Әзабларын бизә фајдасы вар
«Биз тәһәммүл едәнләри бәхтијар һесаб едирик» (ЈАГУБ 5:11).
1, 2. Нә ҝөстәрир ки, Јеһова инсанларын әзаб-әзијјәт чәкмәсини истәмирди?
ҺЕЧ ким әзаб чәкмәк истәмир. Јараданымыз Јеһова Аллаһ да инсанларын әзаб чәкмәсини истәмир. Бу бизә Аллаһын илһамланмыш Кәламыны вә киши илә гадынын јаранмасындан сонра нә баш вердијини арашдыраркән ајдын олур. Әввәлҹә Аллаһ кишини јаратды. «Рәбб Аллаһ јерин торпағындан инсаны дүзәлтди вә онун бурнуна һәјат нәфәси үфүрдү. Беләҹә инсан ҹанлы бир варлыг олду» (Јарадылыш 2:7). Адәм физики вә әгли ҹәһәтдән камил иди, о нә хәстәләнәҹәк, нә дә өләҹәкди.
2 Адәм һансы шәраитдә јашајырды? «Аллаһ шәргдә јерләшән Едендә бир бағ салды вә дүзәлтдији инсаны орада јерләшдирди. Рәбб Аллаһ торпагда ҝөзәл ҝөрүнүшлү вә јемәк үчүн ширин мејвәли ҹүрбәҹүр ағаҹлар јетирди» (Јарадылыш 2:8, 9). Бәли, Адәмин ҝөзәл еви варды. Едендә һеч бир әзаб-әзијјәт јох иди.
3. Илк инсан ҹүтүнү һансы ҝәләҹәк ҝөзләјирди?
3 Јарадылыш 2:18 ајәсиндә белә бир мә’лумат вар: «Рәбб Аллаһ јенә деди: “Инсанын тәк олмасы јахшы дејил, Мән она мүнасиб олан бир көмәкчи јарадаҹағам”». Јеһова Адәм үчүн камил гадын јарадараг, хошбәхт аилә һәјатынын әсасыны гојду (Јарадылыш 2:21-23). Мүгәддәс Китабда даһа сонра дејилир: «Аллаһ онлара хејир-дуа верәрәк деди: “Төрәјиб чохалын вә јер үзүнү бүрүјүб она саһиб олун”» (Јарадылыш 1:28). Илк инсан ҹүтүнүн бүтүн јер үзү ҹәннәт олана гәдәр Еден бағынын һүдудларыны ҝенишләндирмәк имканы варды, онлардан төрәјән нәсил исә әзаб-әзијјәтсиз, хошбәхт һәјат сүрәҹәкди. Неҹә дә ҝөзәл башланғыҹ иди! (Јарадылыш 1:31).
Әзабларын башланғыҹы
4. Тарихә нәзәр саланда бәшәријјәтә даир нә ајдын олур?
4 Анҹаг тарихин сәһифәләриндән бәшәр аиләсинин вәзијјәтинә нәзәр саланда ајдын олур ки, нә исә дәһшәтли бир шеј баш вермишдир. Писликләр баш алыб ҝедир, бәшәријјәт ағыр әзабларла үзләшир. Әсрләр бојунҹа Адәмлә Һәвванын бүтүн өвладлары хәстәләнир, гоҹалыр вә сонда өлүрләр. Бу ҝүн јер үзү һеч дә хошбәхт инсанларын јашадығы ҹәннәтә бәнзәмир. Бу вәзијјәт Ромалылара 8:22 ајәсиндә дәгигликлә тәсвир олунуб: «Бүтүн хилгәт индијә кими бирликдә фәрјад едиб доғум ағрысы чәкир».
5. Әзаб-әзијјәтин бәшәријјәтә дахил олмасында илк валидејнләримизин һансы ролу олуб?
5 Јеһова узун мүддәт сүрән чохсајлы әзаблара ҝөрә мәс’улијјәт дашымыр (2 Шамуел 22:31). Ҝүнаһын јарысы инсанларын үстүнә дүшүр. ‘Инсанлар позулмуш, әмәлләри ијрәнҹ олмушдур’ (Мәзмур 14:1). Башланғыҹда валидејнләримизә ән јахшы шејләр верилмишди. Бундан сонра да һәр шејин белә давам етмәси үчүн тәкҹә Аллаһа итаәт етмәк ҝәрәк иди, лакин Адәмлә Һәвва сәрбәст јашамағы сечди. Илк валидејнләримиз Јеһовадан үз дөндәрдикләри үчүн, камиллији итирдиләр. Онларын сәһһәти ҝет-ҝедә писләшди, ахырда да өлдүләр. Гејри-камиллији биз дә мирас алдыг (Јарадылыш 3:17-19; Ромалылара 5:12).
6. Әзаб-әзијјәтләрин мөвҹуд олмасында Шејтанын һансы ролу олмушдур?
6 Әзаб-әзијјәтин бәшәр аиләсинә дахил олмасында сонралар Шејтан Иблис адландырылан руһани варлығын да әли олмушдур. Она ирадә азадлығы верилмишди. Лакин о бу ән’амдан суи-истифадә едәрәк ибадәти әлдә етмәјә ҹан атды. Анҹаг ибадәт олунмаға Јеһованын јаратдыглары дејил, јалныз Онун Өзү лајигдир. Адәмлә Һәвваны сәрбәстлик ахтармаға тәһрик едән Шејтан олду, ҝуја бунунла онлар ‘хејирлә шәри биләрәк Аллаһ кими олаҹагдылар’ (Јарадылыш 3:5).
Јалныз Јеһованын идарә етмәк һүгугу вар
7. Јеһоваја гаршы үсјанын нәтиҹәләри нәји ҝөстәрир?
7 Үсјанын пис нәтиҹәләри ҝөстәрир ки, јалныз Каинатын Һөкмдары Јеһованын идарә етмәк һүгугу вар вә тәкҹә Онун һөкмранлығы әдаләтлидир. Өтән минилликләр ҝөстәрир ки, «бу дүнјанын рәиси» Шејтан тамамилә јарарсыз олан пис, әдаләтсиз вә гәддар һакимијјәт гурмушдур (Јәһја 12:31). Артыг узун мүддәтдир ки, Шејтанын рәһбәрлији алтында мөвҹуд олан аҹиз инсан һакимијјәти әдаләтлә идарә етмәјә габил олмадығыны нүмајиш етдирир (Јеремја 10:23). Беләликлә, Јеһовадан асылы олмајан истәнилән һакимијјәт формасы мүвәффәгијјәтсизлијә мәһкумдур. Тарих буну ачыг-ајдын сүбута јетириб.
8. Јеһованын инсан һакимијјәтләринә даир нијјәти нәдир вә О буну неҹә һәјата кечирәҹәк?
8 Минилликләр әрзиндә инсанларын сәрбәст сурәтдә өз идарәетмә формаларыны сынагдан кечирмәләринә иҹазә вердикдән сонра, инди Јеһованын онларын һамысыны јер үзүндән силиб Өз һакимијјәтини гурмаға там һаггы вар. Пејғәмбәрликдә бу һагда дејилир: «О падшаһларын [инсан һакимијјәтләринин] дөврүндә ҝөјләрин Аллаһы һеч вахт дағылмајан бир падшаһлыг [Мәсиһин идарә етдији сәмави һөкумәтини] гураҹаг... О бүтүн әввәлки падшаһлыглары әзиб-дағыдаҹаг, өзү исә әбәди галаҹаг» (Даниел 2:44). Ҹинләрин вә инсанларын һакимијјәтинә сон гојулаҹаг, јалныз Аллаһын сәмави Падшаһлығы мөвҹуд олаҹаг вә јер үзүнү идарә едәҹәк. Мәсиһ Падшаһ олаҹаг вә јер үзүндән сечилмиш 144 000 садиг инсан онунла бирликдә идарә едәҹәк (Вәһј 14:1).
Әзабларын фајдасы
9, 10. Әзабларын Исаја һансы фајдасы олду?
9 Сәмави Падшаһлыгда идарә едәҹәк инсанларын һансы кејфијјәтләрә малик олдугларыны нәзәрдән кечирмәк мараглы олаҹаг. Биринҹиси, Иса Мәсиһ Падшаһ вәзифәсинә нә дәрәҹәдә мүнасиб олдуғуну ҝөстәрмишди. О, сајсыз-һесабсыз илләр әрзиндә Јеһованын јанында јашамыш вә Атасынын ‘ме’мары’ олараг Онун ирадәсини јеринә јетирмишдир (Сүлејманын мәсәлләри 8:22-31). Јеһова Исаны јерә ҝөндәрмәк истәјәндә, о, һәвәслә разылашды. Јер үзүндә Јеһованын һөкмранлығы вә Падшаһлығы һагда тәблиғ етмәклә мәшғул иди. Иса Јеһованын һакимијјәтинә тамамилә итаәткар олмагла һамымыз үчүн ҝөзәл нүмунә гојуб (Матта 4:17; 6:9).
10 Иса тә’гибләрә мә’руз галды вә сонда е’дам олунду. Анҹаг хидмәти заманы о, инсанларын аҹынаҹаглы вәзијјәтини ҝөрүрдү. Бүтүн бунлары ҝөрмәјин вә өзүнүн әзаб чәкмәсинин она фајдасы олдуму? Бәли. Ибраниләрә 5:8 ајәсиндә дејилир ки, Иса Аллаһын ‘Оғлу олдуғу һалда, чәкдији изтирабларла итаәтли олмағы өјрәнди’. Јер үзүндә газандығы тәҹрүбә сајәсиндә Иса даһа мәрһәмәтли олду вә башгаларыны даһа јахшы баша дүшмәјә башлады. О, инсанларын нә вәзијјәтдә јашадығыны өз үзәриндә һисс етди, әзаб чәкәнләрин һалына аҹымағы өјрәнди вә онларын хиласында өз ролуну даһа јахшы баша дүшдү. Ҝөрүн һәвари Павел буну ибраниләрә мәктубунда неҹә вурғулајыр: «О, һәр ҹәһәтҹә гардашларына бәнзәмәли иди ки, халгын ҝүнаһларынын бағышланмасыны тә’мин едән гурбан ҝәтирмәк үчүн Аллаһа хидмәтиндә мәрһәмәтли вә садиг Баш Каһин олсун. Чүнки Өзү имтаһан олунуб әләм чәкдији үчүн, имтаһан олунанлара јардым едә биләр». «Биз елә бир баш каһинә малик дејилик ки, зәифликләримиздә бизә аҹыја билмәсин; әксинә, бизим кими имтаһан едилмиш, ҝүнаһдан хариҹ, һәр шејдә бизә бәнзәјән бир Баш Каһинә маликик. Беләликлә, лүтфкар Аллаһын тахтына ҹәсарәтлә јахынлашаг ки, вахтында јардыма малик олмаг үчүн мәрһәмәт алыб, лүтф тапаг» (Ибраниләрә 2:17, 18; 4:14-16; Матта 9:36; 11:28-30).
11. Ҝәләҹәк падшаһ вә каһинләрин јер үзүндә газандыглары тәҹрүбә онлара һансы фајданы ҝәтирәҹәк?
11 Бүтүн бунлары сәмави Падшаһлыгда Иса Мәсиһин һакимијјәт шәрикләри олмаг үчүн јер үзүндән ‘сатын алынмыш’ 144 000 нәфәр һаггында да демәк олар (Вәһј 14:4). Онларын һамысы јер үзүндә доғулмуш, әзаблы дүнјада јашамыш вә әзаб-әзијјәт чәкмишләр. Чохлары тә’гибләрә мә’руз галмыш, һәтта бә’зиләри Јеһованын гаршысында нөгсансызлығы горудуглары вә Исанын ардынҹа ҝетмәк истәдикләри үчүн өлдүрүлмүшләр. Анҹаг онлар ‘нә Рәббә шәһадәт етмәкдән, нә дә Мүждә уғрунда әзијјәтә таб ҝәтирмәкдән утанмајыблар’ (2 Тимотејә 1:8). Јер үзүндә газандыглары тәҹрүбә онлары ҝөјдән бәшәријјәти мүһакимә етмәјә һазырлады. Онлар даһа мәрһәмәтли, хејирхаһ олмағы өјрәндиләр вә инсанлара көмәк етмәк истәјирләр (Вәһј 5:10; 14:2-5; 20:6).
Јерүзү үмиди оланларын хошбәхтлији
12, 13. Јер үзүндә јашамаг үмиди оланлара әзабларын һансы фајдасы вар?
12 Хәстәлијин, кәдәрин вә өлүмүн олмајаҹағы ҹәннәтдә әбәди јашамаг үмиди оланлара әзабларын бир хејри вармы? Әлбәттә, әзабларын ҝәтирдији ағры-аҹы һеч кимә хош дејил. Анҹаг белә әзаблара таб ҝәтирәндә биз өзүмүздә јахшы кејфијјәтләр инкишаф етдирир вә бунун сајәсиндә хошбәхтлик әлдә едирик.
13 Ҝәлин Аллаһын илһамланмыш Кәламынын бу һагда дедикләринә нәзәр салаг: «Әҝәр салеһлик уғрунда әзијјәт чәксәниз белә, сиз бәхтијарсыныз». «Мәсиһин адындан өтрү тәһгир едилирсинизсә, бәхтијарсыныз» (1 Петер 3:14; 4:14). «Мәнә ҝөрә инсанлар сизи тәһгир вә тә’гиб едәҹәкләри, јалан сөјләјиб сизә һәр ҹүр бөһтан атаҹаглары заман сиз нә бәхтијарсыныз! Севинин вә шадланын! Чүнки ҝөјләрдә мүкафатыныз бөјүкдүр» (Матта 5:11, 12). «Имтаһана дөзән адам хошбәхтдир. Чүнки сынагдан уғурла чыхаркән... һәјат таҹыны алаҹагдыр» (Јагуб 1:12).
14. Әзаблар Јеһованын хидмәтчиләринә һансы мә’нада хошбәхтлик ҝәтирир?
14 Әлбәттә, бу о демәк дејил ки, бизи хошбәхт едән әзаб-әзијјәтләрдир. Хошбәхтлик вә мәмнунлуг ҝәтирән Јеһованын ирадәсини јеринә јетирдијимизи вә Исанын нүмунәсини изләдијимизи билмәјимиздир. Мәсәлән, биринҹи әсрдә һәвариләрдән бә’зиләри Иса Мәсиһ һаггында тәблиғ етдикләри үчүн һәбс олундулар, сонра Јәһуди али мәһкәмәсинә ҝәтирилдиләр вә мүһакимә едилдиләр. Онлары дөјүб бурахдылар. Һәвариләр буна неҹә мүнасибәт ҝөстәрдиләр? Мүгәддәс Китаб дејир ки, онлар «Синедрионун һүзурундан севинәрәк чыхдылар. Чүнки Рәбб Исанын ады үчүн тәһгир едилмәјә лајиг ҝөрүлмүшдүләр» (Һәвариләрин ишләри 5:17-41). Онлар дөјүлдүкләри вә ағры-аҹы чәкдикләри үчүн дејил, бүтүн бунларын Јеһова гаршысында нөгсансызлыгларыны горудуглары вә Исанын изләри илә ҝетдикләри үчүн баш вердијини анладыгларындан хошбәхт идиләр (Һәвариләрин ишләри 16:25; 2 Коринфлиләрә 12:10; 1 Петер 4:13).
15. Инди сынаглара дөзмәјимиз ҝәләҹәкдә бизә неҹә фајда ҝәтирәҹәк?
15 Мүгавимәт вә тә’гибләрә дүзҝүн јанашмағымыз биздә тәһәммүл тәрбијә едәҹәк вә бизи ҝәләҹәк әзаблара һазырлајаҹаг. Мүгәддәс Китабдан охујуруг: «Еј гардашларым, мүхтәлиф имтаһанлара дүшәндә, буну бөјүк бир севинҹлә гәбул един. Билин ки, иманынызын сынанмасы тәһәммүл һасил едир» (Јагуб 1:2, 3). Буна бәнзәр тәрздә Ромалылара 5:3-5 ајәләриндә дејилир: «Сыхынтыдан дөзүмлүлүк, дөзүмлүлүкдән тәҹрүбә вә тәҹрүбәдән үмид һасил олдуғуну биләрәк, сыхынтыларла да өјүнүрүк. Вә үмид утандырмаз». Беләликлә, мәсиһчи олдуғумуза ҝөрә инди нә гәдәр чох сынаглара таб ҝәтиририксә, ҝәләҹәк сынаглара таб ҝәтирмәк үчүн бир о гәдәр јахшы һазырланмыш олаҹағыг.
Јеһова мүкафатландыраҹаг
16. Јеһова ҝәләҹәк падшаһ вә каһинләри чәкдикләри әзабларын әвәзиндә неҹә мүкафатландыраҹаг?
16 Мәсиһчи олдуғумуза ҝөрә мүгавимәт вә тә’гибләр үзүндән һәтта мал-мүлкүмүзү итирсәк дә, Јеһованын бизи там мүкафатландыраҹағыны биләрәк, севинҹимизи итирмәјәҹәјик. Мәсәлән, ҝөјләр үмиди оланлардан бә’зиләринә һәвари Павел јазмышдыр: «Сиз... өзүнүз үчүн даһа јахшы вә даими малыныз [Аллаһын Падшаһлығында идарә етмәк] олдуғуну биләрәк, мүлкүнүзүн талан едилмәсини севинҹлә гәбул етдиниз» (Ибраниләрә 10:34). Јени дүнјада Јеһованын вә Мәсиһин рәһбәрлији алтында јерин сакинләри үзәринә мөһтәшәм хејир-дуалар јағдырылан заман онларын севинҹини тәсәввүр един. Һәвари Павелин садиг мәсиһчиләрә дедији сөзләрдә неҹә дә бөјүк һәгигәт вар: «Белә дүшүнүрәм ки, индики мүвәггәти изтираблар бизә изһар едиләҹәк иззәтлә һеч мүгајисәјә дәјмәз» (Ромалылара 8:18).
17. Јеһова јер үзүндә јашамаг үмидинә малик олан садиг хидмәтчиләри үчүн нә едәҹәк?
17 Ејнилә, јер үзүндә јашамаг үмидинә малик оланлар Јеһоваја хидмәт етмәк наминә нәјисә итирмәли вә ја гурбан вермәли олсалар да, ҝәләҹәкдә мүкафатларыны артыгламасыјла алаҹаглар. Јеһова онлара јерүзү ҹәннәтдә камиллик, сонсуз һәјат верәҹәк. Аллаһ јени дүнјада «онларын ҝөзләриндән бүтүн јашлары силәҹәкдир. Артыг өлүм мөвҹуд олмајаҹаг; артыг нә кәдәр, нә фәрјад, нә дә ағры олаҹагдыр» (Вәһј 21:4). Неҹә дә ҝөзәл вә’ддир! Бу дүнјада Јеһова наминә гурбан вердијимиз һеч бир шеј Онун әзаблара таб ҝәтирән садиг хидмәтчиләрә верәҹәји һәјата чата билмәз.
18. Јеһова Өз Кәламында һансы тәсәлливериҹи вә’ди верир?
18 Таб ҝәтирмәли олдуғумуз әзаблар Аллаһын јени дүнјасындакы әбәди һәјаты алмағымыза һеч бир вәҹһлә мане ола билмәз. Јени дүнјадакы ҝөзәл һәјат шәраити инди үзләшдијимиз бүтүн әзабларын јерини долдураҹаг. Јешаја 65:17, 18 ајәләриндә дејилир: «Әввәлки ишләр бир даһа хатырланмајаҹаг, һеч јада дүшмәјәҹәк. Јаратдығыма әбәдилик севинин, шадланын». Буна ҝөрә дә Исанын өҝеј гардашы Јагубун: «Биз тәһәммүл едәнләри бәхтијар һесаб едирик» демәси мәнтигә ујғундур (Јагуб 5:11). Бәли, әзаблара сәдагәтлә дөзсәк, инди вә ҝәләҹәкдә фајда әлдә едәҹәјик.
Неҹә ҹаваб верәрдиниз?
• Әзаблар бәшәр аиләсинә неҹә дахил олду?
• Әзаблар јерин ҝәләҹәк падшаһларына вә сакинләринә һансы фајдалары ҝәтирәҹәк?
• Әзаблара бахмајараг, биз инди нә үчүн хошбәхт ола биләрик?
[13-ҹү сәһифәдәки шәкил]
Илк валидејнләримизи гаршыда ҝөзәл ҝәләҹәк ҝөзләјирди.
[15-ҹи сәһифәдәки шәкил]
Инсанларын әзабларыны ҝөрмәси Исаја көмәк етди ки, ҝәләҹәкдә јахшы Падшаһ вә Баш каһин олсун.
[17-ҹи сәһифәдәки шәкил]
Һәвариләр иманлары уғрунда тәһгир едилмәјә лајиг ҝөрүлдүкләри үчүн севинирдиләр.