Суаллар гутусу
◼ Вәфтиз едилмәмиш тәблиғчинин вәфтиз олунмасына иҹазә верилмәси үчүн о, јығынҹаг ҝөрүшләриндә вә тәблиғдә нә дәрәҹәдә иштирак етмәлидир?
Вәфтиз олунмаг инсанын һәјатында верәҹәји ән ваҹиб гәрардыр. Буна ҝөрә дә инсан бу аддымы атмаздан әввәл Аллаһын ондан нә тәләб етдијини шүурлу шәкилдә дәрк етмәлидир. Һәмчинин о, артыг вәфтизә гәдәр Аллаһын тәләбләринә ујғун јашамаға гәтијјәтли олдуғуну ҝөстәрмәлидир.
Мәсиһчиләрдән өз јығынҹагларыны тәрк етмәмәк тәләб олундуғундан вәфтиз олунмамыш тәблиғчи дә јығынҹаг ҝөрүшләриндә мүнтәзәм иштирак етмәлидир (Ибр. 10:24, 25). Үмуми ҝөтүрдүкдә, ондан јығынҹаг ҝөрүшләриндә шәрһләр вермәк дә ҝөзләнилир. Чох еһтимал ки, о, артыг Теократик Хидмәт Мәктәбинә јазылмыш олаҹаг, һәрчәнд бу, тәләб дејил.
Бундан әлавә, мәсиһчиләрә хош хәбәри тәблиғ етмәк вә шаҝирд һазырламаг иши тапшырылдығындан вәфтиз олунмамыш тәблиғчи вәфтиздән әввәл тәблиғдә мүнтәзәм иштирак етмәлидир (Мат. 24:14; 28:19, 20). Вәфтиздән габаг о, нечә ај тәблиғчи олмалыдыр? Мәнтиглидир ки, тәблиғ ишиндә мүнтәзәм вә сәјлә иштирак етмәјә там гәтијјәтли олдуғуну ҝөстәрмәси үчүн она кифајәт гәдәр вахт верилмәлидир (Мәз. 78:37). Анҹаг бунун үчүн чох узун мүддәт тәләб олунмур, ҹәми бир нечә ај да кифајәт едә биләр. Бәс о, ајда нечә саат тәблиғ етмәлидир? Бу мәсәләдә конкрет гајда јохдур. Ағсаггаллар һәр бир тәблиғчинин вәзијјәтини нәзәрә алмалы, бу ишдә таразлы вә анлајышлы олмалыдырлар (Лука 21:1—4).
Тәблиғчидән вәфтизин суалларыны ҝөтүрән ағсаггаллар (јахуд ағсаггаллар аз олан јығынҹагларда хидмәти көмәкчиләр) һәр кәсә фәрди јанашмалы вә вәфтизә јарарлылыг мәсәләси илә бағлы гәрар верәркән сағламдүшүнҹәли олмалыдырлар. Ағсаггаллар вәфтиз олмаг үчүн мүраҹиәт едән тәблиғчинин, һәгигәтән дә, Јеһованын Шаһиди олмаг истәдијинә, Јеһованын тәшкилатында олдуғуна вә хидмәтдә иштирак етдијинә ҝөрә миннәтдар олуб-олмадығына фикир верәҹәкләр. Ағсаггаллар баша дүшүрләр ки, һәмин адам һәлә руһани ҹәһәтдән јеткинләшмәјиб, јахуд вәфтиз олунмуш тәблиғчи кими лазыми баҹарыглара јијәләнмәјиб. Әҝәр ағсаггаллар һисс етсәләр ки, тәблиғчи вәфтизә јарарлы дејил, онда онлар мүлајимликлә һәмин адама гәрарларынын Мүгәддәс Јазылара әсасландығыны изаһ етмәли вә она руһани көмәклик ҝөстәрмәлидирләр.