Иса пејғәмбәр һарада вә нә вахт доғулуб?

Рома императору Сезар Август әһалинин сијаһыја алынмасы үчүн фәрман чыхарыр. Буна ҝөрә дә Јусифлә Мәрјәм доғулдуглары шәһәрә, Јерусәлимин ҹәнубунда јерләшән Бејтләһм шәһәринә ҝетмәли олур.

Сијаһыја алынмаг үчүн Бејтләһмә хејли адам ҝәлиб. Адам о гәдәр чохдур ки, Јусифлә Мәрјәм галмаға јер тапмыр вә мәҹбур олуб бир төвләдә, мал-гара сахландығы јердә галырлар. Иса һәмин төвләдә доғулур. Мәрјәм көрпәсини бәләјиб ахура — һејванлара јем төкүлән габа гојур.

Чох еһтимал ки, бу фәрманын чыхарылмасында Аллаһын рәһбәрлији вар. Чүнки бунун сајәсиндә Иса Бејтләһмдә, онун әҹдады Давуд падшаһын шәһәриндә анадан олур. Ахы Мүгәддәс Јазыларда јазылмышды ки, вәд едилмиш һөкмдар Бејтләһмдә анадан олаҹаг (Микә 5:2).

Бу, әламәтдар ҝеҹәдир! Јеһова Аллаһын ҹалалы отлагда олан чобанларын әтрафына ҝур ишыг сачыр! Јеһованын бир мәләји чобанлара дејир: «Горхмајын! Мән сизә бүтүн инсанлара бәхтијарлыг бәхш едәҹәк мүждәни чатдырмаға ҝәлмишәм. Бу ҝүн Давудун шәһәриндә сизин үчүн хиласкар, Аға Мәсиһ доғулуб. Сизә нишан верирәм: ахурун ичиндә, бәләкдә бир көрпә тапаҹагсыныз». Гәфләтән бу мәләјин јанында сајсыз-һесабсыз мәләкләр пејда олуб дејирләр: «Ҝөјләрдәки Аллаһымыза алгыш олсун! Јердә Онун бәјәндији инсанлара сүлһ нәсиб олсун!» (Лука 2:10—14).

Мәләкләр гејб оландан сонра чобанлар бир-биринә дејирләр: «Ҝәлин елә бу саат дуруб Бејтләһмә ҝедәк вә Јеһованын бизә билдирдији бу һадисәни ҝөзүмүзлә ҝөрәк» (Лука 2:15). Онлар дәрһал јола дүшүрләр вә мәләјин дедији јерә ҝедиб көрпә Исаны тапырлар. Чобанлар мәләјин дедикләрини данышанда ешидәнләр мат-мәәттәл галыр. Мәрјәм исә бүтүн бу сөзләри үрәјиндә сахлајыр вә онларын мәнасы үзәриндә дүшүнүр.

Бу ҝүн чохлары Исанын декабрын 25-дә анадан олдуғуну дүшүнүр. Анҹаг декабр ајында Бејтләһмдә һава јағмурлу вә сојуг олур. Чох вахт һәтта гар јағыр. Чәтин ки, чобанлар илин бу вахты сүрүләрини ҝеҹә чөлдә, ачыг һавада сахлајардылар. Бундан әлавә, Рома Сезары да она гаршы үсјан галдырмаға мејилли олан халгдан гышын оғлан чағында сијаһыја алынмаг үчүн јола чыхмағы тәләб етмәзди. Белә гәнаәтә ҝәлмәк олар ки, Иса октјабр ајында анадан олмушду.