Шөвг

ШӨВГЛӘ данышмаг чыхышы ҹанлы едир. Материалын долғун олмасы ваҹиб олса да, мәһз ҹанлы, шөвглә данышмағын сајәсиндә динләјиҹиләрин диггәтини ҹәлб етмәк мүмкүн олур. Миллијјәтиндән, јахуд хасијјәтиндән асылы олмајараг, һәр кәс шөвглә данышмағы өјрәнә биләр.

Үрәкдән даныш. Самаријалы гадынла данышаркән Иса деди ки, Јеһоваја «ибадәт едәнләрин руһән вә һәгигәтән ибадәт етмәләри ҝәрәкдир» (Јәһ 4:24). Онлары ибадәтә миннәтдарлыгла долу үрәкләри тәшвиг етмәли вә бу ибадәт Аллаһын Кәламында олан һәгигәтә әсасланмалыдыр. Инсанда белә дәрин миннәтдарлыг һисси варса, бу, онун сөзләриндә әкс олунаҹаг. О, Јеһованын мәһәббәтлә гејдимизә галмасы һагда инсанлара данышмағы арзулајаҹаг. Әслиндә һансы һиссләри кечирдији онун үз ифадәләриндән, жестләриндән вә сәсиндән билинәҹәк.

Бәс нәјә ҝөрә Јеһованы севән вә Она инанан бәзи натигләр шөвглә данышмырлар? Шөвглә данышмаг үчүн садәҹә материалы һазырламаг кифајәт дејил. Мөвзуну јашамаг, ону һисс етмәк лазымдыр. Фәрз едәк ки, сәнә Иса Мәсиһин фидјә гурбанлығы һагда данышмаг тапшырылыб. Чыхыш едәркән фикрин јалныз тәфсилатларда галмамалыдыр, һәм дә Исанын гурбанлығынын сәнә вә динләјиҹиләринә ҝәтирдији фајдалар барәдә дүшүнмәлисән. Ҝөстәрдикләри бөјүк гајғыја ҝөрә Јеһова Аллаһа вә Иса Мәсиһә дујдуғун миннәтдарлыг һиссини јада салмаг лазымдыр. Бу гурбанлығын сајәсиндә бәшәријјәт гаршысында ачылан мөһтәшәм имкан — бәрпа едилмиш Ҹәннәтдә әбәди хошбәхтлик вә мүкәммәл сағламлыг һагда дүшүнмәк ҝәрәкдир! Беләликлә, бу заман үрәк бөјүк рол ојнајыр.

Исраилдә Ганун мүәллими олан Езра һаггында Мүгәддәс Китабда дејилир ки, о, ‘Рәббин шәриәтини арајыб јеринә јетирмәк вә өјрәтмәк үчүн өз үрәјини һазырламышды’ (Езра 7:10, КМ). Әҝәр биз дә јалныз мәлуматы јох, һәм дә үрәјимизи һазырласаг, үрәкдән данышаҹағыг. Һәгигәти үрәкдән данышмағымызын мүраҹиәт етдијимиз инсанларын үрәјиндә һәгигәтә гаршы мәһәббәтин ојанмасына бөјүк көмәји дәјәҹәк.

Динләјиҹиләрин һагда дүшүн. Шөвглә данышмаға көмәк едән диҝәр ваҹиб амил одур ки, чатдыраҹағын мәлуматын динләјиҹиләр үчүн ваҹиб олдуғуна әмин олмалысан. Бу о демәкдир ки, чыхышы һазырлајаркән јалныз фајдалы материал топламамалы, һәмчинин бу материалы динләјиҹиләринә фајда ҝәтирәҹәк шәкилдә чатдырмаг үчүн дуада Јеһовадан рәһбәрлик истәмәлисән (Мәз. 32:8; Мат. 7:7, 8). Бу мәлуматын нәјә ҝөрә динләјиҹиләрин үчүн ваҹиб олдуғуну, онлара һансы фајданы ҝәтирәҹәјини вә дәјәрини анламалары үчүн ону неҹә чатдыраҹағыны тәһлил ет.

Сәни һејран едән бир шеј тапана гәдәр материалын үзәриндә ишлә. Шәрт дејил ки, мәлумат јени олсун, она садәҹә фәргли призмадан јанаша биләрсән. Әҝәр динләјиҹиләринә Јеһова илә мүнасибәтләрини мөһкәмләндирмәјә, вердији бәхшишләри гијмәтләндирмәјә, бу көһнә системдә растлашдыглары проблемләрин өһдәсиндән мүвәффәгијјәтлә ҝәлмәјә вә ја хидмәтләрини јахшылашдырмаға көмәк едән мәлумат һазырламысанса, шөвглә данышмаға әсасын вар.

Бәс әҝәр сәнә аудиторија гаршысында охумаг тапшырылыбса, онда неҹә? Шөвглә охумаг үчүн садәҹә сөзләри дүзҝүн тәләффүз етмәкдән вә онлары дүзҝүн груплашдырмагдан чох шеј тәләб олунур. Материалы өјрән. Әҝәр Мүгәддәс Китабдан бир парча охујаҹагсанса, онунла бағлы бир гәдәр арашдырма апар. Әмин ол ки, онун мәнасыны анлајырсан. Бунун сәнә вә динләјиҹиләринә фајдасы һагда дүшүн вә бу фајданы онлара чатдырмаг арзусу илә оху.

Бәлкә, тәблиғә һазырлашырсан? Бу һалда, мүзакирә едәҹәјин мөвзуну вә охујаҹағын ајәләри нәзәрдән кечир. Һәмчинин инсанлары нәләрин нараһат етдији һагда да фикирләш. Хәбәрләрдә нәдән данышмышдылар? Инсанлар һансы проблемләрлә гаршылашырлар? Һисс едәндә ки, мәһз бу проблемләрин һәлли һагда Аллаһын Кәламында јазыланлары онлара ҝөстәрмәјә һазырсан, буну етмәјә сәндә һәвәс јаранаҹаг вә шөвглә данышмаг өз-өзүнә алынаҹаг.

Ҹанлы даныш. Шөвг ән чох ҹанлы данышыгда өзүнү бүрузә верир. Бу, үз ифадәсиндән ајдын ҝөрүнмәлидир. Әминликлә даныш, лакин гәти олмамаға чалыш.

Бу һалда таразлылыг тәләб олунур. Бәзиләрини һәр шеј риггәтә ҝәтирир. Беләләринә баша салмаг лазымдыр ки, инсан тәмтәраглы вә ја һәддиндән артыг емосионал данышанда динләјиҹиләр онун сөзләриндән чох, өзү һагда дүшүнәҹәкләр. Диҝәр тәрәфдән исә, утанҹаг оланлары даһа сәрбәст данышмаға тәшвиг етмәк лазымдыр.

Шөвг сирајәтедиҹидир. Әҝәр динләјиҹиләрлә јахшы тәмас гурмусанса вә шөвглә данышырсанса, бу шөвг динләјиҹиләринә дә кечәҹәк. Бәлағәтли натиг кими тәсвир олунан Аполлос ҹанлы данышырды. Әҝәр руһда сәјли олсан, ҹанлы чыхышын сәни динләјәнләри һәрәкәтә тәшвиг едәҹәк (Һәв. иш. 18:24, 25; Ром. 12:11).

Мөвзуја ујғун шөвг. Диггәтли ол ки, бүтүн чыхыш боју һәддиндән артыг шөвглә данышмајасан. Әкс тәгдирдә, бу, динләјиҹиләри јора биләр вә онлар мүзакирә олунан мөвзуја ујғун һәрәкәт етмәјә тәшвиг олунмазлар. Буна ҝөрә дә материалы елә һазырламаг лазымдыр ки, нитгин рәнҝарәнҝ олсун. Чалыш лагејдлик әкс етдирән тонда данышмајасан. Әҝәр материалы диггәтлә сечсән, о, сәнин үчүн мараглы олаҹаг. Чыхыш заманы адәтән бәзи мәгамлары башгаларына нисбәтән даһа шөвглә демәк тәләб олунур, лакин бүтүн мәгамлары мәһарәтлә бир-биринә бағламаг лазымдыр.

Хүсусилә дә әсас бәндләри шөвглә демәк лазымдыр. Чыхышында кулиминасија нөгтәләри олмалыдыр вә мөвзуну онлара доғру инкишаф етдирмәлисән. Бунлар чыхышын ваҹиб мәгамлары олдуғундан, динләјиҹиләри һәрәкәтә тәшвиг етмәлидир. Динләјиҹиләрини әмин етдикдән сонра онлары һәрәкәтә тәшвиг етмәк, һаггында данышыланлары һәјатларында тәтбиг етмәјин фајдаларыны ҝөстәрмәк лазымдыр. Шөвглә данышмағын онларын үрәјинә јол тапмаға көмәк едәҹәк. Өзүнү мәҹбур едәрәк ҹанлы данышмаға чалышма. Бунун үчүн сәбәб олмалыдыр. Һәмин сәбәби исә материалда тапаҹагсан.