Хош хәбәр мүждәчиләри

ЈЕҺОВА Аллаһ бизә Оғлу Иса Мәсиһин тимсалында мүкәммәл нүмунә тәгдим едиб (1 Бут. 2:21). Исанын давамчысы олан һәр кәс Аллаһын хидмәтчиси олуб мүждәни тәблиғ едир. Бу ишин руһани тәравәт ҝәтирдијини вурғуламаг үчүн Иса демишди: «Еј бүтүн зәһмәткешләр вә јүкү ағыр оланлар, јаныма ҝәлин, мән сизә тәравәт верәҹәјәм. Бојундуруғуму үзәринизә ҝөтүрүн вә мәндән өјрәнин, чүнки мән һәлим вә гәлбән тәвазөкарам. Онда ҹаныныз тәравәтләнәр» (Мәт. 11:28, 29). Бу дәвәти гәбул едән һәр бир инсан Исанын сөзләринин һәгигәт олдуғуну тәсдиг едә биләр!

² Аллаһа ибадәтдә апарыҹы рол ојнајан Иса инсанлары давамчысы олмаға чағырырды (Мәт. 9:9; Јәһ. 1:43). О, давамчыларына тәблиғ етмәји өјрәдирди. Өзү мүждәни тәблиғ етдији кими, шаҝирдләрини дә бу иши јеринә јетирмәјә ҝөндәрирди (Мәт. 10:1—11:1; 20:28; Лука 4:43). Сонралар о, Аллаһын Падшаһлығы барәдә мүждәни тәблиғ етмәк үчүн әлавә 70 шаҝирд ҝөндәрмишди (Лука 10:1, 8—11). Онлары ҝөндәрәркән демишди: «Сизә гулаг асан мәнә дә гулаг асыр. Сизи рәдд едән мәни дә рәдд едир. Мәни рәдд едән исә мәни ҝөндәрәни дә рәдд едир» (Лука 10:16). Бу сөзләрлә Иса шаҝирдләринә вердији тапшырығын нә дәрәҹәдә ҹидди олдуғуну вурғуламышды. Онлар Исаны вә Һагг-Тааланы тәмсил етмәли идиләр! Бу сөзләр бу ҝүн Исанын «мәним ардымҹа ҝәл» чағырышына һај верән һәр кәсә аиддир (Лука 18:22; 2 Кор. 2:17). Дәвәтә һај верән һәр бир кәсә Падшаһлыг һаггында мүждәни тәблиғ етмәк вә шаҝирд һазырламаг кими шәрәфли иш һәвалә олунуб (Мәт. 24:14; 28:19, 20).

³ Биз Исанын ардынҹа ҝетмәк чағырышына һај вермәклә бөјүк шәрәфә лајиг ҝөрүлмүшүк, Јеһова Аллаһы вә Иса Мәсиһи танымышыг (Јәһ. 17:3). Јеһова бизә Өз јолларыны өјрәдиб. О, бизә дүшүнҹәмизи јениләшдирмәјә, јени шәхсијјәтә бүрүнмәјә вә һәјатымызы Онун адил ганунларына ујғунлашдырмаға көмәк едиб (Ром. 12:1, 2; Ефес. 4:22—24; Кол. 3:9, 10). Дәрин миннәтдарлыг һисси бизи һәјатымызы Јеһова Аллаһа һәср етмәјә вә бунун символу олараг вәфтиз олунмаға сөвг едиб. Бунунла да биз Јеһованын хидмәтчиси олмушуг.

⁴ Һеч вахт јаддан чыхартмајаг ки, Аллаһа ибадәт едән инсанын әлләри пак, гәлби тәмиз олмалыдыр (Зәб. 24:3, 4; Әшј. 52:11; 2 Кор. 6:14—7:1). Иса Мәсиһә иман бизә тәмиз виҹдан бәхш едиб (Ибр. 10:19—23, 35, 36; Вәһј 7:9, 10, 14). Һәвари Булусун мәсләһәтинә ҝөрә, мәсиһиләр һәр иши Аллаһа шәрәф ҝәтирмәк үчүн ҝөрсәләр, һеч кими бүдрәтмәзләр. Һәвари Бутрус исә иманда олмајан инсаны һәгигәтә ҹәлб етмәк үчүн нүмунәви давранышын ваҹиблијини вурғуламышды (1 Кор. 10:31, 33; 1 Бут. 3:1, 2). Бәс инсанлара Падшаһлығын мүждәчиси олмаға неҹә көмәк едә биләрик?

ЈЕНИ ТӘБЛИҒЧИЛӘР

⁵ Кимәсә Мүгәддәс Китабы өјрәтмәјә башлајан вахтдан ону тәшвиг етмәк лазымдыр ки, өјрәндикләрини башгаларына данышсын. О, бу барәдә гоһумларына, достларына, иш јолдашларына вә саирә инсанлара даныша биләр. Шаҝирди Иса Мәсиһин давамчысы вә мүждәчи кими јетишдирмәк үчүн бу, ваҹиб амилдир (Мәт. 9:9; Лука 6:40). Руһани ҹәһәтдән бөјүдүкҹә вә гејри-формал шәкилдә тәблиғ етмәк баҹарығына јијәләндикҹә, сөзсүз ки, онда тәблиғчи олмаг арзусу ојанаҹаг.

ТӘЛӘБЛӘР

⁶ Шаҝирди ев-ев тәблиғ етмәјә апармаздан әввәл, әмин олмаг лазымдыр ки, о, мүәјјән тәләбләрә ҹаваб верир. Бизимлә хидмәтдә әмәкдашлыг едән инсан Јеһованын Шаһиди олдуғуну ачыг шәкилдә ҝөстәрир. Буна ҝөрә дә тәблиғчи олмаздан әввәл, о, һәјатыны Јеһованын салеһлик нормаларына ујғунлашдырмалыдыр.

⁷ Сиз кимәсә Мүгәддәс Китабы өјрәдир вә орадакы принсипләри мүзакирә едирсинизсә, демәли, ону јахшы таныјырсыныз. Сиз онун өјрәндикләринә әсасән јашајыб јашамадығыны ҝөрүрсүнүз. Амма елә мәгамлар вар ки, ағсаггаллар икинизлә бир јердә буну мүзакирә етмәлидирләр.

⁸ Ағсаггаллар шурасынын координатору ики ағсаггал (бири хидмәт комитәсинин үзвү олмалыдыр) тәјин едәҹәк ки, сизинлә вә Мүгәддәс Китабы өјрәтдијиниз адамла бу мәсәләни мүзакирә етсин. Ағсаггал аз олан јығынҹагда бу иши бир ағсаггал вә бир јығынҹаг хидмәтчиси ҝөрә биләр. Гардашлар бу иши тәхирә салмамалыдырлар. Шаҝирд истәјини јығынҹагда билдирәрсә, гардашлар сизинлә ҝөрүшдән сонра даныша биләрләр. Мүзакирәни хош аб-һавада кечирмәк лазымдыр. Шаҝирдин тәблиғчи олмасына иҹазә вермәздән әввәл, нөвбәти мәгамлары дәгигләшдирмәк мүтләгдир:

1. 1) О, Мүгәддәс Китабын (Төврат, Зәбур, Инҹил) Аллаһын Кәламы олдуғуна инанырмы? (2 Тим. 3:16).

2. 2) Мүгәддәс Китабын әсас тәлимләрини билир вә гәбул едирми? Она верилән суаллара Мүгәддәс Китабын өјрәтдији кими ҹаваб верир, јохса јалан динин өјрәтдији вә ја өз билдији кими? (Мәт. 7:21—23; 2 Тим. 2:15).

3. 3) Вәзијјәти јол верирсә, Мүгәддәс Китабдакы ҝөстәришә әсасән, ибадәт ҝөрүшләринә ҝәләрәк Јеһованын халгы илә сых мүнасибәт сахлајырмы? (Зәб. 122:1; Ибр. 10:24, 25).

4. 4) Мүгәддәс Китабын ҹинси әхлагсызлыға, һәмчинин зинаја, чохникаһлылыға, һомосексуализмә даир нөгтеји-нәзәрини билирми вә буна ујғун јашајырмы? Әҝәр әкс ҹинслә бир јердә јашајырса, рәсми никаһлары вармы? (Мәт. 19:9; 1 Кор. 6:9, 10; 1 Тим. 3:2, 12; Ибр. 13:4).

5. 5) О, Мүгәддәс Китабын әјјашлыгла бағлы нөгтеји-нәзәрини гәбул едирми? Асылылыг јарадан вә ја тәбии вә синтетик психотроп маддәләрдән гејри-тибби мәгсәдлә истифадә етмир ки? (2 Кор. 7:1; Ефес. 5:18; 1 Бут. 4:3, 4).

6. 6) Пис достлуглардан гачмағын нә дәрәҹәдә ваҹиб олдуғуну дәрк едирми? (1 Кор. 15:33).

7. 7) Әввәлләр үзв олдуғу јалан дини тәшкилатларла әлагәсини кәсибми? Онларын дини ҝөрүшләринә ҝетмәјә, фәалијјәтләриндә иштирак етмәјә вә дәстәкләмәјә сон гојубму? (2 Кор. 6:14—18; Вәһј 18:4).

8. 8) Сијаси ишләрдән узаг дурурму? (Јәһ. 6:15; 15:19; Јаг. 1:27).

9. 9) Әшија 2:4 ајәсиндә јазыланлары гәбул едир вә буна ујғун јашајырмы?

10. 10) Јеһованын Шаһиди олмаг истәји сәмимидир? (Зәб. 110:3).

⁹ Әҝәр ағсаггаллар шаҝирдин бу мәгамлары дәгиг баша дүшдүјүнә әмин дејилләрсә, јухарыдакы ајәләрин көмәји илә суаллар вериб мүзакирә апара биләрләр. О баша дүшмәлидир ки, Јеһованын Шаһидләри илә тәблиғ ишиндә иштирак етмәк үчүн инсан Мүгәддәс Китабын бу тәләбләринә ујғун јашамалыдыр. Онун ҹаваблары әсасында ағсаггаллар мүәјјән етмәлидирләр: шаҝирд ондан нә ҝөзләнилдијини баша дүшүр? Тәблиғчи олмаг үчүн тәләбләрә кифајәт гәдәр ҹаваб верир?

¹⁰ Ағсаггаллар шаҝирдин тәләбләрә ҹаваб вериб-вермәдијини јубатмадан демәлидирләр. Адәтән, буну мүзакирәнин сонунда мүәјјән етмәк олур. Әҝәр о, тәләбләрә ҹаваб верирсә, ағсаггаллар ону бир тәблиғчи кими үрәкдән тәбрик етмәлидирләр (Ром. 15:7). Ағсаггаллар ону тәблиғә мүмкүн гәдәр тез чыхмаға вә ајын ахырында тәблиғ һесабаты вермәјә тәшвиг етмәлидирләр. Ағсаггаллар она баша салмалыдырлар ки, Мүгәддәс Китабы өјрәнән адам тәблиғчи оланда вә илк тәблиғ һесабатыны верәндә онун адына «Тәблиғчинин һесабат карточкасы» ачылыр вә јығынҹағын сәнәдләри арасына гојулур. Ағсаггалларын тәблиғчидән шәхси мәлуматларыны алмасы сајәсиндә тәшкилат бүтүн дүнјадакы Јеһованын Шаһидләринин дини фәалијјәтинә нәзарәт едә билир. Үстәлик, тәблиғчинин руһани ишләрдә иштирак етмәк вә руһани көмәк алмаг имканы олур. Бундан әлавә, ағсаггаллар јени тәблиғчиләрә билдирә биләрләр ки, шәхси мәлуматлардан jw.org

сајтында јер алан Јеһованын Шаһидләринин мәлуматын горунма сијасәтинә мүвафиг истифадә олунур.

¹¹ Јени тәблиғчи илә јахындан таныш олмаг вә наилијјәтләри илә марагланмаг она мүсбәт тәсир ҝөстәрә биләр. Бу, ону тәблиғ һесабатыны мүнтәзәм вермәјә вә Јеһоваја ҹанла-башла хидмәт етмәјә тәшвиг едәҹәк (Филип. 2:4; Ибр. 13:2).

¹² Шаҝирдин тәблиғ ишиндә иштирак етмәјә јарарлы олдуғуну мүәјјәнләшдирәндән сонра ағсаггаллар она «Аллаһын ирадәсини јеринә јетирән тәшкилат» китабыны верирләр. Илк тәблиғ һесабатыны вердикдән сонра ибадәт ҝөрүшүндә онун јени тәблиғчи олдуғу гысаҹа елан олунур.

УШАГЛАРА КӨМӘК

¹³ Ушаглар да тәблиғчи ола биләрләр. Иса ушаглара гаршы диггәтли иди вә онлара хејир-дуа верирди (Мәт. 19:13—15; 21:15, 16). Ушаглара ҝөрә мәсулијјәти валидејнләр дашыса да, мүждәчилик ишиндә иштирак етмәји арзулајан ушаглара јығынҹагдакылар да көмәк едә биләр. Валидејнин тәблиғ ишиндә ҝөстәрдији ҝөзәл нүмунә ушағы Аллаһа үрәкдән хидмәт етмәјә тәшвиг едә биләр. Давранышы нүмунәви олан вә өз иманы барәдә башгаларына данышмаг истәјән ушаға неҹә көмәк етмәк олар?

¹⁴ Валидејн јығынҹағын хидмәт комитәсинин үзвү олан ағсаггаллардан биринә јахынлашыб ушағынын тәблиғчи олмаға јарарлы олуб-олмадығыны онунла мүзакирә едә биләр. Ағсаггаллар шурасынын координатору ики ағсаггала (бири хидмәт комитәсинин үзвү олмалыдыр) ушагла вә иманда олан валидејнләриндән бири илә, јахуд һәр икиси илә вә ја гәјјуму илә ҝөрүшмәји тапшыраҹаг. Әҝәр ушаг Мүгәддәс Китабын әсас тәлимләрини билирсә вә тәблиғдә иштирак етмәк истәдији ајдын ҝөрүнүрсә, бу, онун руһани инкишафынын ҝөстәриҹисидир. Буну вә бөјүкләрә дә тәтбиг олунан бәзи тәләбләри нәзәрә алараг һәмин ики ағсаггал гәрар верәҹәк, ушаг тәблиғчи ола биләр, ја јох (Лука 6:45; Ром. 10:10). Адәтән, бөјүкләрлә мүзакирә олунан бәзи мәгамлары ушагла мүзакирә етмәјә еһтијаҹ јохдур.

¹⁵ Бу ҝөрүш заманы ағсаггаллар ушағы руһани ҹәһәтдән инкишаф етдијинә ҝөрә тәрифләмәли вә мәгсәд гојуб вәфтиз олмаға тәшвиг етмәлидирләр. Ушаға һәгигәти ашыламаг үчүн валидејнләр чох бөјүк зәһмәт чәкирләр, онлары да тәрифләмәк лазымдыр. Әлавә көмәк кими, ағсаггаллар валидејнләрә 179—181 сәһифәләрдәки «Мәсиһи валидејнләрә исмарыҹ» әлавәсини охумағы мәсләһәт ҝөрмәлидирләр.

ҺӘСРОЛУНМА ВӘ ВӘФТИЗ

¹⁶ Сиз артыг Јеһова Аллаһы таныјыр вә севирсинизсә, Онун ганунлары илә јашајыр вә тәблиғдә иштирак едирсинизсә, Аллаһла мүнасибәти мөһкәмләндирмәк үчүн бир аддым да атмаг лазымдыр. Һансы аддымы? Һәјатынызы Јеһоваја һәср етмәк вә бунун рәмзи олараг суда вәфтиз олмаг (Мәт. 28:19, 20).

¹⁷ «Һәср етмәк» нәји исә вә ја кими исә мүгәддәс мәгсәд үчүн ајырмаг демәкдир. Һәјатыны Јеһоваја һәср етмәк о демәкдир ки, инсан дуада өмүрбоју Аллаһа хидмәт едәҹәјинә вә Онун ганунлары илә јашајаҹағына, јәни әбәдијјән Она там сәдагәт ҝөстәрәҹәјинә сөз верир (Ган. 5:9). Бу, инсанын шәхси гәрарыдыр. Һеч кәс онун әвәзинә гәрар верә билмәз.

¹⁸ Анҹаг Јеһоваја дуада Она мәхсус олмаг истәјинизи демәк кифајәт дејил. Һәјатынызы Јеһоваја һәср етдијинизи башгалары да билмәлидир. Буну, Иса кими, суда вәфтиз олмагла едә биләрсиниз (1 Бут. 2:21; 3:21). Әҝәр Јеһоваја хидмәт етмәк вә вәфтиз олмаг гәрарына ҝәлмисинизсә, нә етмәлисиниз? Бу истәјинизи ағсаггаллар шурасынын координаторуна билдирин. О, ағсаггаллара тапшыраҹаг ки, сизинлә данышсынлар, вәфтиз үчүн тәләбләрә ҹаваб вериб-вермәдијинизи мүәјјән етсинләр. Әлавә мәлумат үчүн бу китабын 182—184 сәһифәләрдә јерләшән «Вәфтиз олунмамыш тәблиғчиләрә исмарыҹ» вә 185—207 сәһифәләрдәки «Вәфтиз олмаг истәјәнләр үчүн суаллар» адлы әлавәләрә бахын.

ТӘБЛИҒ ҺЕСАБАТЫ

¹⁹ Пак ибадәтин дүнја мигјасында вүсәт алдығы барәдә верилән һесабатлар узун илләрдир ки, Јеһованын халгына гол-ганад верир. Иса Мәсиһ шаҝирдләринә мүждәнин бүтүн дүнјада тәблиғ олунаҹағыны дедији вахтдан бәри һәгиги мәсиһиләр бу ишин неҹә јеринә јетәҹәји илә јахындан марагланырлар (Мәт. 28:19, 20; Марк 13:10; Һәв. 1:8).

²⁰ Илк мәсиһиләр тәблиғдә әлдә олунан наилијјәтләр барәдә ешидәндә чох севинирдиләр (Марк 6:30). «Һәвариләрин ишләри» китабында јазылыб ки, ерамызын 33-ҹү илинин Әллинҹи ҝүн бајрамында тәгрибән 120 шаҝирдин үзәринә мүгәддәс руһ төкүлдү. Тезликлә шаҝирдләрин сајы тәхминән 3000-ә, сонра исә тәхминән 5000-ә чатды. «Јеһова... һәр ҝүн хилас оланлары онларын сыраларына гошурду» вә «чохлу сајда каһин... иман јолуна гошулурду» (Һәв. 1:15; 2:5—11, 41, 47; 4:4; 6:7). Бу мәлуматлар шаҝирдләрә бөјүк севинҹ ҝәтирирди! Сөзсүз ки, бу шад хәбәрләр онлары, јәһуди дин рәһбәрләринин тәгибләринә бахмајараг, Аллаһын тапшырдығы иши ирәли апармаға тәшвиг едирди!

²¹ Бизим еранын тәхминән 60—61-ҹи илләриндә һәвари Булус колослулара мәктубунда јазмышды ки, «мүждә бүтүн дүнјада» бар ҝәтирәрәк јајылыб вә «сәма алтында јашајанларын һамысына тәблиғ едилиб» (Кол. 1:5, 6, 23). Илк мәсиһиләр Кәлама бағлы јашајырдылар. Вә мүгәддәс руһ онлара ҝүҹ верирди ки, 70-ҹи илдә јәһуди системи дағылана кими мөһтәшәм тәблиғ ишини баша чатдырсынлар. Әмин ола биләрик ки, әлдә олунан наилијјәтләр барәдә ешитмәк һәмин садиг мәсиһиләри чох руһландырмышды!

²² Мәтта 24:14 ајәсиндә јазылыб: «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк». Јеһованын мүасир халгы бу пејғәмбәрлији јеринә јетирмәк үчүн ҝөрүлән ишләр барәдә һесабат апарыр. Аллаһын хидмәтчиси кими, бизләрә чох ваҹиб бир иш тапшырылыб. Һәлә ки Армаҝеддон ҝәлмәјиб, бу тапшырығы ахыра кими јеринә јетирмәк үчүн әлимиздән ҝәләни етмәлијик. Јеһова тәблиғ ишинин баша чатмасы үчүн нә лазымдырса едәҹәк вә бу ишә биз дә төһфә веририксә, Јеһованын лүтфүнү газанаҹағыг (Һизг. 3:18—21).

СИЗИН ТӘБЛИҒ ҺЕСАБАТЫНЫЗ

²³ Һесабата нәји дахил етмәлијик? Һесабата нәләри гејд етмәли олдуғумуз тәшкилатын тәгдим етдији «Тәблиғ хидмәти һаггында һесабат» бланкында јазылыб. Бунунла белә, нөвбәти мәлуматы билмәк фајдалы оларды.

²⁴ «Нәшрләр (чап вә електрон)» бөлмәсиндә нәшрләрин сајы, јахуд видеоларын електрон почтла ҝөндәрдијиниз линкләринин вә вәфтиз олунмамыш инсанлара вердијиниз нәшрләрин сајы јазылмалыдыр, «видео» бөлмәсиндә исә хидмәтдә ҝөстәрдијиниз видеоларын сајы гејд олунмалыдыр.

²⁵ «Тәкрар сөһбәт» сүтунунда вәфтиз олмамыш инсанларын ҝөстәрдији марағы артырмаг мәгсәдилә етдијиниз тәкрар сөһбәтләрин үмуми сајыны гејд един. Тәкрар сөһбәт дедикдә инсанын јанына ҝетмәк, мәктуб јазмаг, телефонла әлагә сахламаг, месаж јазмаг, електрон мәктуб ҝөндәрмәк, јахуд һансыса нәшри сахламаг нәзәрдә тутулур. Мүгәддәс Китабы өјрәтдијиниз адамла кечдијиниз һәр дәрс дә тәкрар сөһбәт сајыла биләр. Аиләви ибадәти апаран валидејн ҝөрүшдә вәфтиз олунмамыш ушағы иштирак етдији һалда һәр һәфтә һесабата бир тәкрар сөһбәт јаза биләр.

²⁶ Адәтән, шаҝирдлә Мүгәддәс Китаб дәрси һәр һәфтә кечирилир вә ајын сонунда һесабата бир шаҝирдлә дәрс кечирилдији јазылыр. Тәблиғчиләр һесабата шаҝирдләрин үмуми сајыны јазмалыдырлар. Һесабата Јеһованын Шаһиди олмајан инсанла кечилән дәрси дахил етмәк лазымдыр. Хидмәт комитәсинин үзвләриндән биринин ҝөстәриши илә гејри-фәал баҹы вә ја гардашла, јахуд јени вәфтиз олмуш, амма һәлә «Әбәди хошбәхт һәјат!» китабыны гуртармамыш инсанла кечирилән дәрсләри дә һесабата дахил етмәк олар.

²⁷ Һесабатда сааты дәгиг јазмаг лазымдыр. Әсасән ев-ев тәблиғ заманы, тәкрар сөһбәт едәндә, Мүгәддәс Китаб дәрсләри кечәндә, формал вә ја гејри-формал тәблиғ едәндә сәрф етдијимиз саатлары бу һесабата дахил етмәлијик. Ики тәблиғчи бир јердә тәблиғ едәндә онларын икиси дә сааты јаза биләрләр, амма тәкрар сөһбәти вә ја Мүгәддәс Китаб дәрсини һесабата јалныз бири јазмалыдыр. Аиләви ибадәт ахшамында ушагларына дәрс кечән валидејнләрин икиси дә һәфтәјә бир саат јазмалыдырлар. Гардашлар мәрузә сөјләдикләри вахты һесабата дахил едә биләрләр. Мәрузәни тәрҹүмә едәнләр дә вахты һесабата јаза биләрләр. Тәблиғә һазырлыға, тәблиғ ҝөрүшүнә, шәхси ишләрә вә бу кими ваҹиб ишләрә сәрф етдијимиз вахты һесаба дахил етмирик.

²⁸ Һәр тәблиғчи тәблиғ саатыны неҹә һесаблајаҹағына гәрар верәндә Мүгәддәс Китаба әсасән тәрбијә олунмуш виҹданынын сәсинә гулаг асмалыдыр. Елә тәблиғчиләр вар ки, сых мәскунлашмыш әразиләрдә тәблиғ едир, бәзиләри исә әһалинин аз олдуғу јерләрдә хидмәт едир вә узаг мәсафәләр гәт етмәли олурлар. Саһәләр фәргли олдуғу кими, тәблиғчиләрин хидмәтә бахышы да фәрглидир. Рәһбәрлик Шурасы бүтүн дүнјадакы јығынҹаглара тәблиғдә кечирилән вахты һесабламагла бағлы өз фикрини јеритмир вә һеч кимә бу мәсәләдә мүһакимә јүрүтмәк ихтијары верилмәјиб (Мәт. 6:1; 7:1; 1 Тим. 1:5).

²⁹ Һесабат бланкында тәблиғә сәрф олунан вахтын анҹаг саатларыны јазмаг лазымдыр. Амма истисна һаллар олур, мәсәлән, јашлы инсанлара, јатаг хәстәләринә, гоҹалар евиндә јашајанлара вә саирә мәһдудијјәтләри оланлара ҝүзәштләр едилир. Бу тәблиғчиләр, ән азы, 15 дәгигә һесабат верә биләрләр. Һәтта әҝәр онлар ај әрзиндә ҹәми 15 дәгигә тәблиғ едибләрсә, бу вахты һесабата дахил етмәлидирләр. Беләҹә, онлар фәал тәблиғчи сајылырлар. Бу, мүвәггәти мәһдудијјәтләри олан, мәсәлән, ҹидди хәстәлик вә ја хәсарәт нәтиҹәсиндә ај әрзиндә һәрәкәт едә билмәјән тәблиғчиләрә дә аид едилир. Бу истисна анҹаг имканлары һәддән артыг мәһдуд олан тәблиғчиләрә аиддир. Кимә бу ҹүр ҝүзәштләр едиләҹәјинә хидмәт комитәси гәрар верир.

«ТӘБЛИҒЧИНИН ҺЕСАБАТ КАРТОЧКАСЫ»

³⁰ Сизин ајлыг һесабатыныз «Тәблиғчинин һесабат карточкасы»на јазылыр. Бу карточкалар тәблиғчинин аид олдуғу јығынҹаға мәхсусдур. Башга јығынҹаға кечмәји планлашдырырсынызса, ағсаггаллара хәбәр верин. Катиб карточканызын јени јығынҹаға ҝөндәрилмәсинә нәзарәт едәҹәк. Бунун сајәсиндә ағсаггаллара сизи танымаг вә руһани көмәк ҝөстәрмәк даһа асан олаҹаг. Әҝәр үч ајдан чох олмамаг шәртилә башга јерә ҝедирсинизсә, тәблиғ һесабатынызы өз јығынҹағыныза ҝөндәрин.

ТӘБЛИҒ ҺЕСАБАТЫНЫ НӘЈӘ ҜӨРӘ ВЕРИРИК?

³¹ Елә олурму ки, тәблиғ һесабатыны вермәји унудурсунуз? Сөзсүз ки, вахташыры олараг һесабаты вермәји һамынын јадына салмаг лазым ҝәлир. Амма һесабат вермәк мәсәләсинә дүзҝүн јанашмағы өјрәнсәк вә бунун ваҹиблијини анласаг, һесабаты вахтында вермәк даһа асан олаҹаг.

³² Бәзиләриндә белә бир суал јараныр: «Әҝәр Јеһова Она хидмәт етдијими ҝөрүрсә, һесабат вермәк нәјә лазымдыр?» Дүздүр, Јеһова һәр шеји ҝөрүр. О билир, биз үрәкдән хидмәт едирик, јохса ҝөздән пәрдә асмаг үчүн. Амма нәзәрә алын ки, Јеһова Нуһун ҝәмидә нечә ҝүн галдығыны, исраиллиләрин сәһрада нечә ил долашдығыны јаздырыб. Аллаһ Она садиг галан бәндәләринин вә Она аси чыхан инсанларын сајыны гејд етдириб. Кәнан дијарынын неҹә алындығыны, Исраилин садиг һакимләринин ҝөрдүјү ишләри гәләмә алдырыб. Ҝөрүндүјү кими, Јеһова садиг хидмәтчиләринин ҝөрдүјү ишләрин чохлу тәфсилатларыны гејд етдириб. Јеһованын кечмишдә баш вермиш һадисәләри јаздырмасындан ҝөрүнүр ки, дәгиг гејдләр апармаг Онун үчүн ҹидди мәсәләдир.

³³ Мүгәддәс Китабдакы тарихи һадисәләр Јеһованын халгынын гәләмә алдығы мәлуматларын дәгиглијини тәсдиг едир. Конкрет рәгәм јазылмасајды, Мүгәддәс Китабдакы әксәр һадисәләр охуҹуја о гәдәр дә ҝүҹлү тәсир бағышламазды. Мисал үчүн, нөвбәти нүмунәләрә бахмаг олар: Јарадылыш 46:27; Чыхыш 12:37; Һакимләр 7:7; 2 Падшаһлар 19:35; 2 Салнамәләр 14:9—13; Јәһја 6:10; 21:11; Һәвариләрин ишләри 2:41; 19:19.

³⁴ Дүздүр, биз һесабата Јеһоваја ибадәтдә етдијимиз һәр шеји дахил етмирик, амма бу һесабатларын Јеһованын тәшкилатына бөјүк көмәји дәјир. Биринҹи әсрдә һәвариләр тәблиғдән гајыданда «ҝөрдүкләри ишләри вә өјрәтдикләри һәр шеји» Иса Мәсиһә данышдылар (Марк 6:30). Бәзән һесабатлардан ҝөрмәк олар ки, хидмәтимизин мүәјјән саһәсинә даһа чох диггәт јетирмәк лазымдыр. Һесабатлар бәзи саһәләрдә ирәлиләјишләрин олдуғуну, диҝәр саһәләрдә исә, мәсәлән, тәблиғчиләрин артымында вә инкишафында зәифликләрин мүшаһидә олундуғуну үзә чыхарыр. Бунун нәтиҹәсиндә ја тәблиғчиләри руһландырмаг, ја да мүәјјән проблемләри һәлл етмәк лазым ҝәлә биләр. Бу ишә мәсул олан нәзарәтчиләр һесабатлары јохлајыр, тәблиғчиләрин вә јығынҹагларын инкишафына мане олан амилләри арадан галдырмаға чалышырлар.

³⁵ Һәмчинин һесабатларын сајәсиндә тәшкилат тәблиғчиләрә даһа чох һарада еһтијаҹ олдуғуну ҝөрүр. Һансы әразиләр даһа бәһрәлидир, һансыларда инкишаф зәиф ҝедир? Инсанлара һәгигәти чатдырмаг үчүн һансы нәшрләрә еһтијаҹ вар? Һесабатлар сајәсиндә тәшкилат дүнјанын мүхтәлиф ҝушәләриндә һансы әдәбијјатлара еһтијаҹ олдуғуну ҝөрүр вә бу еһтијаҹы өдәјир.

³⁶ Һесабатлар бизи чох руһландырыр. Бүтүн дүнјада баҹы-гардашларымызын мүждәнин тәблиғиндә әлдә етдији наилијјәтләри ешидәндә үрәјимиз даға дөнүр. Артымы ҝөстәрән рәгәмләр биздә Јеһованын тәшкилатынын нә дәрәҹәдә ҝенишләндији барәдә үмуми тәсәввүр јарадыр. Хидмәтдә баш вермиш мараглы һадисәләр бизи севиндирир, шөвгүмүзү артырыр вә беләҹә, бизи тәблиғ ишиндә ҹанла-башла иштирак етмәјә тәшвиг едир (Һәв. 15:3). Һесабаты вахтында вермәк чох ваҹибдир. Бунунла биз бүтүн баҹы-гардашларымызы дүшүндүјүмүзү ҝөстәририк. Хырда ҝөрүнән бу мәсәләјә ҹидди јанашмагла Јеһованын тәшкилатындакы гурулуша табе олуруг (Лука 16:10; Ибр. 13:17).

ГАРШЫНЫЗА МӘГДӘСЛӘР ГОЈУН

³⁷ Хидмәтимизи башгаларынын хидмәти илә мүгајисә етмәк лазым дејил (Гал. 5:26; 6:4). Һәр кәсин шәраити фәрглидир. Амма гаршымыза әлчатан мәгсәдләр гојмаг чох фајдалыдыр, чүнки бу јолла өзүмүзүн тәблиғ ишиндә нә гәдәр тәрәгги етдијимизи ҝөрәҹәјик. Бу мәгсәдләрә чатанда бөјүк мәмнунлуг дујаҹағыг.

³⁸ Ачыг-ајдын ҝөрүнүр ки, Јеһова «бөјүк мүсибәтдән» сағ чыхаҹаг инсанлары сүрәтлә топлајыр. Биз Әшијанын јаздығы пејғәмбәрлијин јеринә јетдији бир дөврдә јашајырыг: «Ән кичијиндән мин нәфәр, ән балаҹасындан гүдрәтли халг төрәјәҹәк. Мән Јеһова вахты јетишәндә бу иши сүрәтләндирәҹәјәм» (Вәһј 7:9, 14; Әшј. 60:22). Бу ҹүр әламәтдар дөврдә, ахырзаманда мүждәни тәблиғ етмәк бөјүк шәрәфдир! (Мәт. 24:14).