Фәсил 28

Оруҹла бағлы суал

ЕРАМЫЗЫН 30-ҹу илиндәки Пасха бајрамындан тәхминән бир ил кечиб. Вәфтизчи Јәһја артыг бир нечә ајдыр ки, һәбсханададыр. О истәјирди ки, онун шаҝирдләри Исанын ардынҹа ҝетсинләр, амма онларын һамысы буну етмәјиб.

Јәһја илә галмыш шаҝирдләрдән бир нечәси Исанын јанына ҝәлиб сорушурлар: «Нә үчүн биз дә, фәрисејләр дә оруҹ тутуруг, амма сәнин шаҝирдләрин тутмур?» Фәрисејләр дини адәтләринә ҝөрә һәфтәдә ики дәфә оруҹ тутурлар. Ҝөрүнүр, Јәһјанын шаҝирдләриндә дә белә адәт вар. Бәлкә дә онлар мүәллимләринин һәбсдә олмасындан һүзнлү олдугларына ҝөрә оруҹ тутурлар. Бу сәбәбдән тәәҹҹүбләнирләр ки, Исанын шаҝирдләри онларын дәрдинә шәрик олмурлар.

Иса изаһ едир: «Һеч тәзәбәј достлары илә оланда достлар јас тутарлар? Лакин ҝүн ҝәләҹәк, бәји араларындан ҝөтүрәҹәкләр, бах онда онлар оруҹ тутаҹаглар».

Јәгин, Јәһјанын шаҝирдләринин јадында галыб ки, о, Исаны «Тәзәбәј» адландырмышды. Демәли, һәлә ки «Тәзәбәј» бурададыр, «достлары», јәни Јәһја вә Исанын шаҝирдләри оруҹ тутмағы мүнасиб сајмырлар. Бир мүддәт сонра, Иса өләндә шаҝирдләри һүзн сахлајыб оруҹ тутурлар. Даһа сонра о дирилиб ҝөјә галхдыгда артыг кәдәрләниб оруҹ тутмаға еһтијаҹ галмыр.

Сонра Иса онлара ики мисал чәкир: «Һеч кәс көһнә палтара тәзә парчадан јамаг тикмәз, чүнки тәзә јамаг јығыланда палтар ҹырылар вә јыртылмыш јер даһа да корланар. Һәмчинин тәзә шәрабы көһнә тулуглара төкмәзләр, јохса тулуг јыртылар, шәраб да дағылар вә тулуг јарарсыз һала дүшәр. Тәзә шәрабы тәзә тулуглара төкәрләр». Бәс бу мисалларын оруҹ тутмагла нә әлагәси вар?

Иса истәјир ки, Вәфтизчи Јәһјанын шаҝирдләри бир шеји баша дүшсүнләр: һеч ким онун давамчыларындан јәһудиләрин көһнә адәтләринә риајәт етмәји, о ҹүмләдән оруҹ тутмағы ҝөзләмәмәлидир. Иса јер үзүнә артыг көһнәлмиш вә тезликлә ләғв едиләҹәк дин системини «јамајыб», онун өмрүнү узатмаг үчүн ҝәлмәјиб. Мәсиһчилик инсан әнәнәләри илә корланмыш јәһуди дининин гәлибинә салынмајаҹаг. Бәли, мәсиһчилик «көһнә палтара вурулмуш тәзә јамаг», јахуд «көһнә тулуглара төкүлмүш тәзә шәраб» олмајаҹаг. Матта 9:14—17; Марк 2:18—22; Лука 5:33—39; Јәһја 3:27—29.

▪ Кимләр оруҹ тутур вә нә үчүн?

▪ Иса шаҝирдләри илә олдуғу заман нәјә ҝөрә онлар оруҹ тутмурлар? Нә үчүн бир аздан оруҹ тутмаға еһтијаҹ олмајаҹаг?

▪ Иса һансы ики мисалы чәкир вә онлар нә мәна кәсб едир?