Фәсил 69
Әслиндә ким кимин өвладыдыр
БАЈРАМ әрзиндә Иса Мәсиһин јәһуди рәһбәрләри илә сөһбәти ҝетдикҹә ҝәрҝинләшир. Иса дејир: «Мән билирәм ки, сиз Ибраһимин өвладларысыныз. Анҹаг сиз мәни өлдүрмәк истәјирсиниз, чүнки мәним сөзләрим сизә кар етмир. Мән Атамын јанында оларкән ҝөрдүкләрими сизә данышырам, сиз исә өз атаныздан ешитдикләринизи едирсиниз».
Иса онларын атасынын ким олдуғуну ачыгламыр, лакин ајдын ҝөстәрир ки, өзүнүн вә онларын атасы ајрыдыр. Јәһуди рәһбәрләри Исанын кими нәзәрдә тутдуғуну анламајыб дејирләр: «Бизим атамыз Ибраһимдир». Бу адамлар әминдирләр ки, онларда Аллаһын досту олан Ибраһимин иманы вар.
Лакин Исанын ҹавабы онлары сарсыдыр: «Әҝәр сиз Ибраһимин өвладларысынызса, Ибраһимин ҝөрдүјү ишләри ҝөрүн». Доғрудан да, әсил оғул атасына бәнзәр. Иса дејир: «Сиз исә инди мәни, Аллаһдан ешитдији һәгигәти сизә сөјләјән адамы өлдүрмәк истәјирсиниз. Ибраһим белә иш ҝөрмәмишди». Иса јенә дејир: «Сиз атанызын төкдүјүнү јығырсыныз».
Онлар һәлә дә Исанын кимдән данышдығыны анламырлар вә исрар едирләр ки, Ибраһимин һәгиги өвладларыдырлар: «Биз биҹ доғулмамышыг». Беләҹә, онлар Ибраһим кими һәгиги мөмин олдугларыны сөјләјәрәк иддиа едирләр: «Бизим бир Атамыз вар, о да Аллаһдыр».
Бәс, доғрудан да, онларын атасы Аллаһдыр? «Сизин Атаныз Аллаһ олсајды, — дејә Иса ҹаваб верир, — сиз мәни севәрдиниз, чүнки мән Аллаһдан ҝәлмишәм вә инди бурадајам. Мән өзүмдән ҝәлмәмишәм, мәни О ҝөндәриб. Нә үчүн мәним дедикләрими баша дүшмүрсүнүз?»
Иса бу дин рәһбәрләринә, ону рәдд етмәләринин нәтиҹәсини ҝөстәрмәк истәмишди. Инди исә онлара бирбаша дејир: «Сизин атаныз Иблисдир вә сиз атанызын арзуларыны һәјата кечирмәк истәјирсиниз». Иблис неҹә атадыр? Иса дејир ки, Иблис гатилдир, «јаланчыдыр вә јаланын атасыдыр». Сонра бу фикри белә јекунлашдырыр: «Аллаһын бәндәси Аллаһын сөзүнә гулаг асыр. Сиз исә Аллаһ бәндәси олмадығыныз үчүн мәнә гулаг асмырсыныз».
Јәһудиләр Исанын онлары иттиһам етмәсиндән гәзәбләнәрәк дејирләр: «Дүз дејирик дә! Сән самаријалысан, өзү дә ичиндә ҹин отуруб». Јәһудиләрин самаријалылардан зәһләси ҝедир вә «самаријалы» ифадәсини кимисә алчалтмаг, ҝөздән салмаг үчүн ишләдирләр.
Иса «самаријалы» сөзүнә мәһәл гојмур вә белә ҹаваб верир: «Мәндә ҹин јохдур. Мән Атама еһтирам бәсләјирәм. Сиз исә мәнә һөрмәт гојмурсунуз». Сонра һејрәтләндириҹи бир бәјанат верир: «Мәним сөзүмә әмәл едән адам үчүн өлүм јохдур». Бу о демәк дејил ки, Исанын давамчылары һеч вахт өлмәјәҹәк. Иса демәк истәјир ки, онлар «икинҹи өлүмә» («икинҹи өлүмдән» дирилмә јохдур), јәни әбәди мәһвә дүчар олмајаҹаглар.
Амма јәһудиләр Исанын сөзләрини һәрфи мәнада гәбул едирләр вә дејирләр: «Доғрудан да, сәһв етмәмишик. Сәндә ҹин вар. Ибраһим дә, пејғәмбәрләр дә өлүбләр, сән исә дејирсән ки: “Мәним сөзүмә әмәл едән адам һеч вахт өлмәјәҹәк”. Мәҝәр сән вәфат етмиш атамыз Ибраһимдән бөјүксән? Пејғәмбәрләр дә өлүбләр. Сән өзүнү ким һесаб едирсән?»
Бүтүн бу сөһбәт боју Иса өзүнүн вәд едилмиш Мәсиһ олдуғуну бу адамлара ҝөстәрир. Лакин онларын: «Өзүнү ким һесаб едирсән?» — суалына бирбаша ҹаваб вермир. О дејир: «Әҝәр мән өзүмә шан-шөһрәт ахтарырамса, мәним шөһрәтим һеч нәдир. Мәни шөһрәтләндирән Атамдыр. Сиз Ону өз Аллаһыныз санырсыныз, амма Ону гәтијјән танымырсыныз. Мән исә Ону таныјырам. Әҝәр мән десәјдим ки, Ону танымырам, сизин кими јаланчы олардым».
Иса јенидән садиг Ибраһим пејғәмбәрин нүмунәсинә гајыдыр: «Атаныз Ибраһим мәним ҝүнүмү ҝөрмәк үмиди илә јашајараг севинирди. О, мәним ҝүнүмү ҝөрдү вә шадланды». Бәли, Ибраһим пејғәмбәр иман ҝөзү илә ирәли бахыр вә вәд едилмиш Мәсиһин ҝәлишини сәбирсизликлә ҝөзләјирди. Јәһудиләр өз имансызлыгларыны бүрузә верәрәк дејирләр: «Сәнин һеч әлли јашын да јохдур, сән Ибраһими ҝөрмүсән?!»
«Билин вә аҝаһ олун, Ибраһим доғулмаздан әввәл мән вар идим», — Иса онлара дејир. Әлбәттә, Иса өзүнүн инсан олмаздан өнҹә ҝөјдә гүдрәтли бир руһани варлыг олдуғуну вурғулајыр.
Исанын Ибраһимдән өнҹә мөвҹуд олмасы бәјанаты јәһудиләри бәрк гәзәбләндирир вә ону дашламаг истәјирләр. Лакин Иса ҝизләнир вә һеч бир хәсарәт алмадан мәбәддән чыхыр. Јәһја 8:37—59; Вәһј 3:14; 21:8.
▪ Иса өзүнүн вә дүшмәнләринин атасынын ајры олдуғуну неҹә ҝөстәрир?
▪ Јәһудиләр Исаны нә үчүн «самаријалы» адландырырлар?
▪ Исанын давамчылары үчүн һансы мәнада «өлүм јохдур»?