Нијјәтләримиздә нәјә ҝөрә мүдрик олмалыјыг?
НИЈЈӘТЛӘРИМИЗИН вә ҹәһдләримизин һәјата кечмәси мәмнунлуг һисси ҝәтирир. Лакин е’тираф етмәк лазымдыр ки, бүтүн арзу вә истәкләримиз һеч дә истәдијимиз кими һәјата кечмир. Нөвбәти дәфә мә’јуслуға гапыланда, биз өзүмүзә вә һәтта башгаларына да гәзәбләнирик. Бир мүдрик инсан дүзҝүн гејд едиб: “Башга ҝүнә атылан үмид үрәји хәстә едәр” (Сүлејманын мәсәлләри 13:12).
Мә’јуслуға сәбәб олан амил нәдир? Нијјәтләримиздә мүдрик олмағы неҹә өјрәнә биләрик? Бундан әлавә, бу нә үчүн бизә фајдалыдыр?
Нијјәтләр вә мә’јуслуг
Буҝүнкү чох сүр’әтли һәјат аһәнҝиндә, һәрдән бизә елә ҝәлир ки, заманла ајаглашмаға нә гәдәр чох чалышырыгса, бир о гәдәр дә аз вахт тапырыг. Һәјат бизә һәмишә амансыз тәләбләр тәгдим едир вә биз нәјәсә наил ола билмәјәндә өзүмүзү мүһакимә етмәјә вә һәтта киминсә үмидини доғрултмадығымызы дүшүнмәјә башлајырыг. Һәјат јолдашы вә ана олан Синтија, ушаглары тәрбијә етмәјин нә дәрәҹәдә чәтин олдуғуну биләрәк, дејир: “Ушагларымы ардыҹыл олараг ҹәзаландырмамағым вә үмумијјәтлә, онлары дүзҝүн тәрбијә етмәмәјим мәнә әзаб верир”. Ҝәнҹ гыз Стефани өз тәһсили һаггында бунлары дејир: “Етмәк истәдијим һәр шејә вахтым чатмыр, бу исә мәни әсәбләшдирир”.
Әҝәр инсанын нијјәтләри һәддиндән артыг јүксәкдирсә, о инсанда һәр шејдә мүкәммәллијә наил олмаг мејли асанлыгла јарана биләр, бу исә чох вахт бөјүк мә’јуслуға ҝәтириб чыхарыр. Бен адлы евли ҝәнҹ бир киши е’тираф едир: “Мән һәр дәфә өз һәрәкәтләрими, дүшүнҹәләрими вә дујғуларымы јохлајанда ҝөрүрәрәм ки, һансыса чәһәтдән даһа јахшы даврана биләрдим. Мән һәмишә мүкәммәллијә ҹан атырам, нәтиҹәдә исә јалныз дилхорлуг вә мә’јуслуг јараныр”. Гејл адлы евли бир мәсиһчи гадын исә белә дејир: “Өзүнә гаршы тәләбкар олан инсан үчүн, уғурсузлуг ағласығмаз ҝөрүнүр. Өзүнә гаршы тәләбкар олан бизләр, чох јахшы ана вә чох јахшы һәјат јолдашы олмаг истәјирик. Разы галмаг үчүн, бизә ҝөрүнән нәтиҹәләр ҝәрәкдир, буна ҝөрә дә, ҹәһдләримиз фајдасыз оланда бизи пешманчылыг бүрүјүр”.
Мә’јуслуға сәбәб ола билән диҝәр амилләр исә сәһһәтин позулмасы вә гоҹалыгдыр. Инсанын чевиклији вә гүввәси азаланда о өз имканларынын мәһдуд олдуғуну һисс едир вә даһа чох кәдәрләнмәјә башлајыр. Елизабет е’тираф едәрәк дејир: “Мән, хәстәләнмәздән әввәл етдијим кими, һәр шеји асан вә адәтән олдуғу кими едә билмәдијим үчүн чох кәдәрләнирдим”.
Беләликлә, бунларын һамысы, биздә мә’јуслуг һиссинин нә үчүн јаранмасынын сәбәбләрини ҝөстәрир. Әҝәр белә һиссләр идарә олунмазса, онлар белә фикир јарада биләр ки, бизи һеч ким гијмәтләндирмир. Бәс мә’јуслуғун өһдәсиндән ҝәлмәјә бизә нә көмәк едә биләр вә нијјәтләримиздә мүдрик олмағы неҹә өјрәнмәк олар?
Нијјәтләримиздә мүдрик олмағын үсуллары
Биринҹиси, хатырлајын ки, Јегова мүдрик вә анлајышлы Аллаһдыр. Мәзмур 103:14 бизә хатырладыр: “Јарадылышымызы билир; хатырлыјыр ки, биз торпағыг”. Јегова имканларымызын мәһдудлуғуну билир вә биздән јалныз ҝүҹүмүз чатан шејләри ҝөзләјир. Белә тәләбләрдән бири, “Аллаһынла алчаг көнүллү [“тәвазөкар”, ЈД] олараг јеримәкдән” ибарәтдир (Мика 6:8).
Ејни заманда Јегова бизи тәшвиг едир ки, дуада Она мүраҹиәт едәк (Ромалылара 12:12; 1 Салониклиләрә 5:17). Бәс бу бизә неҹә көмәк едә биләр? Дуанын сајәсиндә бизим дүшүнҹәмиз сабитләшир вә таразлашыр. Үрәкдән едилән дуа, көмәјә еһтијаҹымыз олдуғуна сүбут, тәвәзөкарлыг вә итаәткарлыг нишанәсидир. Јегова дуаларымыза һазырлыгла ҹаваб верир вә мәһәббәт, лүтфкарлыг, јахшылыг, өзүнә һаким олмаг кими сәмәрәләри олан мүгәддәс руһу бизә бәхш едир (Лука 11:1; Галатијалылара 5:22, 23). Бундан әлавә, дуа, нараһатчылыг вә наразылыгдан азад олмаға да көмәк едир. Елизабетин дедикләринә ҝөрә, дуа васитәсилә “инсан, әвәзолунмаз тәсәлли алыр”. Кевин буна бәнзәр фикир сөјләјир: “Мән, проблемин өһдәсиндән ҝәлмәк үчүн, һәлим үрәк вә ајдын дүшүнҹә һаггында дуа едирәм. Јегова һеч бир вахт мәни көмәксиз гојмур”. Һәвари Павел дуанын нә дәрәҹәдә дәјәрли олдуғуну билдији үчүн мәсләһәт едирди: “Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи горујаҹагдыр” (Филипилиләрә 4:6, 7). Бәли, дуада Јегова илә үнсијјәтдә олмаг, доғрудан да бизә, өзүмүздән вә башгаларындан ҝөзләдикләримизә мүнасибәтдә даһа мүдрик олмаға көмәк едир.
Лакин бә’зән киминсә тәсәллисинә чох еһтијаҹымыз олур. Вахтында дејилән сөз неҹә дә јахшыдыр! Јахын олан јеткин достла сөһбәт етмәк, һәрдән мә’јуслуг вә ја нараһатчылыг јарадан һадисәләрә башга ҹүр бахмаға көмәк едир (Сүлејманын мәсәлләри 15:23; 17:17; 27:9). Мә’јуслугла мүбаризә апармалы олан ҝәнҹ оғлан вә гызлар әмин олурлар ки, валидејн мәсләһәти онлара даһа таразлашмыш олмаға көмәк едир. Канди адлы бир гыз миннәтдарлыгла дејир: “Валидејнләримин севҝи долу мәсләһәтләри сајәсиндә мән даһа дүшүнҹәли вә таразлашдырылмыш олдум вә мәнимлә үнсијјәтдә олмаг башгаларына хош олду”. Бәли, Сүлејманын мәсәлләри 1:8, 9 ајәсиндә хатырланан мәсләһәт јерлидир: “Оғлум, атанын тә’лимини динлә вә ананын өјрәтдијини бурахма; чүнки онлар сәнин башына севимли бир чәләнҝ вә бојнуна бојунбағы олаҹаглар”.
Һәддиндән артыг тәләбкар инсанын дүшүнҹәсинин нәјә ҝәтириб чыхартмасы, бир мәсәлдә чох јахшы ифадә олунур: “Ҝөзләмә ки, һәјат сәнин өлчүләринлә бичиләҹәкдир, әкс һалда сәни мә’јуслуг ҝөзләјир”. Бунун баш вермәмәси үчүн, дүшүнҹә тәрзини дәјишмәк лазымдыр. Садәлик вә тәвазөкарлыг - башга сөзләрлә десәк, шәхси мәһдудијјәтләримизә реал бахыш - биздә јалныз таразлашдырылмыш вә мүдрик нијјәтләр ојадаҹагдыр. Ромалылара 12:3 ајәсиндәки сөзләр бизи хәбәрдар едир: “Өзүнүзә лүзумундан чох әһәмијјәт вермәјин”. Бундан әлавә, Филипилиләрә 2:3 ајәсиндәки сөзләр бизи тәвазөкар олмаға вә бир-биримизи өзүмүздән үстүн сајмаға тәшвиг едир.
Јухарыда хатырланан Елизабет, хәстәлијинә ҝөрә чох кәдәрләнирди. Онун өз проблемләринә Јегованын нөгтеји-нәзәри илә бахмасы вә Аллаһын бизим хидмәтимизи унутмамасы фикриндән тәсәлли алмасы үчүн вахт тәләб олунурду. Үзүҹү хәстәлик Колин адлы бир кишини јорған-дөшәјә бағламышды. Сағлам оларкән етдији хидмәтлә мүгајисәдә индики хидмәтинин дәјәрсиз олмасына даир һиссләрдән, әввәлҹә азад ола билмирди. Лакин 2 Коринфлиләрә 8:12 ајәси үзәриндә дүшүнмәк, она бу һиссләрин өһдәсиндән ҝәлмәјә көмәк етди. Бу мәтндә дејилир: “Әҝәр шөвг варса, инсанда олмајан мала ҝөрә дејил, олан мала ҝөрә мәгбулдур”. Колин дејир: “Чох едә билмәдијимә бахмајараг, нә исә едә билирәм вә Јегова буну гијмәтләндирир”. Ибраниләрә 6:10 ајәсиндә белә бир хәбәрдарлыг тапырыг: “Аллаһ һагсыз дејилдир ки, сизин ишинизи, мүгәддәсләрә хидмәт етмиш вә едәрәк Онун ады наминә ҝөстәрдијиниз мәһәббәти унутсун”.
Бәс нијјәтләримизин мүдрик олуб олмадығыны неҹә мүәјјән етмәк олар? Өзүнүздән сорушун: “Мәним нијјәтләрим, Јегованын нијјәтләринә мүвафигдирми?” Галатијалылыра 6:4 ајәсиндә дејилир: “Гој һәр кәс өз ишини сынасын вә о заман башгасы илә дејил, өзү илә ифтихара сәбәб олсун”. Исанын сөзләрини јада салын: “Бојундуруғум асан вә јүкүм јүнҝүлдүр”. Бәли, биз мәсиһчиләрин үзәринә бојундуруг гојулуб. Анҹаг о раһат вә јүнҝүлдүр вә Исанын вә’д етдији кими, әҝәр биз ондан дүзҝүн истифадә етмәји өјрәнсәк, о бизә тәравәт ҝәтирәҹәкдир (Матта 11:28—30).
Мүдрик нијјәтләр мүкафатландырылыр
Аллаһын Кәламына гулаг асараг вә орадакы мәсләһәтләри тәтбиг едәрәк, биз нијјәтләримиздә мүдрик олмағы өјрәнәҹәјик. Белә давранараг биз јалныз инди јох, илләр кечәндән сонра да јахшы сәмәрәләр әлдә едәҹәјик. Биринҹиси, бу бизим физики вәзијјәтимизә јахшы тә’сир едир. 22 јашлы Ҹеннифер, Јегованын хатырлатмаларынын она неҹә фајда ҝәтирдијини е’тираф едир: “Мән, һәјат гүввәсинин бөјүк јүксәлишини һисс едирәм”. Сүлејманын мәсәлләри 4:21, 22-дә инадла мәсләһәт олунур ки, Јегованын дедикләриндән ҝөзүмүзү ајырмајаг вә онлары үрәјимиздә горујаг, “чүнки онлары тапанлар үчүн һәјат вә бүтүн бәдәнләри үчүн шәфадырлар”.
Икинҹиси, бу бизим руһи вә емосионал вәзијјәтимизә мүсбәт тә’сир ҝөстәрир. Тереза дејир: “Мән, Аллаһын Кәламынын зеһнимә вә үрәјимә тә’сир етмәсинә имкан верәндә, өзүмү даһа хошбәхт һисс едирәм”. Әлбәттә, биз һәјатда һәлә чох мә’јуслугларла тоггушаҹағыг. Анҹаг онлара таб ҝәтирмәк бизә асан олаҹагдыр. Јагуб 4:8 ајәси тәшвиг едир: “Аллаһа јахынлашын вә О да сизә јахынлашар”. Һәмчинин Јегова вә’д едир ки, бизи һәјати сынагларда ҝүҹләндирәҹәк вә сүлһ илә хејир-дуаландыраҹаг (Мәзмур 29:11).
Әҝәр биз нијјәтләримиздә мүдрикиксә, руһани таразлығы горумуш олуруг. Бу исә өз-өзлүјүндә хејир-дуадыр. Биз диггәтимизи һәјатда “ән үстүн” шејләрә мәркәзләшдиририк (Филипилиләрә 1:16). Мәгсәдләримиз һәгигәтә чеврилир вә әлверишли олур, бу да бөјүк севинҹ вә мәмнунлуг ҝәтирир. Бундан әлавә, Јегованын һәр шеји бизим хејримизә едәҹәјини биләрәк, бөјүк һәвәслә Она архаланырыг. Петер дә’вәт едир: “Аллаһын ҝүҹлү әлинин һимајәси алтында тәвазөкар олун ки, О Өз вахтында сизи уҹалтсын” (1 Петер 5:6). Јегованын хејирхаһлығындан јахшы мүкафат нә ола биләр?
[32-ҹи сәһифәдәки шәкилләр]
Әҝәр нијјәтләримиздә мүдрик олмағы өјрәнириксә, кәдәрин вә үмидсизлијин өһдәсиндән ҝәлмәк бизә асан олаҹагдыр