Рәһбәрлик Шурасынын мәктубу

Әзиз мүждәчиләр!

Биз чох хошбәхт инсанларыг! Бизә ваһид Аллаһ олан Јеһоваја чијин-чијинә ибадәт етмәк шәрәфи нәсиб олуб! Аллаһын әмәкдашы олан бизләрә мүгәддәс вә һәјатлары хилас едән иш тапшырылыб: биз Падшаһлыг һагда хош хәбәри инсанлара чатдырмалы вә шаҝирд һазырламалыјыг (1 Кор. 3:9; Мәт. 28:19, 20). Дүнја мигјасында ҝөрүлән бу иши сүлһ вә әмин-аманлыг ичиндә баша чатдырмаг үчүн јахшы тәшкилатчылыг ҝәрәкдир (1 Кор. 14:40).

Бу китабда мәсиһи јығынҹағынын неҹә фәалијјәт ҝөстәрдији тәсвир олунур, Јеһованын Шаһиди кими үзәринизә дүшән мәсулијјәтләр вә шәрәфли тапшырыглар барәдә сөз ачылыр. Әҝәр алдығыныз шәрәфли тапшырығы гијмәтләндирир вә мәсулијјәтләринизи јеринә јетирирсинизсә, иманда мөһкәм олаҹагсыныз (Һәв. 16:4, 5; Гал. 6:5).

Одур ки бу китабы јахшы-јахшы охумағы төвсијә едирик. Охудугларынызы һәјатынызда неҹә тәтбиг едә биләҹәјиниз барәдә дүшүнүн. Мәсәлән, әҝәр бу јахынларда тәблиғчи олмусунузса, вәфтиз олуб Јеһованын Шаһиди олмаг үчүн һансы аддымлары атмалысыныз? Јахуд, артыг вәфтиз олмусунузса, руһани ҹәһәтдән инкишаф етмәк вә Јеһоваја хидмәтинизи ҝенишләндирмәк үчүн нә едә биләрсиниз? (1 Тим. 4:15). Јығынҹагда сүлһү вә меһрибанчылығы горумаг үчүн шәхсән сиздән нә асылыдыр? (2 Кор. 13:11). Ҹаваблары бу китабдан тапмаг олар.

Әҝәр сиз вәфтиз олунмуш гардашсынызса, јығынҹаг хидмәтчиси вә ағсаггал кими хидмәт етмәјә јарарлы олмаг үчүн нә едә биләрсиниз? Минләрлә јени-јени инсан Аллаһын халгына гошулур. Буна ҝөрә дә мәсул гардашлара бөјүк еһтијаҹ вар. Бу мәгсәдләрә ҹан атмаг үчүн сиз нә етмәлисиниз? Ҹавабы бу китабдан өјрәнә биләрсиниз (1 Тим. 3:1).

Биз үрәкдән дуа едирик ки, бу китаб сизә Јеһованын гурулушунда өз јеринизи тапмаға вә ону гијмәтләндирмәјә көмәк етсин. Биз һәр биринизи чох севирик вә һәмишә дуа едирик ки, сиз әбәдијјән Атамыз Јеһоваја ҹани-дилдән ибадәт едән инсанларын арасында оласыныз (Зәб. 37:10, 11; Әшј. 65:21—25).