Үзәринизә гојулан шәхсләрә һөрмәт един
“Һамыја һөрмәт един. Гардашлығы севин, Аллаһдан горхун, һөкмдара һөрмәт един” (1 ПЕТЕР 2:17).
1, 2. Инсанлар бу ҝүн һакимијјәтә неҹә мүнасибәт ҝөстәрирләр? Нә үчүн?
БИР АНА ҝилејләнәрәк дејир: “Ушаглар тамамилә сөзә бахмырлар. Валидејнләрә һеч бир һөрмәт јохдур”. Автомобилин бампериндәки јарлык белә сәсләнир: “Һакимијјәтә мејдан оху!” Бунлар, сизә мә’лум олдуғу кими, бу ҝүн јаранмыш вәзијјәти әкс етдирән јалныз ики мүлаһизәдир. Валидејнләрә, мүәллимләрә, рәисләрә вә һөкумәт гуллугчуларына гаршы һөрмәтсизлик бүтүн дүнјада ҝениш јајылыб.
2 Ким исә садәҹә чијинләрини атыб, дејәр: “Сәлаһијјәти олан инсанлар мәним һөрмәтимә лајиг дејилләр”. Бә’зән бу фикирлә разылашмамаг чәтин олур. Мәсәлә бурасындадыр ки, биз, рүшвәтлә әлә алынан һөкумәт гуллугчулары, мәнфәәт ҝүдән рәисләр, тәҹрүбәсиз мүәллимләр вә мәдәнијјәтсиз валидејнләрлә гаршылашырыг. Хошбәхтликдән, мәсиһчиләрдән аз адам, јығынҹагда сәлаһијјәти олан шәхсләри белә инсанлара аид едәҹәк (Матта 24:45—47).
3, 4. Мәсиһчиләр сәлаһијјәт верилән шәхсләрә нәјә ҝөрә һөрмәт етмәлидирләр?
3 Биз мәсиһчиләр, дүнјәви сәлаһијјәт верилмиш шәхсләрә һөрмәт етмәлијик. Һәвари Павел мәсиһчиләри үзәрләриндә олан һакимијјәтләрә табе олмаға дә’вәт едирди, “чүнки Аллаһ тәрәфиндән олмајан һаким јохдур, мөвҹуд олан һакимләр дә Аллаһ тәрәфиндән тә’јин олунмушдур” (Ромалылара 13:1, 2, 5; 1 Петер 2:13—15). Ејни заманда, Павел аиләдәки һакимијјәтә табе олмаг үчүн дә әсаслы сәбәб ҝөстәрди: “Еј гадынлар, Рәббә аид оланлара лајиг олдуғу кими, әрләринизә табе олун. Еј ушаглар, һәр вәҹһлә валидејнләринизә итаәт един; чүнки бу, Рәббә мәгбулдур” (Колослулара 3:18, 20). Јығынҹағын ағсаггаллары исә она ҝөрә һөрмәтә лајигдирләр ки, “Мүгәддәс Руһ” онлары “сүрүнүн ичиндә нәзарәтчи тә’јин етмишдир ки, Рәббин вә Аллаһын ҹәмијјәтини” ҝүдсүнләр (Һәвариләрин ишләри 20:28). Биз, бәшәри һакимијјәтләрә, Јеговаја еһтирам бәсләдијимизә ҝөрә һөрмәт едирик. Тәбиидир ки, Јегованын һакимијјәтинә һөрмәт етмәк һәјатымызда һәмишә биринҹи јердә дурур (Һәвариләрин ишләри 5:29).
4 Јегованын ән али һакимијјәтә саһиб олдуғуну јадда сахлајараг, сәлаһијјәти оланлара һөрмәт едән вә онлара һөрмәт етмәјән шәхсләрин нүмунәләрини нәзәрдән кечирәк.
Һөрмәтсизлик мүһакимәјә сәбәб олур
5. Микал әри Давуда неҹә һөрмәтсизлик етди вә бу нәјә сәбәб олду?
5 Биз, Давуд падшаһын һәјатындан ҝөрүрүк ки, Јегова Аллаһ, вердији сәлаһијјәтә һөрмәт етмәјән инсанлара неҹә мүнасибәт ҝөстәрир. Давудун ҝөстәриши илә әһд сандығы Јерусәлимә ҝәтирилән заман, онун арвады Микал, “падшаһ Давуду, Рәббин гаршысында сычрајыб рәгс едән ҝөрдү вә үрәјиндә она хор бахды”. Микал, Давуду һәм аиләнин башчысы, һәм дә мәмләкәтин падшаһы кими гәбул етмәли иди. Амма о өз һиссләрини кинајә илә билдирди: “Бу ҝүн гулларынын гадынлары гаршысында анҹаг ахмаг адамлардан биринин утанмадан сојундуғу кими сојунан Исраил падшаһы, бу ҝүн нә шәрәфли иди!” Елә буна ҝөрә дә, Микалын һеч вахт өвлады олмады (2 Самуел 6:14—23).
6. Јегова өзүнүн мәсһ етдији адамлара гаршы Гораһын етдији һөрмәтсизлијә неҹә гијмәт верди?
6 Аллаһын тә’јин етдији теократик рәһбәрлијә гаршы кобуд һөрмәтсизлик нүмунәси Гораһ олмушдур. Коһати оғулларындан бири кими, Гораһын сәјјар мә’бәддә Јеговаја хидмәт етмәси бир шәрәф иди! Амма о, Аллаһын мәсһ етдији (мүгәддәс руһу илә сечдији) исраиллиләрин рәһбәрләринә, јә’ни Муса илә Һаруна јерсиз ирад тутмаға башлады. Гораһ вә онун тәрәфини тутан Исраилин тајфа башчылары кобудҹасына Муса илә Һаруна дедиләр: “Бүтүн ҹамаат, онлардан һәр бири мүгәддәсдир вә Рәб онларын арасындадыр; нә үчүн Рәббин халгы үзәриндә өзүнүзү јүксәлдирсиниз?” Гораһын вә онун тәрәфдарларынын давранышына Јегова неҹә гијмәт верди? Јегованын нөгтеји-нәзәринә ҝөрә, онларын һәрәкәти Ону тәһгир етмиш олду. Онлара тәрәфдар оланларын һамысыны торпаг уддугдан сонра, Гораһ вә 250 нәфәр тајфа башчысы Јеговадан ҝәлән атәшлә јандылар (Сајлар 16:1—3, 28—35).
7. Павелин сәлаһијјәтини тәнгид етмәјә “фөвгәлһәвариләрин” әсаслары вардымы?
7 Биринҹи әсрин мәсиһчи јығынҹағында да, теократик рәһбәрлији гәбул етмәјән шәхсләр варды. Коринфдәки јығынҹагда олан бу “фөвгәлһәвариләр” Павелә һөрмәтсизликлә јанашырдылар. Онлар, Павелин натиглик габилијјәтини тәнгид едәрәк, дејирдиләр: “Шәхси ҝөркәми... тә’сирсиз, нитги исә әһәмијјәтсиздир” (2 Коринфлиләрә 10:10; 11:5). Натиглик баҹарығындан асылы олмајараг, Павел бир һәвари кими һөрмәтә лајиг иди. Бәс Павелин нитги доғруданмы “әһәмијјәтсиз” иди? Мүгәддәс Китабда јазылмыш чыхышлары, онун чох инандырыҹы сурәтдә данышдығына шәһадәт едир. Павел, јәһудиләрин “мүбаһисәли фикирләринин һамысыны” билән Һирод ЫЫ Агриппа илә гыса олараг сөһбәт етдикдән сонра, падшаһ е’тираф едиб деди: “Бир аз сонра мәни, Мәсиһчи олмаға инандыраҹагсан” (Һәвариләрин ишләри 13:15—43; 17:22—34; 26:1—28). Буна бахмајараг, Коринфдәки “фөвгәлһәвариләр” Павели данышыг габилијјәти олмамагда иттиһам едирдиләр! Бәс белә фикрә Јегова неҹә гијмәт верирди? Иса Мәсиһ, Ефесдәки ҹәмијјәтин нәзарәтчиләринә ҝөндәрдији хәбәрдә, “һәвари олмадыглары һалда, өзләрини һәвари” адландыранларын тә’сири алтына дүшмәјән инсанлар һаггында илтифатла данышмышды (Вәһј 2:1 2).
Гејри-камиллијә бахмајараг һөрмәт ҝөстәрмәк
8. Јегованын Шаула вердији сәлаһијјәтә һөрмәт етдијини Давуд неҹә ҝөстәрди?
8 Мүгәддәс Китабда, һакимијјәт сәлаһијјәти верилән шәхсләр, һәтта өз вәзифәләриндән суи-истифадә едәркән дә онлара һөрмәт ҝөстәрән инсанларын бир чох нүмунәләри вар. Белә јахшы нүмунәләрдән бири Давуддур. Шаул падшаһ, өз табелији алтында хидмәт едән Давудун наилијјәтләринә пахыллыг етмәјә башлады вә ону өлдүрмәјә чалышды (1 Самуел 18:8—12; 19:9—11; 23:26). Амма бир нечә дәфә Шаулу өлдүрмәк фүрсәтинә малик олан Давуд белә деди: “Рәбб мәнә ҝөстәрмәсин ки... Рәббин мәсиһинә... әл узадым” (1 Самуел 24:3—6; 26:7—13). Давуд, Шаулун сәһв олдуғуну билирди, амма ону мүһакимә етмәји Јегованын өһдәсинә бурахмышды (1 Самуел 24:12, 15; 26:22—24). О, һәм Шаулун өзү илә, һәм дә онун һаггында һөрмәтсизҹәсинә данышмырды.
9. а) Шаул тәрәфдән пис мүнасибәтә мә’руз галдыгда Давуд һансы һиссләри кечирирди? б) Давудун һәгигәтән дә Шаула һөрмәт етдијини биз һарадан билирик?
9 Давуд бу ҹүр пис мүнасибәтә таб ҝәтирәркән әзаб чәкирдими? Давуд, Јеговаја мүраҹиәтиндә фәрјад едиб дејирди: “Зорлулар ҹанымы ахтарыр” (Мәзмур 54:3). О, үрәјини Јегованын гаршысында бошалдырды: “Мәни дүшмәнләримдән азад ејлә, еј Аллаһым... Гүввәтлиләр мәнә гаршы топланырлар, нә үсјаныма ҝөрә, нә дә сучума ҝөрә, ја Рәб. Ҝүнаһым олмадан силаһланыб һазырлашырлар; мәнә јардым етмәк үчүн ојан вә бах” (Мәзмур 59:1—4). Сәлаһијјәт верилән адам, һеч бир пислик етмәдијиниз һалда сизә чәтинликләр төрәтдикдә, сиз дә белә һиссләр кечирибсинизми? Буна бахмајараг, Давуд Шаула лајигинҹә һөрмәт едирди. Шаул өләндә Давуд севинмәди, әксинә, ағы нәғмәси бәстәләди: “Саул [Шаул] илә Јонатан һәјатларында дадлы вә севимли идиләр... гарталлардан ҹәлд, асланлардан гүввәтли идиләр. Еј Исраил гызлары, Саул үчүн ағлајын” (2 Самуел 1:23, 24). Шаулун һагсыз олараг Давуда изтираб вермәсинә бахмајараг, Јегованын мәсһ етдији шәхсә әсл һөрмәт ҝөстәрмәкдә Давуд олдугҹа ҝөзәл нүмунә вермишди!
10. Аллаһын сәлаһијјәт вердији рәһбәрлик едән шураја мүнасибәтдә Павел һансы ҝөзәл һөрмәт нүмунәсини ҝөстәрди вә бу нәјә сәбәб олду?
10 Илк мәсиһчиләр арасында да, Аллаһдан сәлаһијјәт алан шәхсләрә һөрмәт едән инсанлар варды. Мисал үчүн Павели ҝөтүрәк. О, биринҹи әсрдәки мәсиһчи ҹәмијјәтинин рәһбәрлик едән шурасынын гәбул етдији гәрарлара һөрмәт едирди. Павел ахырынҹы дәфә Јерусәлимдә оларкән, рәһбәрлик едән шура она мәсләһәт етди ки, Мусанын ганунуна хор бахмадығыны башга инсанлара ҝөстәрмәк мәгсәдилә, тәнтәнәли сурәтдә паклансын. Павел белә фикирләшә биләрди: “Әввәлләр, мәним һәјатым тәһлүкәдә олан заман, бу гардашлар мәнә Јерусәлимдән чыхмағы бујурдулар. Инди исә онлар истәјирләр ки, мән һамынын гаршысында Мусанын ганунуна һөрмәт етдијими ҝөстәрим. Артыг мән галатијалылара јазмышам ки, бу Гануна риајәт етмәк лазым дејил. Әҝәр мә’бәдә ҝетсәм, мәним һәрәкәтими башгалары сәһв баша дүшә биләрләр, елә фикирләшәрләр ки, мән сүннәтлә разылашмышам”. Анҹаг, ҝөрүндүјү кими, Павел белә фикирләшмирди. Бу ишдә мәсиһчи принсипини позмаг тәләб олунмадығы үчүн, Павел, биринҹи әсрдәки рәһбәрлик едән шураја һөрмәт ҝөстәрди вә онун мәсләһәтинә риајәт етди. Дәрһал бундан сонра Павел, гәзәбләнмиш јәһудиләрин издиһамындан хилас олмаг мәҹбуријјәтиндә галды вә нәтиҹәдә ики или һәбсдә кечирди. Ахырда јенә дә Аллаһын ирадәси јеринә јетирилмиш олду. Павел Гејсәријәдә јүксәк вәзифәли рәисләрә тәблиғ етди вә сонрадан дөвләт хәзинәсинин һесабына Ромаја апарылды, орада исә бирбаша гејсәрин өзүнә шәһадәтлик етди (Һәвариләрин ишләри 9:26—30; 21:20—26; 23:11; 24:27; Галатијалылара 2:12; 4:9, 10).
Сиз дә һөрмәт ҝөстәрирсинизми?
11. Биз, дүнјәви һакимијјәтә һөрмәтимизи неҹә ҝөстәрә биләрик?
11 Сиз, сәлаһијјәт верилән шәхсләрә лајигинҹә һөрмәт едирсинизми? Мәсиһчиләрә әмр едилир: “Һәр адама һаггыны верин... һөрмәт исә һөрмәти”. Үзәримиздә “олан һакимләрә табе” олмағымыз јалныз верҝиләри өдәмәјимиздән јох, һәм дә һакимијјәтләрә өз һәрәкәт вә нитгимизлә һөрмәт ҝөстәрмәјимиздән ибарәтдир (Ромалылара 13:1—7). Әҝәр һакимијјәт гуллугчулары бизимлә амансыз давранарларса, бәс онда неҹә? Мексиканын Чјапас штатында бир јашајыш мәнтәгәсинин һөкумәт нүмајәндәләри Јегованын Шаһидләри олан 57 аиләнин кәнд тәсәррүфаты торпагларыны әлләриндән алмышдылар, чүнки бу мәсиһчиләр мүәјјән дини бајрамларда иштирак етмирдиләр. Бу мәсәләни һәлл етмәк үчүн тәшкил олунан иҹласларда, тәмиз вә сәлигәли ҝејинмиш Шаһидләр һәмишә ләјагәт вә һөрмәтлә данышырдылар. Бир илдән артыг вахт кечди вә галдырылан мәсәлә Шаһидләрин хејринә һәлл олунду. Бу иши мүшаһидә едән бә’зи адамларда Шаһидләрә гаршы елә һөрмәт јаранды ки, онларын өзләри дә Јегованын Шаһидләри олмаг истәдиләр!
12. Иман етмәјән әрә “еһтирам етмәк” нә үчүн ваҹибдир?
12 Бәс Аллаһын аиләдә сәлаһијјәт вердији шәхсләрә неҹә һөрмәт едә биләрик? Пислијә мә’руз галан Исанын нүмунәсини мүзакирә етдикдән сонра, һәвари Петер деди: “Еј гадынлар, сиз дә ејни шәкилдә өз әрләринизә табе олун ки, бә’зиләри кәлама итаәт етмәзләрсә, еһтирам ичиндә тәмиз һәјатынызы мүшаһидә едәрәк, сиз арвадларын рәфтары илә һеч бир сөз сөјләнмәдән фәтһ едилсинләр” (1 Петер 3:1, 2; Ефеслиләрә 5:22—24). Петер бурада гејд едир ки, һәтта әр буна лајиг олмајан кими ҝөрүнсә дә, арвадын әринә “еһтирамла” табе олмасы чох ваҹибдир. Арвадын һөрмәтли мүнасибәти, иман етмәјән әринин үрәјинә јол ача биләр.
13. Арвадлар өз әрләринә неҹә һөрмәт едә биләрләр?
13 Петер бу фәслин ајәләриндә бизим диггәтимизи Саранын нүмунәсинә јөнәлдир. Онун әри Ибраһим иман саһәсиндә ҝөзәл нүмунә олмушду (1 Петер 3:6; Ромалылара 4:16, 17; Галатијалылара 3:6—9). Иман едән әр, иман етмәјән әрдән азмы һөрмәтә лајигдир? Әҝәр сиз бир ишдә өз әринизлә разы дејилсинизсә, бәс онда неҹә? Иса, бу ишдә дә фајдалы олан бир мәсләһәт верир: “Ким сәнинлә бир мил ҝетмәк истәрсә, онунла ики мил ҝет” (Матта 5:41). Әринизин истәјинә ујғун давранмагла, она һөрмәт ҝөстәрирсинизми? Әҝәр бу сизә чәтин оларса, өз һиссләринизи она сөјләјин. Һиссләринизин она мә’лум олдуғуну фәрз етмәјин. Лакин өз арзунузу һөрмәтҹил сурәтдә билдирин. Мүгәддәс Китаб бизә нәсиһәт едир: “Гој сөзүнүз һәмишә нәвазишли олсун вә она дуз гатылмыш кими олсун ки, сиз һәр адама неҹә ҹаваб вермәк лазым олдуғуну биләсиниз” (Колослулара 4:6).
14. Валидејнләрә һөрмәт етмәк нә демәкдир?
14 Еј ушаглар, бәс сиз неҹә олмалысыныз? Аллаһын Кәламы бујурур: “Еј ушаглар, Рәбб јолунда валидејнләринизә итаәт един, чүнки бу әдаләтлидир. Атана вә анана һөрмәт ет ки, сәнә сәадәт јар олсун вә јер үзүндә узунөмүрлү оласан. Бу, дахилиндә вә’д олан илк әмрдир” (Ефеслиләрә 6:1—3). Фикир верин ки, “атана вә анана һөрмәт” етмәк вә онлара итаәтли олмаг ејни мә’наны верир. Бурада “һөрмәт етмәк” фе’ли илә ифадә едилән јунан сөзү, “јүксәк гијмәтләндирмәк” вә ја “гәдрини билмәк” мә’насыны верир. Буна ҝөрә дә, итаәтли олмаг үчүн, валидејнләрин сизә дүшүнҹәсиз ҝөрүнә билән гајда-ганунларына көнүлсүз табе олмаг кифајәт дејил. Аллаһ истәјир ки, сиз өз валидејнләринизә һөрмәт едәсиниз вә онларын вердији рәһбәрлији гијмәтләндирәсиниз (Сүлејманын мәсәлләри 15:5).
15. Валидејнләринин сәһвә јол вердикләрини зәнн етсәләр дә, онлара һөрмәт ҝөстәрмәкдә ушаглара нә көмәк едә биләр?
15 Әҝәр валидејнләринизин етдикләри бә’зи ишләр сизин онлара һөрмәтинизи азалдырса, бәс онда неҹә? Һәр шејә онларын нөгтеји-нәзәри илә бахмаға чалышын. Мәҝәр “сизи дүнјаја ҝәтирән” вә сизин гајғыныза галан онлар дејилми? (Сүлејманын мәсәлләри 23:22, ЈД). Онлары буна тәшвиг едән сизә олан мәһәббәтләри дејилми? (Ибраниләрә 12:7—11). Валидејнләринизлә һөрмәтлә сөһбәт един вә кечирдијиниз һиссләри онлара мүлајимликлә данышын. Һәтта онларын ҹавабы сизә хош ҝәлмәсә дә, онларла кобуд данышмагдан чәкинин (Сүлејманын мәсәлләри 24:29). Унутмајын ки, Шаул падшаһ Аллаһын мәсләһәтинә зидд даврандығы заман да, Давуд она һөрмәт едирди. Јеговадан хаһиш един ки, өз һиссләринизин өһдәсиндән ҝәлмәкдә сизә көмәк етсин. Давуд дејирди: “Үрәјинизи онун гаршысында бошалдын; Аллаһ бизим үчүн сығынаҹаг јеридир” (Мәзмур 62:8; Јеремјанын мәрсијәләри 3:25—27).
Рәһбәрлији өз үзәрләринә ҝөтүрәнләрә һөрмәт един
16. Мәләкләрин вә јаланчы мүәллимләрин нүмунәсиндән биз һансы ибрәт дәрси ала биләрик?
16 Јығынҹағын ағсаггаллары мүгәддәс руһла тә’јин едилирләр, буна бахмајараг онлар гејри-камилдирләр вә сәһвләр ишләдирләр (Мәзмур 130:3; Ваиз 7:20; Һәвариләрин ишләри 20:28; Јагуб 3:2). Нәтиҹәдә, јығынҹагда оланлардан ким исә ағсаггаллардан наразы гала биләр. Әҝәр јығынҹагда бир иш лазыми дәрәҹәдә едилмирсә вә ја бу иш һәр һалда бизә елә ҝөрүнүрсә, неҹә давранмалыјыг? Биринҹи әсрдә олан јаланчы мүәллимләрин, өзләрини мәләкләрдән нә гәдәр фәргли апардыгларына диггәт јетирин: “Онлар [јаланчы мүәллимләр] күстаһ, инадҹыл олуб, иззәтли варлыглара күфр едәркән, титрәмәзләр. Һалбуки гүввәт вә гүдрәтдә онлардан үстүн олан мәләкләр, Рәббин һүзурунда [“Јеговаја һөрмәт етдикләри үчүн”, ЈД] бунлара күфр етмәз вә һөкм вермәзләр” (2 Петер 2:9—13). Јаланчы мүәллимләр “иззәтли варлыглары”, јә’ни биринҹи әсрдә мәсиһчи јығынҹағында сәлаһијјәт верилмиш ағсаггаллары тәһгир едирдиләр, амма мәләкләр, руһани гардашлар арасында бирлији позан һәмин јаланчы мүәллимләри тәһгир етмирдиләр. Инсанлардан јүксәкдә олан вә инсанларла мүгајисәдә даһа артыг әдаләт һиссинә саһиб олан мәләкләр, јығынҹагда баш верән ишләри билирдиләр. Амма буна бахмајараг, онлар “Јеговаја һөрмәт етдикләри үчүн” мүһакимәни Онун өһдәсинә бурахырдылар (Ибраниләрә 2:6, 7; Јәһуда 9).
17. Бир кимсә ағсаггалларын сәһв олдугларыны һесаб едәркән, иман неҹә көмәк едәр?
17 Һәтта әҝәр бир иш лазымынҹа едилмирсә, биз, мәсиһчи јығынҹағынын дири Башчысы олан Иса Мәсиһә инанмалы дејиликми? Мәҝәр өзүнүн үмумдүнја јығынҹагларында баш верән ишләр Исаја мә’лум дејилми? Онун проблемләри һәлл етмәк баҹарығына һөрмәт ҝөстәрмәли вә һәр шејин онун әлиндә олдуғуну е’тираф етмәли дејиликми? Доғрудан да, ахы биз кимик ки, өз гоншумузу “мүһакимә” едәк? (Јагуб 4:12; 1 Коринфлиләрә 11:3; Колослулара 1:18). Әҝәр бир шеј бизә раһатлыг вермирсә, ахы нәјә ҝөрә өз нараһатлығымызы дуада Јеговаја билдирмәјәк?
18, 19. Әҝәр ағсаггалын сәһвә јол вердијини һесаб едирсинизсә, нә етмәк олар?
18 Инсанын гејри-камиллији үзүндән чәтинликләр вә ја проблемләр јарана биләр. Һәтта елә олур ки, ағсаггал, бә’зи адамларын нараһатлығына сәбәб олан сәһвә јол верир. Тәләм-тәләсик давранмағымыз вәзијјәти дәјишмир. Бу јалныз проблеми чәтинләшдирә биләр. Руһән ҝөзүачыг олан шәхсләр, баш верән ишә Јегованын дүзәлиш верәҹәјини вә Онун өзүнүн лазым билдији кими инсаны јола ҝәтирәҹәји вахты ҝөзләјәҹәкдир (2 Тимотејә 3:16; Ибраниләрә 12:7—11).
19 Әҝәр бир шеј сизи чох нараһат едирсә, онда нә етмәли? Проблеми јығынҹагда башгалары илә мүзакирә етмәк әвәзинә, нәјә ҝөрә көмәк үчүн һөрмәтҹил сурәтдә ағсаггаллара мүраҹиәт едилмәсин? Һеч кими тәнгид етмәдән, сизи нараһат едән шејләри сөјләјин. Ағсаггаллара гаршы һәмишә “шәфгәтли” олун вә онлара е’тибар етмәклә һөрмәти горујун (1 Петер 3:8). Кинајә илә данышмагдан узаг олун вә онларын јеткин мәсиһчи олдугларына бел бағлајын. Мүгәддәс Јазылара әсасланмыш һәр бир руһландырыҹы сөзләри онлардан миннәтдарлыгла гәбул един. Әҝәр вәзијјәти дүзәлтмәк үчүн мүәјјән тәдбир ҝөрмәк лазым ҝәләрсә, онда әмин олун ки, ағсаггаллар Јегованын рәһбәрлији илә дүзҝүн вә әдаләтлә давранаҹаглар (Галатијалылара 6:10; 2 Салониклиләрә 3:13).
20. Нөвбәти мөвзуда биз нәји мүзакирә едәҹәјик?
20 Биз, бунунла бәрабәр, сәлаһијјәт верилмиш шәхсләрә һөрмәт вә еһтирам ҝөстәрмәк мәсәләсинин даһа бир саһәсини нәзәрдән кечирмәлијик. Бәс сәлаһијјәт алан инсанлар, онлара тапшырылан шәхсләрә һөрмәт етмәли дејилләрми? Буну нөвбәти мөвзуда мүзакирә едәҹәјик.
Сиз неҹә ҹаваб верәрдиниз?
• Сәлаһијјәт верилмиш шәхсләрә һөрмәт етмәк үчүн һансы ҹидди сәбәбләримиз вар?
• Јегова вә Иса, Аллаһдан сәлаһијјәт алан шәхсләрә һөрмәт етмәјән адамлара неҹә бахырлар?
• Сәлаһијјәт верилмиш адамлара һөрмәт етмәкдә ким јахшы нүмунә ҝөстәрмишдир?
• Әҝәр үзәримиздә сәлаһијјәти олан адам, фикримизҹә сәһвә јол верирсә, нә етмәлијик?
[8-ҹи сәһифәдәки шәкил]
Сара, Ибраһимин сәлаһијјәтинә еһтирам едирди вә хошбәхт иди
[9-ҹу сәһифәдәки шәкил]
Микал, Давудун аилә башчысы вә падшаһ сәлаһијјәтинә һөрмәт етмәди
[10-ҹу сәһифәдәки шәкил]
“Рәбб мәнә ҝөстәрмәсин ки... Рәббин мәсиһинә... әл узадым”
[12-ҹи сәһифәдәки шәкил]
Ахы нәјә ҝөрә өз нараһатлығымызы дуада Јеговаја билдирмәјәк?