Фәсил 38
Вәфтизчи Јәһјаны нараһат едән суал
ВӘФТИЗЧИ ЈӘҺЈА тәхминән бир илдир ки, һәбсханададыр. Шаҝирдләри Наин шәһәриндә дул гадынын оғлунун дирилмәси һадисәсини ҝәлиб она данышырлар. Јәһја һәр шеји Исанын өзүндән ешидиб өјрәнмәк үчүн шаҝирдләриндән икисини онун јанына ҝөндәрир. О сорушур: «Ҝәлишини ҝөзләдијимиз Мәсиһ сәнсән, јохса башгасыны ҝөзләјәк?»
Бу суал бир аз гәрибә ҝөрүнә биләр. Ахы Јәһја ики ил бундан әввәл, Иса вәфтиз оларкән Аллаһын мүгәддәс руһунун Исанын үзәринә гондуғунун вә Аллаһын она Өз рәғбәтини билдирдијинин шаһиди олмушду. Бәзиләри дүшүнә биләр ки, Јәһјанын иманы зәифләјиб. Амма бу белә дејил. Әҝәр белә олсајды, онда Иса һәмин вахт Јәһјаны тәрифләмәзди. Бәс нәјә ҝөрә Јәһја Исаја белә суал верир?
Ола билсин, Јәһја истәјир ки, Иса өзүнүн Мәсиһ олдуғуну шәхсән тәсдиг етсин. Бу, зинданда әзаб чәкән Јәһјаја гүввәт верә биләр. Амма Јәһјанын суалынын архасында јалныз бу мәгсәд дајанмыр. Ҝөрүнүр, Јәһја Мәсиһин һәјата кечирәҹәји бүтүн пејғәмбәрликләри тамамламаг үчүн Исадан сонра да киминсә, јәни онун хәләфинин ҝәлиб-ҝәлмәјәҹәјини билмәк истәјир.
Јәһјанын јахшы билдији Мүгәддәс Јазылардакы пејғәмбәрликләрә әсасән, Аллаһын мәсһ едилмиши падшаһ, хиласкар олмалы иди. Исанын вәфтиз олдуғу вахтдан хејли өтүб, Јәһја исә һәлә дә һәбсханададыр. Буна ҝөрә дә демәк олар ки, Јәһјанын суалынын мәғзи бу иди: «Аллаһын гүдрәтли Падшаһлығыны гураҹаг шәхс сәнсән, јохса Мәсиһлә бағлы пејғәмбәрликләри һәјата кечирәҹәк башга бирини ҝөзләјәк?»
Иса Јәһјанын шаҝирдләринә: «Әлбәттә, ҝөзләдијиниз Мәсиһ мәнәм», — демир, о, онларын ҝөзү гаршысында адамлары ҹүрбәҹүр хәстәликләрдән сағалдараг мөҹүзәләр ҝөстәрир. Сонра онлара дејир: «Ҝедин, ешитдикләринизи вә ҝөрдүкләринизи Јәһјаја чатдырын. Корларын ҝөзләри ачылыр, ахсаглар дүз ҝәзир, ҹүзамлылар тәмизләнир, карлар ешидир, өлүләр дирилир, јохсуллара хош хәбәр бәјан едилир».
Башга сөзлә десәк, Јәһја үмид едир ки, Иса етдикләриндән даһа чох ишләр ҝөрәҹәк вә јәгин, ону да зиндандан азад едәҹәк. Амма Иса билдирир ки, Јәһја бунлардан артыг мөҹүзә ҝөзләмәмәлидир.
Јәһјанын шаҝирдләри ҝедәндән сонра Иса ҹамаата дејир ки, Јәһја Малаки пејғәмбәрин хәбәр вердији Јеһованын «елчиси» вә «Илјас пејғәмбәрдир» (Малаки 3:1; 4:5, 6). Беләҹә, Иса Јәһјаны уҹалдыр вә ону кечмишдә јашамыш пејғәмбәрләрлә бир ҹәрҝәјә гојур. Иса дејир: «Инанын ки, бәшәр өвладлары арасында Вәфтизчи Јәһјадан бөјүјү олмајыб, амма сәмави падшаһлыгда ән кичији ондан бөјүкдүр. Вәфтизчи Јәһјанын ҝүнләриндән бу јана инсанлар сәмави падшаһлыға ҹан атырлар».
«Падшаһлыгда ән кичији ондан бөјүкдүр» демәклә Иса ҝөстәрир ки, Јәһја Падшаһлыға ҝирмәјәҹәк. Һәрчәнд Јәһја Иса үчүн јол һазырламышды, амма о, Мәсиһин өз һәвариләри илә падшаһлыг һаггында бағладығы әһддән габаг өлүр. Бу әһдә ҝөрә, һәвариләр Иса илә бирликдә сәмави Падшаһлыгда отурмалыдырлар. Буна ҝөрә Иса дејир ки, Јәһја сәмави Падшаһлыға ҝирмәјәҹәк. Јәһја јер үзүндә јашајаҹаг вә Аллаһын Падшаһлығынын тәбәәси олаҹаг. Лука 7:18—30; Матта 11:2—15.
▪ Нәјә ҝөрә Јәһја Исаја «ҝәлишини ҝөзләдијимиз Мәсиһ сәнсән, јохса башгасыны ҝөзләјәк» суалыны верир?
▪ Исанын сөзләринә ҝөрә, Јәһја һансы пејғәмбәрликләри иҹра етди?
▪ Нәјә ҝөрә Вәфтизчи Јәһја сәмави Падшаһлыгда олмајаҹаг?