Доғру вә дәгиг мәлуматы чатдыр

НЕҸӘ ола биләр ки, мәсиһчи һәгигәтә ујғун олмајан фикир сөјләмиш олсун? О, дәгиг олуб-олмадығыны јохламадан ешитдикләрини садәҹә тәкрар едә, јахуд сәһв охудуғу үчүн өзүнүн дә хәбәри олмадан мәлуматы шиширдә биләр. Һәтта хырда шејләрдә дә дәгиг олмаға чалышсаг, бизи динләјәнләр даһа ваҹиб шејләрдә дә бизә етибар едә биләҹәкләри гәнаәтинә ҝәләҹәкләр.

Тәблиғ хидмәтиндә. Бир чохлары биликләринин јетәринҹә олмадығыны дүшүнәрәк тәблиғ хидмәтиндә иштирак етмәјә тәрәддүд едирләр. Анҹаг онлар тезликлә ҝөрүрләр ки, тәкҹә әсас һәгигәтләри билмәклә дә јахшы шаһидлик едә билирләр. Неҹә? Бунун сирри һазырлашмагдадыр.

Хидмәтә ҝетмәздән әввәл мүзакирә етмәк истәдијин мөвзуну диггәтлә арашдыр. Сәни динләјәнләрин һансы суалы верә биләҹәкләрини тәхмин етмәјә чалыш. Мүгәддәс Китаба әсасланан долғун ҹаваблар тап. Бу ҹүр һазырлашсан, дәгиг ҹаваб верәҹәк, ејни заманда әминлик һисс едәҹәксән. Әҝәр Мүгәддәс Китаб өјрәнмәси кечирмәјә һазырлашырсанса, арашдыраҹағыныз мөвзуну диггәтлә нәзәрдән кечир. Әмин ол ки, абзаса верилән суалларын ҹавабынын Мүгәддәс Јазылара неҹә әсасландығыны баша дүшүрсән.

Бәс ев саһиби вә ја әмәкдашын һазырлашмадығын мөвзуја даир суал версә, онда неҹә? Ҹавабы дәгиг билмирсәнсә, тәхмини фикир сөјләмәк истәјини боғ. «Салеһ инсан ҹаваб вермәздән әввәл гәлбиндә дүшүнәр» (Сүл. мәс. 15:28). Билдијин дилдә варса, «Мүгәддәс Јазыларын әсасында мүлаһизә» китабынын, јахуд «Мүгәддәс Китаб әсасында сөһбәт етмәк үчүн мөвзулар» брошүрасынын көмәји дәјә биләр. Әҝәр онларын һеч бирини өзүнлә ҝөтүрмәмисәнсә, о заман арашдырма апарыб, ҝәлән дәфә бу суала ҹаваб верәҹәјини сөјлә. Һәмсөһбәтин суалы сәмими-гәлбдән верирсә, тәклифинә етираз етмәјәҹәк. Үстәлик, сәнин тәвазөкарлығын онда хош тәәссүрат ојада биләр.

Хидмәтдә тәҹрүбәли тәблиғчиләрлә әмәкдашлыг етдикҹә Аллаһын Кәламыны доғрулугла өјрәтмәк баҹарығына јијәләнәҹәксән. Онларын һансы ајәләри охудугларына вә онлары неҹә изаһ етдикләринә диггәт јетир. Вердикләри мәсләһәтләри вә дүзәлишләри һәлимликлә гәбул ет. Сәјли мәсиһчи олан Аполлос башгаларынын көмәјинин фајдасыны ҝөрмүшдү. Лука Аполлосу «бәлағәт саһиби», «Мүгәддәс Јазылары јахшы билән», ‘Рәбб барәсиндәки һәгигәти бәјан едиб, доғрулугла өјрәдән’ адам кими тәсвир едирди. Анҹаг онун баша дүшмәдији шејләр дә вар иди. Прискила вә Акила буну һисс едәндә «ону јанларына алыб Рәбб јолуну она даһа дәгиг изаһ етдиләр» (Һәв. иш. 18:24-28).

‘Етимада лајиг кәлама ҹидди риајәт ет’. Ҝөрүшләрдә етдијимиз чыхышлардан јығынҹағын «һәгигәтин дирәји вә әсасы» кими ојнадығы рола дәриндән һөрмәт етдијимиз ҝөрүнмәлидир (1 Тим. 3:15). Һәгигәти тәһриф етмәмәк үчүн чыхышларда истифадә етмәји планлашдырдығымыз ајәләрин мәнасыны баша дүшмәк ваҹибдир. Контексти вә онларын һансы мәгсәдлә јазылдығыны нәзәрә ал.

Ола билсин, јығынҹаг ҝөрүшүндә сөјләдијин фикирләри баҹы-гардашлар тәкрарлајаҹаглар. Сөзсүз ки, «һамымыз чох сәһв едирик» (Јаг. 3:2). Анҹаг јалныз дәгиг вә доғру мәлуматы чатдырмаға адәт етсән, јахшы нәтиҹәләр әлдә едәҹәксән. Теократик Хидмәт Мәктәбинә јазылмыш бир чох гардашлар вахт кечдикҹә ағсаггал тәјин олунурлар. Үзәринә белә мәсулијјәт гојулан инсанлардан «даһа чох» тәләб олунур (Лука 12:48). Әҝәр ағсаггал башысојуг јанашараг доғру олмајан мәсләһәт верәрсә вә бунун нәтиҹәсиндә јығынҹағын үзвләринин ҹидди проблеми јаранарса, бу, Аллаһын ондан наразы галмасына сәбәб ола биләр (Мат. 12:36, 37). Бу сәбәбдән, ағсаггал үчүн олан тәләбләрә ҹаваб верән гардаш ‘алдығы тәлимә ујғун вә етимада лајиг кәлама ҹидди риајәт етмәси’ илә танынмалыдыр (Тит. 1:9).

Диггәтли ол ки, чыхардығын нәтиҹәләр ‘сәһиһ сөзләрә’, јәни бүтөвлүкдә Мүгәддәс Јазылардакы һәгигәтә ујғун ҝәлсин (2 Тим. 1:13). Бундан горхуја дүшмәјә лүзум јохдур. Ола билсин, Мүгәддәс Китабы һәлә әввәлдән ахыраҹан охумамысан. Белә исә охумаға давам ет. Ејни заманда, ашағыдакы мәсләһәтләр сәнә өјрәдәркән истифадә етмәк истәдијин материалы тәһлил етмәјә көмәк едә биләр.

Биринҹиси, өзүндән соруш: «Бу материал Мүгәддәс Китабдан индијәдәк өјрәндикләримлә узлашырмы? Мәни динләјәнләри Јеһоваја јахынлашдыраҹаг, јохса дүнјанын мүдриклијини уҹалдараг, ону рәһбәр тутмаға онлары тәшвиг едәҹәк?» Иса демишди: «Сәнин сөзүн һәгигәтдир» (Јәһ. 17:17; Ганун. т. 13:1-5; 1 Кор. 1:19-21). Икинҹиси, садиг вә ағыллы гулун арашдырма апармаг үчүн тәгдим етдији вәсаитләрдән истифадә ет. Онлар сәнә нәинки ајәләри дүзҝүн баша дүшмәјә, һәм дә онлары неҹә тәтбиг етмәји изаһ едәндә таразлы вә узагҝөрән олмаға көмәк едәҹәк. Нитгини ‘сәһиһ сөзләрә’ әсасландырсан вә ајәләри Јеһованын тәгдим етдији вәсаитләр әсасында изаһ едиб, мөвзуја ујғунлашдырсан, сөјләдикләрин дәгиг вә доғру олаҹаг.

Мәлуматын дәгиг вә доғру олдуғуну јохла. Мүәјјән мәгамлары тәсвир вә изаһ едәркән ситат чәкмәк, ҹари һадисәләрдән нүмунә ҝәтирмәк вә ја киминләсә баш вермиш һадисәни данышмаг јарарлы ола биләр. Онларын доғрулуғуна неҹә әмин ола биләрсән? Үсуллардан бири бу кими мәлуматлары етибарлы мәнбәләрдән әлдә етмәкдир. Мәлуматын көһнәлмәдијини јохламағы да унутма. Статистик мәлуматлар көһнәлир; елми ачылышлар чох тез-тез бир-бирини әвәз едир; тарих вә гәдим дилләр дәриндән өјрәнилдикҹә әввәлки биликләрә әсасән чыхарылан нәтиҹәләри јенидән јохламаг лазым ҝәлир. Әҝәр гәзет, телевизор, радио, електрон почту вә ја Интернетдән алдығын мәлуматдан истифадә етмәји планлашдырырсанса, сон дәрәҹә еһтијатлы ол. Сүлејманын мәсәлләри 14:15 ајәси бизи хәбәрдар едир: «Ҹаһил һәр сөзә инанар, узагҝөрән һәр аддымына нәзәр салар». Өзүндән соруш: «Бу мәнбә нә дәрәҹәдә етибарлы һесаб едилир? Мәлуматы башга үсулла јохламаг мүмкүндүрмү?» Әҝәр мәлуматын доғрулуғуна шүбһә едирсәнсә, ондан истифадә етмә.

Мәнбәнин етибарлы олдуғуну јохламагла јанашы, мәлуматдан неҹә истифадә едәҹәјини дә диггәтлә дүшүн. Әмин ол ки, ситатлары вә статистик мәлуматлары онларын контекстинә ујғун истифадә едирсән. Һансыса фикри вурғуламаға чалышанда диггәтли ол ки, «бәзиләри» сөзү «әксәријјәт», «бир чоху» «һамы», «һәрдән» исә «һәмишә» олмасын. Һадисәни, рәгәмләри, мигјасы вә ја мөвзунун ҹиддилијини шиширтсән, өзүнү етибардан саларсан.

Әҝәр сән һәмишә дәгиг мәлумат чатдырырсанса, о заман һәгигәти севән инсан кими танынаҹагсан. Бу, үмумиликдә Јеһованын Шаһидләринин адыны уҹалдаҹаг. Ән ваҹиби исә «һәгигәт Аллаһы» олан Јеһоваја иззәт ҝәтирәҹәк (Мәз. 31:5, КМ).