Һиссә 2
Изтираблардан азад олунмуш бир дүнја
1, 2. Бир чох инсанлар һансы фәргли нөгтеји-нәзәрә саһибдирләр?
БУНУНЛА белә, бүтүн дүнјада милјонларла инсанлар тамамилә фәргли нөгтеји-нәзәрә саһибдирләр. Онлар бәшәријјәт үчүн гаршыда ҝөзәл бир ҝәләҹәк ҝөрүрләр. Тезликлә бурада, јә’ни јер үзүндә пислик вә изтираблардан тамамилә азад олунмуш бир дүнјанын олаҹағыны сөјләјирләр. Онлар бүтүн писликләрин тезликлә арадан галдырылаҹағына вә тамамилә јени бир дүнјанын гурулаҹағына әминдирләр. Онлар, һәтта бу јени дүнјанын тәмәлинин артыг индидән гојулдуғуну сөјләјирләр!
2 Бу инсанлар инанырлар ки, јени дүнја мүһарибәләрдән, гәддарлыгдан, ҹинајәткарлыгдан, һагсызлыг вә јохсуллугдан азад олаҹагдыр. Бу, хәстәликләрин, ағрыларын, ҝөз јашларынын, һәтта өлүмүн дә олмајаҹағы бир дүнја олаҹаг. О заман инсанлар камил олаҹаг вә јер үзүндәки Ҹәннәтдә хошбәхтлик ичиндә әбәди јашајаҹаглар. Һәтта өләнләр дә дирилдиләҹәк вә әбәди јашамаг имканына малик олаҹаглар!
3, 4. Бу инсанлар өз нөгтеји-нәзәрләринин доғрулуғуна нәјә ҝөрә әминдирләр?
3 Ҝәләҹәјә даир бу нөгтеји-нәзәр ҝөрәсән садәҹә бир арзудур, јохса хәјал? Гәтијјән јох. Бу нөгтеји-нәзәр, Ҹәннәтин мүтләг олаҹағына даир мөһкәм тәмәли олан имана әсасланыр (Ибраниләрә 11:1). Онлар нә үчүн белә әминдирләр? Чүнки буну, каинатын һәр шејә гадир олан Јараданы вә’д етмишдир.
4 Мүгәддәс Китаб Аллаһын вә’дләри һаггында дејир: “Аллаһыныз Рәббин һаггынызда сөјләдији бүтүн јахшы шејләрдән һеч бир шеј боша чыхмады; сизин үчүн һамысы олду, ондан һеч бир шеј боша чыхмады”. “Аллаһ инсан дејил ки, јалан сөјләсин... О сөјләр вә ону етмәзми? Јахуд сөз верәр вә иҹра етмәзми?” “Ордуларын Рәбби анд ичиб деди: Ҝерчәк, неҹә дүшүндүмсә елә дә олаҹаг; вә неҹә гәрарлашдырдымса елә дураҹаг” (Јешу 23:14; Сајлар 23:19; Ишаја 14:24).
5. Һансы суаллар ҹаваб тәләб едир?
5 Лакин, әҝәр Аллаһын нијјәти јер үзүндә изтираблардан азад бир Ҹәннәт јаратмаг идисә, бәс нә үчүн О, бу гәдәр писликләрин олмасына әввәлҹәдән јол верирди? Пислији инди арадан галдырмаг үчүн Аллаһ нәјә ҝөрә алты мин ил ҝөзләјирди? Изтираблар ичиндә кечән бу әсрләр, Аллаһын һәгигәтән дә бизим гејдимизә галмадығыны вә ја Онун мөвҹуд олмадығынымы ҝөстәрир?