Башгаларыны һөрмәтдә габаглајырсанмы?
«Бир-биринизи һөрмәтдә габаглајын» (РОМ. 12:10).
1. Дүнјанын бир чох јерләриндә артыг нәјә јер галмајыб?
ДҮНЈАНЫН бәзи јерләриндә бир адәт олараг ушаглар һөрмәт әламәти кими бөјүкләрин мәҹлисиндә дизи үстә дурурлар. Онлар буну бөјүкләрдән һүндүр ҝөрүнмәмәк үчүн едирләр. Белә ҹәмијјәтләрдә ушагларын бөјүкләрә арха чевирмәләри дә һөрмәтсизлик кими гаршыланыр. Һөрмәт мүхтәлиф өлкәләрдә мүхтәлиф тәрздә тәзаһүр етдирилсә дә, бу ҹүр һөрмәт бизә Мусанын Ганунуну хатырладыр. Орада дејилир: «Јашлыларын гаршысында [һөрмәт әламәти олараг] ајаға дурун, ағсаггаллара һөрмәт еләјин. Аллаһыныздан горхун» (Лев. 19:32). Әфсуслар олсун ки, үмумиликдә ҝөтүрсәк, бир чох јерләрдә башгаларына һөрмәт галмајыб. Етираф етмәк лазымдыр ки, һөрмәтсизлик баш алыб ҝедир.
2. Аллаһын Кәламына әсасән, биз кимләрә һөрмәт етмәлијик?
2 Аллаһын Кәламы башгаларына һөрмәти јүксәк гијмәтләндирир. Орада дејилир ки, биз Јеһоваја вә Исаја һөрмәт етмәлијик (Јәһ. 5:23). Бизә еләҹә дә аилә үзвләримизә вә һәмиманлыларымыза, һәмчинин мәсиһчи олмајанлара һөрмәт ҝөстәрмәк әмр едилир (Ром. 12:10; Ефес. 6:1, 2; 1 Пет. 2:17). Јеһоваја һөрмәт етдијимизи ҝөстәрмәјимизин бәзи үсуллары һансылардыр? Мәсиһчи баҹы-гардашларымыза дәрин һөрмәт бәсләдијимизи неҹә ҝөстәрә биләрик? Ҝәлин бу вә диҝәр суаллары арашдыраг.
Јеһоваја вә Онун адына һөрмәт ет
3. Јеһоваја һөрмәт етмәјин ваҹиб үсулларындан бири һансыдыр?
3 Јеһова һөрмәт ҝөстәрмәјин ваҹиб үсулларындан бири Онун адына лазыми һөрмәти бәсләмәкдир. Һәр шејдән өнҹә, биз ‘Онун ады наминә тәшкил едилмиш халгыг’ (Һәв. иш. 15:14). Күлли-Ихтијар Аллаһ олан Јеһованын адыны дашымаг доғрудан да шәрәфдир. Микеја пејғәмбәр демишди: «Бүтүн халглар, өз аллаһларынын јолу илә ҝетсәләр белә, биз исә даим вә әбәди Аллаһымыз Рәббин [Јеһованын] ады илә ҝедирик» (Мик. 4:5). Дашыдығымыз ада ҝүндәлик һәјатымызда шәрәф ҝәтирмәјә сәј ҝөстәрмәклә ‘Аллаһымыз Јеһованын ады илә ҝедирик’. Павелин Ромадакы мәсиһчиләрә хатырлатдығы кими, әҝәр тәблиғ етдијимиз хош хәбәрә мүвафиг јашамырыгса, онда Аллаһын адына «күфр едилир», јәни һөрмәтдән салыныр (Ром. 2:21-24).
4. Јеһова һагда шаһидлик етмәк шәрәфинә неҹә јанашырсан?
4 Биз шәһадәтлик етмәклә дә Јеһоваја һөрмәт ҝөстәририк. Кечмишдә Јеһова Исраил халгыны Онун шаһиди олмаға дәвәт етмишди, амма онлар бу вәзифәнин өһдәсиндән ҝәлмәдиләр (Јешаја 43:1-12). Онлар дөнә-дөнә Јеһоваја гаршы үсјан етдиләр вә «Исраилин Мүгәддәсинин хатиринә дәјдиләр» (Мәз. 78:40, 41). Ахырда халг тамамилә Јеһованын лүтфүндән мәһрум олду. Амма биз Јеһова һагда шаһидлик етмәк вә Онун адыны бәјан етмәк шәрәфинә ҝөрә Она чох миннәтдарыг. Биз буну Аллаһы севдијимиз вә адынын тәгдис олунмасыны истәдијимиз үчүн едирик. Мәҝәр Сәмави Атамыз вә Онун нијјәтләри һагда һәгигәти билдикдән сонра суса биләрикми? Биз һәвари Павелин нөвбәти сөзләри илә там шәрикик: «Бу, мәним зәрури вәзифәмдир вә әҝәр тәблиғ етмирәмсә, вај һалыма!» (1 Кор. 9:16).
5. Јеһоваја иман етмәк Она һөрмәт етмәклә неҹә бағлыдыр?
5 Мәзмурчу Давуд демишди: «Исмини таныјанлар Сәнә ҝүвәнир, чүнки, ја Рәбб, Сәни ахтаранлары тәрк етмәзсән!» (Мәз. 9:10). Әҝәр Јеһованы доғрудан да таныјырыгса вә Онун адынын мәнасына һөрмәт бәсләјириксә, кечмишдәки садиг хидмәтчиләри кими Она ҝүвәнәҹәјик. Јеһоваја ҝүвәнмәк вә иман етмәк Она һөрмәт етдијимизи ҝөстәрмәјин диҝәр үсулудур. Јеһоваја ҝүвәнмәк илә Она һөрмәт етмәк арасындакы бағлылығы Аллаһын Кәламынын неҹә ҝөстәрдијинә диггәт јетир. Гәдим Исраил халгы Јеһоваја ҝүвәнмәјәндә ҝөр Јеһова Мусадан нә сорушмушду: «Нә вахтадәк бу халг Мәнә һөрмәтсизлик едәҹәк? Араларында етдијим әламәтләри ҝөрә-ҝөрә нә вахта гәдәр Мәнә иман ҝәтирмәјәҹәкләр?» (Сај. 14:11). Ајдын олур ки, иман етмәмәк дә һөрмәтсизликдир. Һәтта сынаглар заманы белә Јеһованын бизи мүдафиә етдијинә вә гејдимизә галдығына иман едириксә, Она һөрмәт бәсләдијимизи ҝөстәрмиш олуруг.
6. Јеһоваја дәрин һөрмәт етмәјә бизи нә тәшвиг едир?
6 Иса ҝөстәрди ки, Јеһоваја һөрмәт инсанын үрәјиндән ҝәлмәлидир. О, сәмими-гәлбдән ибадәт етмәјән инсанларла данышаркән Јеһованын сөзләрини ситат ҝәтирди: «Бу халг додаглары илә Мәнә һөрмәт едир, онларын үрәји исә Мәндән узагдыр» (Мат. 15:8). Јеһоваја гаршы сәмими һөрмәт Она олан һәгиги мәһәббәтдән ирәли ҝәлир (1 Јәһ. 5:3). Биз Јеһованын «Мәнә һөрмәт едәнләри һөрмәтә чатдыраҹағам» вәдини дә јадда сахлајырыг (1 Шам. 2:30).
Јығынҹағын нәзарәтчиләри башгаларына һөрмәт едир
7. а) Нәјә ҝөрә јығынҹагдакы мәсул гардашлар нәзарәт етдикләри инсанлара һөрмәт ҝөстәрмәлидирләр? б) Павел һәмиманлыларына һөрмәт етдијини неҹә ҝөстәрирди?
7 Һәвари Павел һәмиманлыларыны тәшвиг едирди: «Бир-биринизи һөрмәтдә габаглајын» (Ром. 12:10). Јығынҹагдакы мәсул гардашлар нәзарәт етдикләри инсанлары һөрмәтдә ‘габагламагда’ нүмунә вермәлидирләр. Бу гардашлар Павелин нүмунәсини тәглид етмәлидирләр. (1 Салоникилиләрә 2:7, 8 ајәләрини оху.) Павелин баш чәкдији јығынҹаглардакы гардашлар билирдиләр ки, онун өзү етмәк истәмәдији иши һеч вахт онлара етдирмәзди. Павел һәмиманлыларына һөрмәт едирди вә әвәзиндә онларын һөрмәтини газанмышды. О демишди: «Буна ҝөрә јалварырам сизә: мәни тәглид един». Биз әмин ола биләрик ки, јахшы нүмунә вердији үчүн бир чохлары ону һәвәслә тәглид етмишди (1 Кор. 4:16, И–93).
8. а) Исанын өз шаҝирдләринә һөрмәт ҝөстәрмәсинин ваҹиб үсулларындан бири һансы иди? б) Бу ҝүн нәзарәтчиләр Исаны неҹә тәглид едә биләрләр?
8 Мәсул гардашларын нәзарәтләри алтында оланлара һөрмәт ҝөстәрмәләринин диҝәр үсулу онлардан мүәјјән шеји хаһиш едәркән вә ја ҝөстәриш верәркән бунун сәбәбини изаһ етмәләридир. Бунунла онлар Исаны тәглид едирләр. Мисал үчүн, Иса шаҝирдләринә мәһсул јығымына даһа чох ишчиләр ҝөндәрмәк үчүн дуа етмәји дејәндә бунун сәбәбини изаһ етди: «Мәһсул чох, ишчиләр исә аздыр. Беләликлә, мәһсулун Саһиби олан Рәббә јалварын ки, Өз мәһсулуну јығмаға ишчиләр ҝөндәрсин» (Мат. 9:37, 38). Ејнилә, шаҝирдләринә ‘ојаг дурмағы’ дејәркән бунун сәбәбини изаһ едиб деди: «Чүнки Рәббинизин һансы ҝүн ҝәләҹәјини билмәзсиниз» (Мат. 24:42). Чох вахт Иса шаҝирдләринә тәкҹә нә едәҹәкләрини јох, һәмчинин буну нә үчүн етмәли олдугларыны да дејирди. Белә етмәклә онлара өз һөрмәтини ҝөстәрирди. Мәсиһчи нәзарәтчиләр үчүн бу неҹә дә ҝөзәл нүмунәдир!
Јеһованын јығынҹағына вә орадакы рәһбәрлијә һөрмәт ҝөстәр
9. Үмумдүнја мәсиһчи јығынҹағына вә онун үзвләринә һөрмәт етмәклә әслиндә кимә һөрмәт етмиш олуруг? Изаһ един.
9 Биз Јеһоваја һөрмәт әламәти олараг үмумдүнја мәсиһчи јығынҹағына вә онун һәр бир үзвүнә дә һөрмәт етмәлијик. Садиг гул синфинин Мүгәддәс Китабдан вердији мәсләһәтләрә риајәт едәндә Јеһованын тәшкилатына вә рәһбәрлијинә һөрмәт ҝөстәририк. Һәвари Јәһја биринҹи әсрдә јығынҹагда тәјин олунмуш гардашлара һөрмәтсизлик ҝөстәрәнләри мәзәммәт етмәк лазым олдуғуну гејд етди. (3 Јәһја 9-11 ајәләрини оху.) Онун сөзләри белә һөрмәтсизлијин јалныз нәзарәтчиләрин өзүнә јох, һәмчинин онларын тәлим вә ҝөстәришләринә гаршы олдуғуну ҝөстәрирди. Севиндириҹи һалдыр ки, мәсиһчиләрин әксәријјәти белә давранмырды. Һәвариләрин сағлығында мәсиһчи јығынҹаглары мәсул гардашлара дәрин һөрмәт ҝөстәрирди (Филип. 2:12).
10, 11. Мәсиһчи јығынҹағында бәзиләринә сәлаһијјәт верилмәсинин нә үчүн дүзҝүн олдуғуну Мүгәддәс Јазылар әсасында изаһ един.
10 Бәзиләри дүшүнүр ки, Иса: «Сиз һамыныз гардашсыныз», — дедији үчүн мәсиһчи јығынҹағында һеч кимин сәлаһијјәти олмамалыдыр (Мат. 23:8). Амма һәм Ибраниҹә, һәм дә Јунанҹа Мүгәддәс Јазыларда Аллаһ тәрәфиндән сәлаһијјәт верилән бир чох кишиләрин нүмунәси вар. Гәдим јәһудиләрдән олан тајфа башчыларынын, һакимләрин вә падшаһларын тарихи Јеһованын инсан нүмајәндәләри васитәсилә рәһбәрлик етдијинә зәнҝин сүбутдур. Инсанлар Аллаһын тәјин етдији шәхсләрә лазыми һөрмәти ҝөстәрмәјәндә Јеһова онлары ҹәзаландырырды (2 Пад. 1:2-17; 2:19, 23, 24).
11 Биринҹи әсрин мәсиһчиләри дә һәвариләрин сәлаһијјәтини гәбул едирдиләр (Һәв. иш. 2:42). Мәсәлән, Павел өз гардашларына ҝөстәришләр верирди (1 Кор. 16:1; 1 Салон. 4:2). Бунунла јанашы, өзү дә үзәриндә сәлаһијјәти оланлара көнүллү сурәтдә табе олурду (Һәв. иш. 15:22; Галат. 2:9, 10). Һәгигәтән дә, Павелин мәсиһчи јығынҹағындакы сәлаһијјәтә дүзҝүн мүнасибәти варды.
12. Мүгәддәс Китаб нүмунәләриндән сәлаһијјәтә даир нә өјрәнирик?
12 Бурадан ики шеј өјрәнирик. Биринҹиси, «садиг вә ағыллы гул»ун Рәһбәрлик Шурасы васитәсилә гардашларын мәсул вәзифәјә тәјин едилмәси Мүгәддәс Јазылара әсасланыр вә онларын да үзәриндә тәјин олунмуш сәлаһијјәтли гардашлар вар (Мат. 24:45-47; 1 Пет. 5:1-3). Икинҹиси, тәјин олунанлар да дахил олмагла, һәр биримиз үзәримиздә сәлаһијјәтли олан гардашлара һөрмәт етмәлијик. Белә исә, үмумдүнја мәсиһчи јығынҹағында нәзарәт етмәјә сәлаһијјәти оланлара һөрмәт етдијимизи неҹә ҝөстәрә биләрик?
Сәјјар нәзарәтчиләрә һөрмәт ет
13. Мәсиһчи јығынҹағынын мүасир нүмајәндәләринә һөрмәт етдијимизи неҹә ҝөстәрә биләрик?
13 Павел јазмышды: «Гардашлар, сиздән хаһиш едирик ки, аранызда зәһмәт чәкәнләрә вә Рәбб јолунда сизә рәислик едәнләрә вә сизә нәсиһәт верәнләрә һөрмәт един; онларын фәалијјәтләриндән өтрү онлара ән бөјүк мәһәббәт вә еһтирам ҝөстәрин. Гој аранызда әмин-аманлыг олсун» (1 Салон. 5:12, 13). ‘Зәһмәт чәкәнләрин’ арасында сәјјар нәзарәтчиләр дә вар. Буна ҝөрә дә, ҝәлин онлара ‘бөјүк еһтирам ҝөстәрәк’. Буну етмәјин бир јолу онлар мәсләһәт верәркән вә руһландыраркән буна сәмими-гәлбдән һај вермәкдир. Сәјјар нәзарәтчи садиг гул синфинин ҝөстәришләрини бизә чатдыранда «јухарыдан назил олан һикмәт» бизи «итаәткар» олмаға тәшвиг едәҹәк (Јаг. 3:17).
14. Јығынҹаг сәјјар нәзарәтчиләрә сәмими һөрмәт етдијини неҹә ҝөстәрир вә бу нәјә сәбәб олур?
14 Бәс әҝәр бизә мүәјјән бир иши әввәлләр етдијимиздән фәргли тәрздә етмәји бујурурларса, онда неҹә? Һөрмәт ҝөстәрмәк үчүн бәзән «Бизим әразидә бу иш белә едилмир» вә ја «Башга јердә буну етмәк мүмкүн олса да, бизим јығынҹагда јарамыр» кими фикирләрдән гачынмаг лазым ола биләр. Биз итаәткар олмаға чалышырыг. Јығынҹағын Јеһоваја мәхсус олдуғуну вә онун Башынын Иса олдуғуну јадда сахламағымыз итаәткар олмағымыза көмәк едәҹәк. Јығынҹағын сәјјар нәзарәтчинин ҝөстәришини мәмнунијјәтлә гәбул етмәси вә јеринә јетирмәси әсл һөрмәтин тәзаһүрүдүр. Һәвари Павел сәјјар нәзарәтчи Титусун вердији рәһбәрлијә һөрмәтлә итаәт етдикләринә ҝөрә Коринф јығынҹағындакы гардашлары тәрифләди (2 Кор. 7:13-16). Биз дә әмин ола биләрик ки, сәјјар нәзарәтчиләрдән алдығымыз ҝөстәришләри һәвәслә тәтбиг етсәк, тәблиғ хидмәтимиздә даһа чох севинҹ дујарыг. (2 Коринфлиләрә 13:11 ајәсини оху.)
«Һамыја һөрмәт един»
15. Һәмиманлыларымыза һөрмәт ҝөстәрмәјин бәзи үсуллары һансылардыр?
15 Павел јазмышды: «Ағсаггалы мәзәммәтләмә, амма атана јалваран кими јалвар; ҝәнҹләрә бир гардаш кими, ағбирчәкләрә ана кими, ҝәнҹ гадынлара там бир паклыгла, бир баҹы кими јалвар. Һәгигәтән дул олан гадынлара һөрмәт ет» (1 Тим. 5:1-3). Бәли, Аллаһын Кәламы бизә мәсиһчи јығынҹағында һәр бир кәсә һөрмәт етмәји мәсләһәт едир. Бәс әҝәр сәнинлә һәмиманлын арасында анлашылмазлыг варса, онда неҹә? Һәмин гардаша, јахуд баҹыја даһа һөрмәт етмәјәҹәксәнми? Јохса онун Аллаһын бир хидмәтчиси кими малик олдуғу јахшы хүсусијјәтләрини ҝөрәрәк өз мүнасибәтини дәјишәҹәксән? Јығынҹагда сәлаһијјәтләри оланлар гардашларына гаршы һөрмәтҹил мүнасибәти хүсусилә горујуб сахламалыдырлар, јәни һеч вахт ‘сүрүјә гаршы зүлмкар’ олмамалыдырлар (1 Пет. 5:3). Һәгигәтән дә, үзвләри арасында сәмими мәһәббәтин һөкм сүрдүјү мәсиһчи јығынҹағында бир-биримизә һөрмәт етмәк үчүн чох имканларымыз вар. (Јәһја 13:34, 35 ајәләрини оху.)
16, 17. а) Нәјә ҝөрә јалныз тәблиғ етдијимиз инсанлара јох, һәтта дүшмәнләрә дә һөрмәт ҝөстәрмәк ваҹибдир? б) ‘Һамыја һөрмәт етдијимизи’ неҹә ҝөстәрә биләрик?
16 Әлбәттә, биз јалныз мәсиһчи јығынҹағынын үзвләринә һөрмәт ҝөстәрмәклә кифајәтләнмәли дејилик. Павел өз дөврүнүн мәсиһчиләринә јазмышды: «Нә гәдәр фүрсәтимиз варса, һамыја... јахшылыг едәк» (Галат. 6:10). Дүздүр, иш вә ја синиф јолдашымыз бизимлә пис рәфтар етдикдә бу принсипә риајәт етмәк чәтин ола биләр. Белә анларда бу сөзләри хатырламалыјыг: «Пислик едәнләрә ҝөрә нараһат олма» (Мәз. 37:1). Бу мәсләһәтә әмәл етмәк һәтта дүшмәнләрлә дә һөрмәтлә давранмағымыза көмәк едәҹәк. Тәблиғдә иштирак едәркән тәвазөкар олмағымыз һамыја ‘мүлајимликлә вә еһтирамла ҹаваб вермәјимизә’ көмәк едәҹәк (1 Пет. 3:15). Һәтта хариҹи ҝөрүнүшүмүз вә ҝејимимиз дә тәблиғ етдијимиз инсанлара һөрмәт етдијимизи ҝөстәрә биләр.
17 Һәгигәтән дә, истәр һәмиманлыларымыз, истәрсә дә башга инсанлар олсун, биз «һамыја һөрмәт един. Гардашлығы севин, Аллаһдан горхун, һөкмдара һөрмәт един» мәсләһәтинә сәјлә әмәл етмәк истәјирик (1 Пет. 2:17).
Неҹә ҹаваб верәрдиниз?
• Јеһоваја лазыми һөрмәти неҹә ҝөстәрә биләрик?
• Јығынҹаг ағсаггалларына вә сәјјар нәзарәтчиләрә лазыми һөрмәти неҹә ҝөстәрә биләрик?
• Јығынҹағын һәр бир үзвүнә лазыми һөрмәти неҹә ҝөстәрә биләрик?
• Тәблиғ етдијимиз инсанлара лазыми һөрмәти неҹә ҝөстәрә биләрик?
[23-ҹү сәһифәдәки шәкил]
Биринҹи әсрин мәсиһчиләри рәһбәрлик шурасынын гәрарларына һөрмәтлә јанашырдылар
[24-ҹү сәһифәдәки шәкил]
Бүтүн јығынҹагларда ағсаггаллар Рәһбәрлик Шурасынын тәјин етдији сәјјар нәзарәтчиләрә һөрмәт едирләр