Мәһәббәтиниз нә гәдәр ҝенишдир?

“Гоншуну өзүн кими сев” (МАТТА 22:39).

1. Әҝәр Јегованы севириксә, онда нәјә ҝөрә гоншуларымызы да севмәлијик?

ИСАДАН сорушанда ки, Ганунда олан ән бөјүк әмр һансыдыр, о деди: “Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев”. Сонра о, биринҹијә бәнзәр олан икинҹи әмри ситат ҝәтирди: “Гоншуну өзүн кими сев” (Матта 22:37, 39). Бәли, мәсиһчи өз гоншусуна олан мәһәббәтилә таныныр. Һәгигәтән дә, әҝәр биз Јегованы севириксә, гоншуларымызы севмәк садәҹә олараг борҹумуздур. Нәјә ҝөрә? Она ҝөрә ки, Аллаһа мәһәббәтимиз Онун Кәламына табе олмағымызда әкс олунур. Онун Кәламы исә бизә гоншуларымызы севмәји бујурур. Буна ҝөрә дә, әҝәр биз баҹы вә гардашларымызы севмириксә, Аллаһа олан мәһәббәтимиз һәгиги ола билмәз (1 Јәһја 2:5; 4:20, 21; Ромалылара 13:8).

2. Биз гоншуларымызы һансы мәһәббәтлә севмәлијик?

² Иса, гоншуларымызы севмәлијик дејәндә ади достлуғу нәзәрдә тутмурду. О, јахын гоһумларын вә ја киши илә гадынын бир-бирләринә ҝөстәрдији мәһәббәтдән данышмырды. Иса, Јегованын, Она һәср олунмуш хидмәтчиләринә вә ја онларын Јеговаја бәсләдикләри мәһәббәт һаггында данышырды (Јәһја 17:26; 1 Јәһја 4:11, 19). Иса диггәт јетирди ки, гануншүнас јәһуди мәнтиглә данышыр. О, Исанын дедикләри илә разы иди ки, Аллаһы “бүтүн үрәјинлә, бүтүн ҹанынла, бүтүн дүшүнҹәнлә вә бүтүн гүввәтинлә” севмәк лазымдыр (Марк 12:28—34, И—93). О, доғру иди. Мәсиһчинин Аллаһа вә гоншуларына мүнасибәтдә инкишаф етдирдији мәһәббәт, онун һиссләрини вә дүшүнҹәсини һәрәкәтә ҝәтирир. Мәһәббәт үрәклә дујулур вә дүшүнҹәјә табе олур.

3. а) Иса “гануншүнаса” гоншусунун ким олдуғуна даһа ҝениш нәзәрләрлә бахмаға неҹә көмәк етди? б) Исанын әјани нүмунәси буҝүнкү мәсиһчиләрә неҹә тәтбиг едиләндир?

³ Луканын јаздығы кими, Иса дејәндә ки, биз өз гоншуларымызы севмәлијик, бир “гануншүнас” сорушду: “Бәс мәним гоншум кимдир?” Буна ҹаваб олараг Иса бир мәсәл сөјләди. Гулдурлар бир нәфәри дөјдүләр, палтарыны әјниндән чыхартдылар вә јарымҹан һалда јол кәнарында гојуб ҝетдиләр. Онун јанындан әввәлҹә каһин, сонра исә левили кечди. Һеч бири јаралыја диггәт јетирмәдиләр. Һәмин јолдан кечән самаријалы јаралы инсаны ҝөрдү вә она бөјүк хејирхаһлыг етди. Бу үч нәфәрдән һансы гулдурлар әлинә дүшән адамын гоншусу олду? Ҹаваб мә’лум иди (Лука 10:25—37, И—93). Јәгин ки, гануншүнас, каһин вә левилидән фәргли олараг, самаријалынын даһа хејирхаһ гоншу олдуғуна һејрәтләнди. Ҝөрүндүјү кими, Иса һәмин инсана көмәк етмәк истәјирди ки, онун, гоншусуна олан мәһәббәти даһа ҝениш олсун. Мәсиһчиләр өз гоншуларыны мәһз белә севирләр. Ҝәлин ҝөрәк онларын мәһәббәти кимләри әһатә едир.

Аиләдә мәһәббәт

4. Мәсиһчи, мәһәббәти илк нөвбәдә һарада әкс етдирир?

⁴ Мәсиһчиләр өз аилә үзвләрини севирләр: гадынлар әрләрини, әрләр арвадларыны, валидејнләр исә ушагларыны (Ваиз 9:9; Ефеслиләрә 5:33; Титуса 2:4). Бу доғрудур ки, аиләләрин чохуну сәмими һиссләр бирләшдирир. Лакин бошанмаларын, һәјат јолдашы илә гәддарҹасына мүнасибәтләрин, тәһгирләрә дөзән вә гајғылардан мәһрум олан ушагларын сајына ҝәлинҹә демәк олар ки, бу ҝүн аиләләр ағыр вахтлары јашајыр вә аиләнин бүтөвлүјүнү горумаг үчүн јалныз тәбии гоһумлуг һиссләри кифајәт етмир (2 Тимотејә 3:1—3). Аилә һәјаты һәгиги мә’нада хошбәхт олсун дејә, мәсиһчиләр Јеговаја вә Исаја хас олан мәһәббәти әкс етдирмәлидирләр (Ефеслиләрә 5:21—27).

5. Ушагларын тәрбијәсиндә валидејнләр көмәји кимдә ахтарырлар вә бир чохлары үчүн бунун нәтиҹәси нә олду?

⁵ Мәсиһчи валидејнләр ушагларына Јеговадан олан мирас кими јанашырлар вә онларын тәрбијәсиндә Онун көмәјини ахтарырлар (Мәзмур 127:3—5; Сүлејманын мәсәлләри 22:6). Беләликлә, онлар ушагларыны, ҝәнҹләри өзүнә табе етдирмәјә гадир олан зәрәрли тә’сирләрдән горумаға көмәк едән мәсиһчи мәһәббәтини инкишаф етдирирләр. Бунун сајәсиндә бир чох мәсиһчи валидејнләр, Нидерланддан олан бир ананын севинҹини өзләриндә һисс етмишләр. Онун оғлу, кечән ил Нидерландда вәфтиз олунан 575 нәфәрдән бири иди. Бу севинҹли һадисәдән сонра ана јазырды: “Мән, 20 иллик зәһмәтимин бәһрәсини ҝөрдүм. Сәрф етдијим бүтүн вахт вә гүввә, һәмчинин ағрылар, сә’јләр вә кәдәрләр артыг јаддан чыхды”. Бу гадын неҹә дә бөјүк севинҹ һисси кечирир: ахы онун оғлу көнүллү сурәтдә Јеговаја хидмәт етмәјә гәрар вериб. Кечән ил Нидерландда тәблиғчиләрин ән јүксәк сајы 31 089 олмушдур. Онларын чохунда Јеговаја мәһәббәти, валидејнләри инкишаф етдирмишләр.

6. Мәсиһчи мәһәббәти аилә бағынын мөһкәмләнмәсинә неҹә көмәк едә биләр?

⁶ Павел мәһәббәти “камил бирлијин бағы” адландырды вә никаһла бир-биринә бағланан инсанлар бу мәһәббәтин сајәсиндә һәјәҹанлы вахтларын өһдәсиндән ҝәлә биләрләр (1 Петер 3:1—7; Колослулара 3:14, 18, 19). Таитидән 700 км аралыда јерләшән Руруту адасынын бир сакини, Јегованын Шаһидләри илә Мүгәддәс Китабы өјрәнмәјә башлајанда, арвады буна чох ҹидди мүгавимәт ҝөстәрди. Бу онунла нәтиҹәләнди ки, гадын ону атыб ушагларла бирликдә Таитијә ҝетди. Лакин әр мәһәббәт ҝөстәрирди: о, мүнтәзәм олараг арвадына пул ҝөндәрир, зәнҝ едәрәк онун вә ушагларын еһтијаҹлары барәдә сорушурду. Беләликлә о, баҹардығы гәдәр өз мәсиһчи вәзифәсини јеринә јетирирди (1 Тимотејә 5:8). О, даима аиләсинә говушмаг үчүн дуа едирди вә нәһајәт арвады гајытды. О, һәјат јолдашы илә “мәһәббәт, тәһәммүл, һәлимлик”лә давранырды (1 Тимотејә 6:11). О, 1998-ҹи илдә вәфтиз олунду, бир гәдәр сонра исә, арвады онун һәдсиз севинҹинә сәбәб олан аддымы атды - Мүгәддәс Китабы өјрәнмәјә разы олду. Таити филиалынын нәзарәти алтында олан әразидә өтән ил 1 351 өјрәнмә кечирилмишдир.

7. Алманијадан олан бир адамын сөзләринә ҝөрә, онун никаһыны нә мөһкәмләндирди?

⁷ Алманијада бир киши Мүгәддәс Китаб һәгигәтинә мараг ҝөстәрән арвадына манечилик төрәдирди; о әмин иди ки, Јегованын Шаһидләри онун арвадыны алдатмаг истәјирләр. Лакин сонрадан, онун арвадына һәгигәт барәдә илк дәфә данышан Шаһидә јазырды: “Һәјат јолдашымы Јегованын Шаһидләри илә таныш етдијиниз үчүн чох сағ олун. Әввәлләр мән нараһат олурдум, чүнки онлар һаггында чохлу хошаҝәлмәз мә’луматлар ешидирдим. Анҹаг һәјат јолдашымла јығынҹаға ҝетдикдән сонра анладым ки, мән чох јанылырмышам. Мән билирәм ки, орада һәгигәти ешидирәм вә бу бизим никаһымызы хејли мөһкәмләндирди”. Алманијада олан 162 932 вә Таити филиалынын нәзарәти алтында олан адаларда Јегованын 1 773 Шаһиди арасында Аллаһа мәгбул мәһәббәтлә бағланмыш чохлу аиләләр вар.

Мәсиһчи гардашларымыза мәһәббәт

8, 9. а) Гардашлары севмәјә бизи ким өјрәдир вә мәһәббәт бизи нәјә тәшвиг едир? б) Мәһәббәт, бир-биринә јардым етмәкдә гардашлара неҹә көмәк едир? Нүмунә ҝәтирин.

⁸ Павел Салоникдәки мәсиһчиләрә деди: “Аллаһ сизә бир-биринизи севмәји өјрәтмишдир” (1 Салониклиләрә 4:9). Бәли, “РӘБ тәрәфиндән өјрәдиләнләр” бир-бирләрини севирләр (Ишаја 54:13). Павелин сөзләриндән ҝөрүндүјү кими, онларын мәһәббәти әмәлләрлә изһар олунур: “Бир-биринизә мәһәббәтлә гуллуг един” (Галатијалылара 5:13; 1 Јәһја 3:18). Онлар, мәсәлән, хәстә баҹы-гардашларына баш чәкәркән, кәдәрли оланлары руһландыраркән вә зәифләрә әл тутаркән бу сөзләрә риајәт едирләр (1 Салониклиләрә 5:14). Бизим әсл мәсиһчи мәһәббәтимиз руһани ҹәннәтин ҝенишләнмәсинә көмәк едир.

⁹ Еквадордакы 544 јығынҹагдан бириндә - Анкон јығынҹағында - гардашлар мәһәббәти әмәлдә ҝөстәрмишләр. Мадди бөһран нәтиҹәсиндә иш јериндән вә јашамаг үчүн вәсаитдән мәһрум олараг, тәблиғчиләр јерли балыгчылара, онлар ҝеҹә овундан гајыдаркән, јемәк сатмагла чөрәк пулу газанмағы гәрара алдылар. Бу мәшғулијјәтә бүтүн Шаһидләр, о ҹүмләдән ушаглар да гошулдулар. Балыгчыларын овдан гајыдан вахтына - сәһәр саат дөрдә јемәк һазырламаг үчүн, ишә ҝеҹә саат бирдә башламаг лазым ҝәлирди. Әлдә едилән пуллар гардашлар арасында, онларын еһтијаҹларына ҝөрә бөлүнүрдү. Белә гаршылыглы көмәклик әсл мәсиһчи мәһәббәтинә шәһадәтдир.

10, 11. Шәхсән танымадығымыз гардашлара неҹә мәһәббәт ҝөстәрә биләрик?

¹⁰ Лакин биз, јалныз таныдығымыз мәсиһчиләри севмирик. Һәвари Петер деди: “Гардашлығы севин” (1 Петер 2:17). Биз бүтүн баҹы вә гардашларымызы севирик, чүнки онлар бизимлә бирликдә Јегова Аллаһа ибадәт едирләр. Буна бәнзәр мәһәббәти әкс етдирмәк имканы чәтин анларда јараныр. Мисал үчүн, 2000-ҹи хидмәт илиндә Мозамбик бир нечә дашгындан зәрәр чәкмишдир, Анголада исә вәтәндаш мүһарибәси бир чохларыны әмлакдан мәһрум етмишдир. Бу һадисәләр Мозамбикдәки 31 725, Анголадакы исә 41 222 гардаша өз тә’сирини ҝөстәрмишдир. О заман гоншу ҸАР-дакы Шаһидләр һәмин өлкәләрдәки гардашларын ағыр вәзијјәтләрини јүнҝүлләшдирмәк үчүн, онлара ваҹиб олан шејләри ҝөндәрдиләр. Еһтијаҹы олан гардашларын рифаһы үчүн “боллугла” ианә етмәк һазырлығы ҸАР-дан олан Шаһидләрин мәһәббәтини ҝөстәрир (2 Коринфлиләрә 8:8, 13—15, 24).

¹¹ Бир чох өлкәләрдән олан гардашлар, инкишаф сәвијјәси зәиф олан өлкәләрдә Падшаһлыг вә конгресс Залларынын тикилмәси үчүн тикинти материаллары ианә едәркән дә мәһәббәт әкс етдирирләр. Нүмунә үчүн Соломон адаларыны ҝөстәрмәк олар. Низамсызлыға бахмајараг, кечән ил Соломон адаларындакы тәблиғчиләрин сајы 6 фаиз артмышдыр вә онларын үмуми сајы 1 697 олмушдур. Онлар конгресс Залы тикмәји планлашдырырдылар. Аданын бир чох сакинләринин өлкәдән гачмасына бахмајараг, Австралијадан, тикинтијә көмәк етмәк үчүн көнүллүләр ҝәлдиләр. Бир мүддәтдән сонра онлар да ҝетмәк мәҹбуријјәтиндә галдылар, амма онлар ҝетмәздән әввәл јерли гардашлары өјрәтмәјә имкан тапдылар вә јерли гардашлар тәмәли гоја билдиләр. Австралијадан залын полад каркасы ҝәтирилди вә өлкәдә бир чох тикинти објектләри башсыз галдығы һалда, ибадәт үчүн тикилән бу бинанын иншасы Јегованын адына иззәт ҝәтирәҹәк вә гардашлыг мәһәббәтинә шәһадәт едәҹәк.

Аллаһ кими, биз дә дүнјаны севирик

12. Иманымыза шәрик олмајан инсанлара мүнасибәтимиздә биз Јегованы неҹә тәглид едирик?

¹² Биз јалныз мәсиһчи гардашлығыны вә јахынларымызымы севирик? Әҝәр “Аллаһы тәглид” едириксә, демәли јох. Иса деди: “Аллаһ дүнјаны елә севди ки, ваһид Оғлуну она верди; буну она ҝөрә етди ки, Она иман едәнләрин һеч бири һәлак олмасын, һамысынын әбәди һәјаты олсун” (Ефеслиләрә 5:1; Јәһја 3:16). Јегова Аллаһ кими, биз дә һамы илә, һәмчинин иманымыза шәрик олмајан инсанларла белә мәһәббәт руһунда давранырыг (Лука 6:35, 36; Галатијалылара 6:10). Бу һалда да мәһәббәтимиз, Падшаһлыг һаггында хош хәбәри тәблиғ етмәјимиздә вә башгаларына, Аллаһын онлара ҝөстәрдији бөјүк мәһәббәти барәсиндә данышмағымызда ҝөрүнүр. Бунун сајәсиндә, гулаг асан һәр бир кәс хилас ола биләр (Марк 13:10; 1 Тимотејә 4:16).

13, 14. Бөјүк чәтинликләрә бахмајараг, гардашларын Шаһид олмајан кәсләрә мәһәббәт ҝөстәрдикләри бир нечә һадисә сөјләјин.

¹³ Непалдан олан дөрд хүсуси пионерин нүмунәсинә бахаг. Онлар тә’јинатларыны өлкәнин ҹәнуб-гәрбиндәки шәһәрә алмышдылар вә сон беш ил әрзиндә бу шәһәрдә вә уҹгар кәндләрдә сәбирлә тәблиғ едирдиләр. Онларын мәһәббәти бунда әкс олунурду. Әразиләрдәки инсанлара тәблиғ етмәк үчүн, тез-тез 40 дәрәҹә истидә велосипедлә бир нечә саатлыг сәфәрләр етмәк лазым ҝәлирди. Онларын мәһәббәти вә “јахшы ишдә” мүнтәзәм олмалары ҝөзәл сәмәрәләр верди: кәндләрдән бириндә китабөјрәнмә групу јаранды (Ромалылара 2:7, И—93). 2000-ҹи илин март ајында, рајон нәзарәтчисинин сөјләдији ачыг мә’рузәни динләмәк үчүн 32 адам јығылмышды. Кечән ил Непалдакы тәблиғчиләрин јүксәк сајы 430 нәфәр олмушдур, бу исә артымын 9 фаизини тәшкил едир. Јегова, бу өлкәдәки гардашларын сә’јләрини вә мәһәббәтләрини, шүбһәсиз ки, хејир-дуаландырыр.

¹⁴ Колумбијада мүвәггәти олан хүсуси пионерләр, Вају гәбиләсинин һиндиләринә тәблиғ етмәк үчүн јолландылар. Бунун үчүн гардашлар јени дил өјрәнмәли олдулар, лакин онларын бу инсанлара мәһәббәтлә мараг ҝөстәрмәләри мүкафатландырылды: ҝүҹлү јағыш јағмасына бахмајараг, ачыг мә’рузәјә гулаг асмаг үчүн 27 адам топлашмышды. Бу пионерләрин мәһәббәтлә диктә олунан сә’јләри, Колумбијадакы 5 фаиз артыма вә тәблиғчиләрин сајынын 107 613 нәфәрә чатмасына сәбәб олду. Данијада јашлы бир баҹы, әлил олмасына бахмајараг, хош хәбәри башгалары илә бөлүшмәк истәјирди. Әлил олмасы она мане олмады: о, марагланан инсанларла мәктублашмаға башлады. Һал һазырда о, 42 адамла мәктублашыр вә 11 Мүгәддәс Китаб өјрәнмәси кечирир. Өтән ил Данијада һесабат верән тәблиғчиләрин јүксәк сајы 14 885 олмушдур.

Дүшмәнләринизи севин

15, 16. а) Исанын сөзләринә ҝөрә, мәһәббәтимиз нә гәдәр ҝениш олмалыдыр? б) Јегованын Шаһидләрини јаландан иттиһам едән инсанла, мәс’улијјәтли гардашлар неҹә мәһәббәт руһунда даврандылар?

¹⁵ Иса гануншүнаса деди ки, самаријалы онун гоншусу ола биләр. Лакин Дағүстү тәблиғиндә Иса бир аз да дәринә ҝетди: ““Өз гоншуну сев вә өз дүшмәнинә нифрәт ет” - дејилдијини ешитмисиниз. Мән исә сизә дејирәм: Дүшмәнләризи севин, сизә лә’нәт охујанлара хејир-дуа верин, сизә нифрәт едәнләрә јахшылыг един, сизә әзијјәт вериб, тә’гиб едәнләр үчүн дуа един ки, сиз, ҝөјләрдә олан Атанызын оғуллары оласыныз” (Матта 5:43—45). Һәтта бизә гаршы дурсалар да, биз “пислијә јахшылыг илә галиб” ҝәлмәјә чалышырыг (Ромалылара 12:19—21). Имкан дахилиндә, биздә олан ән гијмәтли шејлә, һәгигәтлә бөлүшмәјә чалышырыг.

¹⁶ Украјнанын “Вестник Кременчуга” гәзетиндә Јегованын Шаһидләринин тәһлүкәли тәригәт олмасы барәдә фикир ирәли сүрүлүрдү. Бу ҹидди иттиһамдыр: Авропада бә’зиләри, Јегованын Шаһидләринә белә ад верәрәк, инсанлары инандырмаға чалышырлар ки, бизим фәалијјәтимизә мәһдудијјәтләр гојмаг вә ја ону гадаған етмәк лазымдыр. Гардашлар гәзетин редактору илә ҝөрүшүб, дүзәлишләрлә рәсми бәјанат дәрҹ етмәји хаһиш етдиләр. О разылашды, амма хүсуси бүллетенлә бәрабәр биринҹи мәгаләнин фактлара әсасландығыны чап етди. О заман мәс’улијјәтли гардашлар она бир дә јахынлашдылар вә даһа артыг мә’лумат тәгдим етдиләр. Нәтиҹәдә редактор һәмин мәгаләнин сәһв олдуғуну баша дүшдү вә онун јалан олдуғуну сүбут едән мәгалә дәрҹ етди. Гардашлар сәмими вә хош давранырдылар, бу да онлара проблеми мәһәббәт руһунда һәлл етмәјә вә јахшы нәтиҹәләрә наил олмаға көмәк етди.

Мәһәббәти неҹә инкишаф етдирә биләрик?

17. Нәдән ҝөрүнүр ки, башгалары илә мәһәббәтлә давранмаг һәмишә асан олмур?

¹⁷ Ушаг дүнјаја ҝөз ачан кими валидејнләри һәмән ан ону севмәјә башлајырлар. Лакин бөјүкләрлә мәһәббәтлә давранмаг, һәр дәфә өз-өзүнә алынмыр. Јәгин ки, Мүгәддәс Китаб мәһз буна ҝөрә, бир-биримизи севмәји бизә дөнә-дөнә тапшырыр. Бунун үзәриндә ишләмәк лазымдыр (1 Петер 1:22; 4:8; 1 Јәһја 3:11). Иса билирди ки, мәһәббәтимизин ҝүҹү сынаға чәкиләҹәк. О дејирди ки, биз гардашымызы “јетмиш кәрә једди дәфә” бағышламалыјыг (Матта 18:21, 22). Павел дә бизи, бир-биримизә “тәһәммүл” етмәјә тәшвиг едирди (Колослулара 3:12, 13). Тәәҹҹүблү дејил ки, Мүгәддәс Китаб бизи “мәһәббәтә ҹан” атмаға тәшвиг едир (1 Коринфлиләрә 14:1). Буну неҹә едә биләрик?

18. Башгаларына мәһәббәт инкишаф етдирмәкдә бизә нә көмәк едәр?

¹⁸ Биринҹиси, биз, Јегова Аллаһы севдијимзи һәмишә хатырламалыјыг. Бу мәһәббәт исә, гоншуларымызы севмәк үчүн ҝүҹлү амилдир. Нәјә ҝөрә? Она ҝөрә ки, бизим белә давранышымыз сәмави Атамыза иззәт вә һәмд ҝәтирир (Јәһја 15:8—10; Филипилиләрә 1:9—11). Икинҹиси, һәр шејә Јегованын ҝөзү илә бахмаға ҹәһд ҝөстәрмәк олар. Биз һәр дәфә ҝүнаһ ишләдәркән, Јеговаја гаршы ҝүнаһ ишләдирик, амма О, бизи дәфәләрлә бағышлајыр вә севмәјә давам едир (Мәзмур 86:5; 103:2, 3; 1 Јәһја 1:9; 4:18). Әҝәр биз дә Јегованын нөгтеји-нәзәрини инкишаф етдирсәк, башгаларыны севмәјә вә бизә тохунан һәрәкәтләри бағышламаға мејлли олаҹағыг (Матта 6:12). Үчүнҹүсү, бизимлә неҹә давранмаларыны истәјириксә, башгалары илә дә елә давранмаг олар (Матта 7:12). Биз гејри-камилик, буна ҝөрә дә ҝүнаһларымызын бағышланмасына тез-тез еһтијаҹ дујуруг. Мәсәлән, сөзләримиз башгасынын хәтринә дәјәндә үмид едирик ки, онлар һамынын сөздә сәһв етдијини анлајырлар (Јагуб 3:2). Әҝәр башгаларынын бизимлә мәһәббәт руһунда давранмасыны истәјириксә, биз өзүмүз онларла мәһәббәтлә давранмалыјыг.

19. Мәһәббәти инкишаф етдирмәк үчүн ваҹиб олан мүгәддәс руһун көмәјини неҹә ахтармаг олар?

¹⁹ Дөрдүнҹүсү, мәһәббәт руһун сәмәрәсинин әсас һиссәси олдуғу үчүн, биз мүгәддәс руһун көмәјини ахтара биләрик (Галатијалылара 5:22, 23). Достлуг вә сәмими һиссләр, һәмчинин романтик мәһәббәт чох вахт тәбии олараг јараныр. Лакин Јеговаја хас мәһәббәти, јә’ни камил бирлијин бағы олан мәһәббәти инкишаф етдирмәк үчүн Јегованын руһунун көмәјинә еһтијаҹ дујуруг. Мүгәддәс руһун көмәјини, Аллаһдан илһам алмыш Мүгәддәс Китабы охумагла ахтармаг олар. Исанын һәјатыны бу ҹүр өјрәнмәклә, онун инсанларла неҹә даврандығыны ҝөрә биләрик вә бу, ону тәглид етмәкдә бизә көмәк едәр (Јәһја 13:34, 35; 15:12). Бундан әлавә, мүгәддәс руһ барәдә, хүсусән дә мәһәббәтлә давранмаг бизә чәтин олдугда, Јегованын өзүндән хаһиш етмәк олар (Лука 11:13). Вә нәһајәт, мәһәббәт принсипинә риајәт етмәк үчүн көмәји, мәсиһчи јығынҹағына мүнтәзәм ҝедәрәк әлдә етмәк олар. Севән баҹы-гардашлар арасында олмаг бизә мәһәббәти инкишаф етдирмәјә көмәк едир (Сүлејманын мәсәлләри 13:20).

20, 21. Јегованын Шаһидләри 2000-ҹи хидмәт или әрзиндә өз мәһәббәтләрини тә’кидлә неҹә сүбут етдиләр?

²⁰ Кечән ил бүтүн дүнјада хош хәбәрин тәблиғчиләринин үмуми сајы 6 035 564 нәфәрә чатмышдыр. Үмуми һесабла, Јегованын Шаһидләри инсанлара хош хәбәри данышмаг үчүн 1 171 270 425 саат вахт сәрф етмишләр. Бүркүјә, шахтаја, лејсана бахмајараг, тәблиғ етмәкдә бу инсанлара мәһәббәт көмәк етмишдир. Мәһәббәт онлары синиф вә иш јолдашлары илә данышмаға, күчәдә вә башга јерләрдә танымадығы инсанлара јахынлашмаға тәшвиг етмишдир. Шаһидләрин баш чәкдикләри инсанлардан чоху е’тинасызлыг, бә’зиләри исә мүгавимәт ҝөстәрмишләр. Лакин мараглананлар да олмушдур. Буна ҝөрә Јегованын Шаһидләри 433 454 049 нәфәрә тәкрарән баш чәкмиш вә 4 766 631 Мүгәддәс Китаб өјрәнмәси кечирмишләрa.

²¹ Бүтүн бунлар, Јегованын Шаһидләринин Аллаһы вә гоншуларыны севдикләрини, доғрудан да инандырыҹы тәрздә сүбут едир! Бу мәһәббәт һеч заман сојумајаҹаг. Биз инанырыг ки, 2001-ҹи хидмәт или әрзиндә дүнјаја даһа бөјүк шәһадәтлик вериләҹәкдир. Гој Јегова, етдикләри һәр ишин “мәһәббәтлә” олмасына сә’ј ҝөстәрән садиг вә чалышган ибадәтчиләрини бундан сонра да хејир-дуаландырсын (1 Коринфлиләрә 16:14).

[Һашијә]

Сиз изаһ едә биләрсинизми?и

• Гоншуларымызы севәрәк биз кими тәглид едирик?

• Мәһәббәтимиз нә гәдәр ҝениш олмалыдыр?

• Мәсиһчи мәһәббәти әкс олунан бә’зи һадисәләри нүмунә ҝәтирин.

• Мәсиһчи мәһәббәтини неҹә инкишаф етдирә биләрик?

[18-21-ҹи сәһифәләрдәки һесабата бахын]

2000 ЈЕҺОВАНЫН ШАҺИДЛӘРИНИН ХИДМӘТ ИЛИ ҮЧҮН ҮМУМДҮНЈА ҺЕСАБАТЫ

[25-ҹи сәһифәдәки шәкилләр]

Мәсиһчи мәһәббәти аиләнин бүтөвлүјүнә көмәк едир.

[32-ҹи сәһифәдәки шәкилләр]

Мәһәббәт, үмидимизи башгалары илә бөлүшмәјә бизи тәшвиг едир.