Әлчатан мәгсәдләрә ҹан ат вә севинҹини гору
«ЈЕНӘ дә алынмады!» Јәгин ки, мәгсәдинә наил олмадығын һалларда бу сөзләри өзүнә дәфәләрлә демисән. Ҝәнҹ мәсиһчи ана белә һиссләр кечирә биләр. Чүнки о, јени доғулмуш ушағы даима диггәт тәләб етдијиндән јорулур вә руһани ишләрә истәдији гәдәр вахт ајыра билмир. Диҝәр мәсиһчи, алдығы тәрбијәнин уҹбатындан дүшүнә биләр ки, һеч нәјә јарамыр вә јығынҹагда кифајәт гәдәр фәал дејил. Јашлы баҹы инди мәсиһчи хидмәтиндә әввәлләр етдији гәдәр едә билмәдији үчүн мәјуслуға гапыла биләр. Аилә шәраитинин Јеһоваја хидмәтдә истәдији гәдәр етмәјә јол вермәдији Кристина дејир: «Пионер хидмәтинә тәшвиг едән чыхышлара гулаг асмағым бәзән кифајәтдир ки, мәни ағламаг тутсун».
Бу һиссләрин өһдәсиндән неҹә ҝәлмәк олар? Бәзи мәсиһчиләр өз шәраитинә реал бахмағы неҹә өјрәнибләр? Өзүмүздән һәддән артыг чох шеј тәләб етмәсәк, бунун бизә һансы фајдасы олаҹаг?
Гаршына әлчатан мәгсәдләр гој
Һәвари Павел: «Рәббә аид олдуғунуз үчүн һәмишә севинин; вә бир дә дејирәм: севинин. Гој сизин мүлајимлијиниз [јахуд таразлылығыныз] бүтүн инсанлара мәлум олсун», — дејәрәк севинҹи горумағын сиррини ачыглајыр (Филип. 4:4, 5). Аллаһа хидмәтимиз севинҹ вә мәмнунлуг ҝәтирсин дејә, өзүмүздән баҹарығымызын вә шәраитимизин јол вердијиндән артыг шеј ҝөзләмәмәји өјрәнмәлијик. Әҝәр нәјин баһасына олурса-олсун гејри-реал мәгсәдләрә наил олмаг үчүн дәридән-габыгдан чыхырыгса, демәли, өзүмүзү ҝәрәксиз стрессә дүчар едирик. Диҝәр тәрәфдән, диггәтли олмалыјыг ки, мәсиһчи хидмәтиндә аз иштирак етмәк үчүн мүхтәлиф бәһанәләр ахтарараг өзүмүзә бәраәт газандырмајаг.
Шәраитимиздән асылы олмајараг, Јеһова Она малик олдуғумуз ән јахшы шеји вермәјимизи, јәни ҹанла-башла вә сәмими-гәлбдән хидмәт етмәјимизи ҝөзләјир (Колос. 3:23, 24). Әҝәр Јеһоваја имканымызын јол вердијиндән аз веририксә, демәли, Она һәср олунмағымыза ујғун јашамырыг (Ром. 12:1). Үстәлик, өзүмүзү сидги-үрәкдән хидмәт етмәјин ҝәтирдији дәрин мәмнунлугдан, әсл севинҹдән вә бир чох башга хејир-дуалардан мәһрум етмиш олардыг (Сүл. мәс. 10:22).
Мүгәддәс Китабда «мүлајим» кими тәрҹүмә олунан јунан сөзү анлајышлы олмаг мәнасыны дашыјыр. Онун һәрфи мәнасы «ҝүзәштә ҝедән» демәкдир (Јаг. 3:17). Бу сөзүн, өзүнә гаршы һәддән артыг тәләбкар олмамаг чалары да вар. Демәли, бу кејфијјәтләри өзүмүздә јетишдирмишиксә, шәраитимизә даир таразлы нөгтеји-нәзәримиз олаҹаг. Бәс буну етмәк чәтиндирми? Бәзиләри үчүн чәтиндир, һалбуки онлар башга инсанлара анлајышла јанашырлар. Мисал үчүн, тәсәввүр едәк ки, јахын достумуз өз үзәринә чох иш ҝөтүрдүјү үчүн јорулуб әлдән дүшүр. Мәҝәр һәјатында дәјишиклик етмәјин мүдрик давраныш олдуғуну ҝөстәрәрәк она көмәк етмәјә чалышмаздыгмы? Ејнилә, биз дә имканларымызын һәддини ҝөрмәји өјрәнмәлијик (Сүл. мәс. 11:17).
Валидејнләримиз бизә гаршы һәддән артыг тәләбкар олубларса, имканларымыза таразлы јанашмағымыз даһа чәтин ола биләр. Белә аиләләрдә бөјүјән бәзи инсанлар ушаглыгда дүшүнүбләр ки, валидејнләринин мәһәббәтини газанмаг үчүн һәмишә даһа чох сәј ҝөстәрмәли вә ја һәр шејдә даһа јахшы олмалыдырлар. Биз дә белә аиләдә тәрбијә алмышыгса, Јеһованын бизә неҹә јанашдығына даир јанлыш фикримиз ола биләр. Јеһова садәҹә Она бүтүн үрәкдән хидмәт етдијимизә ҝөрә бизи севир. Аллаһын Кәламы бизи әмин едир ки, Јеһова «неҹә јарандығымызы билир, торпагдан дүзәлмәјимизи унутмур» (Мәз. 103:14). Јеһова имканларымызын мәһдуд олдуғундан бихәбәр дејил вә әлимиздән ҝәлдији гәдәр Она сәјлә хидмәт едәндә биздән разыдыр. Јеһова Аллаһымызын сәрт нәзарәтчи олмадығыны јадымызда сахласаг, өзүмүздән артыг шеј ҝөзләмәјәҹәјик вә тәвазөкарлыгла имканларымызын мәһдуд олдуғуну етираф едәҹәјик (Мик. 6:8).
Амма јенә дә бәзиләринә таразлы олмаг чәтиндир. Әҝәр белә проблемин варса, нәјә ҝөрә сәни јахшы таныјан јеткин мәсиһчидән көмәк истәмәјәсән? (Сүл. мәс. 27:9). Тутаг ки, даими пионер олмаг истәјирсән. Бу, әла мәгсәддир! Бәс буна наил олмагда бир чәтинлијин вармы? Бәлкә, һәјатыны садәләшдирмәк үчүн сәнә көмәк лазымдыр? Јахуд аилә вәзијјәтини нәзәрә алараг инди даими пионер хидмәтинә башламаг сәнин үчүн нә дәрәҹәдә мүнасиб оларды? Нәјә ҝөрә буну етибарлы достунла мүзакирә етмәјәсән? О, пионер хидмәтинин өһдәсиндән ҝәлиб-ҝәлмәјәҹәјини, јахуд даһа фәал олмаг үчүн нә едә биләҹәјини ҝөрмәјә көмәк едә биләр. Бу вәзијјәтдә әр дә арвадына көмәк едә биләр ки, о, имканларындан лазымынҹа истифадә етсин. Мәсәлән, арвады даһа чох хидмәт етмәји планлашдырырса, әри она јени хидмәт ајы башламаздан өнҹә бир аз истираһәт етмәји тәклиф едә биләр. Бунун сајәсиндә о, гүввәсини бәрпа едәҹәк вә хидмәтдә севинҹини горујаҹаг.
Диггәтини едә биләҹәјин ишләрә јөнәлт
Гоҹалыг вә сәһһәтин ҝет-ҝедә зәифләмәси Јеһоваја хидмәтдә мүәјјән мәһдудијјәтләр гоја биләр. Әҝәр балаҹа ушагларын варса, сәндә елә тәәссүрат јарана биләр ки, әксәр вахтыны вә ҝүҹүнү онлар алдығына ҝөрә шәхси өјрәнмәдән вә ја мәсиһчи ҝөрүшләриндән аз фајда әлдә едирсән. Елә олурму ки, шәраитинин јол вермәдији шејләр һаггында дүшүнәрәк едә биләҹәкләрини нәзәрдән гачырырсан?
Мин илләр әввәл бир левили мүмкүн олмајан бир шеји арзуламышды. Онун илдә ики һәфтә мәбәддә хидмәт етмәк үстүнлүјү варды. Лакин о, гурбанҝаһын јанында даима хидмәт етмәји арзулајырды. Бу, тәрифәлајиг иди (Мәз. 84:1-3). Бәс бу садиг левилијә севинҹини горумаға нә көмәк етди? О анлады ки, мәбәдин һәјәтиндә һәтта бир ҝүн олмаг белә, мүгајисәолунмаз шәрәфдир (Мәз. 84:4, 5, 10). Ејнилә, гејри-мүмкүн шејләр һагда хәјал етмәкдәнсә, баҹардығымыз шејләри сезмәли вә онлары гијмәтләндирмәјә чалышмалыјыг.
Ҝәлин Канадада јашајан Нерланд адлы баҹымызын нүмунәсинә нәзәр салаг. О, әлил арабасы илә һәрәкәт едир вә хидмәтдә ҹүзи иш ҝөрдүјүнү фикирләширди. Амма јахынлыгдакы тиҹарәт мәркәзиндә тәблиғ едә биләҹәјини ҝөтүр-гој едәндә әһвал-руһијјәси дәјишди. О дејир: «Мән тиҹарәт мәркәзиндә скамјанын јанында әлил арабамда отурурам. Бир аз истираһәт етмәк үчүн орада әјләшән инсанлара тәблиғ етмәк мәнә севинҹ ҝәтирир». Хидмәтин бу дәјәрли нөвүндә иштирак етмәк Нерланды чох мәмнун едир.
Лазым ҝәләрсә, дәјишикликләр ет
Јелкәнли ҝәми күләјин сајәсиндә сүрәтлә ҝедир. Амма ҝәмини идарә едән гасырғанын башладығыны ҝөрәндә јелкәнләри ашағы салмалы олур. Дүздүр, о, гасырғаны јатыра билмәз, амма јелкәнләрдә дәјишиклик етмәклә ҝәмисини идарә едә билир. Буна бәнзәр тәрздә, һәјатда гаршылашдығымыз гасырғајабәнзәр әлверишсиз шәраитләри чох вахт дәјишмәк игтидарында дејилик. Амма физики, әгли вә емосионал имканларымыздан дүзҝүн истифадә етмәклә «һәјатымызын сүканыны» әлдә сахлаја биләрик. Јени шәраитимизә ујғунлашсаг, Аллаһа хидмәтдә мәмнунлуғумузу вә севинҹимизи горујуб сахлајаҹағыг (Сүл. мәс. 11:2).
Бәзи мәгамлара диггәт јетирәк. Әҝәр тез јорулуругса, ахшам јығынҹаг ҝөрүшүнә ҝетмәјә ҝүҹүмүз олсун дејә, һәмин ҝүн ағыр ишләрлә мәшғул олмамаг фајдалы оларды. Онда һәмиманлыларымызла үнсијјәт бизә даһа чох севинҹ ҝәтирәҹәк. Јахуд әҝәр ана ушағы хәстәләндијиндән евдән-евә тәблиғә чыха билмирсә, о, бир баҹыны евинә дәвәт едиб, ушағы јатдығы мүддәтдә телефонла тәблиғ едә биләр.
Бәс јығынҹаг ҝөрүшләриндә мүзакирә едиләҹәк материалы әввәлҹәдән охујуб арашдырмаға шәраитин јол вермирсә, онда неҹә? Нә гәдәр материал һазырлаја биләҹәјини мүәјјән ет вә она мүмкүн гәдәр јахшы һазырлаш. Шәраитимизә ујғун мәгсәдләрә ҹан атсаг, фәаллығымызы вә севинҹимизи горуја биләрик.
Мәгсәдимизи дәјишмәк үчүн гәтијјәт вә сәј тәләб олуна биләр. Франсада јашајан Серж вә Анје планларында бөјүк дәјишиклик етмәли олдулар. Серж дејир: «Ушағымыз олаҹағыны биләндә баша дүшдүк ки, миссионер олмаг арзумуз баш тутмајаҹаг». Инди онларын ики шән вә фәал гызы вар вә Серж бир аилә кими гаршыларына гојдуглары мәгсәддән данышыр: «Башга өлкәдә хидмәт етмәк истәјимиз баш тутмаса да, биз өз өлкәмиздә “миссионер” олмаг гәрарына ҝәлдик вә әҹнәбидилли група кечдик». Јени мәгсәд онлара һансы хејир-дуаны ҝәтирди? Серж дејир: «Һисс едирик ки, хидмәтимиз јығынҹаға фајда ҝәтирир».
Франсада јашајан 70 јашлы Одил баҹы дизләриндә остеоартрит хәстәлијиндән әзијјәт чәкдији үчүн ајаг үстә чох дајана билмир. Сәһһәти илә бағлы проблемләри евдән-евә тәблиғ етмәјинә әнҝәл төрәтдијинә ҝөрә о, чох руһдан дүшүрдү. Амма баҹымыз Одил тәслим олмады вә шәраитинә ујғунлашараг телефонла тәблиғ етмәк гәрарына ҝәлди. Баҹы дејир: «Бу, фикирләшдијимдән асан вә даһа севиндириҹи олду!» Бу үсул онун хидмәтдә иштирак етмәк һәвәсини јенидән аловландырды.
Әлчатан мәгсәдләр хејир-дуалар ҝәтирир
Өзүмүздән һәддиндән артыг шеј тәләб етмәмәји өјрәнмәк бизи бир чох мәјуслугдан горујаҹаг. Мәһдуд имканларымыза бахмајараг, гаршымыза әлчатан мәгсәдләр гојмагла мәмнунлуг дујуруг. Етдикләримиз аз олса да, әлимиздән ҝәләни едириксә, бу бизә севинҹ ҝәтирәҹәк (Галат. 6:4).
Имканларымыза таразлы нөгтеји-нәзәрлә бахмағы өјрәндикҹә, һәмиманлыларымыза гаршы даһа анлајышлы олаҹағыг. Онларын шәраит вә имканларыны нәзәрә аланда бизим үчүн етдикләрини һәмишә гијмәтләндирәҹәјик. Бизә ҝөстәрилән һәр бир көмәјә миннәтдарлығымызы билдирмәклә јығынҹагдакы әмәкдашлыг руһуну мөһкәмләндирәҹәјик вә бир-биримизи даһа јахшы баша дүшәҹәјик (1 Пет. 3:8). Ону јадда сахла ки, Јеһова, севән бир Ата кими, һеч вахт биздән ҝүҹүмүздән артыг шеј ҝөзләмир. Баҹарыг вә шәраитләримизә таразлы нөгтеји-нәзәрлә бахсаг вә гаршымыза әлчатан мәгсәдләр гојсаг, Јеһоваја хидмәт бизә даһа чох мәмнунлуг вә севинҹ бәхш едәҹәк.
[29-ҹу сәһифәдәки чәрчивә]
Аллаһа хидмәтимиз севинҹ вә мәмнунлуг ҝәтирсин дејә, өзүмүздән баҹарығымызын вә шәраитимизин јол вердијиндән артыг шеј ҝөзләмәмәји өјрәнмәлијик
[30-ҹу сәһифәдәки шәкил]
Нерланд хидмәтдә әлиндән ҝәләни етмәкдән севинҹ дујур
[31-ҹи сәһифәдәки шәкил]
«Јелкәнләри идарә етмәји» өјрән
[Иҹазә илә]
Wave Royalty Free/age fotostock
[32-ҹи сәһифәдәки шәкил]
Јени мәгсәдләр Анје вә Сержә хејир-дуа ҝәтирди