Фәсил 15
Нәсиһәтә гулаг ас, тәрбијәни гәбул ет
1. а) Нә үчүн һамымыз нәсиһәт вә тәрбијәјә еһтијаҹ дујуруг? б) Һансы суалын үзәриндә дүшүнмәлијик?
МҮГӘДДӘС КИТАБДА јазылыб ки, «һамымыз чох сәһв едирик» (Јагуб 3:2). Доғрудан да Аллаһын Кәламында дејиләнләрә зидд һәрәкәт етдијимиз чох һаллар олуб. Она ҝөрә дә Мүгәддәс Китаб «нәсиһәтә гулаг ас, тәрбијәни гәбул ет, бунун нәтиҹәсиндә һикмәтли оларсан» дејәркән һаглыдыр (Сүлејманын мәсәлләри 19:20). Шүбһәсиз, һәјатымызы Мүгәддәс Китаб тәлимләринә ујғунлашдырмаг үчүн артыг мүәјјән дәјишикликләр етмишик. Бәс һәмиманлымыз конкрет бир мәсәлә илә бағлы бизә мәсләһәт верәндә буна неҹә мүнасибәт ҝөстәририк?
2. Бизә мәсләһәт вериләндә нә етмәлијик?
2 Мәсләһәт вериләндә бәзиләри өзләрини тәмизә чыхартмаға, мәсәләнин ҹиддилијини азалтмаға вә јахуд да ҝүнаһы башгаларынын бојнуна јыхмаға чалышырлар. Амма мәсләһәтә гулаг асыб она әмәл етмәк бизим хејримизәдир (Ибраниләрә 12:11). Әлбәттә, башгаларындан камиллик ҝөзләмәмәлијик. Һәр хырда шеј үчүн јахуд да Мүгәддәс Китабын ихтијарымыза бурахдығы мәсәләләрә ҝөрә дәгигә башы мәсләһәт вермәк дә лазым дејил. Бундан әлавә, мәсләһәт верән адам јәгин бүтүн фактлары нәзәрә алмајыб, белә олдугда онлары һәмин адамын диггәтинә һөрмәтҹил формада чатдырмаг олар. Бу фәсилдә исә јериндә верилмиш вә Мүгәддәс Китаба әсасланмыш мәсләһәтләрдән сөһбәт ҝедәҹәк. Белә мәсләһәтләрә неҹә мүнасибәт бәсләмәлијик?
Ибрәтамиз нүмунәләр
3, 4. а) Мүгәддәс Китабдакы һансы мәлумат мәсләһәт вә ислаһа дүзҝүн јанашмағымыза көмәк едә биләр? б) Шаул падшаһ мәсләһәтә неҹә мүнасибәт ҝөстәрди вә бунун нәтиҹәси нә олду?
3 Аллаһын Кәламында мәсләһәт алмыш бир нечә адам һаггында јазылыб. Онлардан бәзиләрини һәтта ислаһ етмәк лазым ҝәлмишдир. Белә адамлардан бири Исраилин падшаһы Шаул олуб. Шаул Јеһованын Амалег халгы илә әлагәдар әмринә әмәл етмәмишди. Амалеглиләр Аллаһын хидмәтчиләринә гаршы дүшмәнчилик етдикләри үчүн Јеһова бу халгын өзүнү вә онун мал-гарасыны мәһв етмәк һөкмү вермишди. Шаул исә онларын падшаһыны вә әтли-ҹанлы һејванлары горујуб сахлады (1 Шамуел 15:1-11).
4 Јеһова Шамуел пејғәмбәри ҝөндәриб Шаулу мәзәммәт етди. Шаул буна неҹә мүнасибәт ҝөстәрди? О өзүнә бәраәт газандырараг деди ки, амалеглиләри дармадағын едиб, тәкҹә онларын падшаһыны өлдүрмәјиб. Мәһз елә бу Јеһованын әмринә зидд иди (1 Шамуел 15:20). Мал-гараны мәһв етмәмәкдә халгы ҝүнаһландырды: «Халгдан горхуб онларын сөзүнә гулаг асдым» (1 Шамуел 15:24). Шаул даһа чох өз нүфүзунун гејдинә галырды вә һәтта Шамуелдән халгын гаршысында она һөрмәт ҝөстәрмәсини хаһиш етди (1 Шамуел 15:30). Нәтиҹәдә, Јеһова бу падшаһы рәдд етди (1 Шамуел 16:1).
5. Мәсләһәти рәдд етдији үчүн Уззија падшаһла нә баш верди?
5 Јәһуда падшаһы Уззија «Аллаһы Рәббә гаршы хаинлик едәрәк... бухур јандырмаг үчүн Рәббин мәбәдинә дахил олду» (2 Салнамәләр 26:16). Гануна ҝөрә бухуру јалныз каһинләр јандыра биләрди. Баш каһин падшаһы сахламаг истәјәндә, падшаһ бәрк гәзәбләнди. Бу һадисәнин ахыры нә илә нәтиҹәләнди? Мүгәддәс Китабда дејилир: «Алнындан ҹүзама тутулду... чүнки Рәбб она бәла ҝөндәрмишди. Падшаһ Уззија өлүм ҝүнүнә гәдәр ҹүзамлы галды» (2 Салнамәләр 26:19-21).
6. а) Шаул вә Уззија нә үчүн мәсләһәти рәдд етдиләр? б) Мәсләһәтә гулаг асмамаг нә үчүн бу ҝүн дә ҹидди проблем олараг галыр?
6 Нә үчүн Шаула вә Уззијаја мәсләһәти гәбул етмәк чәтин иди? Чүнки онлар тәкәббүрлү, јәни өзләри һагда чох јүксәк фикирдә идиләр. Бу хүсусијјәтин уҹбатындан бир чох адам өз башына бәла ачыр. Беләләри дүшүнүр ки, мәсләһәти гәбул етмәклә аҹизлик ҝөстәрәҹәк вә нүфузларына хәләл ҝәтирәҹәкләр. Әслиндә исә тәкәббүр зәифликдир. Бу хүсусијјәт инсанын дүшүнҹәсини елә корлајыр ки, о артыг Јеһованын Өз Кәламы вә тәшкилаты васитәсилә вердији көмәји гәбул етмәкдә чәтинлик чәкир. Буна ҝөрә дә Јеһова хәбәрдарлыг едир: «Әҹәлдән әввәл тәкәббүр ҝәләр, фәлакәтдән әввәл ловғалыг руһу ҝәләр» (Сүлејманын мәсәлләри 16:18; Ромалылара 12:3).
Нәсиһәти гәбул един
7. Мусанын мәсләһәтә һај вермәсиндән биз һансы ибрәти ала биләрик?
7 Мүгәддәс Јазыларда мәсләһәтә әмәл етмиш инсанларын да нүмунәләри вар. Бу тәгдирәлајиг нүмунәләр бизә чох шеј өјрәдә биләр. Ҝәлин Мусанын нүмунәсинә бахаг. Гајынатасы Мусаја ағыр, мәсулијјәтли вәзифәсинин өһдәсиндән ҝәлмәк үчүн мәсләһәт вермишди. Муса ону динләјиб мәсләһәтә дәрһал әмәл етди (Чыхыш 18:13-24). Бөјүк сәлаһијјәт саһиби олмасына бахмајараг, мәсләһәтә һај вермәкдә Мусаја нә көмәк етди? Онун тәвазөкарлығы. «Муса јер үзүндә јашајан бүтүн адамлардан даһа һәлим бир инсан иди» (Сајлар 12:3). Һәлимлик нә дәрәҹәдә ваҹибдир? Сефанја 2:3 ајәсиндән ҝөрүндүјү кими, бизим һәјатымыз бундан асылыдыр.
8. а) Давуд һансы ҝүнаһлары ишләтмишди? б) Давуд Натанын мәзәммәтинә неҹә мүнасибәт ҝөстәрди? в) Давудун ҝүнаһлары нәјә ҝәтириб чыхарды?
8 Давуд падшаһ Бат-Шева адлы гадынла зина етмиш вә сонра ҝүнаһыны өрт-басдыр етмәк үчүн онун әри Уријаны өлдүртмүшдү. Јеһова Натан пејғәмбәри Давудун јанына ҝөндәриб ону мәзәммәт етди. Давуд үрәкдән төвбә етди вә Јеһоваја гаршы ҝүнаһ ишләтдијини бојнуна алды (2 Шамуел 12:13). Сәмими гәлбдән төвбә етдији үчүн Аллаһ Давуду бағышлады, амма ону хәбәрдар етди ки, ҝүнаһынын ағыр нәтиҹәләри олаҹаг. Аллаһ деди ки, ‘гылынҹ онун евиндән ајрылмајаҹаг’, ‘арвадлары јахынына вериләҹәк’ вә зинадан доғулан «ушаг өләҹәк» (2 Шамуел 12:10, 11, 14).
9. Мәсләһәт аланда вә јахуд ислаһ олунанда нәји унутмамалыјыг?
9 Давуд падшаһ ағыллы мәсләһәтин хејрини јахшы билирди. Бир дәфә о мәсләһәт верән адама ҝөрә Аллаһа миннәтдарлығыны билдирмишди (1 Шамуел 25:32-35). Биз дә мәсләһәтә бу ҹүр рәғбәт бәсләјирикми? Белә олдугда сонрадан пешманчылыға сәбәб олаҹаг бир чох сөз вә ја һәрәкәтләрдән өзүмүзү горујаҹағыг. Бәс вәзијјәт мәсләһәтдән әлавә, ислаһ олунмағымызы да тәләб едирсә, онда неҹә? Ҝәлин јаддан чыхармајаг ки, бу, Јеһованын мәһәббәтинин тәзаһүрүдүр вә бизим әбәди хејримиз үчүндүр (Сүлејманын мәсәлләри 3:11, 12; 4:13).
Ҝөзәл кејфијјәтләр јетишдирин
10. Иса Падшаһлыға ҝирмәк истәјәнләр үчүн һансы кејфијјәтин зәрурилијини вурғулады?
10 Јеһова вә һәмиманлыларымызла јахшы мүнасибәтдә олмаг үчүн мүәјјән кејфијјәтләр јетишдирмәлијик. Иса бир ушағы шаҝирдләринин арасына чәкәрәк демишди: «Әҝәр сиз дөнүб көрпә ушаглар кими олмасаныз, Сәмави Сәлтәнәтә әсла ҝирә билмәзсиниз. Беләликлә, бу ушаг гәдәр өз-өзүнү алчалдан, Сәмави Сәлтәнәтин ән бөјүјүдүр» (Матта 18:3, 4). Исанын шаҝирдләриндә тәвазөкарлыг чатышмырды, белә ки, онлар өз араларында кимин ән бөјүк олмасы һагда мүбаһисә едирдиләр (Лука 22:24-27).
11. а) Кимин гаршысында тәвазөкар олмалыјыг вә нәјә ҝөрә? б) Тәвазөкар инсан мәсләһәтә неҹә һај верир?
11 Һәвари Петер јазырды: «Һамыныз бир-биринизә табе олараг тәвазөкарлыг палтары ҝејинин. Чүнки Аллаһ мәғрурлара гаршы дурур, тәвазөкарлара исә лүтф верир» (1 Петер 5:5). Бу ајәдән ҝөрүнүр ки, јалныз Аллаһ гаршысында тәвазөкар олмагла иш битмир, биз ҝәрәк һәмиманлыларымыз гаршысында да тәвазөкар олаг. Белә һалда, баҹы-гардашларымыз бизә ағыллы мәсләһәт верәндә биз инҹимәјәҹәк, әксинә онлардан нүмунә ҝөтүрәҹәјик (Сүлејманын мәсәлләри 12:15).
12. а) Һансы кејфијјәт тәвазөкарлыгла сых бағлыдыр? б) Давранышымызын башгаларына неҹә тәсир ҝөстәрмәси бизи нә үчүн нараһат етмәлидир?
12 Тәвазөкарлыг гајғыкешликлә сых бағлыдыр. Һәвари Павел јазмышды: «Һәр кәс өзүнүн мәнфәәтини дејил, башгасынынкыны ахтарсын... Беләликлә, јејирсинизсә, ичирсинизсә, нә едирсинизсә, һәр шеји Аллаһын иззәти үчүн един. Нә јәһудиләрин, нә јунанларын, нә дә ки, Аллаһын ҹәмијјәтинин бүдрәмәсинә сәбәб олун» (1 Коринфлиләрә 10:24-33). Павел бизи бүтүн истәкләримиздән имтина етмәјә чағырмырды. О бизи киминсә виҹданынын јол вермәдији аддымы атмаға тәһрик едәҹәк һәрәкәтдән чәкиндирирди.
13. Мүгәддәс Јазыларын мәсләһәтләринә әмәл едиб-етмәмәјимиз һансы нүмунәдән ҝөрүнүр?
13 Өзүндән габаг башгаларыны дүшүнүрсәнми? Һәр биримиз буну өјрәнмәлијик. Буну мүхтәлиф јолларла етмәк олар. Мисал үчүн хариҹи ҝөркәми ҝөтүрәк. Мүгәддәс Јазыларда дејилир ки, мәсиһчинин ҝөркәми әдәбли, тәмиз вә сәлигәли олмалыдыр. Галан шејләр исә зөвгдән асылыдыр. Тутаг ки, сәнин хариҹи ҝөркәмин јашадығын әразидә гәбул едилмиш нормаларла ујушмур вә адамларын Падшаһлыг хәбәрини динләмәсинә мане олур. Бу һалда, ҝөркәминә дәјишиклик едәҹәксән? Әлбәттә, кимәсә әбәди һәјата наил олмаға көмәк етмәк шәхси истәкләримиздән гат-гат үстүндүр.
14. Тәвазөкарлыг вә гајғыкешлик нә үчүн ваҹибдир?
14 Шаҝирдләринин ајағыны јумагла Иса тәвазөкарлыг вә гајғыкешлик нүмунәси гојду (Јәһја 13:12-15). Аллаһын Кәламында Иса һаггында дејилир: «Мәсиһ Исада олан фикир сизин аранызда да олсун. Аллаһ сурәтиндә олдуғу һалда... Өзүнү һеч едәрәк Өзүнү гул сурәтинә салыб, инсанлара охшар олду. Ҝөркәм етибарилә дә инсан кими, О Өз тәвазөкарлығыны ҝөстәрди вә өлүмәдәк... итаәткарлыг етди» (Филипилиләрә 2:5-8; Ромалылара 15:2, 3).
Јеһованын тәрбијәсини рәдд етмәјин
15. а) Аллаһын бәјәндији инсан олмаг үчүн һәјатымызда һансы дәјишикликләри етмәлијик? б) Јеһова нәјин васитәсилә бизә нәсиһәт вә тәрбијә верир?
15 Ҝүнаһлы олдуғумуздан Аллаһымызын кејфијјәтләрини һәјатымызда әкс етдирмәк үчүн бизә бахышларымызы вә давранышымызы дәјишмәк лазым ҝәлир. Биз «јени мәнлији» ҝејмәлијик (Колослулара 3:5-14). Нәсиһәт вә тәрбијә бизә һансы саһәләрдә јахшылашмағын лазым олдуғуну мүәјјән етмәјә вә буну неҹә етмәји баша дүшмәјә көмәк едир. Әсас тәлим мәнбәјимиз Мүгәддәс Китабдыр (2 Тимотејә 3:16, 17). Јеһованын тәшкилатынын һазырладығы Мүгәддәс Китаба әсасланан нәшрләр вә јығынҹаг ҝөрүшләри Аллаһын Кәламындакы мәсләһәтләрә әмәл етмәкдә бизә көмәк едир. Верилән мәсләһәт бизә артыг таныш олса белә, онун бизим үчүн фајдалы олдуғу илә разылашыб она әмәл едәҹәјик?
16. Јеһова шәхсән һәр биримизә һансы көмәји ҝөстәрир?
16 Јеһова мәһәббәтлә гајғымыза галыр вә чәтинликләрин өһдәсиндән ҝәлмәјимизә көмәк едир. Милјонларла адам Мүгәддәс Китабы өјрәнмәклә артыг белә көмәк алмышдыр. Валидејнләр ушагларына нәсиһәт вә тәрбијә вермәклә онлары бир чох бәладан горујурлар (Сүлејманын мәсәлләри 6:20-23). Јығынаҹагда баҹы вә гардашлар тәблиғдә пүхтәләшмәк үчүн даһа тәҹрүбәли тәблиғчиләрдән мәсләһәт истәјирләр. Ағсаггаллар да бир-бириндән вә ја тәҹрүбәли тәблиғчиләрдән мәсләһәт алырлар. Руһани ҹәһәтдән габилијјәтли гардашлар еһтијаҹы оланлара һәлимликлә руһани јардым ҝөстәрирләр. Әҝәр сән дә кимәсә мәсләһәт верирсәнсә, «јолдан чыхарылмамаг үчүн өзүнә фикир вер» (Галатијалылара 6:1, 2). Бәли, тәк һәгиги Аллаһа бирликдә ибадәт етмәк үчүн һамымыз нәсиһәт вә тәрбијәјә еһтијаҹ дујуруг.
Тәкрар үчүн суаллар
• Јеһова бизим һансы дәјишикликләрә еһтијаҹ дујдуғумузу ҝөрмәјимизә мәһәббәтлә неҹә көмәк едир?
• Нәјә ҝөрә бир чохлары мәсләһәт гәбул етмәкдә чәтинлик чәкир вә бу нә дәрәҹәдә ҹидди проблемдир?
• Мәсләһәти гәбул етмәјә һансы кејфијјәтләр көмәк едә биләр вә Иса бунунла бағлы бизә һансы нүмунәни гојуб?
[142-ҹи сәһифәдәки шәкилләр]
Уззија мәсләһәти рәдд етди вә ҹүзама тутулду
Муса Јетронун мәсләһәтинә әмәл едиб хејир тапды