Фәсил 16
«Бир-биринизә ҹошғун мәһәббәтиниз олсун»
1. Јеһованын Шаһидләринин ҝөрүшләринә тәзә ҝәлән адамлара адәтән нә ҝүҹлү тәсир бағышлајыр?
ЈЕҺОВАНЫН ШАҺИДЛӘРИНИН јығынҹаг ҝөрүшләринә тәзә ҝәлән адамлара јығынҹагда һөкм сүрән мәһәббәт ҝүҹлү тәсир бағышлајыр. Бу адамлар мәһәббәтин тәзаһүрүнү јығынҹаг үзвләринин онлара гаршы сәмими рәфтарында вә бир-бири илә меһрибан үнсијјәтиндә ҝөрүрләр. Конгресләримизә ҝәләнләрин дә нәзәрини мәһәббәт ҹәлб едир. Бир мүхбир конгрес барәсиндә белә јазмышды: «Мән конгресдә сәрхош вә наркотик маддә гәбул етмиш бир адам ҝөрмәдим. Һај-күј, чығырты ешитмәдим. Басабас јох иди. Һеч кәс сөјүш сөјмүр, әдәбсиз вә налајиг зарафат етмирди. Һавада сигарет түстүсү јох иди. Оғурлуг јох иди. Јердә бош банкалар јох иди. Лап гејри-ади бир мәнзәрә иди!» Бүтүн бунлар ‘кобуд давранмајан, өз мәнфәәтини ахтармајан’ мәһәббәтдән бәһс едир (1 Коринфлиләрә 13:4-8).
2. а) Вахт кечдикҹә мәһәббәтимиз неҹә долғунлашыр? б) Мәсиһдән нүмунә ҝөтүрәрәк биз нә ҹүр мәһәббәт јетишдирмәлијик?
2 Гардашлыг мәһәббәти һәгиги мәсиһчиләрин сәҹијјәви әламәтидир (Јәһја 13:35). Руһани ҹәһәтдән јеткинләшдикҹә, мәһәббәтимиз даһа да долғунлашыр. Һәвари Павел мәсиһчи гардашларынын мәһәббәтинин ҝетдикҹә даһа да артмасы үчүн дуа едирди (Филипилиләрә 1:9). Һәвари Јәһја исә демишди ки, мәсиһчи өз гардашыны фәдакарлыгла севмәлидир: «Биз мәһәббәти бунда дәрк етдик ки, Мәсиһ Өз ҹаныны бизим үчүн фәда верди. Биз дә өз ҹанларымызы гардашларымыз үчүн фәда етмәлијик» (1 Јәһја 3:16; Јәһја 15:12, 13). Бәс лазым ҝәлсә, гардашларымыз үчүн ҹанымызы фәда едәрикми? Һәрчәнд, чох һалларда буна еһтијаҹ олмур, амма өзүмүздән соруша биләрик: мәним үчүн нараһатчылыг јаратса да, гардашларымын көмәјинә ҝәлмәк үчүн әлимдән ҝәләни едирәмми?
3. а) Севҝимизи даһа долғун неҹә ифадә едә биләрик? б) Нәјә ҝөрә индидән бир-биримизи ҹошгун мәһәббәтлә севмәлијик?
3 Фәдакарлыгла ҝөрдүјүмүз әмәлләрлә јанашы, гардашларымыза гаршы меһрибан, сәмими олмалыјыг. Аллаһын Кәламы бизи тәшвиг едир: «Гардашлыг севҝиси илә бир-биринизи шәфгәтлә севин» (Ромалылара 12:10). Һәр биримиз мүәјјән адамлара гаршы бу ҹүр һиссләр дујуруг. Бәс башгаларыны да бу ҹүр нәвазишлә севә биләрдикми? Бу көһнә системин сону јахынлашдыгҹа, мәсиһчи баҹы-гардашларымызла даһа да меһрибан олмалыјыг. Мүгәддәс Китабда дејилир: «Һәр шејин ахыры јахындыр... Һәр шејдән әввәл бир-биринизә ҹошғун мәһәббәтиниз олсун, чүнки мәһәббәт бир чох ҝүнаһын үстүнү өртәр» (1 Петер 4:7, 8).
Чәтинликләр јарананда
4. а) Јығынҹаг үзвләри арасында сөз-сөһбәт нәдән јарана биләр? б) Мүгәддәс Китабдакы мәсләһәтләрә әмәл етмәјә һәмишә мејлли олмасаг да, буну етсәк һансы хејири тапаҹағыг?
4 Гејри-камиллик уҹбатындан арабир башгаларынын хәтринә дәјирик. Гардашларымызын да бизә гаршы мүхтәлиф сәһвләри ола биләр (1 Јәһја 1:8). Белә вәзијјәтдә нә етмәк олар? Мүгәддәс Јазыларда бу һагда төвсијәләр верилир. Интәһасы, биз, гејри-камил инсанлар орада јазыланлара риајәт етмәјә мејлли олмаја биләрик (Ромалылара 7:21-23). Буна бахмајараг, Мүгәддәс Китаб мәсләһәтинә ҹанла-башла әмәл етмәјимиз, Јеһованы сәмими гәлбдән севиндирмәк истәдијимизи ҝөстәрир. Бу, мәһәббәтимизин даһа долғун олмасына көмәк едәҹәк.
5. Кимсә хәтримизә дәјәндә, нә үчүн әвәз чыхмамалыјыг?
5 Бәзән адамлар онлары инҹидәнләрдән әвәз чыхмаг истәјирләр. Амма бу, вәзијјәти даһа да ағырлашдырыр. ‘Гисасы’ Аллаһын өһдәсинә бурахмаг лазымдыр (Сүлејманын мәсәлләри 24:29; Ромалылара 12:17-21). Диҝәрләри тәгсиркары данышдырмырлар. Амма биз һәмиманлыларымызла белә рәфтар етмәмәлијик, чүнки ибадәтимизин Аллаһа мәгбул олуб-олмамасы мүәјјән дәрәҹәдә гардашларымыза бәсләдијимиз мәһәббәтдән асылыдыр (1 Јәһја 4:20). Павел бунунла бағлы јазмышды: «Бир-биринизә тәһәммүл един вә биринизин диҝәриндән шикајәти варса, бағышласын. Мәсиһ [“Јеһова”, ЈД] сизи бағышладығы кими, сиз дә бир-биринизи бағышлајын» (Колослулара 3:13). Бәс сән буну баҹарырсан?
6. а) Гардашларымызы нечә дәфә бағышламалыјыг? б) Нәји анласаг, бизә гаршы ҝүнаһ ишләдән адамы бағышлаја биләҹәјик?
6 Тутаг ки, бир адам бизә гаршы дәфәләрлә ҝүнаһ ишләдир. Амма бу ҝүнаһлар о дәрәҹәдә ҹидди дејил ки, онлара ҝөрә инсаны јығынҹагдан кәнар етсинләр. Белә һалда нә етмәли? Һәвари Петер бу ҹүр хырда ҝүнаһлары нәзәрдә тутараг белә гәнаәтә ҝәлмишди ки, тәгсиркары једди дәфәјә гәдәр бағышламаг олар. Амма Иса «једди дәфә јох, јетмиш кәрә једди дәфә» бағышламағы сөјләди. Иса, Аллаһ гаршысындакы борҹумузун киминсә бизә олан борҹундан гат-гат бөјүк олдуғуну вурғулады (Матта 18:21-35). Өзүмүз дә дәрк етмәдән һәр ҝүн Аллаһ гаршысында сөздә вә фикирдә, егоист һәрәкәтлә, бәзән дә өһдәмизә дүшән иши ҝөрмәмәклә ҝүнаһ ишләдирик (Ромалылара 3:23). Бүтүн бунлара бахмајараг, Аллаһ бизимлә һәлә дә мәрһәмәтлә давраныр (Мәзмур 103:10-14; 130:3, 4). О истәјир ки, биз дә бир-биримизлә ејни шәкилдә рәфтар едәк (Матта 6:14, 15; Ефеслиләрә 4:1-3). Бу һалда биз ‘писликләрин һесабыны тутмајан’ мәһәббәт тәзаһүр етдирәҹәјик (1 Коринфлиләрә 13:4, 5; 1 Петер 3:8, 9).
7. Һәр һансы бир гардаш вә ја баҹы биздән инҹијәндә нә етмәлијик?
7 Бәзән һәмиманлымызын биздән инҹидијини һисс едирик, һалбуки, арамызда һеч бир сөз-сөһбәт олмајыб. Белә һалда 1 Петер 4:8 ајәсиндә төвсијә едилдији кими, бу мәсәләнин үстүнү мәһәббәтлә өртмәк јахшы оларды. Һәмчинин һәмиманлымызла данышмаға тәшәббүс ҝөстәриб мүнасибәтләримизи бәрпа етмәјә чалыша биләрик (Матта 5:23, 24).
8. Һәмиманлымыз бәзи һәрәкәтләри илә бизи әсәбиләшдирәндә нә етмәлијик?
8 Бәзән бир мәсиһчи өз һәрәкәтләри илә јалныз сәни дејил, башгаларыны да әсәбиләшдирир. Бәлкә онунла сөһбәт едәсән? Сәни нараһат едән шејләри она һөрмәтҹил тәрздә десән, бунун јахшы нәтиҹәси ола биләр. Амма әввәлҹә өзүндән соруш: гардашым Мүгәддәс Китаба зидд бир иш ҝөрүрмү? Бәлкә арамыздакы чәтинлик башга-башга мүһитдә бөјүдүјүмүз вә алдығымыз мүхтәлиф тәрбијәјә ҝөрә јараныб? Еһтијатлы ол ки, өзүндән гајда-ганун јарадыб адамлары мүһакимә етмәјәсән (Јагуб 4:11, 12). Јеһова үзҝөрәнлик етмир вә ҹүрбәҹүр инсанлары гәбул едиб тәмкинлә онларын руһаниҹә јеткинләшмәләрини ҝөзләјир.
9. а) Јығынҹагда ағыр ҝүнаһ һаллары илә ким мәшғул олур? б) Һансы һалларда вә һансы мәгсәдлә зәрәр чәкмиш адам тәгсиркара өзү биринҹи јанашмалыдыр?
9 Әҝәр јығынҹагда кимсә ағыр ҝүнаһ ишләдир, мәсәлән әхлагсызлыг едирсә, дәрһал тәдбир ҝөрмәк лазымдыр. Бу ишлә ким мәшғул олур? Ағсаггаллар (Јагуб 5:14, 15). Амма кимәсә гаршы ҝүнаһ ишләдиләндә, мисал үчүн, ишҝүзар мәсәләләрин һәллиндә вә ја кимсә дили илә башгасына зәрәр ҝәтирәндә, зәрәр чәкмиш адам өзү тәгсиркара јахынлашыб бу мәсәләни онунла тәкликдә һәлл етмәлидир (Матта 18:15). Әҝәр мәсәлә һәлл олунмазса, онда Матта 18:16, 17 ајәләриндә дејилән аддымлары атмаг лазымдыр. Тәгсиркар гардаша гаршы мәһәббәт вә ону ‘газанмаг’ истәји, бизи о гардашын үрәјинә јол тапмаға сөвг едәҹәк (Сүлејманын мәсәлләри 16:23).
10. Јаранмыш проблемә дүзҝүн јанашмагда бизә нә көмәк едә биләр?
10 Бөјүклүјүндән-кичиклијиндән асылы олмајараг, јаранмыш проблемә Јеһованын ҝөзләри илә бахмағын бизә көмәји дәјәр. Аллаһа үмумијјәтлә һеч бир ҝүнаһ мәгбул дејил, ағыр ҝүнаһ ишләдиб төвбә етмәјәнләр вахты ҝәләндә Аллаһын тәшкилатындан хариҹ едиләҹәкләр. Амма унутмајаг ки, биз һамымыз хырда ҝүнаһлар ишләдирик, она ҝөрә дә Аллаһын бөјүк сәбринә вә мәрһәмәтинә еһтијаҹымыз вар. Јеһова бу јолла бизә нүмунә гојур ки, диҝәрләри ҝүнаһ ишләдәндә биз Онун нүмунәсини тәглид едәк. Мәрһәмәт ҝөстәрмәклә биз Аллаһын мәһәббәтини әкс етдиририк (Ефеслиләрә 5:1, 2).
«Үрәјинизи ҝенишләндирмәк» үчүн имканлар ахтарын
11. Һәвари Павел Коринфдәки мәсиһчиләри нә үчүн ‘үрәкләрини ҝенишләндирмәјә’ чағырырды?
11 Һәвари Павел бир нечә ај әрзиндә Јунаныстанын Коринф шәһәриндәки јығынҹағы мөһкәмләндирирди. Павел орадакы гардашлары севдији үчүн ҹанла-башла онлара көмәк едирди. Амма бәзиләри она гаршы меһрибанчылыг јох, кәскин тәнгиди әһвал-руһијјә бәсләјирдиләр. Павел онлара инҹә һиссләрини ифадә етмәк үчүн ‘үрәкләрини ҝенишләндирмәји’ төвсијјә едирди (2 Коринфлиләрә 6:11-13, И–93; 12:15). Јахшы оларды ки, һәр биримиз башгаларына нә дәрәҹәдә мәһәббәт бәсләдијимиз үзәриндә дүшүнәк вә ‘үрәјимизи ҝенишләндирмәјә’ имканлар ахтараг (1 Јәһја 3:14).
12. Јығынҹағын һәр бир үзвүнә гаршы мәһәббәтимизи неҹә артыра биләрик?
12 Јығынҹагда достлуг мүнасибәти гурмагда чәтинлик чәкдијимиз адамлар вармы? Хасијјәтимиз арасындакы фәргләрә фикир вермәсәк мүнасибәтимиз јәгин ки, јахшылашаҹаг. Ахы биз дә башгаларындан өзүмүзә гаршы белә мүнасибәт ҝөзләјирик. Онларын јахшы ҹәһәтләрини ҝөрмәјә вә гијмәтләндирмәјә чалышсаг, бу адамларла даһа меһрибан олаҹағыг. Бунун сајәсиндә онлара гаршы мәһәббәтимиз шүбһәсиз артаҹаг (Лука 6: 32, 33, 36).
13. Јығынҹаг үзвләринә мәһәббәт ҝөстәрмәк үчүн үрәјимизи неҹә ҝенишләндирә биләрик?
13 Сөзсүз, һәр бир адама шәхси мараг ҝөстәрмәјә имканымыз мәһдуддур. Бир ҝөрүш әрзиндә һамы илә саламлашмаг мүмкүн дејил. Әлбәттә, һамыны гонаг дәвәт едә билмәјәҹәјик. Бәс ҹәми бир нечә дәгигә ајырыб јығынҹағымызда киминләсә даһа јахындан таныш олмагла ‘үрәјимизи ҝенишләндирә’ биләрдикми? Јахындан танымадығымыз һәмиманлымызла арабир тәблиғә ҝедә биләрдикми?
14. Һәлә таныш олмадығымыз мәсиһчиләр арасында ҹошгун мәһәббәти неҹә тәзаһүр етдирә биләрик?
14 Мәсиһчи конгресләри мәһәббәтдә ‘ҝенишләнмәјә’ ҝөзәл имкан јарадыр. Конгресә минләрлә адам ҝәлир. Әлбәттә һамыјла таныш ола билмәјәҹәјик, амма давранышымызла јалныз өзүмүзү јох, башгаларыны да дүшүндүјүмүзү ҝөстәрә биләрик. Фасилә заманы бәзиләринә јахынлашыб таныш олмагла онлара диггәт ҝөстәрә биләрик. Вахт ҝәләҹәк, јер үзүндә јашајан бүтүн инсанлар гардаш вә баҹы кими һамынын Атасы олан һәгиги Аллаһа бирликдә ибадәт едәҹәкләр. О заман һамыјла таныш олмаг бизи неҹә дә севиндирәҹәк! Ҹошгун мәһәббәт бизи бу ишә һәвәсләндирәҹәк. Мәҝәр буна индидән башламаг јахшы олмазды?
Тәкрар үчүн суаллар
• Мәсиһчиләр арасында јаранан сөз-сөһбәти неҹә һәлл етмәк лазымдыр вә нә үчүн?
• Руһани ҹәһәтдән јеткинләшдикҹә һансы саһәләрдә мәһәббәтимиз дә артмалыдыр?
• Јахындан достлуг етмәдијимиз мәсиһчиләрә гаршы ҹошгун мәһәббәти неҹә тәзаһүр етдирә биләрик?
[148-ҹи сәһифәдәки шәкил]
Мәсиһчи мәһәббәти чохшахәлидир, мисал үчүн, өзүнү јығынҹаг ҝөрүшләриндә бүрузә верир