Фәсил 18
Вәфтизчи Јәһја «кичилир», Иса Мәсиһ «бөјүјүр»
ЕРАМЫЗЫН 30-ҹу илинин Пасха бајрамы баша чатыр, Иса Мәсиһ вә шаҝирдләри Јерусәлимдән чыхырлар. Онлар доғма Галилејаја гајытмыр, бирбаша Јәһудеја бөлҝәсинә јолланырлар. Орада онлар вәфтиз иши илә мәшғул олурлар. Вәфтизчи Јәһја да артыг бир илдир ки, вәфтиз едир вә онун јанында һәлә дә шаҝирдләри вар.
Иса Мәсиһ шәхсән өзү вәфтиз етмир, бу иши онун рәһбәрлији алтында шаҝирдләри ҝөрүрләр. О вахт онларын етдији вәфтиз мәна бахымындан Јәһјанын вәфтизи илә ејни иди. Бу вәфтиз васитәсилә јәһудиләр Аллаһын Ганун әһдинә гаршы төрәтдикләри ҝүнаһлардан төвбә етдикләрини ҝөстәрирләр. Лакин Иса дириләндән сонра шаҝирдләринә маһијјәтҹә фәргләнән вәфтиз иши тапшыраҹагды вә һәмин вәфтиз бу ҝүн дә мөвҹуддур. Бу вәфтиз инсанын өзүнү Јеһова Аллаһа хидмәтә һәср етдијини билдирир.
Инди исә Иса Мәсиһин хидмәтинин биринҹи илидир. О вә Јәһја ајры-ајрылыгда тәлим верир вә төвбә едәнләри вәфтиз едирләр. Јәһјанын шаҝирдләри Исаја һәсәд апарыр вә Јәһјаја шикајәт едирләр: «Мүәллим,.. бах, о вәфтиз едир вә һамы онун јанына ҝедир».
Јәһја исә пахыллыг етмир, әксинә, Исанын уғуруна үрәкдән фәрәһләнир вә истәјир ки, шаҝирдләри дә буна севинсинләр. О, өз шаҝирдләринә хатырладыр: «“Мән Мәсиһ дејиләм, садәҹә онун габағынҹа ҝөндәрилмишәм”, — дедијимә сиз өзүнүз шаһидсиниз». Сонра бир мәсәл чәкир: «Ҝәлин кимә мәхсусдурса, бәј дә одур. Амма бәјин досту бәјин јанында дуранда вә онун сәсини ешидәндә үрәкдән севинир. Мән дә беләҹә үрәкдолусу севинирәм».
«Бәјин досту» олан Јәһја јарым ил бундан габаг шаҝирдләрини Иса Мәсиһә севинә-севинә тәгдим етмишди. Бу шаҝирдләрдән бәзиләри ҝәләҹәкдә Мәсиһин сәмави ҝәлининин, јәни мүгәддәс руһла мәсһ едилмиш мәсиһчиләрдән ибарәт синфин үзвү олдулар. Вәфтизчи Јәһја Мәсиһин уғурлу хидмәти үчүн јол һазырламаг мәгсәдилә ҝәлиб. Бу сәбәбдән о истәјир ки, јанында галмыш шаҝирдләри дә Исанын ардынҹа ҝетсинләр. Јәһја бу мәсәләни белә ајдынлашдырыр: «О бөјүмәли, мән исә кичилмәлијәм».
Мараглыдыр ки, әввәлләр Вәфтизчи Јәһјанын шаҝирди олмуш, сонрадан Иса Мәсиһин давамчысы олан Јәһја Исанын мәншәји вә бәшәријјәтин гуртулушундакы ролу һаггында јазыр: «Ҝөјдән ҝәлән һамыдан бөјүкдүр... Ата Оғулу севир вә һәр шеји она әманәт едиб. Оғула иман едән әбәди һәјата говушаҹаг. Оғула итаәт етмәјәнсә һәјата говушмајаҹаг, о, Аллаһын гәзәбинә дүчар олаҹаг».
Вәфтизчи Јәһја өз хидмәтинин кичиләҹәјини хәбәр верәндән бир аз сонра падшаһ Һирод ону һәбс едир. Һирод өз гардашы Филипин арвады Һиродиадаја евләнмишди. Вәфтизчи Јәһја бу биабырчы иши ачыг-ашкар тәнгид етдији үчүн Һирод ону һәбсханаја салдырыр. Иса Мәсиһ бу хәбәри ешидәндә шаҝирдләри илә бирҝә Јәһудејаны тәрк едиб Галилејаја јолланыр. Јәһја 3:22—4:3; Һәвариләрин ишләри 19:4; Матта 28:19; 2 Коринфлиләрә 11:2; Марк 1:14; 6:17—20.
▪ Исанын дирилмәсиндән әввәл едилән вәфтиз һансы мәнаны дашыјырды? Дириләндән сонракы вәфтиз һансы мәнаны дашыјыр?
▪ Јәһја өз шаҝирдләринә наһаг јерә шикајәт етдикләрини неҹә ҝөстәрир?
▪ Јәһја нәјин үстүндә һәбсханаја салыныр?