ФӘСИЛ 17

Нәјә ҝөрә мәктәбдә иманымы бөлүшмәјә горхурам?

«Дәфәләрлә мәктәбдә өз иманым һаггында данышмаг имканым олуб. Анҹаг һәр дәфә бу фүрсәти әлдән вермишәм» Камил

«Бир дәфә мүәллимә тәкамүл барәдә нә дүшүндүјүмүзү сорушду. Иманым һагда данышмаг үчүн бу, әла шанс иди! Амма мән јеримдәҹә донуб галдым. Сонра да өзүмү чох пис һисс етдим» Јасәмән

ОЛА БИЛСИН, Камил вә Јасәмәнин һиссләри сәнә дә танышдыр. Бәлкә, сән дә онлар кими Мүгәддәс Китабдан өјрәндијин һәгигәтләри севир, һәтта башгалары илә бөлүшмәк истәјирсән, амма сөһбәтә башламаға горхурсан. Бәс неҹә ҹәсарәтли олмаг олар? Нөвбәти аддымлары ат:

1. Нәдән горхдуғуну мүәјјән ет. Иманын һаггында данышмаг барәдә дүшүнәндә дәрһал ағлына дәһшәтли сәһнәләр ҝәлә биләр. Анҹаг бәзән горхуну садәҹә дилә ҝәтирмәклә ондан азад олмаг мүмкүндүр.

Нөвбәти ҹүмләни тамамла:

● Горхурам ки, мәктәбдә иманым һаггында данышмаға башласам, бирдән ․․․․․

Јәгин, диҝәр ҝәнҹ мәсиһчиләрин дә ејни шеји јашадыгларыны билмәк сәнә тәсәлли верәҹәк. Мәсәлән, 14 јашлы Фәрид етираф едир: «Ушагларын мәни әлә салыб анормал һесаб етмәләриндән горхурам». Әввәлдә ады чәкилән Камил исә дејир: «Горхурдум ки, суал версәләр, ҹаваб верә билмәрәм».

2. Чәтинликләри гәбул ет. Демәк олармы ки, сәнин горхуларын тамамилә әсассыздыр? Һеч дә јох. 20 јашлы Ешли дејир: «Бәзи ушаглар өзләрини елә ҝөстәрирдиләр, ҝуја, марагланырлар, анҹаг сонра сөзләрими өзүмә гаршы истифадә едәрәк һамынын гаршысында әлә салыб ҝүлүрдүләр». 17 јашлы Николун исә белә бир вәзијјәтлә гаршылашмышды: «Бир оғлан мәним Мүгәддәс Китабымда бир ајәјә бахмаг истәди, амма һәмин ајә онун китабында башга ҹүр иди. О деди ки, мәним Мүгәддәс Китабым дәјишдирилиб. Чашыб галмышдым, нә дејәҹәјими билмирдим»a.

Бу кими вәзијјәтләр асанлыгла ҝөзүнү горхуда биләр. Анҹаг чәтинликләрдән гачмаг әвәзинә, онлары мәсиһчи һәјатынын бир һиссәси олараг гәбул ет (2 Тимотејә 3:12). 13 јашлы Метју дејир: «Иса шаҝирдләринин тәгиб олунаҹагларыны демишди, буна ҝөрә дә һамынын бизимлә разылашаҹағыны ҝөзләмәк лазым дејил» (Јәһја 15:20).

3. Вәзијјәтә мүсбәт ҹәһәтдән бах. Мәҝәр хошаҝәлмәз бир һадисәдә мүсбәт ҹәһәт ҝөрмәк мүмкүндүр? 21 јашлы Елмиранын фикринҹә, мүмкүндүр. О дејир: «Мүгәддәс Китаба һөрмәт етмәјән инсана өз етигадыны изаһ етмәк чәтиндир. Лакин бунун сајәсиндә инсан нәјә инандығыны даһа јахшы дәрк едир» (Ромалылара 12:2).

Фәслин әввәлиндә 1 рәгәми алтында јаздыгларына јенидән нәзәр сал. Һәмин вәзијјәтдә ән азы ики мүсбәт ҹәһәт ҝөрмәјә чалыш вә онлары ашағыда јаз.

1 ․․․․․

2 ․․․․․

Ипуҹу: Өз иманыны бөлүшмәјин һәмјашыдларынын тәзјигини неҹә азалда биләр? Бу, сәнин өзүнә әминлијинә, Јеһова Аллаһа гаршы һиссләринә, еләҹә дә Онун сәнә олан һиссләринә неҹә тәсир едә биләр? (Сүлејманын мәсәлләри 23:15).

4. Һазырлаш. «Салеһ инсан ҹаваб вермәздән әввәл гәлбиндә дүшүнәр», — дејә Сүлејманын мәсәлләри 15:28 ајәсиндә јазылыр. Чалыш, нә дејәҹәјин барәдә дүшүнмәклә јанашы, сәнә һансы суаллары верә биләҹәкләрини дә тәхмин едәсән. Һәмин мөвзулар барәдә мәлумат ахтар тап вә асанлыгла ифадә едә биләҹәјин ҹаваблар һазырла. (127-ҹи сәһифәдәки «Белә ҹаваб верәрдим» адлы схемә бах.)

5. Һәрәкәтә кеч! Һазырлашдын? Бәс инди сөһбәтә неҹә башлаја биләрсән? Иманыны башгалары илә бөлүшмәји суда үзмәјә бәнзәтмәк олар: бәзиләри суја јаваш-јаваш ҝирир, диҝәрләри исә бирбаша кәллә вурурлар. Бунун кими, сәнин дә ики вариантын вар. Сөһбәти әввәлҹә динлә бағлы олмајан мөвзулардан башлаја биләрсән, санки, сујун исти олуб-олмадығыны јохлајырсан. Анҹаг әҝәр бирдән нәјинсә алынмајаҹағындан нараһат олурсанса, онда ән јахшысы «бирбаша суја кәллә вурмагдыр» (Лука 12:11, 12). «Әслиндә, һәмјашыдларымла иманым барәдә сөһбәт етмәк дүшүндүјүмдән асан имиш. Садәҹә сөһбәтә башламаг кифајәтдир!» — дејә 17 јашлы Ендрју гејд едирb.

6. Узагҝөрән ол. «Узагҝөрән һәр ҝөрдүјү иши билир», — дејә Сүлејман јазмышдыр (Сүлејманын мәсәлләри 13:16). Сујун дајаз олдуғу јерә кәлә вурмадығын кими, мәнасыз мүбаһисәләрә ҝиришмәјә дә еһтијат етмәлисән. Унутма ки, «сусмағын өз вахты, данышмағын өз вахты» вар (Ваиз 3:1, 7). Һәтта бәзән Иса да суаллара ҹаваб вермәкдән имтина едирди (Матта 26:62, 63).

Ҹаваб вермәк гәрарына ҝәлмисәнсә, онда чалыш, гыса вә нәзакәтли данышасан. Мәсәлән, синиф јолдашынын: «Нијә сигарет чәкмирсән?» — суалына садәҹә: «Бәдәними зәһәрләмәк истәмирәм», — дејә ҹаваб верә биләрсән. Һәмсөһбәтинин ҹавабындан асылы олараг, сөһбәти ја давам етдирмәк, ја да битирмәк олар.

Бу фәсилдә нәзәрдән кечирдијимиз алты аддым иманыны «мүдафиә етмәјә һәмишә һазыр ол»магда сәнә көмәк едәҹәк (1 Петер 3:15). Әлбәттә, бу о демәк дејил ки, сән һеч вахт һәјәҹан кечирмәјәҹәксән. Анҹаг ҝөр 18 јашлы Ајнурә нә дејир: «Әҝәр сән горхмағына бахмајараг, өз иманын һагда данышмаға башласан, горхуја үстүн ҝәләҹәк вә гәләбә севинҹи дујаҹагсан. Һәр шеј јахшы алынанда исә, өзүнү даһа јахшы һисс едәҹәксән. Өзүндә ҹәсарәт тапыб сөһбәтә башладығын үчүн севинәҹәксән».

[Һашијәләр]

АЧАР АЈӘ

“Мәсиһи бир Аға кими үрәјиниздә мүгәддәс тутун, сиздән изаһат тәләб едән һәр кәсин гаршысында үмидинизи мүдафиә етмәјә һәмишә һазыр олун, анҹаг буну һәлимликлә вә дәрин һөрмәтлә един” 1 Петер 3:15

МӘСЛӘҺӘТ

Синиф јолдашларына онларын нәјә инаныб, нәјә инанмамалы олдугларыны демәк әвәзинә, өз етигадын барәдә әминликлә даныш вә онун нәјә ҝөрә мәнтигли олдуғуна инандығыны изаһ ет.

БИЛИРСӘН... ?

Ола билсин, синиф јолдашларындан бәзиләри Мүгәддәс Китабын әхлаг нормаларына ујғун јашадығына ҝөрә јахшы мәнада сәнә гибтә едирләр, анҹаг етигадын барәдә суаллар вермәјә утанырлар.

ҺӘРӘКӘТ ПЛАНЫ!

Иманымы бөлүшә биләҹәјим синиф јолдашларым: ․․․․․

Онлары марагландыраҹаг мөвзу: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Синиф јолдашларын нәјә ҝөрә сәнин иманыны әлә салырлар?

● Нәјә ҝөрә өз мөвгејини изаһ едәркән әминликлә данышмаг ваҹибдир?

[126–ҹы сәһифәдәки јазы]

“Бир нечә ил бундан әввәл башга ушаглардан фәргләнмәк истәмирдим. Анҹаг сонра баша дүшдүм ки, диним мәни бир чох проблемләрдән горујур. Беләҹә әминлијим артды вә мән Јеһованын Шаһиди олмағымла фәхр етмәјә башладым” Ҹејсон

[124–ҹү сәһифәдәки чәрчиҹә]

Сөһбәтә башламағын үсулу

● «Јајы неҹә кечирмәји планлашдырырсан?» [Гулаг асдыгдан сонра, өз руһани планларын һагда, мәсәлән, конгресә ҝетмәји вә ја хидмәтини ҝенишләндирмәји планлашдырдығын һагда даныш.]

● Хәбәрләрдә дејилән һансыса һадисәни даныш вә соруш: «Ешитмисән..? Бу һагда нә дүшүнүрсән?»

● «Сәнҹә, дүнјада баш верән мадди бөһран [јахуд башга бир проблем] дүзәләҹәк? [Гулаг ас.] Нәјә ҝөрә белә дүшүнүрсән?»

● «Сән Аллаһа инанырсан?»

● «Беш илдән сонракы һәјатыны неҹә тәсәввүр едирсән?» [Гулаг асдыгдан сонра, өз руһани мәгсәдләрин һагда даныш.]

[127–ҹи сәһифәдәки чәрчивә]

(Чәрчивәјә нәшрин өзүндә бахын)

Чәрчивә

Белә ҹаваб верәрдим Сурәтини чыхарт!

Мәсләһәт. Бу схемин үзәриндә валидејнләринлә вә мәсиһчи достларынла бирҝә ишлә. Схеми тамамла. Сонра синиф јолдашларынын даһа һансы суаллары верә биләҹәкләри вә сәнин онлара неҹә ҹаваб верәҹәјин барәдә дүшүн.

Суал Ҹаваб Нөвбәти суал Ҹаваб

[125–ҹи сәһифәдәки шәкил]

Иман һаггында сөһбәтә башламаг үзмәјә бәнзәјир: суја јаваш-јаваш ҝирмәк дә олар, бирбаша кәллә вурмаг да