Дәрс 7

Аллаһа дуа васитәсилә јахынлашмаг

Мүнтәзәм сурәтдә дуа етмәк нәјә ҝөрә зәруридир? (1)

Кимә вә неҹә дуа етмәк лазымдыр? (2, 3)

Һансы мөвзуларда дуа етмәк дүзҝүндүр? (4)

Нә вахт дуа едилмәлидир? (5, 6)

Аллаһ дуаларын һамысынымы динләјир? (7)

1. Дуа, Аллаһла итаәткар сөһбәтдир. Аллаһа мүнтәзәм сурәтдә дуа етмәк лазымдыр. Белә етмәклә сиз, Онунла әзиз бир дост кими јахын олаҹагсыныз. Јеһова гүдрәтли вә гадир олса да, бизим дуаларымызы динләјир! Сиз Аллаһа мүнтәзәм сурәтдәми дуа едирсиниз? (Мәзмур 65:2; 1 Салониклиләрә 5:17).

2. Дуа ибадәтимизин бир һиссәсидир. Буна ҝөрә дә јалныз Јеһова Аллаһа дуа етмәлијик. Иса јер үзүндә јашајаркән башга бир кимсәјә дејил, һәр заман өз Атасына дуа едирди. Биз дә бу ҹүр давранмалыјыг (Матта 4:10; 6:9). Лакин бүтүн дуаларымызы Иса Мәсиһин исми наминә сөјләмәлијик. Бунунла биз Исанын мөвгејинә һөрмәт етдијимизи вә онун фидијә гурбанлығына иман ҝәтирдијимизи ҝөстәририк (Јәһја 14:6; 1 Јәһја 2:1, 2).

3. Дуа едәркән Аллаһла үрәкдән данышмалыјыг. Дуаларымызы әзбәрдән сөјләмәли вә ја дуа китабындан охумалы дејилик (Матта 6:7, 8). Дуаны мүәјјән һөрмәтҹил дурушда, истәнилән вахтда вә мүхтәлиф јерләрдә етмәк олар. Аллаһ, һәтта үрәјимиздә сөјләдијимиз дуалары да ешидир (1 Самуел 1:12, 13). Шәхси дуаларымыз үчүн тамамилә сакит јер тапмаг мүнасиб оларды (Марк 1:35).

4. Нә барәдә дуа етмәк олар? Аллаһла достлуғунуза аид олан һәр шеј барәдә (Филипилиләрә 4:6, 7). Нүмунәви дуадан ҝөрүнүр ки, Јеһованын адынын иззәтләнмәси вә ирадәси барәдә дуа етмәк мүнасибдир. Һәмчинин лазыми мадди јардым, ҝүнаһларын бағышланмасы вә сынаглара таб ҝәтирмәк үчүн көмәк һаггында да дуа етмәк олар (Матта 6:9-13). Дуаларымыз тамаһкарҹасына олмалы дејил. Јалныз Аллаһын ирадәсинә мүвафиг олан шејләр барәдә дуа етмәлијик (1 Јәһја 5:14).

5. Аллаһа миннәтдарлығынызы билдирмәк вә Она һәмд етмәк үчүн үрәјинизин тәһрик етдији һәр вахт дуа едә биләрсиниз (1 Тарихләр 29:10-13). Чәтинликләриниз јаранан вә иманыныз сынаға мә’руз галан заман да дуа етмәк ҝәрәкдир (Мәзмур 55:22; 120:1). Јемәкдән габаг дуа етмәк дүзҝүндүр (Матта 14:19). Јеһова бизи “һәр вахт” дуа етмәјә тәшвиг едир (Ефеслиләрә 6:18).

6. Ҹидди ҝүнаһ ишләтдијимиз заман хүсусилә дуа етмәк лазымдыр. Белә һалларда Јеһовадан мәрһәмәт ҝөстәрмәсини вә бағышламасыны хаһиш етмәлијик. Әҝәр Онун гаршысында ҝүнаһларымызы е’тираф едир вә онлары бир даһа тәкрарламамаг үчүн вар гүввәмизлә чалышарыгса, о заман Аллаһ бизи бағышлајаҹагдыр (Мәзмур 86:5; Сүлејманын мәсәлләри 28:13).

7. Јеһова јалныз салеһ адамларын дуаларыны динләјир. Аллаһ сизин дә дуаларынызы динләсин дејә, Онун ганунлары әсасында јашамаг үчүн әлиниздән ҝәләни етмәјә чалышмалысыныз (Сүлејманын мәсәлләри 15:29; 28:9). Дуа едәркән тәвазөкар олмалысыныз (Лука 18:9-14). Дуада хаһиш етдијиниз шејләрин үзәриндә ишләмәк дә ҝәрәкдир. Буну етмәклә, иман ҝәтирдијинизи вә сөјләдикләринизин һәгигәтән дә үрәкдән ҝәлдијини тәсдиг етмиш оларсыныз. Јалныз белә олдугда Јеһова дуаларыныза ҹаваб верәҹәкдир (Ибраниләрә 11:6).