Јәһја јол һазырлајыр

Зәкәријјә илә Илсәбанын оғлу Јәһја бөјүјәндә пејғәмбәр олур. Јеһова Мәсиһин ҝәлишини инсанлара Јәһја васитәсилә чатдырыр. Јәһја синагогларда, јахуд шәһәрләрдә јох, чөллүкдә тәблиғ едир. Ҹамаат Јерусәлимдән вә Јәһудијјәдән ҝәлиб Јәһјаја гулаг асыр. Јәһја онлара өјрәдир ки, Аллаһы разы салмаг үчүн онлар пис әмәлләриндән дөнмәлидирләр. Она гулаг асандан сонра чохлары ҝүнаһларындан төвбә едир. Јәһја һәмин инсанлары Иордан чајында вәфтиз едир.

Јәһја садә һәјат сүрүр. О, дәвә јунундан палтар ҝејинир, чәјирткә вә чөл балы јејир. Јәһјанын ким олдуғу ҹамаата мараглы ҝәлир. Һәтта гүрурлу фәрисиләр вә саддукиләр ону ҝөрмәјә ҝәлирләр. Јәһја онлара дејир: «Јолларыныздан дөнүн, ҝүнаһларыныздан төвбә един. Елә һесаб етмәјин ки, сиз хүсуси инсанларсыныз. Сиз Ибраһимин өвладлары олдуғунузу дејирсиниз, амма бу, о демәк дејил ки, сиз Аллаһын өвладларысыныз».

Бир чохлары Јәһјанын јанына ҝәлиб сорушурлар: «Аллаһы разы салмаг үчүн нә етмәлијик?» Јәһја јәһудиләрә ҹаваб верир: «Әҝәр ики палтарыныз варса, бирини еһтијаҹы олана верин». Сәнҹә, о нәјә ҝөрә белә дејир? Чүнки Јәһја истәјир ки, онлар Аллаһы разы салмаг үчүн инсанлары севмәли олдугларыны баша дүшсүнләр.

Јәһја верҝијығанлара дејир: «Виҹданла давранын вә һеч кими алдатмајын». Әсҝәрләрә исә дејир: «Һеч кәсдән рүшвәт ҝөтүрмәјин, јалан данышмајын».

Каһинләр вә лавилиләр дә Јәһјанын јанына ҝәлиб ондан сорушурлар: «Сән кимсән? Һамы сәнин ким олдуғуну билмәк истәјир». Јәһја ҹаваб верир: «Әшија пејғәмбәрин дедији, инсанлары Јеһоваја тәрәф јөнәлдән чөллүкдәкинин сәсијәм».

Ҹамаат Јәһјанын тәлимләрини бәјәнир. Чохларына мараглыдыр ки, ҝөрәсән, Јәһја Мәсиһдир? Анҹаг Јәһја онлара дејир: «Мәндән даһа ҝүҹлүсү ҝәлир. Мән онун ајағындакы сәндәлин бағыны ачмаға белә лајиг дејиләм. Мән сизи су илә вәфтиз едирәм, о исә сизи мүгәддәс руһла вәфтиз едәҹәк».