Фәсил 12
Сәнин вәфтизинин мәнасы
1. Вәфтиз һәр биримизи нә үчүн марагландырмалыдыр?
ЕРАМЫЗЫН 29-ҹу илиндә Вәфтизчи Јәһја Исаны Иордан чајында суја батырмагла вәфтиз етди. Јеһова бу һадисәни ҝөјдән мүшаһидә едиб Өз разылығыны билдирди (Матта 3:16, 17). Иса вәфтиз олунмагла бүтүн ҝәләҹәк давамчылары үчүн нүмунә гојду. Үч ил јарым кечәндән сонра Иса шаҝирдләринә деди: «Ҝөјдә вә јер үзүндә бүтүн һакимијјәт Мәнә верилмишдир. Беләликлә, ҝедин, бүтүн халглары шаҝирдим един, онлары Ата, Оғул вә Мүгәддәс Руһ наминә вәфтиз един» (Матта 28:18, 19). Бәс сән, Исанын бу ајәдәки әмринә мүвафиг тәрздә вәфтиз олунмусанмы? Јохса һәлә һазырлашырсан?
2. Вәфтизлә әлагәдар һансы суаллара ҹаваб тапмалыјыг?
2 Вәфтиз олунуб-олунмамағындан асылы олмајараг, Јеһоваја хидмәт етмәк вә Онун салеһ јени дүнјасында јашамаг истәјән һәр бир шәхсин вәфтиз һаггында там анлајышы олмалыдыр. Биз ашағыдакы суаллара ҹаваб тапмалыјыг: бу ҝүн мәсиһчи вәфтизи Исанын вәфтизи кими ејни мәна дашыјыр? «Ата, Оғул вә Мүгәддәс Руһ наминә вәфтиз» олунмаг нә демәкдир? Мәсиһчи вәфтизинә мүвафиг јашамаг нә демәкдир?
Јәһја тәрәфиндән едилән вәфтиз
3. Јәһја кимләри вәфтиз едирди?
3 Исанын вәфтиз олунмасындан алты ај әввәл Вәфтизчи Јәһја Јәһудеја сәһрасында бу сөзләрлә тәблиғә башламышды: «Төвбә един, чүнки Сәмави Сәлтәнәт јахындыр» (Матта 3:1, 2). Јәһјаны динләјәнләр онун сөзләрини үрәкдән гәбул едирдиләр. Онлар ҝүнаһларыны бојнуна алыр, төвбә едир, Јәһјанын јанына ҝәлиб Иордан чајында вәфтиз олунурдулар. О вәфтиз јәһудиләр үчүн иди (Лука 1:13-16; Һәвариләрин ишләри 13:23, 24).
4. Биринҹи әсрдә јашамыш јәһудиләрә төвбә етмәк нәјә ҝөрә сон дәрәҹә зәрури иди?
4 Јәһудиләрә төвбә етмәк сон дәрәҹә зәрури иди. Ерамыздан әввәл 1513-ҹү илдә Сина дағында онларын әҹдадлары Исраил халгы Јеһова Аллаһла рәсми, тәнтәнәли әһд вә ја мүгавилә бағлады. Лакин онлар бөјүк ҝүнаһлар ишләдиб бу әһдин гаршысында ҝөтүрдүкләри өһдәликләри јеринә јетирмәдикләриндән һәмин әһд васитәсилә иттиһам едилдиләр. Исанын ҝүнләриндә јәһуди халгынын вәзијјәти чох ағыр иди. Малаки пејғәмбәрин габагҹадан сөјләдији Јеһованын «бөјүк вә дәһшәтли ҝүнү» артыг јахынлашырды. Һәмин ‘ҝүн’ ерамызын 70-ҹи илиндә ҝәлди. О вахт ромалылар Јерусәлими вә орадакы мәбәди дағыдыб милјондан чох јәһудини гырдылар. Һәгиги ибадәти ҹидди-ҹәһдлә горујан Вәфтизчи Јәһја Јеһоваја «һазырланмыш бир халг тәшкил етмәк» үчүн бу фәлакәтин габағынҹа ҝөндәрилмишди. Исраиллиләр Мусанын Ганунунун әһдинә гаршы ишләтдикләри ҝүнаһларындан төвбә етмәли вә онларын хиласындан өтрү Јеһованын јер үзүнә ҝөндәрдији Оғлу Иса Мәсиһи гәбул етмәјә һазырлашмалы идиләр (Малаки 4:4-6; Лука 1:17; Һәвариләрин ишләри 19:4).
5. а) Иса вәфтиз олунмаг үчүн Јәһјанын јанына ҝәләндә Јәһја нәјә ҝөрә етираз етди? б) Исанын вәфтизи һансы рәмзи мәна дашыјырды?
5 Иса да диҝәрләри кими вәфтиз олунмаг үчүн Јәһјанын јанына ҝәлди. Нәјә ҝөрә? Јәһја Исанын ҝүнаһсыз олдуғуну вә төвбәјә еһтијаҹы олмадығыны билдији үчүн деди: «Мән сәнин тәрәфиндән вәфтиз олмаға мөһтаҹам, сән исә мәним јанымамы ҝәлирсән?» Бәли, Исанын вәфтизи тамамилә башга рәмзи мәна дашыјырды. О Јәһјаја ҹаваб верди: «Индилик разы ол; чүнки беләҹә салеһ олан һәр шеји иҹра етмәк бизә јарашар» (Матта 3:13-15). Иса ҝүнаһсыз олдуғундан онун вәфтизи төвбәни билдирмирди. Артыг Аллаһа һәср едилмиш халгын нүмајәндәси олдуғу үчүн она Аллаһа һәср олунмаг да лазым дејилди. Иса вәфтиз олунанда онун отуз јашы варды. Онун вәфтизи маһијјәт бахымындан тарихдә јеҝанә олуб. Беләликлә, Исанын вәфтизи ҝөјдәки Атасынын ирадәсини јеринә јетирмәк үчүн Она һәср едилдијини билдирирди.
6. Иса Аллаһын нијјәтиндә она ајрылмыш рола нә дәрәҹәдә ҹидди јанашырды?
6 Аллаһын Иса илә бағлы ирадәси онун Падшаһлыг һаггында тәблиғ етмәсиндән ибарәт иди (Лука 8:1). Иса һәмчинин өз камил инсан һәјатыны һәм фидијә, һәм дә јени әһдин тәмәли кими гурбан вермәли иди (Матта 20:28; 26:26-28; Ибраниләрә 10:5-10). Иса, вәфтизинин маһијјәтини чох ҹидди гәбул едирди. О бош јерә вахтыны әһәмијјәтсиз ишләрә сәрф етмирди. Иса һәјатында әсас јери Аллаһын Падшаһлығы һаггындакы мүждәни јајмаға ајырмышды вә сон нәфәсинә кими Аллаһын ирадәсини јеринә јетирди (Јәһја 4:34).
Мәсиһчи шаҝирдләрин вәфтизи
7. Ерамызын 33-ҹү илинин Пентикост ҝүнүндән етибарән, шаҝирдләр вәфтизлә әлагәдар һансы тапшырығы јеринә јетирмәјә башладылар?
7 Исанын илк шаҝирдләри, Јәһја тәрәфиндән вәфтиз олунуб, сәмави Падшаһлығын ҝәләҹәк үзвләри кими онун јанына ҝәлирдиләр (Јәһја 3:25-30). Бу шаҝирдләр Исанын рәһбәрлији алтында диҝәрләрини вәфтиз едирдиләр. Онларын етдији вәфтиз дә Јәһјанын вәфтизи кими ејни мәна дашыјырды (Јәһја 4:1, 2). Ерамызын 33-ҹү илинин Пентикост ҝүнүндән етибарән, шаҝирдләр онлара верилмиш тапшырығы — «Ата, Оғул вә Мүгәддәс Руһ наминә» вәфтиз етмәк тапшырығыны јеринә јетирмәјә башладылар (Матта 28:19). Бу вәфтизин мәнасыны арашдырмағын бизә фајдасы олаҹаг.
8. ‘Ата наминә’ вәфтиз олунмаг нә демәкдир?
8 ‘Ата наминә’ вәфтиз олунмаг нә демәкдир? Бу, Аллаһын адыны, мөвгејини, сәлаһијјәтини, нијјәтини вә ганунларыны танымаг демәкдир. Ҝәлин бунлары бир-бир арашдыраг. 1) Аллаһын ады илә әлагәдар Јешаја 42:8 (КМ) ајәсиндә дејилир: «Мән Јеһовајам, исмим одур». 2) Онун мөвгеји һаггында 2 Падшаһлар 19:15 ајәсиндә јазылыб: ‘Аллаһ јалныз Сәнсән’. 3) Вәһј 4:11 ајәси Онун сәлаһијјәтини белә шәрһ едир: «Аллаһымыз [Јеһова] иззәти, һөрмәти вә гүдрәти алмаға лајигсән. Чүнки һәр шеји Сән јаратдын вә һәр шеј Сәнин ирадәнлә мөвҹуд олду вә јаранды». 4) Јеһова «һәјат мәнбәји»дир, Онун бизи ҝүнаһ вә өлүмдән хилас етмәк нијјәтиндә олдуғуну анламалыјыг: «Гуртулуш Рәбдәндир» (Мәзмур 3:8; 36:9). 5) Биз һәмчинин гәбул етмәлијик ки, Јеһова Али Ганунвериҹидир: «Рәбдир һаким олан, Рәбдир ганунумузу гојан, Падшаһымыз Рәбдир» (Јешаја 33:22). Бунларла әлагәдар бизә төвсијә едилир: «Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев» (Матта 22:37).
9. ‘Оғул наминә’ вәфтиз олунмаг нә демәкдир?
9 ‘Оғул наминә’ вәфтиз олунмаг нә демәкдир? Бу, Иса Мәсиһин адыны, мөвгејини вә сәлаһијјәтини танымағы билдирир. Исанын ады «Јеһова хиласдыр» мәнасыны дашыјыр. Ваһид Оғул — Аллаһын јаратдығы илк варлыг олдуғундан јүксәк мөвге тутур (Матта 16:16; Колослулара 1:15, 16). Бу Оғул һаггында Јәһја 3: 16 ајәсиндә дејилир: «Аллаһ дүнјаны [гуртулуша еһтијаҹы олан бәшәријјәти] елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун». Иса өләнәдәк садиг галдығы үчүн, Аллаһ ону дирилдиб даһа чох сәлаһијјәт верди. Һәвари Павелин дедији кими «Аллаһ Ону чох уҹалтды» вә инди Каинатда јалныз Јеһова Аллаһ ондан јүксәкдә дурур. Мәһз буна ҝөрә дә, ‘Исанын ады’ гаршысында һамы һөрмәтлә ‘диз чөкмәлидир’ (Филипилиләрә 2:9-11). Бу о демәкдир ки, биз Исанын Јеһовадан алдығы әмрләринә әмәл етмәлијик (Јәһја 15:10).
10. ‘Мүгәддәс Руһ наминә’ вәфтиз олунмаг һансы мәнаны дашыјыр?
10 ‘Мүгәддәс Руһ наминә’ вәфтиз олунмаг һансы мәнаны дашыјыр? Бу, мүгәддәс руһун ролуну вә фәалијјәтини танымағы билдирир. Бәс мүгәддәс руһ нәдир? Мүгәддәс руһ Аллаһын фәал гүввәсидир. Аллаһ онун васитәсилә Өз нијјәтләрини һәјата кечирир. Иса өз давамчыларына демишди: «Мән дә Атадан хаһиш едәҹәјәм ки, О, даим сизинлә бәрабәр олмаг үзрә сизә башга бир Тәсәлливериҹи версин. Бу, һәгигәт Руһудур» (Јәһја 14:16, 17). Мүгәддәс руһун сајәсиндә шаҝирдләр нә едә биләрдиләр? Бир гәдәр сонра Иса онлара белә демишди: «Мүгәддәс Руһ үзәринизә ендикдән сонра... гүдрәт алаҹагсыныз. Вә Јерусәлимдә, бүтүн Јәһудеја вә Самаријада, һәтта дүнјанын ән узаг јерләринә гәдәр Мәнә шаһид олаҹагсыныз» (Һәвариләрин ишләри 1:8). Бундан әлавә Јеһова мүгәддәс руһ васитәсилә Мүгәддәс Китабын јазылмасыны илһамландырмышды: «Пејғәмбәрлик һеч заман инсан ирадәсилә ҝәлмәмишдир. Лакин Аллаһын мүгәддәс инсанлары, Мүгәддәс Руһ тәрәфиндән һәрәкәтә ҝәтириләрәк данышырдылар» (2 Петер 1:21). Беләликлә, Мүгәддәс Китабы тәдгиг едәркән мүгәддәс руһун ролуну гәбул етдијимизи ҝөстәририк. Өзүмүздә «руһун сәмәрәси»ни — ‘мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик, өзүнә һаким олмағы’ јетишдирмәк үчүн Јеһовадан көмәк истәмәјимиз дә мүгәддәс руһун ролуну гәбул етдијимизи билдирир (Галатијалылара 5:22, 23).
11. а) Бизим ҝүнләрдә вәфтизин һәгиги мәнасы нәдир? б) Вәфтиз һансы мәнада өлүмә вә дирилмәјә бәнзәјир?
11 Исанын бу ҝөстәришинә әсасән ерамызын 33-ҹү илиндән башлајараг илк вәфтиз олунанлар јәһудиләр вә јәһуди динини гәбул етмиш гејри-јәһудиләр олмушлар. Бундан аз сонра самаријалылар Мәсиһин давамчысы олмаг шәрәфинә лајиг ҝөрүлдүләр. Даһа сонра ерамызын 36-ҹы илиндә сүннәтсиз халгларын нүмајәндәләринә дә бу ҹүр имкан верилди. Вәфтиз олунмаздан әввәл самаријалылар вә гејри-јәһудиләр Исанын шаҝирди кими хидмәт етмәк үчүн өзләрини Јеһоваја һәср етмәли идиләр. Мәсиһчи вәфтизи бу ҝүн дә ејни рәмзи мәна дашыјыр. Вәфтиз символик дәфн мәнасыны дашыдығы үчүн, бәдәнин бүтөвлүклә суја батырылмасы инсанын өзүнү Аллаһа һәср етмәсини чох ҝөзәл ифадә едир. Инсан суја батырыларкән көһнә һәјат тәрзи үчүн өлүр. Судан чыханда исә Аллаһын ирадәсини иҹра етмәк үчүн санки дирилир. Мәсиһин давамчысы олмаг истәјәнләрин һамысы бу ҹүр «вәфтиз» олунур вә Аллаһын тәјин едилмиш хидмәтчиси — Јеһованын Шаһиди олурлар (Ефеслиләрә 4:5; 2 Коринфлиләрә 6:3, 4).
12. Мәсиһчи вәфтизи нәјә бәнзәјир вә һансы мәнада?
12 Бу ҹүр вәфтиз Аллаһын ҝөзүндә бөјүк хиласедиҹи гүввәјә маликдир. Мәсәлән, һәвари Петер Дашгын заманы Нуһун өз аиләси илә хилас олундуғу ҝәминин тикилмәсини хатырлатдыгдан сонра белә јазмышды: «О су илә тәмсил едилән вә бәдәнин чиркини јумаг дејил, тәмиз виҹданын Аллаһ гаршысында тәәһһүдү [“Аллаһ гаршысында тәмиз виҹдан диләји”, КМ] олан вәфтиз, инди бизи Иса Мәсиһин дирилмәси илә хилас едир» (1 Петер 3:20, 21). Нуһун тикдији ҝәми онун Аллаһдан алдығы бүтүн тапшырыглары сәдагәтлә јеринә јетирдијинин сүбуту иди. Ҝәми тикилиб гуртардыгдан сонра «о заманкы дүнја... суларла боғулуб мәһв олду» (2 Петер 3:6). Ҹәми сәккиз нәфәр —Нуһ вә онун аиләси «судан сағ-саламат чыхды» (1 Петер 3:20).
13. Вәфтиз мәсиһчини нәдән хилас едир?
13 Өлүләрдән дирилмиш Мәсиһә иманын әсасында бу ҝүн өзләрини Јеһова Аллаһа һәср едәнләр буну вәфтизлә символизә едирләр. Онлар Аллаһын дөврүмүзә аид нијјәтини иҹра етдикләринә ҝөрә буҝүнкү пис дүнјадан хилас олунублар (Галатијалылара 1: 4). Бу пис систем мәһв олунанда онлара хәләл дәјмәјәҹәк, башга сөзлә десәк онлар мәһвдән гуртулаҹаглар. Аллаһ онлара артыг бу ҝүн тәмиз виҹдан верир. Һәвари Јәһја Аллаһын хидмәтчиләрини әмин едир: «Дүнја вә онун еһтирасы кечиб ҝедир, амма Аллаһын ирадәсини јеринә јетирән әбәди јашајыр» (1 Јәһја 2:17).
Өһдәликләримизә мүвафиг јашамаг
14. Нә үчүн вәфтиз өз-өзлүјүндә хиласа зәманәт вермир?
14 Вәфтизин өз-өзлүјүндә хиласа зәманәт вердијини дүшүнмәк дүзҝүн дејил. Инсан өзүнү Иса Мәсиһ васитәсилә Јеһова Аллаһа һәср едиб Онун ирадәсини иҹра едәрәк сона кими сәдагәтли галдығы һалда вәфтизин һәгиги дәјәри олаҹаг. Матта 24:13 ајәсиндә дејилир: «Ахыра гәдәр сәбр едән хилас олаҹагдыр».
15. а) Аллаһ вәфтиз олунмуш мәсиһчиләрдән нә ҝөзләјир? б) Мәсиһин давамчысы олмаг һәјатымызда һансы јери тутмалыдыр?
15 Исанын өз инсан һәјатыны неҹә јашамасы да Аллаһын онунла бағлы ирадәсинин тәркиб һиссәси иди. Өз һәјатыны гурбан ҝәтирмәк үчүн о өлмәли иди. Биз дә бәдәнимизи Аллаһа тәгдим етмәли вә Онун ирадәсини иҹра едәрәк өзүмүз үчүн јашамамалыјыг (Ромалылара 12:1, 2). Тәк-тәк һалларда белә, бу дүнја илә гәсдән ајаглашсаг вә ја шәхси мәнфәәтимизи ҝүдәрәк Аллаһа формал шәкилдә хидмәт етсәк, демәли биз Аллаһын ирадәсини иҹра етмирик (1 Петер 4:1-3; 1 Јәһја 2:15, 16). Бир јәһуди әбәди јашамаг үчүн нә етмәк лазым олдуғуну сорушанда Иса, јүксәк әхлаглы һәјат сүрмәклә јанашы, даһа мүһүм бир шеји, онун давамчысы олмағын зәрурилијини вурғулады. Бу, һәјатымызда ән әсас јери тутмалы, вар-дөвләт һәрислији ону һеч вахт сыхышдырмамалыдыр (Матта 19:16-21).
16. а) Бүтүн мәсиһчиләрә Падшаһлыгла бағлы һансы мәсулијјәт һәвалә едилиб? б) 116, 117-ҹи сәһифәләрдә Падшаһлыг һаггында хош хәбәри тәблиғ етмәјин һансы әлверишли үсуллары тәсвир едилиб? в) Тәблиғ ишиндә ҹанла-башла иштиракымыз нәдән хәбәр верир?
16 Тәкрарән гејд едәк ки, Аллаһын Исаја аид ирадәси Падшаһлыг һаггында тәблиғ етмәкдән ибарәт иди. Иса, Падшаһ олмаг үчүн мәсһ едилмишди. Буна бахмајараг о, јердә јашајанда Падшаһлыг һаггында әзмлә тәблиғ едирди. Бизә дә бу ҹүр тапшырыг верилиб вә бу тапшырығы ҹанла-башла јеринә јетирмәлијик. Бу јолла биз Јеһованын һөкмранлығына ҝөрә миннәтдарлығымызы вә инсанлары севдијимизи ҝөстәририк (Матта 22:36-40). Биз һәмчинин, јер үзүндә Падшаһлығы тәблиғ едән Јеһованын бүтүн хидмәтчиләри илә јекдил олдуғумузу нүмајиш етдиририк. Үмумдүнја гардашлығымызла бирликдә, биз Падшаһлығын јер үзүндә бәрпа едәҹәји Ҹәннәтдә әбәди һәјата говушмаға ҹан атырыг.
Тәкрар үчүн суаллар
• Исанын вәфтизинин вә бизим ҝүнләрдә едилән вәфтизин һансы охшар вә фәргли ҹәһәтләри вардыр?
• «Ата, Оғул вә Мүгәддәс Руһ наминә» вәфтиз олунмаг нә демәкдир?
• Мәсиһчи вәфтизинин үзәримизә гојдуғу мәсулијјәтә мүвафиг јашамаг нәји билдирир?
[116, 117-ҹи сәһифәләрдәки шәкилләр]
ПАДШАҺЛЫГ ҺАГГЫНДА ТӘБЛИҒ ЕТМӘЈИН ҮСУЛЛАРЫ
Гоһумлара
Иш јолдашларына
Мәктәб јолдашларына
Күчәдә
Евдән-евә
Мараглананлара тәкрар баш чәкмәк
Инсанларла Мүгәддәс Китабы өјрәнмәк