Аллаһа дуа васитәсилә јахынлашын

1, 2. Нәјә ҝөрә дуа етмәк бөјүк шәрәфдир вә Мүгәддәс Китабын дуа һаггында өјрәтдикләрини билмәк нә үчүн ваҹибдир?

УҸСУЗ-БУҸАГСЫЗ Каинатла мүгајисәдә Јер күрәси чох кичикдир. «Ҝөјләри вә јери Јарадан» Јеһова үчүн бүтүн милләтләр «ведрәдә бир дамла су кимидир» (Мәзмур 115:15; Јешаја 40:15). Бунунла белә, Мүгәддәс Китабда дејилир: «Рәбб Ону чағыран бүтүн инсанлара, Ону сидг үрәкдән чағыран бүтүн инсанлара јахындыр. Ондан горханлары мурада чатдырар, фәрјадларына гулаг асыб онлары гуртарар» (Мәзмур 145:18, 19). Бир анлыға дүшүнүн: гүдрәтли Јарадан бизә јахындыр вә әҝәр Ону сидг үрәклә чағырсаг, О бизи ешидәр. Аллаһа дуа етмәк, һәгигәтән дә, бөјүк шәрәфдир!

² Әҝәр Јеһованын дуаларымызы динләмәсини истәјириксә, Она мәгбул тәрздә мүраҹиәт етмәлијик. Мәҝәр Мүгәддәс Китабын дуа һаггында өјрәтдикләрини билмәдән дүзҝүн дуа етмәк мүмкүндүрмү? Бу һагда Мүгәддәс Јазыларын нә дедијини билмәк чох ваҹибдир, чүнки дуа Јеһоваја јахынлашмағымыза көмәк едир.

БИЗ НӘ ҮЧҮН ЈЕҺОВАЈА ДУА ЕТМӘЛИЈИК?

3. Јеһоваја дуа етмәли олдуғумузун ваҹиб сәбәбләриндән бири һансыдыр?

³ Јеһоваја дуа етмәли олдуғумузун ваҹиб сәбәбләриндән бири, Онун Өзүнүн бизи буна дә’вәт етмәсидир. Аллаһын Кәламы бизи тәшвиг едир: «Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр» (Филипилиләрә 4:6, 7). Әлбәттә, биз Каинатын Али Һөкмдарынын тәгдим етдији бу ҝөзәл ән’ама е’тинасызлыг ҝөстәрмәк истәмирик!

4. Дуа етмәк Јеһова илә достлуғумузу неҹә мөһкәмләндирир?

⁴ Дуа етмәли олдуғумузун башга бир сәбәби, Јеһова илә үнсијјәтин Онунла мүнасибәтимизи мөһкәмләндирмәсидир. Әсл достлар јалныз нәјә исә еһтијаҹ дујдуглары заман үнсијјәт етмирләр. Бир јердә вахт кечирмәк онларын хошуна ҝәлир, өз фикирләрини, һиссләрини вә нараһатчылыгларыны бөлүшәндә, онларын достлуғу мөһкәмләнир. Јеһова Аллаһла мүнасибәтләримиз дә буна бәнзәр тәрздә гурулур. Сиз бу китабын васитәсилә Јеһова, Онун хүсусијјәтләри вә нијјәтләри һаггында Мүгәддәс Китабдан чох шеј өјрәндиниз. Артыг сиз Аллаһын реал шәхсијјәт олдуғуну билирсиниз. Дуа, дүшүнҹәләримизи вә ән дәрин дујғуларымызы сәмави Атамызла бөлүшмәјә имкан јарадыр. Дуа етмәклә биз Јеһоваја јахынлашырыг (Јагуб 4:8).

ВАҸИБ ТӘЛӘБЛӘР

5. Јеһованын һәр дуаны динләмәдији нәдән ҝөрүнүр?

⁵ Јеһова һәр бир дуаны динләјирми? Јешаја пејғәмбәрин дөврүндә Онун үсјанкар исраиллиләрә дедији сөзләрә диггәт јетирин: «Сиз әл ачыб Мәнә јалваранда ҝөз јумаҹағам. Нә гәдәр чох дуа етсәниз дә, јенә гулаг асмајаҹағам. Әлләриниз ганла долудур» (Јешаја 1:15). Ҝөрүндүјү кими, бә’зи инсанларын давранышлары, Аллаһы онларын дуаларыны динләмәмәјә вадар едир. Аллаһа дуаларымызы динләмәк хош олсун дејә, бә’зи әсас тәләбләрә риајәт етмәлијик.

6. Аллаһын дуаларымызы динләмәси үчүн башлыҹа тәләб нәдир вә биз она неҹә риајәт едә биләрик?

⁶ Башлыҹа тәләбләрдән бири — сәмими гәлбдән иман етмәкдир (Марк 11:24). Һәвари Павел јазмышдыр: «Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир» (Ибраниләрә 11:6). Әсл имана малик олмаға садәҹә Аллаһын мөвҹуд олдуғуну, дуаларымызы ешитдијини вә онлара ҹаваб вердијини билмәкдән даһа чох шеј дахилдир. Иман әмәлләрлә тәсдиг олунур. Имана малик олдуғумузу јашадығымыз һәр бир ҝүнлә сүбут етмәлијик (Јагуб 2:26).

7. а) Нәјә ҝөрә Јеһоваја һөрмәт вә еһтирамла дуа етмәлијик? б) Аллаһа дуа едәркән тәвазөкар вә сәмими олдуғумузу неҹә ҝөстәрә биләрик?

⁷ Јеһова үчүн бизим сәмими гәлбдән вә тәвазөкарлыгла дуа етмәјимиз дә чох ваҹибдир. Мәҝәр Аллаһ лајиг дејилми ки, биз Онунла сөһбәт едәркән тәвазөкарлыг ҝөстәрәк? Инсанлар президентә мүраҹиәт едәндә, онун јүксәк мөвгејини гәбул етдикләрини ҝөстәрмәк үчүн, адәтән бөјүк һөрмәт вә еһтирамла данышырлар. Бәс Јеһоваја даһа чох һөрмәт вә еһтирамла мүраҹиәт етмәли дејиликми? (Мәзмур 138:6). Ахы О «Күлли-Ихтијар Аллаһ»дыр (Јарадылыш 17:1). Аллаһа дуа едәркән, Онун гаршысында һансы мөвгеји тутдуғумузу тәвазөкарлыгла дәрк етмәлијик. Бу ҹүр әһвал-руһијјә сәмими гәлбдән дуа етмәјә, ејни ифадәләрдән вә әзбәрләнмиш дуалардан гачмаға тәшвиг едәҹәкдир (Матта 6:7, 8).

8. Дуаларымыза ујғун һәрәкәт етмәк нә демәкдир?

⁸ Аллаһын дуаларымызы ешитмәси үчүн нөвбәти тәләб, дуаларымыза ујғун давранмағымызыдыр. Јеһова ҝөзләјир ки, биз бунун үчүн әлимиздән ҝәләни едәҹәјик. Мәсәлән, әҝәр биз: «Ҝүндәлик чөрәјимизи бизә бу ҝүн вер» дејә дуа едириксә, сә’ј ҝөстәрмәли вә ишимизи виҹданла јеринә јетирмәлијик (Матта 6:11; 2 Салоникилиләрә 3:10). Әҝәр һәр һансы зәифлијимизин өһдәсиндән ҝәлмәк үчүн дуа едириксә, бизи јолдан чыхара биләҹәк бүтүн һаллардан гачмаға чалышмалыјыг (Колослулара 3:5). Аллаһа дүзҝүн дуа етмәк үчүн даһа нәји билмәлијик?

ДУА ҺАГГЫНДА ДАҺА НӘЈИ БИЛМӘК ЛАЗЫМДЫР?

9. Кимә дуа етмәлијик вә кимин васитәсилә?

⁹ Биз кимә дуа етмәлијик? Иса давамчыларына ‘ҝөјләрдә олан Атамыза’ дуа етмәји өјрәдирди (Матта 6:9). Буна ҝөрә дә биз дуада јалныз Јеһова Аллаһа мүраҹиәт етмәлијик. Лакин Јеһова истәјир ки, биз Онун ваһид Оғлу Иса Мәсиһин мөвгејини гәбул едәк. 5-ҹи фәсилдән өјрәндијимиз кими, Иса бизи ҝүнаһын вә өлүмүн көләлијиндән азад етмәк үчүн, фидијә тимсалында јер үзүнә ҝөндәрилди (Јәһја 3:16; Ромалылара 5:12). О, Баш каһин вә Һаким тә’јин олунмушдур (Јәһја 5:22; Ибраниләрә 6:20). Буна ҝөрә дә Аллаһын Кәламы бизә Иса васитәсилә дуа етмәји өјрәдир. Иса өзү һаггында демишдир: «Јол, һәгигәт вә һәјат Мәнәм; Мәним васитәчилијим олмаса, Атанын јанына һеч ким ҝәлә билмәз» (Јәһја 14:6). Дуаларымызын ешидилмәсини истәјириксә, Иса Мәсиһ васитәсилә јалныз Јеһоваја дуа етмәлијик.

10. Дуа едән заман нәјә ҝөрә хүсуси дуруш тәрзи тәләб олунмур?

¹⁰ Дуа едән заман хүсуси дуруш тәрзи тәләб олунурму? Хејр. Јеһова, әлләримиз вә ја бәдәнимиз үчүн хүсуси дуруш тәрзи тәләб етмир. Мүгәддәс Китабдан ҝөрүндүјү кими, мүхтәлиф ҹүр: отурараг, ајаг үстә, баш әјәрәк вә ја диз чөкәрәк дуа етмәк олар (1 Салнамәләр 17:16; Неһем­ја 8:6; Даниел 6:10). Әслиндә башгаларынын ҝөрә биләҹәји дуруш тәрзи дејил, үрәјимизин дүзҝүн әһвал-руһијјәси даһа ваҹибдир. Ҝүндәлик ишләрлә мәшғул оланда вә ја тәһлүкә илә гаршылашанда, һарада олмағымыздан асылы олмајараг, үрәјимиздә дуа едә биләрик. Башгалары дуа етдијимизи һисс етмәсәләр дә, Јеһова белә дуалары ешидир (Неһемја 2:1-6).

11. Һансы шәхси проблемләримиз барәдә дуа едә биләрик?

¹¹ Нә һагда дуа едә биләрик? Мүгәддәс Китаб изаһ едир: «Онун [Јеһованын] ирадәсинә ујғун шәкилдә бир шеј диләјириксә, О бизи ешидир» (1 Јәһја 5:14). Демәли, Аллаһын ирадәсинә ујғун олан һәр шеј һаггында дуа едә биләрик. Шәхси нараһатчылыгларымыз барәдә дуа етмәјимиз Аллаһын ирадәсинә ујғундурму? Әлбәттә! Јеһоваја дуа етмәк, јахын достла сөһбәт етмәјә бәнзәјир. Биз ‘Онун һүзурунда гәлбимизи ачыб бошалдараг’, сәмими сөһбәт едә биләрик (Мәзмур 62:8). Ејни заманда Аллаһдан мүгәддәс руһ диләмәк лазымдыр. Чүнки мүгәддәс руһ дүзҝүн давранмағымыза көмәк едәҹәк (Лука 11:13). Биз, һәмчинин Јеһовадан мүдрик гәрар гәбул етмәк үчүн рәһбәрлик вә чәтинликләрин өһдәсиндән ҝәлмәк үчүн ҝүҹ истәјә биләрик (Јагуб 1:5). Ҝүнаһ ишләтдијимиз заман, Мәсиһин гурбанлығы әсасында бағышланмағымызы диләмәлијик (Ефеслиләрә 1:3, 7). Әлбәттә, јалныз шәхси нараһатчылыгларымыз барәдә дуа етмәли дејилик. Башгалары үчүн дә, мәсәлән, аилә үзвләримиз вә һәмиманлыларымыз үчүн дә дуа етмәлијик (Һәвариләрин ишләри 12:5; Колослулара 4:12).

12. Илк нөвбәдә нә һагда дуа етмәлијик?

¹² Илк нөвбәдә, Јеһова Аллаһла бағлы олан шејләр һагда дуа етмәк лазымдыр. Она сәмими гәлбдән һәмд етмәк вә миннәтдарлығымызы билдирмәк үчүн чохлу сәбәбләримиз вар (1 Салнамәләр 29:10-13). Иса, Матта 6:9-13 ајәләриндә јазылмыш нүмунәви дуасында Аллаһын адынын мүгәддәс тутулмасы һаггында дуа етмәји өјрәтди. Нөвбәти хаһиш, Аллаһын Падшаһлығынын ҝәлмәси вә ҝөјдә олдуғу кими јердә дә Онун ирадәсинин олмасы һагда иди. Иса, јалныз бу ваҹиб мәсәләләрдән сонра шәхси нараһатчылыглар барәдә хатырлатды. Нүмунәви дуаја ујғун дуа етмәклә, јалныз өз рифаһымызын гејдинә галмадығымызы ҝөстәририк.

13. Аллаһа мәгбул дуаларын нә гәдәр чәкмәли олдуғу һагда Мүгәддәс Китабда нә дејилир?

¹³ Дуаларымыз нә гәдәр чәкмәлидир? Мүгәддәс Китабда шәхси вә ја үмуми дуаларын нә гәдәр давам етмәли олдуғу барәдә һеч нә дејилмир. Бу, јемәкдән габаг гыса дуалар вә ја Јеһованын һүзурунда гәлбимизи бошалтдығы­мыз узун дуалар ола биләр (1 Шамуел 1:12, 15). Лакин Иса өзләриндән разы һалда ријакарҹасына узун-узады дуа едәнләри мүһакимә едирди (Лука 20:46, 47). Бу ҹүр дуаларла Јеһовада тәәссүрат јаратмаг мүмкүн дејил. Дуаларымызын үрәкдән ҝәлмәси Онун үчүн даһа ваҹибдир. Ҝөрдүјүмүз кими, Аллаһа мәгбул дуаларын нә гәдәр чәкмәси, бизим тәләбатларымыздан вә шәраитимиздән асылыдыр.

14. ‘Дурмадан дуа етмәк’ нә демәкдир вә бу бизә неҹә тәсәлли верир?

¹⁴ Нә гәдәр тез-тез дуа етмәлијик? Мүгәддәс Китаб бизи ‘ојаг дуруб дуа етмәјә’, ‘дуада мәтанәтли олмаға’ вә ‘дурмадан дуа етмәјә’ тәшвиг едир (Матта 26:41; Ромалылара 12:12; 1 Салоникилиләрә 5:17). Әлбәттә, бу о демәк дејил ки, биз ҝеҹә-ҝүндүз дуа етмәлијик. Әслиндә Мүгәддәс Китаб бизи мүнтәзәм олараг дуа етмәјә, хејирхаһлығына ҝөрә Јеһоваја миннәтдарлыг билдирмәјә вә Ондан рәһбәрлик, тәсәлли вә көмәк диләмәјә тәшвиг едир. Неҹә дә тәсәлливериҹидир ки, Јеһова дуаларымызын сајына вә мүддәтинә мәһдудијјәт гојмур! Әҝәр дуа етмәк үстүнлүјүнү гијмәтләндиририксә, сәмави Атамызла үнсијјәт етмәјә һәмишә вахт тапаҹағыг.

15. Шәхси вә үмуми дуаларын сонунда нәјә ҝөрә «амин» демәлијик?

¹⁵ Нәјә ҝөрә дуанын сонунда «амин» демәлијик? «Амин» сөзүнүн мә’насы «доғрудур» вә ја «гој елә олсун» демәкдир. Мүгәддәс Китабын јазылдығы дөврләрдә Аллаһын хидмәтчиләри өз дуаларыны адәтән «амин» сөзү илә битирирдиләр (1 Салнамәләр 16:36; Мәзмур 41:13). Шәхси дуамызын сонунда «амин» демәклә, сөзләримизин сәмими олдуғуну тәсдиг едирик. Үмуми дуанын сонунда уҹадан вә ја үрәјимиздә «амин» дедикдә исә, дејиләнләрлә разы олдуғумузу ҝөстәририк (1 Коринфлиләрә 14:16).

АЛЛАҺ ДУАЛАРЫМЫЗА НЕҸӘ ҸАВАБ ВЕРИР?

16. Дуа етдијимиз заман нәјә әмин ола биләрик?

¹⁶ Јеһова дуалара ҹаваб верирми? Әлбәттә, верир! Там әмин ола биләрик ки, «дуалары ешидән» Аллаһ милјонларла инсанын сәмими дуаларына ҹаваб верир (Мәзмур 65:2). Јеһова дуаларымыза мүхтәлиф үсулларла ҹаваб верә биләр.

17. Нәјә ҝөрә демәк олар ки, Аллаһ дуаларымыза мәләкләрин вә јер үзүндәки хидмәтчиләринин васитәсилә ҹаваб верир?

¹⁷ Јеһова дуалара Өз мәләкләри вә јер үзүндәки хидмәтчиләри васитәсилә ҹаваб верир (Ибраниләрә 1:13, 14). Инсанларын Мүгәддәс Китабы анламаг үчүн Аллаһдан көмәк диләдикләри вә чох кечмәдән Јеһованын хидмәтчиләри илә гаршылашдыглары чохлу һаллар олмушдур. Бу кими һадисәләр, мәләкләрин Падшаһлығын тәблиғ ишиндә иштирак етдикләрини ҝөстәрир (Вәһј 14:6). Дуаларымыза ҹаваб вермәк үчүн, Јеһова һәмиманлыларымызы тәшвиг едә биләр ки, онлар бизим көмәјимизә ҝәлсинләр (Сүлејманын мәсәлләри 12:25; Јагуб 2:16).

18. Јеһова хидмәтчиләринин дуаларына ҹаваб вермәк үчүн Өз мүгәддәс руһундан вә Кәламындан неҹә истифадә едир?

¹⁸ Бундан әлавә, Јеһова Аллаһ хидмәтчиләринин дуаларына ҹаваб вермәк үчүн, Өз мүгәддәс руһундан вә Кәламы олан Мүгәддәс Китабдан да истифадә едир. Сынаглара таб ҝәтирмәјимизә көмәк етмәсини хаһиш етдикдә, мүгәддәс руһунун васитәсилә бизә лазыми рәһбәрлик вә ҝүҹ верир (2 Коринфлиләрә 4:7). Чох вахт рәһбәрлик истәдијимиз дуалара ҹавабы, мүдрик гәрарлар гәбул етмәјимизә көмәк едән Мүгәддәс Китабдан алырыг. Аллаһын Кәламыны шәхсән өјрәнәркән вә әлимиздәки бу китаб кими Мүгәддәс Јазылара әсасланан нәшрләри охујаркән, лазыми ајәләри тапа биләрик. Аллаһын Кәламындан олан лазыми мәсләһәти, мәсиһчи ҝөрүшләриндә вә ја јығынҹағын гајғыкеш ағсаггаллары илә сөһбәт едәркән дә ешидә биләрик (Галатијалылара 6:1).

19. Һәрдән дуаларымызын ҹавабсыз галдығыны дүшүнүрүксә, нәји јадда сахламалыјыг?

¹⁹ Һәрдән бизә елә ҝәлә биләр ки, Јеһова дуаларымыза ҹаваб вермәкдә ҝеҹикир. Анҹаг бу о демәк дејил ки, Аллаһ дуалара ҹаваб вермәјә гадир дејил. Јадда сахламаг лазымдыр ки, Јеһова дуалара Өз ирадәсинә мәгбул тәрздә вә мүнасиб сандығы вахтда ҹаваб верир. Нәјә еһтијаҹ дујдуғумузу вә бизә неҹә көмәк едәҹәјини, О даһа јахшы билир. Чох вахт О бизә исрарла диләмәјә, ахтармаға вә гапыны дөјмәјә имкан верир (Лука 11:5-10). Белә давранмагла, биз иманымызын сәмими вә диләдијимизин бизим үчүн чох ваҹиб олдуғуну ҝөстәрәрик. Һәрдән Јеһова дуаларымыза ҝөзләмәдијимиз кими ҹаваб верә биләр. Мәсәлән, проблемләримизин һәлл олунмасы үчүн етдијимиз дуалара Јеһова онлары арадан галдырмагла јох, һәр шејә таб ҝәтирмәјимиз үчүн ҝүҹ вермәклә ҹаваб верә биләр (Филипилиләрә 4:13).

20. Дуа етмәк үстүнлүјүнү нәјә ҝөрә гијмәтләндирмәлијик?

²⁰ Неҹә дә миннәтдарыг ки, уҹсуз-буҹагсыз Каинатын Јараданы, Ону сидг үрәкдән чағыранларын һамысына јахындыр! (Мәзмур 145:18). Ҝәлин дуа етмәк үстүнлүјүнү һәмишә гијмәтләндирәк. Бу, дуалары ешидән Јеһова илә даһа да јахын олмағымыза вә бундан бөјүк севинҹ дујмағымыза көмәк едәҹәк.