Рисклә долу һәјат
“Һәр ҝүн, һәр санијә, һәтта јатдығымыз заман, рискә о дәрҹәдә мә’руз галырыг ки, һәјатымызын һәр бир аны сонунҹу ола биләр” (“Дискавер” журналы).
ҺӘЈАТ, миналанмыш бир саһәдә јеримәјә бәнзәјир, чүнки шикәстлик вә өлүм, бир гајда олараг, хәбәрдарлыг етмәдән бизи һәр ан јахалаја биләр. Һәр бир өлкәдә инсанлар мүхтәлиф рискләрә, јә’ни тәһлүкәләрә мә’руз галырлар. Бунларын арасында, автомобил гәзалары, вәтәндаш мүһарибәси, аҹлыг, ГИЧС, хәрчәнҝ хәстәлији, үрәк хәстәликләри вә бир чох башга шејләр ола биләр. Мәсәлән, “Јунајтет Стејтс нјус енд уорлд рипорт” журналында гејд олундуғу кими, Бөјүк Сәһранын ҹәнубунда јерләшән Африка рајонларында, ГИЧС бир нөмрәли гатил олмуш вә бир ил әрзиндә “2,2 милјон инсанын һәјатыны мәһв етмишдир. Бу исә Африканын бүтүн вәтәндаш мүһарибәләриндә мәһв олан инсанларын сајындан он гат артыгдыр”.
Ејни заманда, бүтүн дүнјада хәстәләнмәк, әлил галмаг тәһлүкәсинин гаршысыны алмаг вә һәјаты узатмаг үчүн милјардларла вәсаит сәрф олунур. Гидадан вә спиртли ичкиләрдән лазыми дәрәҹәдә истифадә етмәк вә идманла мәшғул олмаг һаггында ҝениш јајылмыш чохлу фикирләр бә’зи фајдалар ҝәтирир. Лакин һәјатын һәр бир ваҹиб саһәсинә аид е’тибарлы, даһа тәһлүкәсиз јашамаға имкан јарадан мә’лумат мәнбәји мөвҹуддур. Бу билик мәнбәји Мүгәддәс Китабдыр. Орада сағламлығымыза вә әмин-аманлығымыза тә’сир ҝөстәрән, тамамилә мүхтәлиф характерли чәтинликләри һәлл етмәјә аид мәсләһәтләр јерләшир. Тәбиидир ки, мөвҹуд олан бүтүн проблемләр Мүгәддәс Китабда тәфсилаты илә садаланмыр. Анҹаг орада гидаланмаг, бәдән тәрбијәси, психоложи әһвал-руһијјә, ҹинси әлагә, спиртли ички, түтүн вә наркотикдән истифадә етмәк кими мәсәләләрдә бизә рәһбәрлик верән ҝөзәл принсипләр јерләшир.
Бир чохларынын һәјаты мадди ҹәһәтдән дәјишкәнликлә дә бағлыдыр. Анҹаг Мүгәддәс Китаб бу ишдә дә көмәјимизә ҝәлир. О јалныз пула дүзҝүн мүнасибәт бәсләмәји вә онлары ағылла хәрҹләмәји мәсләһәт етмир, һәмчинин јахшы ишчи вә саһибкар олмағын да јолларыны ҝөстәрир. Башга сөзләрлә десәк, Мүгәддәс Китаб һәм мадди тәһлүкәсизлик вә физики сағламлыг үчүн, һәм дә һәјат үчүн е’тибарлы бәләдчидир. Бу ҝүн Мүгәддәс Китабын ҝәтирдији практики фајда һаггында билмәк сизә мараглыдырмы? Белә исә, нөвбәти мәгаләни охумаға давам един.