ФӘСИЛ 17
Јеһованын тәшкилатына бағлы галын
ИСА МӘСИҺИН шаҝирди Јагуб јазмышды: «Аллаһа јахынлашын, О да сизә јахынлашаҹаг» (Јаг. 4:8). Бәли, Јеһова Аллаһ Уҹа, ҝөзәҝөрүнмәз олса да, биз ҝүнаһлы инсанларын дуасыны ешидир (Һәв. 17:27). Бәс Јеһова Аллаһа неҹә јахынлаша биләрик? Онунла јахын мүнасибәт гурмагла, мәсәлән, үрәкдән дуа етмәклә (Зәб. 39:12). Һәмчинин Мүгәддәс Китабы мүнтәзәм мүталиә етмәклә Аллаһла арамызда сых бағлар јарана биләр. Бу јолла биз Јеһова Аллаһы јахындан таныјыр, Онун нијјәтләрини вә биз бәндәләрдән нә ҝөзләдијини өјрәнирик (2 Тим. 3:16, 17). Беләҹә, бизим Она севҝимиз артыр вә үрәјимиздә сағлам горху, дәрин еһтирам јараныр (Зәб. 25:14).
2 Јеһова Аллаһла јалныз Онун Оғлу Иса Мәсиһ васитәсилә јахын мүнасибәт гурмаг олар (Јәһ. 17:3; Ром. 5:10). Иса гәдәр һеч кәс бизә Јеһованын зәкасыны анламаға көмәк едә билмәз. О, Атасы илә о дәрәҹәдә јахын иди ки, нөвбәти сөзләри демишди: «Оғулу Атадан савајы һеч ким танымыр. Атаны да Оғулдан савајы вә Оғулун танытмаг истәдији адамдан савајы һеч кәс танымыр» (Лука 10:22). Инҹилдә Исанын фикирләри вә һиссләри барәдә охујанда, санки, Јеһованын фикирләри вә һиссләри илә таныш олуруг. Бу биликләрин сајәсиндә Јараданымызла јахын дост олуруг.
3 Јеһованын тәшкилатынын ҝөрүнән һиссәсинә бағлы галмагла Онунла мүнасибәтләримизи мөһкәмләндиририк. Башында Иса Мәсиһин дурдуғу бу тәшкилат бизә Аллаһын ирадәсини јеринә јетирмәји өјрәдир. Мәтта 24:45—47 ајәләриндә пејғәмбәрлик едилдији кими, Ағамыз Иса Мәсиһ иман әһлинә «вахтлы-вахтында јемәк вермәк үчүн» «садиг вә ағыллы нөкәр» тәјин едиб. Бу ҝүн садиг нөкәр бизә бол руһани гида верир. Јеһова тәшкилаты васитәсилә бизи Мүгәддәс Китабы һәр ҝүн охумаға, ибадәт ҝөрүшләринә мүнтәзәм ҝетмәјә вә «Падшаһлыг һаггындакы бу мүждә»нин тәблиғиндә үрәкдән иштирак етмәјә чағырыр (Мәт. 24:14; 28:19, 20; Јуш. 1:8; Зәб. 1:1—3). Ҝәлин һеч вахт садиг нөкәрә инсан нөгтеји-нәзәри илә бахмајаг. Биз чалышмалыјыг ки, һәмишә Јеһованын тәшкилатынын ҝөрүнән һиссәсинә бағлы галаг вә тәшкилатдан ҝәлән ҝөстәришләрә әмәл едәк. Бунун сајәсиндә биз Аллаһымыз Јеһоваја јахынлашаҹаг, нә гәдәр сынансаг да, мөһкәм галаҹаг вә мүдафиә алтында олаҹағыг.
СЫНАГЛАР НИЈӘ АРТЫР?
4 Ола билсин, узун илләрдир Јеһованын јолундасыныз. Белә исә сынаглара дөзмәјин нә демәк олдуғуну јахшы билирсиниз. Јеһованы вә Онун халгыны тәзәликҹә таныјанлар да Шејтан Иблисин Јеһованын тәрәфини тутан һәр кәслә мүбаризә апардығыны ҝөрүрләр (2 Тим. 3:12). Нә гәдәр сынанмағымыздан асылы олмајараг, горхмаға вә әлимизи јана салмаға әсас јохдур. Јеһова сөз верир ки, бизә дајаг олаҹаг, хилас едәҹәк вә сонсуз һәјат бәхш едәҹәк (Ибр. 13:5, 6; Вәһј 2:10).
5 Шејтанын гурдуғу системин сон ҝүнләриндә һәр биримиз сынагларла үзләшә биләрик. 1914-ҹү илдә Аллаһын Падшаһлығы гуруландан сонра Шејтан јер үзүнә атылды вә о вахтдан бәри Јеһованын дәрҝаһынын гапылары онун үзүнә бағланыб. Шејтан вә онун ҹинләри анҹаг јерин һүдудларында фәалијјәт ҝөстәрә билирләр. Дүнјада бәлаларын артмасы, еләҹә дә Јеһованын садиг бәндәләринин ҝетдикҹә даһа чох тәгиб олунмасы Шејтанын гәзәбинин бәһрәсидир вә сүбут едир ки, биз Шејтанын амансыз һөкмранлығынын сон ҝүнләриндә јашајырыг (Вәһј 12:1—12).
6 Өз мөвгејиндән ашағы салындығы үчүн гәзәбдән алышыб-јанан Шејтан билир ки, онун вахтына аз галыб. О, ҹинләрини дә башына јығыб һәр вәҹһлә Падшаһлығын тәблиғ ишинә мане олмаға вә Јеһованын халгынын арасына нифаг салмаға чалышыр. Буна ҝөрә дә биз руһани савашда иштирак етмәк мәҹбуријјәтиндә галырыг; «биз әтә вә гана гаршы јох, һөкумәтләрә, һакимијјәтләрә, бу зүлмәти идарә едән дүнја һөкмдарларына, сәмави аләмдәки шәр руһи гүввәләрә гаршы мүбаризә апарырыг». Әҝәр Јеһованын тәрәфини тутуб галиб чыхмаг истәјириксә, бу савашда һеч вахт тәслим олмамалыјыг, руһани зиреһләримизин һамысы әјнимиздә олмалыдыр. Биз «Иблисин һијләләринә синә» ҝәрмәлијик (Ефес. 6:10—17). Бунун үчүн дөзүм ҝәрәкдир.
ДӨЗҮМЛҮ ОЛУН
7 Дөзүм дејәндә чәтинликләрә вә әзаблара таб ҝәтирмәк нәзәрдә тутулур. Руһани мәнада исә дөзүм сынаглар, тәгибләр вә бизи Аллаһдан дөндәрмәк үчүн ҝөрүлән саирә тәдбирләрин гаршысында мәтин галыб доғру јашамаг демәкдир. Дөзүм өз-өзүнә јаранмыр, мәсиһи ҝәрәк бу хүсусијјәти өзүндә јетишдирсин. Тәбии ки, буна вахт лазымдыр. Биз руһани ҹәһәтдән инкишаф етдикҹә дөзүм дә инкишаф едәҹәк. Мәсиһи јолуна гәдәм гојандан әгидәмизә ҝөрә гаршылашдығымыз кичик сынаглара таб ҝәтирдикҹә ҝүҹүмүз артыр вә гачылмаз олан даһа ағыр сынаглара дөзмәји өјрәнирик (Лука 16:10). Иманда гәтијјәтли олмаг үчүн отуруб ағыр сынаглары ҝөзләмәк лазым дејил. Биз бу сынаглар башламамыш гәтијјәтли олмалыјыг. Һәвари Бутрус гејд етмишди ки, дөзүмү диҝәр хүсусијјәтләрлә јанашы јетишдирмәк ҝәрәкдир. О јазмышды: «Вар ҝүҹүнүзлә чалышараг, иманынызы алиҹәнаблыгла, алиҹәнаблығы елмлә, елми тәмкинлә, тәмкини дөзүмлә, дөзүмү мөминликлә, мөминлији гардашлыг севҝиси илә, гардашлыг севҝисини мәһәббәтлә тамамлајын» (2 Бут. 1:5—7; 1 Тим. 6:11).
Ҝүнбәҝүн сынаглара таб ҝәтирмәклә биздә дөзүм јетишир
8 Јагубун мәктубунда дөзүмү јетишдирмәјин зәрурәти вурғуланыр: «Гардашлар, үзләшдијиниз мүхтәлиф сынаглары севинҹлә гаршылајын. Билин ки, сынанмыш иманыныз сиздә дөзүм һасил едир. Гој дөзүм өз ишини тамамласын ки, сиз камил вә һәр ҹәһәтдән сағлам оласыныз, һеч нәдә әскијиниз олмасын» (Јаг. 1:2—4). Јагубун јаздыгларына әсасән, мәсиһиләр сынаглары севинҹлә гаршыламалыдырлар, чүнки сынаглар дөзүм һасил едир. Сиз дә сынаглара бу ҹүр јанашырсыныз? Сонра Јагуб ҝөстәрир ки, дөзүм өзү-өзлүјүндә мәсиһи мәнлијини камилләшдирир вә бизи Аллаһын ҝөзүндә уҹалдыр. Ҝүнбәҝүн сынаглара таб ҝәтирмәклә биздә дөзүм јетишир. Дөзүм исә диҝәр ваҹиб вә ҝөзәл хүсусијјәтләрә тәкан верир.
9 Дөзүм ҝөстәрмәјимиз Јеһоваја хош ҝедир вә буна ҝөрә О, бизә әбәди һәјат әнамыны бәхш едәҹәк. Јагуб сөзүнә белә давам етмишди: «Сынаглара таб ҝәтирән адам хошбәхтдир. Чүнки о, бәјәнилиб Јеһованын Ону севәнләрә вәд етдији һәјат таҹыны алаҹаг» (Јаг. 1:12). Бәли, дөзүмлү олмагдан һәјатымыз асылыдыр. Дөзүмлү олмасаг, һәгигәт јолунда гала билмәјәҹәјик. Дүнјанын тәзјиги гаршысында сынсаг, јенидән бу дүнјаја гајыдаҹағыг. Дөзүм ҝөстәрмәсәк, биздә Јеһованын руһу олмајаҹаг вә һәјатымызда бу руһун бәһрәсини ҝөрмәјәҹәјик.
10 Бу чәтин зәманәдә дөзүмлү олмаг истәјириксә, бир мәсиһи кими гаршылашдығымыз сынаглара мүнасибәтимиз дүзҝүн олмалыдыр. Јагубун «сынаглары севинҹлә гаршылајын» сөзләри јадыныздадыр? Тәбии ки, бу, асан дејил, чүнки бу заман, ола билсин, инсан физики вә емосионал әзаб чәксин. Лакин јадда сахлајын ки, бундан ҝәләҹәк һәјатыныз асылыдыр. Һәвариләрин башына ҝәлән һадисәләр бизә сынаглары севинҹлә гаршыламаға көмәк едә биләр. Бу әһвалатлардан бири «Һәвариләрин ишләри» китабында јазылыб: «Һәвариләри чағырыб дөјдүрдүләр вә бир дә Исанын ады илә данышмамағы әмр едиб бурахдылар. Һәвариләр исә Исанын ады наминә тәһгирә лајиг ҝөрүлдүкләринә ҝөрә Синедриондан севинә-севинә чыхдылар» (Һәв. 5:40, 41). Һәвариләр баша дүшүрдү ки, чәкдикләри бу әзаблар онларын Исанын ҝөстәришинә садиг олдугларынын вә Јеһованын ризасыны газандыгларынын сүбутудур. Илләр сонра Бутрус Аллаһдан илһам алыб илк мәктубуну јазанда салеһлик уғрунда әзаб чәкмәјин фајдасыны вурғуламышды (1 Бут. 4:12—16).
11 Диҝәр бир һадисә һәвари Булусла Силанын башына ҝәлмишди. Филиппидә тәблиғ сәјаһәтиндә оланда онлары һәбс едиб шәһәрин асајишини позмагда вә јад адәт-әнәнәләри тәблиғ етмәкдә иттиһам етмишдиләр. Сонра онлары мөһкәм дөјүб зиндана атмышдылар. Мүгәддәс Китабда дејилир ки, јаралы вәзијјәтдә зинданда оланда ҝеҹәјарысы «Булусла Сила дуа едиб маһны охујур, Аллаһы тәрәннүм едирдиләр. Дустаглар да онлара гулаг асырдылар» (Һәв. 16:16—25). Булус вә Сила Мәсиһә ҝөрә гаршылашдыглары әзаб-әзијјәтләри тәкҹә Аллаһ гаршысында камил олдугларынын ҝөстәриҹиси кими гәбул етмирдиләр, һәм дә һәгигәти ахтаран инсанлара шаһидлик етмәк имканы кими јанашырдылар. Бундан инсанларын һәјаты асылы иди. Һәмин ҝеҹә дустагхана ҝөзәтчиси вә онун ев әһли һәгигәти гәбул едиб Исанын шаҝирди олду (Һәв. 16:26—34). Булус вә Сила Јеһоваја, Онун гүдрәтинә вә сынаглар заманы онлара дајаг олаҹағына әмин идиләр. Јеһова онларын үмидләрини доғрултду.
12 Бу ҝүн дә сынагларын чох олдуғу бир дөврдә Јеһова бизә дајаг олмаг үчүн лазым олан һәр шеји верир. О, бизим дөзүмлү олмағымызы истәјир. Јеһова бизә Өз Кәламыны вериб ки, Онун нијјәти һаггында дәгиг билијимиз олсун. Бу билик иманымызы артырыр. Биз баҹы-гардашларла үнсијјәтдә олмаг вә мүгәддәс Аллаһа ибадәт етмәк шәрәфинә лајиг ҝөрүлмүшүк. Һәмчинин биз хошбәхт инсанларыг ки, дуада Јеһова илә үнсијјәт едә билирик. Јеһова Она уҹалтдығымыз һәмд-сәналары вә өнүндә тәмиз галмаг үчүн етдијимиз јалварышлары гәбул едир (Филип. 4:13). Ҝәләҹәјә үмидимизин бизә вердији ҝүҹүн дә көмәји аз дејил (Мәт. 24:13; Ибр. 6:18; Вәһј 21:1—4).
ҺӘР ҸҮР СЫНАҒА ДӨЗҮРҮК
13 Буҝүнкү сынаглар Иса Мәсиһин илк шаҝирдләринин гаршылашдығы сынаглара чох бәнзәјир. Бәзи инсанлар јанлыш мәлумата әсасланараг Јеһованын Шаһидләрини тәһгир едир вә онларла зоракы давранырлар. Һәвариләрин вахтында олдуғу кими, индики тәгибләрин дә әксәријјәти тәлимләри вә әмәлләри Аллаһын Кәламында ифша олунан дини фанатикләрин башынын алтындан чыхыр (Һәв. 17:5—9, 13). Бәзән Јеһованын халгы өз һүгугларыны мүдафиә едәрәк дөвләтин ганунларында көмәк тапыр (Һәв. 22:25; 25:11). Лакин һәрдән дөвләт рәһбәрләри фәалијјәтимизә гадаға гојуб мәсиһи ибадәтимизи дајандырмаг истәјирләр (Зәб. 2:1—3). Белә вәзијјәтдә биз нөвбәти сөзләри дејән садиг һәвариләрин нүмунәсини ҹәсарәтлә изләјирик: «Биз инсанлара јох, һөкмдарымыз Аллаһа итаәт етмәлијик» (Һәв. 5:29).
14 Милләтчилик руһу бүтүн дүнјада ҝет-ҝедә артыр вә хош хәбәрин мүждәчиләринә тәзјиг ҝөстәрилир ки, Аллаһын онлара тапшырдығы ишә сон гојсунлар. Аллаһын бүтүн садиг бәндәләри вәһши «һејвана вә онун сурәтинә» сәҹдә етмәклә бағлы Вәһј 14:9—12 ајәләриндә верилән хәбәрдарлыға ҹидди јанашырлар. Биз Јәһјанын нөвбәти сөзләринә бармагарасы бахмамалыјыг: «Бурада Аллаһын әмрләринә әмәл едән вә Исанын иманындан бәрк јапышан мүгәддәсләрә дөзүм ҝәрәкдир».
15 Ола билсин, сиз мүһарибәләр, сијаси чеврилишләр, тәгибләр вә дөвләтин гојдуғу гадағалар уҹбатындан ачыг шәкилдә ибадәт едә билмирсиниз. Бүтүн јығынҹаг бир јердә јығышыб ибадәт ҝөрүшү кечирә билмир. Филиалла әлагә кәсилиб. Рајон нәзарәтчиләри јығынҹаглары зијарәт едә билмир. Әдәбијјат ала билмирсиниз. Белә олан һалда сиз нә етмәлисиниз?
16 Нә баҹарырсыныз, ону един, нә гәдәр баҹарырсыныз, о гәдәр един. Јәгин ки, мүталиә етмәк, Мүгәддәс Китабы охујуб арашдырмаг мүмкүндүр. Балаҹа груплар шәклиндә евләрдә јығышыб ибадәт ҝөрүшләри кечирмәк олар. Бу ҝөрүшләрдә әввәлләр кечдијиниз нәшрләри вә садәҹә Мүгәддәс Китабы арашдырмаг олар. Нараһат олмаг вә горхмаг лазым дејил. Рәһбәрлик Шурасы гыса мүддәт әрзиндә бир јол тапыб мәсул гардашларла әлагә сахлајаҹаг.
17 Унутмајын, мәсиһи баҹы-гардашларынызла әлагәниз кәсилсә дә, Јеһова Аллаһла вә Оғлу Иса Мәсиһлә әлагәниз кәсилмәјиб. Ҝәләҹәјә үмидинизи әввәлки кими мөһкәм сахлајын. Јеһова инди дә сизин дуаларынызы ешидир вә Өз руһу илә сизә ҝүҹ-гүввә вермәјә гадирдир. Ондан көмәк истәјин. Јадда сахлајын ки, сиз Јеһованын хидмәтчиси вә Иса Мәсиһин шаҝирдисиниз. Буна ҝөрә дә һәр имкандан истифадә едиб шаһидлик един. Јеһова сизин бу зәһмәтинизи мүкафатсыз гојмајаҹаг вә нәтиҹәдә, јени-јени инсанлар сыраларымыза гошулуб бу пак јолда јеријәҹәкләр (Һәв. 4:13—31; 5:27—42; Филип. 1:27—30; 4:6, 7; 2 Тим. 4:16—18).
18 Амма әҝәр, һәвариләр вә диҝәр баҹы-гардашларыныз кими, сизи дә өлүмлә һәдәләјирләрсә, «өлүләри дирилдән Аллаһа» бел бағлајын (2 Кор. 1:8—10). Дирилмә үмиди сизә ән ағыр тәгибләрә таб ҝәтирмәјә көмәк едәҹәк (Лука 21:19). Иса Мәсиһ бу саһәдә нүмунә гојуб. О билирди ки, сынаглар гаршысында ҝөстәрдији сәдагәт нечә-нечә инсана ҹәсарәт верәҹәк. Сиз дә баҹы-гардашларынызы бу ҹүр ҹәсарәтләндирә биләрсиниз (Јәһ. 16:33; Ибр. 12:2, 3; 1 Бут. 2:21).
19 Һәјатымызы ағырлашдыран тәкҹә тәгибләр дејил, башга чәтинликләр дә бизи үзә биләр. Мәсәлән, инсанлар мүждәјә лагејд јанашдыглары үчүн руһдан дүшә биләрик. Арамыздан кимләрсә физики вә емосионал хәстәликләрдән әзијјәт чәкирләр, јахуд гејри-камиллијин нәтиҹәсиндә әл-голларыны бағлајан вәзијјәтләрә дөзмәли олурлар. Һәвари Булус да бәзән хидмәтинә мәнфи тәсир едән вә ону чәтинләшдирән вәзијјәтләрә дөзмәли олурду (2 Кор. 12:7). Биринҹи әсрдә Филиппидә јашајан Епафродит дә достларынын онун хәстә олдуғундан хәбәр тутдуғу үчүн бәрк мәјус олмушду (Филип. 2:25—27). Һәрдән өзүмүзүн вә әтрафдакы инсанларын ҝүнаһлы хисләти ағыр проблемләр јарадыр. Баҹы-гардашларла вә ја аилә үзвләримизлә арамызда проблемләр баш галдырыр. Лакин Јеһованын Кәламындакы мәсләһәтләрә әмәл етмәклә бу вәзијјәтләрә дөзмәк вә бу проблемләри һәлл етмәк мүмкүндүр (Һизг. 2:3—5; 1 Кор. 9:27; 13:8; Кол. 3:12—14; 1 Бут. 4:8).
СОНА ГӘДӘР САДИГ ГАЛЫН
20 Биз Јеһованын јығынҹағын башы тәјин етдији шәхсә, Иса Мәсиһә садиг галмалыјыг (Кол. 2:18, 19). «Садиг вә ағыллы нөкәр»лә вә нәзарәтчи тәјин олунан гардашларла сых әмәкдашлыг етмәлијик (Ибр. 13:7, 17). Теократик гајдалара там әмәл етмәклә вә үзәринә мәсулијјәт ҝөтүрән гардашларла бирҝә чалышмагла биз бир халг кими Јеһованын ирадәсини јеринә јетирмиш олуруг. Дуа етмәк әнамындан там шәкилдә јарарланын. Унутмајын, нә дустагхана диварлары, нә тәкликдә зиндана атылмағымыз гајғыкеш сәмави Атамызла үнсијјәтин гаршысыны кәсә билмәз, баҹы-гардашларла бирлијимизи поза билмәз.
21 Ҝәлин гәтијјәт вә дөзүм ҝөстәриб әлимиздән ҝәләни едәк ки, дириләндән сонра Исанын давамчыларына вердији тапшырығы, тәблиғ ишини иҹра едә биләк. О өз давамчыларына бујурмушду: «Ҝедин вә бүтүн халгларын ичиндә шаҝирд һазырлајын, онлары Ата, Оғул вә мүгәддәс руһ ады илә вәфтиз един, сизә әмр етдијим һәр шејә риајәт етмәји онлара өјрәдин» (Мәт. 28:19, 20). Ҝәлин биз дә Иса кими дөзүмлү олаг. Ҝөзүмүзү Падшаһлыға бәсләдијимиз үмиддән вә әбәди јашамаг үмидиндән ајырмајаг (Ибр. 12:2). Мәсиһин вәфтиз олмуш шаҝирди олан бизләр Исанын дөврүн јекуну илә бағлы дедији пејғәмбәрлији јеринә јетирмәк шәрәфинә лајиг ҝөрүлмүшүк. О демишди: «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәт. 24:3, 14). Сон ҝәләнә кими бу ишә ҹан гојсаг, салеһлијин һөкм сүрдүјү јени дүнјаја кечиб әбәди вә шад-хүррәм јашајаҹағыг!