Нәјә ҝөрә инсанларын һәјат әнамына һөрмәти галмајыб?

ҺӘЈАТ ӘНАМЫНА ҺӨРМӘТ ҜӨСТӘРМӘК НӘЈӘ ҜӨРӘ ВАҸИБДИР?

Өзүнүн вә ја башгаларынын һәјатына зәрәр вураҹаг бир шеј илә мәшғул олмагла һәјат әнамына дәјәр вермәдијини ҝөстәрирсән.

Сигарет чәкмәк тәкҹә хәрчәнҝә сәбәб олмур, һәмчинин бәдәнин хәрчәнҝлә мүбаризә апармасына да мане олур. Мәлумата әсасән ағ ҹијәр хәрчәнҝиндән өләнләрин тәхминән 90 фаизи ја сигарет чәкибләр, ја да сигарет түстүсүнә һәддән чох мәруз галыблар.
Күтләви атышмалар һәр ил емосионал травмалара сәбәб олур. Станфорд Университетинин бир һесабатында дејилир: «Тәдгигатлар ҝөстәрир ки, һәтта [мәктәбдә баш вермиш атышмалардан] хәсарәтсиз гуртуланлар белә, узун илләр һәјатларында дәрин из бурахан мәнәви јараларла јашамалы олурлар».
Ичкили һалда вә ја наркотикин тәсири алтында машын идарә едән сүрүҹүләр јоллардакы, һәтта сәкиләрдәки инсанларын һәјаты үчүн тәһлүкә јарадырлар. Инсанлар һәјат әнамына етинасыз јанашанда ҝүнаһсыз инсанларын һәјаты үчүн тәһлүкә јарадырлар.

ҺӨРМӘТ ҜӨСТӘРМӘЈӘ СИЗӘ НӘ КӨМӘК ЕДӘ БИЛӘР?

Сағламлығынызы горујун. Зәрәрли вәрдишләри, мәсәлән, сигарети, вејпи, һәддән артыг спиртли ички ичмәји вә әјләнҹә хатиринә наркотик гәбул етмәји тәрҝитмәк һеч вахт ҝеҹ дејил. Бу ҹүр вәрдишләр һәјатыныза зәрәр вурур вә әтрафыныздакы инсанларын, еләҹә дә аилә үзвләринизин һәјатына һөрмәт етмәдијинизи ҝөстәрир.

«Ҹисми вә руһу мурдарлајан һәр шејдән өзүмүзү тәмизләјәк» (2 Коринфлиләрә 7:1).

Өзүнүзүн вә башгаларынын тәһлүкәсизлијини дүшүнүн. Гәзаларын гаршысыны алмаг үчүн евинизи јахшы вәзијјәтдә сахлајын. Автомобилинизи еһтијатла идарә един вә саз вәзијјәтдә сахлајын. Сизи һәјатынызы рискә атаҹаг ишләрә сөвг едән инсанларын тәсиринә ујмајын.

«Ев тикәндә дамына мәһәҹҹәр чәкин ки, кимсә дамдан јыхылмасын вә ганы сизин бојнунузда галмасын»a (Ганунун тәкрары 22:8).

Инсанлара гаршы хејирхаһ олун. Һәјат әнамына һөрмәт етмәк иргиндән, миллијјәтиндән, варлы вә ја касыб, тәһсилли вә ја тәһсилсиз олмасындан асылы олмајараг, һәр кәсә гаршы хејирхаһ олмаг демәкдир. Дүнјадакы зоракылыгларын вә мүһарибәләрин көкүндә әсасән гәрәз вә нифрәт дурур.

«Һәр ҹүр кини, һирси, гәзәби, гышгырығы, тәһгири, һабелә зәрәр ҝәтирән һәр шеји кәнара гојун. Бир-биринизә гаршы хејирхаһ... олун» (Ефеслиләрә 4:31, 32).

ЈЕҺОВАНЫН ШАҺИДЛӘРИ НЕҸӘ ҺӨРМӘТ ҜӨСТӘРИР?

Јеһованын Шаһидләри инсанлара таразлы вә сағлам һәјат тәрзи сүрмәјә көмәк едирләр. Кечдијимиз Мүгәддәс Китаб дәрсләри инсанлара зәрәрли вәрдишләрдән гуртулмаға көмәк едир.

Биз тикинти лајиһәләримиздә тәһлүкәсизлик гајдаларына ҹидди шәкилдә әмәл едирик. Ибадәт евләримизин вә Мүгәддәс Китабын тәдриси илә әлагәли олан диҝәр биналарын тикинтисиндә иштирак едән көнүллүләр хәсарәт алмамаг үчүн тәлим алырлар. Тикдијимиз биналарын јерли тәһлүкәсизлик стандартларына ҹаваб вериб-вермәдији мүнтәзәм олараг јохланылыр.

Зәрәрчәкәнләрә һуманитар јардым ҝөстәририк. Сон 12 ај әрзиндә Јеһованын Шаһидләри бүтүн дүнјада һәјати тәһлүкәләрә јол ачан тәхминән 200 фәлакәт заманы јардым ҝөстәриб вә ианә едилән пуллардан бу јардым ишләринә 12 милјон доллара јахын пул хәрҹләјиб.

Гәрби Африкада (2014) вә Конго Демократик Республикасында (2018) Ебола вирусу күтләви шәкилдә јајылмаға башлајанда Јеһованын Шаһидләри инсанлары маарифләндирдиләр, онлара бу өлүмҹүл хәстәлијин јајылмасынын гаршысыны неҹә ала биләҹәкләрини изаһ етдиләр. Һәмчинин нүмајәндәләрини ҝөндәрдиләр ки, орадакы инсанларла «Итаәткарлыг һәјатлары хилас едир» мөвзусунда сөһбәт етсинләр. Еләҹә дә ибадәт евләринин гаршысында әлјума мәнтәгәләри гурашдырдылар вә хәстәлијин јајылмасынын гаршысыны алмаг үчүн әл јумағын, о ҹүмләдән атылмалы олан диҝәр аддымларын ваҹиблијини вурғуладылар.

Сјерра-Леонедәки бир радиода Јеһованын Шаһидләрини һәм өз диндашларына, һәм дә диҝәр инсанлара Ебола вирусундан горунмаға көмәк етдикләри үчүн тәрифләмишдиләр.

Јеһованын Шаһидләри ибадәт евинә дахил олмаздан әввәл әл јумаг үчүн сырада дурублар. — Либеријада ибадәт евиндә әлјума мәнтәгәси (2014-ҹү илдә Ебола вирусу заманы)

a Гәдимдә Јахын Шәргдә бу һикмәтли әмрә әмәл едән инсанлар аилә үзвләринин вә башгаларынын тәһлүкәсизлијинин гајғысына галырдылар.