Фәсил 5
Иса һарада вә нә вахт доғулур
РОМА императору сезар Август әһалинин сијаһыја алынмасы үчүн фәрман чыхарыр. Бу фәрмана әсасән, һәр кәс өз доғулдуғу јердә олмалыдыр, буна ҝөрә дә Јусиф Бетлеһем шәһәринә ҝетмәли олур.
Сијаһыја алынмаг үчүн Бетлеһемә хејли адам ҝәлиб. Адам о гәдәр чохдур ки, Јусифлә Мәрјәм галмаға јер тапмырлар вә мәҹбур олуб бир төвләдә, мал-гара илә бир јердә галмалы олурлар. Иса һәмин төвләдә доғулур. Мәрјәм көрпәсини бәләјиб бир ахура гојур.
Шүбһәсиз, бу сијаһыјаалынма фәрманыны чыхармағы Сезар Августун үрәјинә гојан Аллаһдыр. Ахы Мүгәддәс Јазыларда габагҹадан хәбәр верилмишди ки, вәд едилмиш һөкмдар Бетлеһемдә анадан олаҹаг. Һәмин фәрманын сајәсиндә Иса Бетлеһемдә доғулур.
Бу, әламәтдар ҝеҹәдир! Јеһова Аллаһын ҹалалы чөлдә, отлагларда олан чобанларын әтрафына ҝур ишыг сачыр! Јеһованын мәләји чобанлара уҹадан дејир: «Горхмајын! Мән сизә бүтүн инсанлары шад едәҹәк хош хәбәри чатдырмаға ҝәлмишәм. Бу ҝүн Давудун шәһәриндә сизин Хиласкарыныз, Ағамыз Мәсиһ доғулуб. Сизә нишан верирәм: ахурда, гундаға бүрүнмүш бир көрпә тапаҹагсыныз». Гәфләтән бу мәләјин јанында сајсыз-һесабсыз мәләкләр пејда олур вә шөвглә охујурлар: «Ҝөјләрдәки Аллаһымыза ешг олсун! Јердә Онун бәјәндији инсанлара сүлһ нәсиб олсун!»
Мәләкләр ҝөјә галхандан сонра чобанлар бир-биринә дејирләр: «Ҝәлин елә бу саат дуруб Бетлеһемә ҝедәк вә Јеһованын бизә билдирдији бу һадисәни ҝөзүмүзлә ҝөрәк». Онлар дәрһал јола дүшүб ҝедирләр вә мәләјин дедији јердә көрпә Исаны тапырлар. Чобанлар мәләјин дедикләрини данышанда ешидәнләр мат-мәәттәл галыр. Мәрјәм исә бүтүн бу сөзләри үрәјиндә сахлајыр.
Бу ҝүн чохлары Исанын декабрын 25-дә анадан олдуғуна инаныр. Анҹаг декабр ајында Бетлеһемдә һава јағмурлу вә сојуг олур. Чобанлар илин бу вахты сүрүләрини ҝеҹә чөлдә, ачыг һавада сахламырлар. Бундан әлавә, Рома сезары да ипә-сапа јатмајан бир халгдан гышын оғлан чағында сијаһыја алынмаг үчүн јола чыхмағы тәләб етмәзди. Белә гәнаәтә ҝәлә биләрик ки, Иса пајызын әввәлләриндә анадан олмушдур. Лука 2:1—20; Микеја 5:2.
▪ Јусифлә Мәрјәм нә үчүн Бетлеһемә ҝетмәли олурлар?
▪ Иса доғулан ҝеҹә һансы мөҹүзәви һадисә баш верир?
▪ Исанын декабрын 25-дә доғулмадығыны һарадан билирик?