Мәһәббәтлә инкишаф един
“Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев” (МАТТА 22:37).
1. а) Мәсиһчиләр һансы хүсусијјәтләри инкишаф етдирирләр? б) Мәсиһчијә хас олан һансы хүсусијјәт бүтүн башга хүсусијјәтләрдән ваҹибдир вә нәјә ҝөрә?
АЛЛАҺА сәмәрәли тәрздә хидмәт етмәк үчүн мәсиһчи чохлу хүсусијјәтләр инкишаф етдирмәлидир. Сүлејманын мәсәлләри китабында билијин, дүшүнҹәнин вә мүдриклијин ваҹиблији гејд олунур (Сүлејманын мәсәлләри 2:1—10). Һәвари Павел, мөһкәм иманын вә сарсылмаз үмидин ваҹиблијиндән данышырды (Ромалылара 1:16, 17; Колослулара 1:5; Ибраниләрә 10:39). Сәбир вә өзүнә һаким олмаг да сон дәрәҹә ваҹибдир (Һәвариләрин ишләри 24:25; Ибраниләрә 10:36). Лакин елә хүсусијјәт вар ки, онсуз бүтүн башга хүсусијјәтләр өз дәјәрини ја гисмән, ја да ки, тамамилә итирир. Бу хүсусијјәт - мәһәббәтдир (1 Коринфлиләрә 13:1—3, 13).
2. Мәһәббәтин нә гәдәр ваҹиб олдуғуну Иса неҹә ҝөстәрди вә бунула әлагәдар һансы суаллар јараныр?
2 “Әҝәр бир-биринизә гаршы мәһәббәтиниз олса, бундан һәр кәс Мәним шаҝирдләрим олдуғунузу биләҹәк” демәклә, Иса мәһәббәтин нә гәдәр ваҹиб олдуғуну ҝөстәрди (Јәһја 13:35). Әҝәр мәһәббәт - хүсусилә дә мәсиһчи гардашларымыза мүнасибәтдә - мәсиһчинин фәргләндириҹи ҹәһәтидирсә, онда биз өзүмүзә бу кими суаллары верә биләрик: мәһәббәт нәдир? Исанын сөзләринә ҝөрә нә үчүн мәһз мәһәббәт, онун шаҝирдләрини фәргләндирир? Биз мәһәббәти неҹә инкишаф етдирә биләрик? Биз кимләри севмәлијик? Ҝәлин бу суаллары нәзәрдән кечирәк.
Мәһәббәт нәдир?
3. Мәһәббәти неҹә тәсвир етмәк олар вә нәјә ҝөрә мәһәббәт неҹә ағлы, еләҹә дә үрәји һәрәкәтә ҝәтирир?
3 Мәһәббәт, “кимә вә ја нәјә исә дәрин бағлылыг һисси” кими тәсвир едилир. Бу, бә’зән бөјүк фәдакарлыгла башгаларынын хејринә давранмаға тәшвиг едән хүсусијјәтдир. Мүгәддәс Китабда һаггында бәһс едилән мәһәббәт неҹә ағылы, еләҹә дә үрәји һәрәкәтә ҝәтирир. Мәһәббәтин ағыл вә ја дүшүнҹәни һәрәкәтә ҝәтирдијини она ҝөрә тәсдиг етмәк олар ки, севән инсан ҝөзүачыг олур: о өзүндә вә севдији адамларда неҹә чатышмазлыглары, еләҹә дә ҹәлбедиҹи хүсусијјәтләри ҝөрүр. Дүшүнҹә һәм дә башга сәбәбдән һәрәкәтә ҝәтирилир: мәсиһчи, бә’зән ирадәсинә зидд олараг кими исә севмәли олур, чүнки о, Мүгәддәс Китабдан билир ки, буну Аллаһ белә истәјир (Матта 5:44; 1 Коринфлиләрә 16:14). Лакин мәһәббәт әсасән үрәкдән ҝәлир. Мүгәддәс Китабын бизә бәјан етдији кими, һәгиги мәһәббәт һеч заман сырф фикри ҹәһәтдән ифадә олунмур. Мәһәббәт һәгиги сәмимиликлә вә мөһкәм мә’нәви бағлылыгла сых әлагәлидир (1 Петер 1:22).
4. Мәһәббәт һансы мә’нада гүввәтли бирлик бағыдыр?
4 Худбин тәбиәтли инсанлар надир һалларда һәгигәтән севмәјә гадирдирләр, чүнки севән инсан башгаларынын мәнфәәтини шәхси мәнфәәтиндән үстүн тутмаға һазырдыр (Филипилиләрә 2:2—4). Исанын “вермәк алмагдан даһа бөјүк бәхтијарлыг ҝәтирир” сөзләри, бир иши мәһәббәтлә ҝөрәркән хүсусилә әдаләтлидир (Һәвариләрин ишләри 20:35). Мәһәббәт ән гүввәтли бирлик бағыдыр (Колослулара 3:14). Әксәр һалларда мәһәббәт достлугла мүшајиәт олунур, анҹаг мәһәббәт бағлары достлуг бағларындан даһа гүввәтлидир. Әрлә арвад арасындакы романтик мүнасибәтләри мәһәббәт адландырырлар; лакин Мүгәддәс Китабын өзүмүздә јетишдирмәјә тәшвиг етдији мәһәббәт, физики ҹазибәдарлыгдан даһа узунөмүрлүдүр. Ики нәфәр бир-бирини үрәкдән севирсә, гоҹалыг насазлығы вә ја онлардан биринин шикәст олмасы уҹбатындан физики јахынлыг мүмкүн олмајанда да, онлар ајрылмырлар.
Мәһәббәт ән ваҹиб хүсусијјәтдир
5. Нәјә ҝөрә мәһәббәт, мәсиһчи үчүн ваҹиб олан хүсусијјәтдир?
5 Нәјә ҝөрә мәһәббәт, мәсиһчи үчүн ваҹиб олан хүсусијјәтдир? Биринҹиси, она ҝөрә ки, Иса давамчыларына бир-бирләрини севмәји тапшырды. О деди: “Әҝәр сизә әмр етдијим шејләрә әмәл етсәниз, Мәним достларымсыныз. Бир-биринизи севәсиниз дејә бу шејләри сизә әмр едирәм” (Јәһја 15:14, 17). Икинҹиси, она ҝөрә ки, Јегова мәһәббәтин тәҹәссүмүдүр, онун ибадәтчиләри исә Ону тәглид етмәлидирләр (1 Јәһја 4:16; Ефеслиләрә 5:1). Мүгәддәс Китаба әсасән Јегованы вә Иса Мәсиһи танымаг әбәди һәјата малик олмаг демәкдир. Аллаһа бәнзәмәјә сә’ј ҝөстәрмәриксә, Ону таныдығымызы е’тираф едә биләрикми? Һәвари Јәһја дејир: “Севмәјән, Аллаһы танымамышдыр, чүнки Аллаһ мәһәббәтдир” (1 Јәһја 4:8).
6. Мәһәббәт таразлыға неҹә көмәк едир?
6 Үчүнҹүсү исә, мәһәббәт нөвбәти сәбәбә ҝөрә ваҹибдир: о бизә таразлығы горујуб сахламаға вә һәр шеји ән јахшы нијјәтләрлә етмәјә көмәк едир. Мисал үчүн, Аллаһын Кәламындан даима билик әлдә етмәк, мәсиһчи үчүн ваҹибдир. Онун үчүн бу билик гида кимидир. Бу билик она јеткин олмаға вә Аллаһын ирадәсинә ујғун давранмаға көмәк едир (Мәзмур 119:105; Матта 4:4; 2 Тимотејә 3:15, 16). Лакин Павел хәбәрдарлыг едирди: “Билик инсаны ловғаландырыр, мәһәббәт исә руһән инкишаф етдирир” (1 Коринфлиләрә 8:1). Өз-өзлүјүндә дәгиг биликдә пис һеч бир шеј јохдур. Проблем бизим өзүмүздә, гејри-камиллијимиздәдир (Тәквин 8:21). Әҝәр мәһәббәтин таразлашдырыҹы тә’сири јохдурса, билик инсаны ловға едәр вә о, өзүнү башгаларындан үстүн һесаб едә биләр. Әҝәр бизи һәрәкәтә ҝәтирән илк нөвбәдә мәһәббәтдирсә, бу баш вермәјәҹәкдир. “Мәһәббәт ловғаланмаз, гүррәләнмәз” (1 Коринфлиләрә 13:4). Мәһәббәтлә һәрәкәтә ҝәтирилән мәсиһчи һеч заман - һәтта дәрин билик әлдә етсә белә, ловғаланмаз. Мәһәббәт ону, тәвазөкарлығы горујуб сахламаға тәшвиг едир вә өзүнә ад газанмаг арзусунун инкишаф етмәсинә јол вермир (Мәзмур 138:6; Јагуб 4:6).
7, 8. Диггәтимизи ән јахшы шејләрә ҹәлб етмәкдә мәһәббәт бизә неҹә көмәк едир?
7 Павел Филип шәһәриндәки мәсиһчиләрә јазырды: “Вә дуа едирәм ки, мәһәббәтиниз биликдә вә һәр ҹүр идракда ҝетдикҹә даһа чох артсын ки, ән јахшы шејләри дәрк едә биләсиниз” (Филипилиләрә 1:9, 10, И—93). Мәсиһчи мәһәббәти, ән јахшы шејләри дәрк етмәк тапшырығына риајәт етмәјә бизә көмәк едәҹәкдир. Мисал үчүн, Павелин Тимотејә јаздығы сөзләрә бахаг: “ҹәмијјәтдә нәзарәтчи олмаға һәвәс ҝөстәрән, хејирли бир иш арзу едир” (1 Тимотејә 3:1). 2000-ҹи хидмәт или әрзиндә, бүтүн дүнјада јығынҹагларын сајы 1 502 әдәд артмыш вә онларын үмуми сајы 91 487 олмушдур. Демәли, даһа чох ағсаггал тәләб олунур вә бу хидмәтә ҹан атанлар тә’рифә лајигдирләр.
8 Анҹаг әлавә имтијазлара ҹан атан гардашлар, нәзарәтчиләрин нә үчүн лазым олдуғуну хатырлајараг, таразлығы горуја биләҹәкләр. Бурада нә мәс’улијјәтли вәзифә, нә дә бөјүк нүфуз ваҹибдир. Јегованы севиндирән ағсаггаллар, Она вә гардашлара мәһәббәт һисси илә һәрәкәт едирләр. Онлар ҝөркәмли вәзифә вә ја нүфуз ахтармырлар. Һәвари Петер јығынҹағын ағсаггалларыны дүзҝүн дүшүнҹә тәрзини горујуб сахламаға тәшвиг едәрәк, “тәвазөкарлығын” ваҹиблијини гејд етди. Јығынҹағын бүтүн үзвләринә исә белә бир өјүд верди: “Аллаһын ҝүҹлү әлинин һимајәси алтында тәвазөкар олун” (1 Петер 5:1—6). Јахшы оларды ки, әлавә имтијазлар алмаға сә’ј ҝөстәрәнләрин һәр бири, бүтүн дүнјада зәһмәткеш, һәлим вә буна ҝөрә дә јығынҹаглар үчүн хејир-дуа олан чохсајлы ағсаггалларын нүмунәләринә диггәт јетирсинләр (Ибраниләрә 13:7).
Јахшы нијјәтләр, сынаглара таб ҝәтирмәкдә бизә көмәк едир
9. Нәјә ҝөрә мәсиһчиләр һәмишә ағылларында, Јегованын вә’д етдији хејир-дуалары тутурлар?
9 Мәһәббәтлә һәрәкәтә ҝәтирилмәк башга бир сәбәбдән дә ваҹибдир. Мәһәббәтдән ирәли ҝәләрәк Аллаһа сәдагәтини горујанлара, Мүгәддәс Китаб инди бол хејир-дуалар вә ҝәләҹәкдә исә тәсәввүредилмәз мөҹүзәви хејир-дуалар вә’д едир (1 Тимотејә 4:8). Бу вә’дләрә үрәкдән инанан вә Јегованын “Ону ахтаранлара мүкафат” верәҹәјинә әмин олан мәсиһчијә, иманыны мөһкәм горујуб сахламаг асандыр (Ибраниләрә 11:6). Бизләрдән чоху Аллаһын вә’дләринин јеринә јетәҹәји вахты сәбирсизликлә ҝөзләјир вә һәвари Јәһјанын сөзләрини тәкрар едир: “Амин. Ҝәл, ја Рәбб Иса!” (Вәһј 22:20). Бәли, әҝәр садиглији горујуб сахлајарыгса, ҝәләҹәкдә алаҹағымыз хејир-дуалар үзәриндә дүшүнмәјимиз, чәтинликләрә таб ҝәтирмәк үчүн бизи мөһкәмләндирәр. “Гаршысына гојулан севинҹ”, сарсылмаз галмагда Исаја да көмәк етмишдир (Ибраниләрә 12:1, 2).
10, 11. Мәһәббәтлә һәрәкәтә ҝәтирилмәјимиз, сынаглара таб ҝәтирмәкдә бизә неҹә көмәк едир?
10 Әҝәр бизи Јеговаја хидмәт етмәјә илк нөвбәдә јени дүнјада јашамаг истәји тәшвиг едирсә, онда неҹә? Белә һалда, чәтин анлар ҝәләндә вә ја һадисәләр ҝөзләмәдијимиз вахтда баш верәрсә, биз асанлыгла сәбримизи итирәр вә ја үмидсизлијә гапыла биләрик. Бу заман бизим үчүн Аллаһдан “узаглашмаг” тәһлүкәси јаранар (Ибраниләрә 2:1; 3:12). Павел, ону тәрк едән Димас адлы кечмиш јолдашы барәдә данышырды. Димас Павели нә үчүн тәрк етди? Чүнки о, “индики дөврү севди” (2 Тимотејә 4:10). Бу, тамаһкар мәгсәдләрлә хидмәт едән һәр бир кәслә баш верә биләр. Онлары, бу дүнја тәрәфиндән тәклиф олунан бир анлыг имканлар ҹәлб едә биләр вә гаршыларында, ҝәләҹәк хејир-дуалар үчүн фәдакарлыг етмәк һазырлығыны итирмәк тәһлүкәси јаранар.
11 Ҝәләҹәк хејир-дуалары әлдә етмәк истәји вә ја сынаглардан азад олунмаг үмиди тәбии вә мәнтигидир, лакин мәһәббәт, һәјатымызда биринҹи јердә олаҹаг шеји гијмәтләндирмәјә көмәк едир. Бизим истәдијимиз дејил, Јегованын ирадәси ваҹибдир (Лука 22:41, 42). Бәли, мәһәббәт инкишаф етдирир. Мәһәббәт сајәсиндә, Аллаһын һәр бир хејир-дуасындан разы галыб, Онун вә’д етдији һәр шеји өз вахтында, һәтта артыгламасы илә алаҹағымыза әмин олуб сәбирлә ҝөзләјә биләрик (Мәзмур 145:16; 2 Коринфлиләрә 12:8, 9). Бундан әлавә мәһәббәт бизә, ән тәмиз нијјәтләрлә хидмәт етмәјә көмәк едир, чүнки “мәһәббәт... өз мәнфәәтини ахтармаз” (1 Коринфлиләрә 13:4, 5).
Мәсиһчиләр кимләри севмәлидирләр?
12. Исанын сөзләринә ҝөрә, биз кими севмәлијик?
12 Иса, Мусанын ганунундан ики фикир сөјләјәрәк севмәјә даир үмуми принсип верди. “Аллаһын олан Рәбби бүтүн үрәјинлә, бүтүн ҹанынла вә бүтүн дүшүнҹәнлә сев” вә “гоншуну өзүн кими сев” (Матта 22:37—39).
13. Ҝөзә ҝөрүнмәсә дә, Јегованы севмәји неҹә өјрәнмәк олар?
13 Исанын сөзләриндән мә’лум олур ки, биз илк нөвбәдә Јегованы севмәлијик. Лакин биз, Јеговаја мүнасибәтдә там формалашмыш мәһәббәтлә доғулмуруг. Бу мәһәббәти инкишаф етдирмәк лазымдыр. Аллаһ һаггында илк дәфә ешидәндә, бизи Онун шәхсијјәти ҹәлб етди. Вахт кечдикҹә, Онун инсанлар үчүн јер үзүнү неҹә һазырладығыны өјрәндик (Тәквин 2:5—23). Онун инсанларла неҹә даврандығыны ҝөрдүк: ҝүнаһ дүнјаја дахил оланда, О, бизи рәдд етмәди, хиласымыз үчүн тәдбирләр ҝөрдү (Тәквин 3:1—5, 15). Садиг инсанларла хејирхаһлыгла давранырды вә нәтиҹәдә, ҝүнаһларымызын бағышланмасы үчүн јеҝанә Оғлуну гурбан верди (Јәһја 3:16, 36). Јегова һаггында биликләримиз, бунунла јанашы миннәтдарлыг һиссимиз дә артды (Ишаја 25:1). Давуд падшаһ, Јегованы, Онун гајғыкешлијинә ҝөрә севирди (Мәзмур 116:1—9). Јегова бу ҝүн бизә дә гајғы ҝөстәрир: О, бизә јол ҝөстәрир, бизи гүввәтләндирир вә руһландырыр. Онун һаггында даһа чох өјрәндикҹә мәһәббәтимиз даһа да артыр (Мәзмур 31:23; Тсефанја 3:17; Ромалылара 8:28).
Мәһәббәти неҹә әкс етдирә биләрик?
14. Јегованы һәгигәтән севдијимизи неҹә ҝөстәрмәк олар?
14 Бүтүн дүнјада, Аллаһы таныдыгларыны иддиа едән инсанлар аз дејил, анҹаг онларын һәрәкәтләри бунун әксини ҝөстәрир. Јегованы һәгигәтән севдијимизи неҹә мүәјјән етмәк олар? Дуада, Она һиссләримизи сөјләјә биләрик. Бундан әлавә, мәһәббәтимизи әмәлләримизлә дә сүбут едә биләрик. Һәвари Јәһја деди: “Ким Онун сөзүнә риајәт едирсә, Аллаһын мәһәббәти онда һәгигәтән камил олмушдур. Бу јолла билирик ки, Ондајыг” (1 Јәһја 2:5; 5:3). Бунларла јанашы, Аллаһын Кәламы бизә бир јерә јығылмағы, һәмчинин тәмиз, јүксәк әхлаглы һәјат сүрмәји бујурур. Биз икиүзлүлүк етмирик, һәгигәти сөјләјир вә дүшүнҹәмизи тәмиз сахлајырыг (2 Коринфлиләрә 7:1; Ефеслиләрә 4:15; 1 Тимотејә 1:5; Ибраниләрә 10:23—25). Мадди еһтијаҹы оланлара көмәк етмәклә мәһәббәт ҝөстәририк (1 Јәһја 3:17, 18). Биз, Јегова һаггында билдикләримизи башгаларындан ҝизләтмирик. Буна ҝөрә дә, Падшаһлыг һаггындакы хош хәбәрин дүнја үзрә тәблиғиндә иштирак едирик (Матта 24:14; Ромалылара 10:10). Белә мәсәләләрдә Аллаһын Кәламына итаәткарлығымыз, Јегованы һәгигәтән севдијимизә шәһадәт едир.
15, 16. Јеговаја мәһәббәт, өтән ил әрзиндә чох инсанларын һәјатына неҹә тә’сир ҝөстәрмишдир?
15 Јеговаја олан мәһәббәт мүдрик гәрарлар гәбул етмәјә көмәк едир. Аллаһа мәһәббәт, кечән ил 288 907 инсаны, һәјатларыны Она һәср етмәјә вә гәрарларыны суда вәфтиз олунараг бәјан етмәјә тәшвиг етмишдир (Матта 28:19, 20). Онларын һәср олунмалары дәрин мә’на кәсб едирди. Бу, онларын һәјатларында дөнүш нөгтәси олду. Мәсәлән, Газменд, Албанијанын танынмыш баскетболчуларындан бири иди. О, бир нечә ил һәјат јолдашы илә бирликдә Мүгәддәс Китабы өјрәнирди вә манеәләрә бахмајараг, онлар тәблиғчи олдулар. Газменд кечән ил, 2000-ҹи хидмәт илиндә Албанијада вәфтиз олунан 366 нәфәрдән бири олду. Гәзетдә, онун һаггында јазылан мәгаләдә дејилирди: “О, һәјатын мә’насыны тапыб, бунун сајәсиндә о вә онун доғмалары, һеч заман олмадығы кими хошбәхт јашајырлар. Инди онун үчүн ваҹиб олан, һәјатдан нә гәдәр әлдә едә биләҹәји јох, башгаларынын рифаһы үчүн нә гәдәр едә билмәсидир”.
16 Гуам адасында јашајан, нефт е’малы компанијасында ишләјән јени вәфтиз олунмуш бир баҹыја ҹәлбедиҹи иш тәклиф етдиләр. Бу баҹы узун илләрдир ки, вәзифә пилләләри илә јүксәлирди вә бу дәфә она витсе-президент вәзифәсини тәклиф етдиләр. О, һәмин компанијанын тарихиндә илк гадын витсе-президент ола биләрди. Амма баҹы һәјатыны Јеговаја һәср етмишди. Буна ҝөрә дә, һәр шеји әри илә мүзакирә едиб вәзифәдән имтина етди вә ҝәләҹәкдә таммүддәтли хидмәтчи - пионер олмаг үмиди илә јарым ҝүнлүк ишә разылашды. Јеговаја мәһәббәт, коммерсија мараглары ҝүдмәк әвәзинә, онда пионер кими хидмәт етмәк һәвәси ојатды. Бүтүн дүнјада исә Аллаһа мәһәббәт 805 205 инсаны 2000-ҹи хидмәт илиндә пионер хидмәтинин мүхтәлиф нөвләриндә фәалијјәт ҝөстәрмәјә тәшвиг етмишдир. Бу пионерләр неҹә дә мәһәббәт вә иман ҝөстәрмишләр!
Исаны севмәјә тәшвиг олунуруг
17. Биз, Исада мәһәббәтин һансы ҝөзәл нүмунәсини ҝөрүрүк?
17 Иса, мәһәббәтли давраныша ән ҝөзәл нүмунәдир. О, јер үзүнә ҝәләнә гәдәр, өз Атасыны вә инсанлары чох севирди. Мүдриклији тәҹәссүм едән Иса, Сүлејманын мәсәлләри китабында дејир: [“Маһир көмәкчи”, ЈД] олараг Онун [Јегованын] јанында идим вә һәр ҝүн онун севинҹи идим, һәр вахт онун өнүндә севинирдим, мәскун олан дүнјасында севинирдим вә севинҹим адам оғуллары илә иди” (Сүлејманын мәсәлләри 8:30, 31). Мәһәббәт Исаны ҝөјләр һәјатыны тәрк етмәјә вә јер үзүндә көмәксиз бир көрпә кими доғулмаға тәшвиг етди. О, һәлимләрлә вә јохсулларла сәбирлә, мәрһәмәтлә давранырды вә Јегованын дүшмәнләринин әлиндән әзијјәт чәкирди. Ахырда, бүтүн бәшәријјәт уғрунда әзаб дирәји үзәриндә өлдү (Јәһја 3:35; 14:30, 31; 15:12, 13; Филипилиләрә 2:5—11). Дүзҝүн нијјәтләри неҹә дә ҝөзәл әкс етдирән нүмунәдир!
18. а) Биз Исаја мәһәббәти неҹә инкишаф етдиририк? б) Исаны севдијимизи неҹә ҝөстәририк?
18 Сәмими гәлбли инсанлар Инҹилдән Исанын һәјаты һаггында охујанда вә Аллаһа садиглијинин онлара ҝәтирдији хејир-дуалар һаггында дүшүнәндә бу инсанларын Исаја олан мәһәббәтләри артыр. Бу ҝүн биз, Петерин: “Сиз Иса Мәсиһи ҝөрмәдијиниз һалда, Ону севирсиниз” - сөзләри илә мүраҹиәт етдији инсанлара бәнзәјирик (1 Петер 1:8). Исаја мәһәббәтимизи, она иман едәрәк вә онун фәдакарлығыны әкс етдирәрәк ҝөстәририк (1 Петер 2:21—25; 1 Коринфлиләрә 11:1; 1 Салониклиләрә 1:6). 2000-ҹи ил, апрелин 19-да, Исанын өлүмүнүн Хатирә Ахшамына топлашан 14 872 086 адама, онун нәјә ҝөрә севилмәјә лајиг олдуғу хатырланды. Бу аз сај дејил! Исанын гурбанлығы сајәсиндә бу гәдәр инсанын хилас әлдә етмәк истәдијини билмәк неҹә дә фәрәһләндирир! Бәли, Јегованын вә Иса Мәсиһин бизә, еләҹә дә бизим онлара олан мәһәббәтимиз бизи инкишаф етдирир.
19. Нөвбәти мәгаләдә һансы суаллар мүзакирә олунаҹаг?
19 Иса деди ки, биз Јегованы бүтүн үрәјимиз, ҹанымыз, дүшүнҹәмиз вә гүввәмизлә севмәлијик. Лакин Иса ону да деди ки, биз гоншумузу өзүмүз кими севмәлијик (Марк 12:29—31). Бизим гоншуларымыз кимләрдир? Вә гоншуларымыза олан мәһәббәтимиз таразлығы вә дүзҝүн нијјәтләри горујуб сахламагда бизә неҹә көмәк едир? Бу суаллр нөвбәти мәгаләдә мүзакирә олунаҹаг.
Сиз хатырлајырсынызмы?
• Нәјә ҝөрә мәһәббәт ән ваҹиб хүсусијјәтдир?
• Јегованы севмәји биз неҹә өјрәнә биләрик?
• Давранышымыз Јегованы севдијимизи неҹә сүбут едир?
• Исаны севдијимизи неҹә ҝөстәририк?
[20 вә 21-ҹи сәһифәләрдәки шәкилләр]
Изтираблардан азад олунмағы сәбирлә ҝөзләмәкдә мәһәббәт бизә көмәк едир.
[22-ҹи сәһифәдәки шәкил]
Исанын бөјүк фәдакарлығы бизи, ону севмәјә тәшвиг едир.