ФӘСИЛ 4

Иса Мәсиһ Аллаһ һаггындакы билијин ачарыдыр

1, 2. Дүнјанын динләри Аллаһ һаггындакы билијин ачарыны неҹә корламышлар?

ЕВИНИЗИН гапысы ағзында дуруб, гапыны ачарла ачмаға чалышырсыныз. Һава сојуг вә гаранлыг олдуғундан тезҹә евә дахил олмаг истәјирсиниз, лакин гапыны һеч ҹүр ача билмирсиниз. Дүзҝүн ачары ҝөтүрдүјүнүзү дүшүнүрсүнүз, анҹаг гыфыл ачылмаг билмир. Олдугҹа хошаҝәлмәз һалдыр! Ачара јенидән нәзәр салырсыныз. Лазыми ачарымы ҝөтүрмүсүнүз? Бәлкә ону кимсә корлајыб?

² Бу нүмунә, дүнја динләриндә Аллаһ һаггындакы билијә даир мөвҹуд олан долашыглығы јахшы тәсвир едир. Әслиндә чохлары Иса Мәсиһин ролуну тәһриф етмәклә бу билији ачан ачары корламышлар. Бә’зи динләр Иса Мәсиһи тамамилә инкар едәрәк, бу ачары үмумијјәтлә атмышлар. Башгалары исә Исаја бир Гадир Аллаһ кими ибадәт едәрәк онун ролуну тәһриф етмишләр. Һәр неҹә олса да, әҝәр биз Иса Мәсиһин ролунун ваҹиблијини ајырд етмәсәк, Аллаһ һаггында билик бизим үчүн бағлы галаҹагдыр.

3. Нәјә ҝөрә Исаны Аллаһ һаггындакы билијин ачары адландырмаг олар?

³ Исанын дедији сөзләр, бәлкә дә, јадыныздадыр: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар” (Јәһја 17:3). Иса бу сөзләри демәклә өзүнү өјмүрдү. Мүгәддәс Китаб Мәсиһ һаггында дәгиг билијин ваҹиблијини дөнә-дөнә вурғулајыр (2 Петер 1:8; 2:20; Ефеслиләрә 4:13; Колослулара 2:2). “Бүтүн пејғәмбәрләр Она [Иса Мәсиһә] шаһидлик едирләр” дејә, һәвари Петер гејд етмишди (Һәвариләрин ишләри 10:43). Һәвари Павел исә јазмышды: “Һикмәтин вә билијин бүтүн хәзинәләри Мәсиһдә ҝизләдилмишдир” (Колослулара 2:3, И–93). Бундан әлавә, Павел демишдир ки, Јеһова бүтүн нијјәтләрини Исанын васитәсилә һәјата кечирәҹәкдир (2 Коринфлиләрә 1:20). Беләликлә, Иса Мәсиһ — Аллаһ һаггындакы билијин ачарыдыр. Иса һаггында билијимиз нә онун шәхсијјәтинә, нә дә Аллаһын нијјәтләриндә ојнадығы рола даир һеч ҹүр тәһриф олунмамалыдыр. Бәс нәјә ҝөрә Исанын давамчылары Аллаһын нијјәтләриндә әсас ролу она аид едирләр?

ВӘ’Д ЕДИЛМИШ МӘСИҺ

4, 5. Мәсиһә һансы үмидләри бәсләјирдиләр вә Исанын шаҝирдләри ону ким һесаб едирдиләр?

⁴ Һабилин ҝүнләриндән бәри Аллаһын садиг хидмәтчиләри сәбирсизликлә Јеһованын әввәлҹәдән һаггында дедији Зүрријјәти ҝөзләјирдиләр (Тәквин 3:15; 4:1-8; Ибраниләрә 11:4). Аллаһ билдирмишдир ки, Зүрријјәт Онун нијјәтиндә Мәсиһ, јә’ни “Мәсһ едилмиш” ролуну јеринә јетирәҹәкдир. Мәсиһ ‘ҝүнаһы битирәҹәкдир’, “Мәзмур” китабында исә онун Падшаһлығынын әзәмәти һаггында әввәлҹәдән дејилмишдир (Даниел 9:24-26; Мәзмур 72:1-20). Бәс һәмин Мәсиһ ким олду?

⁵ Назаретли Исанын сөзләрини динләјәркән Андреј адлы ҝәнҹ јәһудинин кечирдији һиссләри тәсәввүр един. Андреј гардашы Шимон Петерин јанына гачыб деди: “Биз Мәсиһи тапдыг” (Јәһја 1:41). Исанын шаҝирдләри Онун вә’д едилмиш Мәсиһ олдуғуна әмин идиләр (Матта 16:16). Мәсиһин һәгиги давамчылары Исанын мәһз әввәлҹәдән дејилән Мәсиһ олдуғуна инандыглары үчүн һәјатларындан белә кечмәјә һазыр идиләр. Бу ҹүр әминлик үчүн онларын һансы әсаслары варды? Ҝәлин Исанын Мәсиһ олдуғуна даир үч әсас сүбуту нәзәрдән кечирәк.

ИСАНЫН МӘСИҺ ОЛДУҒУНА ДАИР СҮБУТЛАР

6. а) Вә’д едилмиш Зүрријјәт һансы нәсилдән ҝәлмәли иди вә Исанын мәһз һәмин нәсилдән ҝәлдијини һарадан билирик? б) Нәјә ҝөрә б. е. 70-ҹи илиндән сонра артыг һеч ким өзүнүн Мәсиһ олдуғуну иддиа едә билмир?

⁶ Исанын нәсил шәҹәрәси — онун Мәсиһ олдуғуна илк сүбутдур. Јеһова, хидмәтчиси Ибраһимә вә’д едилмиш Зүрријјәтин онун аиләсиндән ҝәләҹәјини демишдир. Ејни вә’ди Ибраһимин оғлу Исһаг, Исһагын оғлу Јагуб вә Јагубун оғлу Јәһуда да алмышдыр (Тәквин 22:18; 26:2-5; 28:12-15; 49:10). Әсрләр кечдикдән сонра Мәсиһин нәсил хәтти Давуд падшаһа ҝәлиб чыхды; ҝөзләнилән Зүрријјәтин онун нәслиндән чыхаҹағы вә’дини Давуд да алмышдыр (Мәзмур 132:11; Ишаја 11:1, 10). Матта вә Луканын јаздығы Мүждәләр Исанын мәһз һәмин нәсилдән ҝәлдијини тәсдигләјир (Матта 1:1-16; Лука 3:23-38). Исанын чохлу дүшмәнләри олса да, онлардан һеч кәс онун ҝениш танынмыш нәсил шәҹәрәсинин доғрулуғуна даир мүбаһисә етмирди (Матта 21:9, 15). Онун нәсил шәҹәрәсинә даир һеч бир шүбһә олмадығы ајдындыр. Лакин б. е. 70-ҹи илиндә, ромалылар Јерусәлими зәбт едән заман, өзүнә јәһудиләрин нәсил шәҹәрәсини дахил едән тумарлар мәһв едилмишди. О вахтдан е’тибарән һеч ким өзүнүн Мәсиһ олдуғуну сүбут едә билмир.

7. а) Исанын Мәсиһ олдуғуна даир икинҹи сүбут нәдир? б) Мика 5:2 ајәсиндән олан пејғәмбәрлик Исанын үзәриндә неҹә јеринә јетди?

⁷ Јеринә јетән пејғәмбәрликләр икинҹи сүбутдур. Ибраниҹә Мүгәддәс Јазыларда олан чохсајлы пејғәмбәрликләр Мәсиһин һәјатынын мүхтәлиф саһәләрини ишыгландырыр. Б. е. ә. VIII әсрдә Мика пејғәмбәр бу бөјүк рәһбәрин кичик Бејтлеһем шәһәриндә анадан олаҹағыны әввәлҹәдән демишдир. Исраилдә ики Бејтлеһем варды, буна ҝөрә дә пејғәмбәрлик онлардан конкрет олараг бирини ҝөстәрирди. Бу, Давуд падшаһын анадан олдуғу Бејтлеһем Ефрат иди (Мика 5:2). Исанын валидејнләри Јусиф вә Мәрјәм, Бејтлеһемдән тәхминән 150 километр шималда јерләшән Назаретдә јашајырдылар. Мәрјәм һамилә икән, Рома императору Гејсәр Август әһалијә доғулдуглары шәһәрләрдә гејдијјатдан кечмәләрини әмр едирa. Бу сәбәбдән Јусиф һамилә арвады илә бәрабәр Бејтлеһемә јола дүшүр; Иса орада доғулур (Лука 2:1-7).

8. а) 69 “һәфтә” нә вахт вә һансы һадисә илә башланды? б) 69 “һәфтә” нә гәдәр давам етди вә сона чатдыгда нә баш верди?

⁸ Б. е. ә. VI әсрдә Даниел пејғәмбәр әввәлҹәдән хәбәр вермишди ки, “Мәсһ олунан һөкмдар”, Јерусәлимин бәрпа олунмасы һаггында әмр чыхдыгдан 69 “һәфтә” сонра ҝәләҹәкдир (Даниел 9:24, 25). Бу “һәфтәнин” һәр бири једди илә бәрабәр идиb. Мүгәддәс Китаб вә үмумдүнја тарихинә әсасән, Јерусәлимин бәрпасы һаггында әмр б. е. ә. 455-ҹи илдә чыхмышдыр (Неһемја 2:1-8). Беләликлә, Мәсиһ б. е. ә. 455-ҹи илдән 483 ил (69х7) кечдикдән сонра ҝәлмәли иди. Бу бизи б. е. 29-ҹу илинә, Јеһованын Исаны мүгәддәс руһла мәсһ етдији дөврә ҝәтириб чыхарыр. Беләликлә, Иса — “Мәсиһ” (мә’насы “Мәсһ едилмиш” демәкдир) олду (Лука 3:15, 16, 21, 22).

9. а) Мәзмур 2:2 ајәси неҹә јеринә јетди? б) Исанын үзәриндә даһа һансы пејғәмбәрликләр јеринә јетди? (Ҹәдвәлә бахын.)

⁹ Әлбәттә, Исанын вә’д едилмиш Мәсиһ олдуғуну һамы гәбул етмәди, бу исә, Ибраниҹә Мүгәддәс Јазыларда әввәлҹәдән дејилмишдир. Аллаһдан илһам алараг Давуд падшаһ Мәзмур 2:2 ајәсиндә габагҹадан демишдир: “Дүнјанын падшаһлары галхыр вә һөкмдарлар Рәббә гаршы вә мәсиһинә гаршы бир-бири илә мүшавирә едирләр”. Бу пејғәмбәрлик бирдән артыг өлкәнин рәһбәрләринин Јеһованын Мәсһ едилмишинә, јә’ни Зүрријјәтинә гаршы һүҹум етмәк үчүн бирләшәҹәјини ҝөстәрирди. Елә дә олду. Јәһуди дин рәһбәрләри, Һирод падшаһ вә Рома һөкмдары Понти Пилат бу вә ја диҝәр тәрздә Исанын өлдүрүлмәсинә гол гојдулар. Һәтта әввәлләр бир-биринә гаты дүшмән олан Һирод вә Пилат да һәмин вахтлар бирдән-бирә јахын дост олдулар (Матта 27:1, 2; Лука 23:10-12; Һәвариләрин ишләри 4:25-28). Исанын Мәсиһ олдуғуна даир даһа чох сүбутлар әлдә етмәк үчүн, “Мәсиһлә бағлы јеринә јетән бә’зи мүһүм пејғәмбәрликләр” ҹәдвәлинә бахын.

10. Јеһова Исанын вә’д едилмиш Мәсиһ олдуғуна неҹә шаһидлик етди?

¹⁰ Јеһова Аллаһын шаһидлији — Исанын Мәсиһ олдуғуну тәсдиг едән үчүнҹү сүбутдур. Јеһова мәләкләри ҝөндәрди ки, Исанын вә’д едилмиш Мәсиһ олдуғуну инсанлара билдирсинләр (Лука 2:10-14). Бундан әлавә, Иса јер үзүндә јашајан заман Јеһова она олан илтифатыны билдирәрәк шәхсән ҝөјдән данышды (Матта 3:16, 17; 17:1-5). Јеһова Исаја мө’ҹүзәләр јаратмаг гүввәси вермишди. Бу мө’ҹүзәләрдән һәр бири Исанын Мәсиһ олдуғуна даир Аллаһдан ҝәлән сүбут иди, чүнки Аллаһ һеч заман фырылдагчылара мө’ҹүзәләр јаратмаг гүввәси вермәмишдир. Јеһова Инҹилин јазылмасына илһам вермәк үчүн дә мүгәддәс руһдан истифадә етмишдир. Беләликлә, Исанын Мәсиһ олдуғуна даир сүбутлар Мүгәддәс Китабын бир һиссәси олду вә бу китаб тарихдә ән ҝениш јајылмыш вә ән чох дилләрә тәрҹүмә олунмушдур (Јәһја 4:25, 26).

11. Исанын Мәсиһ олдуғу нә дәрәҹәдә әсаслыдыр?

¹¹ Бу әсас сүбутлар Исанын вә’д едилмиш Мәсиһ олдуғуну тәсдиг едән јүзләрлә факты өзүнә дахил едир. Ајдын олур ки, мәсиһчиләрин Исаны ‘бүтүн пејғәмбәрләрин Она шаһидлик етдијини’ һесаб етмәјә һәр заман там әсаслары олуб. Бәли, мәсиһчиләр Исаны Аллаһ һаггындакы билијин ачары кими ҝөрүрләр (Һәвариләрин ишләри 10:43). Лакин Исанын Мәсиһ олдуғуну тәсдиг едән фактлардан савајы, онун һаггында даһа чох шеј өјрәнмәк олар. Мәсәлән, онун мәншәји вә шәхсијјәти һаггында нә демәк олар?

ИСАНЫН ИНСАН ОЛМАЗДАН ӘВВӘЛКИ МӨВҸУДЛУҒУ

12, 13. а) Исанын јер үзүнә ҝәлмәздән әввәл ҝөјдә јашадығыны һарадан билирик? б) “Кәлам” сөзү алтында ким нәзәрдә тутулур вә о, инсан олунҹаја гәдәр нә илә мәшғул олмушдур?

¹² Исанын һәјатыны үч дөврә ајырмаг олар. Биринҹи дөвр онун јер үзүндә доғулмасындан чох-чох әввәл башланмышдыр. Мика 5:2 ајәсиндә Мәсиһин “гәдим вахтдан, әзәли ҝүнләрдән” јарандығы һагда дејилир. Иса өзүнүн “јухарыдан”, јә’ни ҝөјдән ҝәлдијини ачыгҹа демишди (Јәһја 8:23; 16:28). Бәс Иса јер үзүнә ҝәлмәздән әввәл ҝөјдә нә гәдәр јашамышдыр?

¹³ Исаны шәхсән Јеһованын Өзү јаратдығы үчүн, о, Аллаһын “ваһид Оғлу” адланмышдыр (Јәһја 3:16). Сонра Јеһова, “бүтүн хилгәтин фөвгүндә дуран” Исаны галан шејләри јаратмаг үчүн истифадә етмишдир (Колослулара 1:15; Вәһј 3:14). Јәһја 1:1 ајәсиндә дејилир ки, “Кәлам” (Иса инсан олмаздан габаг) “әзәлдән” Аллаһын јанында иди. Демәли, ‘ҝөјләр вә јер’ јарадылан заман Кәлам Јеһова илә бирликдә иди. Аллаһ ‘сурәтимиздә инсан јарадаг’ дедикдә Кәлама мүраҹиәт етмишдир (Тәквин 1:1, 26). Бундан әлавә, ҝөрүнүр, Кәлам Сүлејманын мәсәлләри 8:22-31 ајәләриндә мүдриклијин тәҹәссүмү кими тәсвир едилән, галан һәр шејин јарадылмасында Јеһованын рәһбәрлији алтында чалышан истәкли “ме’мар” олмушдур. Јеһова Кәламы јаратдыгдан сонра вә о, јер үзүнә инсан кими ҝәлмәздән әввәл, ҝөјдә Аллаһла узун мүддәт өмүр сүрмүшдүр.

14. Нәјә ҝөрә Иса “ҝөрүнмәјән Аллаһын сурәти” адланыр?

¹⁴ Тәәҹҹүблү дејил ки, Колослулара 1:15 ајәсиндә Иса “ҝөрүнмәјән Аллаһын сурәти” адланыр! Чох илләр әрзиндә сых үнсијјәтин сајәсиндә итаәткар Оғул Атасы Јеһоваја чох бәнзәмишдир. Бу, Исанын һәјат верән Аллаһ һаггындакы билијин ачары олмасынын башга бир сәбәбидир. Исанын јер үзүндә ҝөрдүјү ишләрин һәр бири Јеһованын өзүнүн едәҹәји ишләрә мүвафиг иди. Буна ҝөрә дә, Исаны даһа јахшы танымагла биз Јеһова һаггында билијимизи ҝенишләндиририк (Јәһја 8:28; 14:8-10). Беләликлә, тамамилә ајдын олур ки, Иса Мәсиһ һаггында даһа чох өјрәнмәк лазымдыр.

ИСАНЫН ЈЕР ҮЗҮНДӘКИ ҺӘЈАТЫ

15. Нәјә ҝөрә Иса камил инсан кими доғулду?

¹⁵ Исанын һәјатынын икинҹи дөврү бурада — јер үзүндә кечмишдир. О, көнүллү сурәтдә разы олду ки, Аллаһ онун һәјатыны ҝөјдән дәрин имана малик олан Мәрјәм адлы јәһуди гызынын бәтнинә гојсун. Јеһованын гүдрәтли мүгәддәс руһу, јә’ни Онун фәал гүввәси Мәрјәмин “үстүнә көлҝә салды”, о, һамилә галды вә дүнјаја камил ушаг ҝәтирди (Лука 1:34, 35). Иса һәјатыны камил Мәнбәдән алдығы үчүн гејри-камиллији мирас алмады. Иса тәвазөкар бир аиләдә тәрбијә алмышды. О, дүлҝәр Јусифин өҝеј оғлу вә аиләдәки диҝәр ушагларын илки иди (Ишаја 7:14; Матта 1:22, 23; Марк 6:3).

16, 17. а) Иса мө’ҹүзәләр јаратмаг гүввәсини һарадан алды вә ҝөстәрдији мө’ҹүзәләрин бә’зиләри һансылар иди? б) Иса һансы хүсусијјәтләри тәзаһүр етдирирди?

¹⁶ Иса 12 јашында икән, онун Јеһоваја олан дәрин сәдагәти артыг ашкар иди (Лука 2:41-49). Иса бөјүјүб 30 јашында хидмәтинә башлајан заман инсанлара бөјүк мәһәббәт тәзаһүр етдирирди. Аллаһын мүгәддәс руһунун сајәсиндә Иса мө’ҹүзәләр ҝөстәрмәк гүввәсини әлдә етдикдә хәстәләри, топаллары, лаллары, корлары, карлары вә ҹүзамлылары шәфгәтлә сағалдырды (Матта 8:2-4; 15:30). Иса минләрлә аҹ инсаны једиздирирди (Матта 15:35-38). Бир дәфә достларыны хилас етмәк үчүн туфаны сакитләшдирди (Марк 4:37-39). Бундан әлавә, о, һәтта өлүләри дә дирилдирди (Јәһја 11:43, 44). Бу мө’ҹүзәләр һәгигәтән баш вермиш тарихи фактлардыр. Һәтта Исанын дүшмәнләри белә онун ‘бир чох мө’ҹүзәләр ҝөстәрдијини’ е’тираф етмәли олурдулар (Јәһја 11:47, 48).

¹⁷ Иса инсанлара Аллаһын Падшаһлығы һаггында өјрәдәрәк бүтүн өлкәни сәјаһәт едирди (Матта 4:17). О, һәмчинин сәбрин вә камалын мүкәммәл нүмунәси иди. Һәтта шаҝирдләри ону пис вәзијјәтдә гојдуглары заман, о, шәфгәтлә демишди: “Руһ гејрәтли, бәдән исә зәифдир” (Марк 14:37, 38). Лакин Иса һәгигәтә хор баханлара вә мүдафиәсиз инсанлары сыхышдыран кәсләрә гаршы ҹәсарәтли вә сарсылмаз иди (Матта 23:27-33). Иса һәр шејдән өнҹә, Атасынын мәһәббәт нүмунәсини мүкәммәл сурәтдә тәглид едирди. Гејри-камил инсанларын ҝәләҹәјә үмид әлдә етмәләри үчүн Иса өлмәјә белә һазыр иди. Демәли, Исаны Аллаһ һаггындакы билијин ачары һесаб етмәјә бизим там әсасымыз вар! Бәли, о, ҹанлы ачардыр! Бәс нә үчүн ҹанлы? Бу суала ҹаваб вермәк үчүн онун һәјатынын үчүнҹү дөврүнү нәзәрдән кечирәк.

ИСА БУ ҜҮН

18. Биз Иса Мәсиһи бу ҝүн неҹә тәсәввүр етмәлијик?

¹⁸ Мүгәддәс Китаб Исанын өлүмү һаггында мә’лумат версә дә, о, инди јашајыр! Б. е. I әсриндә јашамыш јүзләрлә инсанлар Исанын дирилмәсинин шаһиди олмушлар (1 Коринфлиләрә 15:3-8). Бундан сонра, әввәлҹәдән дејилдији кими Иса, Аллаһын ҝөјдә она падшаһлыг һакимијјәти верәҹәји вахты ҝөзләјәрәк Атасынын сағында отурмушдур (Мәзмур 110:1; Ибраниләрә 10:12, 13). Буна ҝөрә биз инди Исаны неҹә тәсәввүр етмәлијик? Ону һејван үчүн олан ахурда көмәксиз бир көрпә кимими хәјалымыза ҝәтирмәлијик? Јохса, өлүмгабағы ҹан верән инсан кими? Әлбәттә ки, јох. О, һөкмранлыг едән гүдрәтли Падшаһдыр! Вә чох тезликлә бизим бәдбәхт дүнјамыз үзәриндә өз рәһбәрлијини гураҹагдыр.

19. Иса јахын ҝәләҹәкдә һансы тәдбири ҝөрәҹәкдир?

¹⁹ Вәһј 19:11-15 ајәләриндә Иса Мәсиһ пис инсанлары мәһв етмәк нијјәтиндә олан бөјүк гүввәјә малик Падшаһ кими ајдын сурәтдә тәсвир едилир. Мәһәббәтлә долу олан бу сәмави Һөкмдар милјонларла инсанын әзаб-әзијјәтинә сон гојмаг үчүн неҹә дә сә’јлә чалышыр! Һәмчинин онун јер үзүндә гојдуғу мүкәммәл нүмунәни тәглид етмәјә чалышан инсанлара да көмәк етмәк истәјир (1 Петер 2:21). О, һәмин инсанларын Аллаһын сәмави Падшаһлығынын јер үзү вәтәндашлары кими әбәди јашамалары үчүн, онлары ити сүр’әтлә јахынлашан, чох вахт Һар-Меҝидон адланан “Күлл-Ихтијар Аллаһын бөјүк ҝүнүндә” горумаг истәјир (Вәһј 7:9, 14; 16:14, 16).

20. Иса миниллик рәһбәрлији заманы бәшәријјәт үчүн нә едәҹәкдир?

²⁰ Исанын әввәлҹәдән дедији сүлһүн һөкм сүрәҹәји миниллик рәһбәрлији заманы, о, бүтүн инсанларын рифаһына олараг мө’ҹүзәләр ҝөстәрәҹәкдир (Ишаја 9:6, 7; 11:1-10; Вәһј 20:6). Иса бүтүн хәстәликләри арадан галдыраҹаг вә өлүмә сон гојаҹагдыр. О, милјардларла өлмүш инсанлары дирилдәҹәк ки, онлар да јер үзүндә әбәди јашамаг имканына малик олсунлар (Јәһја 5:28, 29). Бу китабдан Хиласкар Падшаһлыг һаггында өјрәнәҹәкләриниз, јәгин ки, сизә бөјүк тә’сир бағышлајаҹагдыр. Падшаһлығын рәһбәрлији алтында һәјатымызын неҹә ҝөзәл олаҹағыны тәсәввүр белә едә билмәрик. Буна ҝөрә дә Иса Мәсиһ һаггында ­баҹардыгҹа даһа чох билмәк зәруридир! Бәли, чох ваҹибдир ки, биз Исанын әбәди һәјата апаран Аллаһ һаггындакы билијин ҹанлы ачары олдуғуну һеч вахт нәзәрдән гачырмајаг.

[Һашијәләр]

БИЛИЈИНИЗИ ЈОХЛАЈЫН

• Исанын нәсил шәҹәрәси онун Мәсиһ олдуғуну неҹә сүбут едирди?

• Исанын үзәриндә Мәсиһлә бағлы олан һансы бә’зи пејғәмбәрликләр јеринә јетди?

• Аллаһ Исанын Мәсһ едилмиш олдуғуну билаваситә неҹә ҝөстәрди?

• Иса нәјә ҝөрә Аллаһ һаггындакы билијин ҹанлы ачарыдыр?

[37-ҹи сәһифәдәки чәрчивә]

Мәсиһлә бағлы бә’зи мүһүм пејғәмбәрликләр

ПЕЈҒӘМБӘРЛИК ҺАДИСӘ ЈЕРИНӘ ЈЕТМӘ

ҺӘЈАТЫНЫН ИЛК ИЛЛӘРИ

Ишаја 7:14 Бакирә гыздан доғулмасы Матта 1:18-23

Јеремја 31:15 Онун анадан олмасындан сонра

ушагларын гәтлә јетирилмәси Матта 2:16-18

ХИДМӘТИ

Ишаја 61:1, 2 Аллаһ она сәлаһијјәт верди Лука 4:18-21

Ишаја 9:1, 2 Онун хидмәтинин сајәсиндә

инсанлар мөһтәшәм бир ишыг ҝөрдү Матта 4:13-16

Мәзмур 69:9 Јеһованын еви үчүн

ҝөстәрдији гејрәт Јәһја 2:13-17

Ишаја 53:1 Она иман етмәдиләр Јәһја 12:37, 38

Зәкарја 9:9; Јерусәлимә сыпанын белиндә ҝәлди Матта 21:1-9

ХӘЈАНӘТӘ УҒРАМАСЫ ВӘ ӨЛҮМҮ

Мәзмур 41:9; 109:8 Һәвариләрдән бири сәдагәтсиз чыхды;

Исаја хәјанәт етди, буна ҝөрә дә

јерини башгасы тутду Һәвариләрин ишләри 1:15-20

Зәкарја 11:12 30 ҝүмүшә сатылды Матта 26:14, 15

Мәзмур 27:12 Она гаршы јаланчы шаһидләр

истифадә едилди Матта 26:59-61

Мәзмур 22:18 Палтарлары үчүн пүшк атылды Јәһја 19:23, 24

Ишаја 53:12 Ҝүнаһкарларла сајылды Матта 27:38

Мәзмур 22:7, 8 Өлүмгабағы тәһгир етдиләр Марк 15:29-32

Мәзмур 69:21 Турш шәраб вердиләр Марк 15:23, 36

Ишаја 53:5; Бәдәни дешилди Јәһја 19:34, 37

Зәкарја 12:10

Ишаја 53:9 Зәнҝинләрлә басдырылды Матта 27:57-60

Мәзмур 16:8-11 Чүрүмә ҝөрмәдән дирилди Һәвариләрин ишләри 2:25-32; 13:34-37

[35-ҹи сәһифәдәки шәкил]

Аллаһ Исаја хәстәләри сағалтмаг гүввәсини вермишдир.