Нәјә ҝөрә дуа етмәк лазымдыр?
“ДИЛӘЈИРСИНИЗ, амма алмырсыныз, чүнки... пис нијјәтлә диләјирсиниз. Аллаһа јахынлашын, О да сизә јахынлашар” (Јагуб 4:3, 8). Исанын шаҝирди олан Јагубун бу сөзләри, бизи, нәјә ҝөрә дуа етдијимизин үзәриндә дүшүнмәјә тәшвиг едир.
Дуа - садәҹә олараг еһтијаҹларымыз һаггында Аллаһа сөјләмәк үчүн васитә дејил. Иса, мәшһур Дағүстү тәблиғиндә деди: “Атаныз сизин нәләрә еһтијаҹыныз олдуғуну сиз Ондан диләмәздән әввәл билир”. Анҹаг буна бахмајараг, Иса тәшвиг етди: “Диләјин, сизә вериләҹәк” (Матта 6:8; 7:7). Беләликлә, Јегова истәјир ки, зәннимизҹә еһтијаҹында олдуғумуз шејләр барәсиндә Она данышаг. Анҹаг дуа, даһа артыг мә’на дашыјыр.
Һәгиги достлар, јалныз нәјә исә еһтијаҹ дујдуглары заман үнсијјәтдә олмурлар. Онлар бир-бирләринә мараг ҝөстәрир, һиссләрини ифадә едәркән исә, достлуглары мөһкәмләнир. Буна бәнзәр шәкилдә, дуанын да мәгсәди, јалныз нә исә истәмәкдән ибарәт дејил. Дуа, Јегова илә гаршылыглы мүнасибәтимизи мөһкәмләндирмәјә вә сәмими садиглијимизи тәзаһүр етдирмәјә имкан јарадыр.
Аллаһ, дуа етмәк үстүнлүјүнү, Она јахынлаша билмәмиз үчүн бәхш етмишдир. Буна исә, әзбәрләнмиш дуалары тәкрарламагла јох, јалныз һиссләримизи Аллаһа ачмагла наил ола биләрик. Дуада Јеговаја мүраҹиәт етмәк неҹә дә севинҹлидир! Һәмчинин Мүгәддәс Китабын бир мәсәлиндә дејилир: “Доғруларын дуасы она мәгбулдур” (Сүлејманын мәсәлләри 15:8).
Мәзмурчу Асаф “Аллаһа јахынлашмаг мәнә јахшыдыр” дејә, тәрәннүм едирди. (Мәзмур 73:28). Анҹаг Аллаһа јахынлашмаг үчүн садәҹә дуа етмәк кифајәт дејил. Нөвбәти һадисә буну тәсдиг едир.
“[Исанын] шаҝирдләриндән бири Она деди: “Ја Рәбб... бизә дуа етмәји өјрәт””. Иса ҹавабында деди: “Дуа етдијиниз заман дејин: Еј ҝөјләрдә олан Ата, исмин мүгәддәс тутулсун. Падшаһлығын ҝәлсин” (Лука 11:1, 2, И—93). Әҝәр биз әввәлҹә Аллаһын адыны вә бу ады мүәгәддәс тутмағын үсулуну өјрәнмәсәк, Исанын өјрәтдији кими, мә’налы шәкилдә дуа едә биләрикми? Аллаһын Падшаһлығынын нә олдуғуну анламадан, Исанын бу сөзләринә әсасән дуа етмәмиз мүмкүндүрмү? Әҝәр Мүгәддәс Китабы диггәтлә тәдгиг етсәк, бу дуанын мә’насыны баша дүшә биләрик. Әлдә етдијимиз бу билик, Аллаһы танымағымыза вә Онун јолларыны анламағымыза көмәк едәҹәк. Һәмчинин Јегова Аллаһ һаггында өјрәндикҹә, Она јахынлашмаг вә даһа садиг олмаг истәјәҹәјик. Бу исә, дуада Она даһа сәрбәст мүраҹиәт етмәмизә көмәк едәҹәк.
Дуа чәтин анларда көмәк едир
Јегова илә јахын гаршылыглы мүнасибәти инкишаф етдирәрәк, бир чох проблемләри һәлл едә биләрик. Ашағыда ҝәтирилән нүмунәләрдән һәр бириндә бунун неҹә мүмкүн олдуғуна диггәт јетирин. Бу нүмунәләр, Јегова илә гаршылыглы мүнасибәтләрини мөһкәмләндирмәкдә, дуанын бә’зи инсанлара неҹә көмәк етдијини ҝөстәрир.
Бразилијада, Марија адлы бир гадын көмәк үчүн Аллаһа дуа едирди. Ҹәмијјәтдә гәбул едилән вә онун фикринҹә, ријакарлыгла долу нормалар, онда е’тираз һисси јарадырды. Марија, һәтта әрини, ушагларыны вә евини тәрк едиб ҝетди. Һәмчинин, наркотик гәбул етмәјә башлады. Лакин хошбәхтлик тапмадығы үчүн, үрәјини Аллаһа ачды вә көмәк үчүн дуа етди.
Тезликлә Јегованын ики Шаһиди онун јанына ҝәләрәк, Аллаһын рәһбәрлијинин дәјәрини ҝөстәрән “Ҝөзәтчи Гүлләси” журналыны вердиләр. Журналда јазыланлар Маријаја дәрин тә’сир бағышлады вә елә һәмин ҝүн Шаһидләрлә Мүгәддәс Китабы өјрәнмәјә башлады. Нәтиҹәдә о, аиләсинә дөнмәјә тәшвиг олунду. Јегова һаггында өјрәндикҹә, Она олан мәһәббәтини тәзаһүр етдирмәк истәди. Марија дејир: “Һәјатым јахшылыға доғру дәјишди. Башланғыҹда әрим вә аиләм Мүгәддәс Китабы өјрәнмәјими истәмирдиләр. Анҹаг өзүмдә етдијим дәјишикликләри ҝөрдүкдә, мәнә дајаг олдулар”. Даһа сонра, Марија, хидмәт етмәк үчүн һәјатыны дуаларын Динләјиҹисинә һәср етди.
Хосенин ҝөзәл арвады вә Боливијада ҝәлирли иши варды, анҹаг о өзүнү хошбәхт һисс етмирди. Никаһдан кәнар ҹинси әлагәсинә ҝөрә, арвады ону тәрк етди. О, һәддиндән артыг ичир вә өзүнү лазымсыз һесаб едирди. Хосе сөјләјир: “Үрәкдән дуа етмәјә башладым вә Аллаһы разы салмаг үчүн нә етмәли олдуғуму сорушдум. Гыса мүддәтдән сонра, иш јеримә Јегованын Шаһидләри ҝәлдиләр вә евдә Мүгәддәс Китабы пулсуз өјрәнмәји тәклиф етдиләр, анҹаг мән онлары динләмәдим. Бу үч дәфә тәкрар олунду. Һәр дәфә, көмәк үчүн дуа етдијим заман онлар јенидән ҝәлирдиләр. Ахырда гәрара ҝәлдим ки, нөвбәти дәфә онлары динләјәҹәјәм. О вахта гәдәр бүтүн Мүгәддәс Китабы охумушдум вә чохлу суалларым варды, лакин бүтүн суалларыма инандырыҹы ҹаваблар алырдым. Јегова һаггында өјрәнмәк һәјатыма јени мә’на верди, Јегованын Шаһидләринин сырасында олан достларым исә тәглид едиләҹәк јахшы нүмунә идиләр! Мән рәфигәмдән вә ички достларымдан ајрылдым. Тезликлә һәјат јолдашымын вә ушагларымын јанына дөндүм. 1999-ҹу илин әввәлиндә исә вәфтиз олундум”.
Италијадан олан Тамаранын аилә проблемләри варды вә о, мүдриклик әлдә етмәк үчүн Аллаһа дуа едирди. Ушаглыгда тез-тез дөјүлдүјүнә вә 14 јашында евдән говулдуғуна ҝөрә, тәҹавүзкар иди. Тамара дејир: “Мүгәддәс Китабы әлдә етдим вә охумаға башладым. Бир дәфә ахшам охудум ки, мүдриклик әлдә етмәк - ҝизләдилмиш хәзинә тапмаға бәнзәјир. Бу мүдриклијә саһиб олмаг үчүн дуа етдим (Сүлејманын мәсәлләри 2:1—6). Нөвбәти ҝүн сәһәр јаныма Јегованын Шаһидләри ҝәлдиләр. Онларла Мүгәддәс Китабы өјрәнмәјә башладым, анҹаг өјрәндикләрими һәјата кечирмәк үчүн вахт тәләб олунду. Нәһајәт мәсиһчи кими һәјат тәрзи сүрмәк гәрарына ҝәлдим вә вәфтиз олундум. Инди әримлә бирликдә, Аллаһын мүдриклијини әлдә едә билмәләри үчүн башгаларына көмәк едирик”.
Беатрис, Каракасда (Венесуела), ҹәмијјәтин јүксәк тәбәгәсинә мәхсус иди. Әриндән бошандығы үчүн өзүнү мә’јус һисс едирди. Бир ҝүн үмидсизлик ичиндә саатларла дуа етди. Сәһәр гапынын зәнҝи чалынды. Аҹыглы һалда гапынын ҝөзҹүјүндән бахды вә әлләриндә чанта, ики нәфәри ҝөрдү. Евдә јохмуш кими давранды, лакин һәмин инсанлар ҝедәркән гапынын алтындан ичәри кичик бир вәрәг салдылар. Орада јазылмышды: “Мүгәддәс Китабынызла таныш олун”. Бәлкә бу, онун дүнән ҝеҹә етдији дуаја ҹаваб иди? О, онлары ҝери чағырды. Тезликлә Мүгәддәс Китабы өјрәнмәјә башлады, сонра исә вәфтиз олунду. Нәһајәтдә хошбәхтлијә наил олан Беатрис, инди башгаларына хошбәхтлијин јолуну тапмаға көмәк едир.
Кармен јохсуллуғун өһдәсиндән ҝәлә билмәк үчүн дуа едирди. Онун он ушағы варды, әри Рафаел исә ичирди. Кармен дејир: “Мән палтар јумагла пул газанмаға чалышырдым”. Анҹаг Рафаел ҝет-ҝедә даһа артыг ичирди. “Јалныз Мүгәддәс Китабы бирликдә Јегованын Шаһидләри илә өјрәнмәјә башладыгдан сонра, әрим дәјишмәјә башлады. Биз, Јегованын Падшаһлыг гурмаг вә онун рәһбәрлији алтында дүнјадакы јохсуллуға вә сыхынтылара сон гојмаг вә’ди һаггында өјрәндик. Нәһајәт Аллаһ дуаларыма ҹаваб верди!” Јегова һаггында билик, Рафаелин ичкини тәрҝитмәсинә вә “јени мәнлији ҝејин”мәсинә көмәк етди (Ефеслиләрә 4:24). О, аиләси илә бирликдә мадди вәзијјәтләрини јахшылашдыра билди. Рафаел дејир: “Зәнҝин дејилик, шәхси евимиз дә јохдур, лакин һәјат үчүн ҝәрәкли олан һәр шејимиз вар вә хошбәхтик”.
Аллаһын бүтүн дуалара ҹаваб верәҹәји заман
Дуанын бу инсанлара көмәји олдуму? Әлбәттә олду! Фикир вердинизми ки, әксәр һалларда, бу инсанлар өз дуаларына ҹавабы, мәсиһчи јығынҹағындан бир кимсә Мүгәддәс Китаб өјрәнмәси васитәсилә Аллаһа јахынлашмагда онлара көмәк етдији заман алдылар (Һәвариләрин ишләри 9:11).
Буна ҝөрә дә дуа етмәк үчүн там әсасымыз вар. Тезликлә Аллаһ, Падшаһлығынын ҝәлмәсинә вә ирадәсинин јер үзүндә дә олмасына даир дуаларымыза ҹаваб верәҹәкдир (Матта 6:10). Аллаһ јер үзүнү дүшмәнләриндән тәмизләдикдән сонра, “дүнја да РӘБ билҝиси илә долу олаҹаг” (Ишаја 11:9). О заман Јегованы севән һәр кәс “Аллаһын оғулларынын азадлығындан” һәзз алаҹаг вә Аллаһ онларын дуаларына мүтләг ҹаваб верәҹәкдир (Ромалылара 8:18—21).
[7-ҹи сәһифәдәки шәкил]
Билирсинизми, биз нәјә ҝөрә дуа етмәлијик?