Јеговаја хидмәтдә севинҹинизи горујун
“Рәббдә һәмишә севинин; вә бир дә дејирәм: севинин” (ФИЛИПИЛИЛӘРӘ 4:4, И—93).
1, 2. Бүтүн әмлакыны итирдијинә бахмајараг, бир гардаш өз аиләси илә бәрабәр севинҹини горумаға неҹә наил олду?
СЕРРА-ЛЕОНЕДӘ јашајан 70 јашлы мәсиһчи Ҹејмс өмрү боју виҹданла зәһмәт чәкиб. Нәһајәт дөрд отаглы садә бир мәнзил алмаг үчүн пул топлаја билдијинә ҝөрә онун неҹә севиндијини тәсәввүр един! Бир гәдәр вахтдан сонра Ҹејмс аиләси илә бирликдә һәмин мәнзилә көчдү, лакин сонрадан өлкәни вәтәндаш мүһарибәси бүрүдү вә онларын мәнзилләри тамамилә јандырылды. Онлар мәнзилләрини итирмиш олсалар да, севинҹләрини итирмәдиләр. Нәјә ҝөрә?
2 Ҹејмс вә аиләси итирдикләри шејләри јох, әлләриндә галанлары һагда дүшүнүрдүләр. Ҹејмс изаһ едир: “Һәтта ән дәһшәтли вахтларда да ҝөрүшләр кечирир, Мүгәддәс Китабы охујур, бир јердә дуа едир вә малик олдуғумуз шејләр аз олса да башгалары илә бөлүшүрдүк. Биз, илк нөвбәдә Јегова илә олан дәјәрли мүнасибәтләримиз һагда дүшүндүјүмүз үчүн, севинҹимизи горуја билдик”. Малик олдуглары хејир-дуалары хатырлајараг, бу садиг мәсиһчиләр севинмәјә давам едирдиләр. Онлар үчүн бу хејир-дуаларын ән гијмәтлиси исә Јегова илә сых мүнасибәтләри иди (2 Коринфлиләрә 13:11). Ағыр шәраитләрә таб ҝәтирмәк, әлбәттә ки, асан дејилди. Анҹаг бу аилә Јеговада севинмәји давам едирди.
3. Бә’зи илк мәсиһчиләр севинҹләрини неҹә горујурдулар?
3 Илк мәсиһчиләр дә, Ҹејмс вә аиләсинин башына ҝәлән охшар сынагларла гаршылашырдылар. Буна бахмајараг, һәвари Павел јәһудиләрдән олан мәсиһчиләрә јазырды: “Сиз... мүлкүнүзүн талан едилмәсини севинҹлә гәбул етдиниз”. Сонра Павел: “Өзүнүз үчүн даһа јахшы вә даими малыныз олдуғуну биләрәк” демәклә, онларын севинҹинин сәбәбини изаһ етди (Ибраниләрә 10:34). Бәли, биринҹи әсрдәки һәмин мәсиһчиләрин ҹанлы үмидләри вар иди. Онлар, “талан едилмәси” мүмкүн олмајан шеји — Аллаһын сәмави Падшаһлығында “һәјат таҹыны” алаҹагларыны әминликлә ҝөзләјирдиләр (Вәһј 2:10). Бу ҝүн бизим мәсиһчи үмидимиз — истәр ҝөјләрдә, истәрсә дә јердә јашамаг үмидимиз севинҹимизи һәтта бәдбәхтликләр заманы да горујуб сахламаға көмәк едәр.
“Үмидлә севинин”
4, 5. а) Павелин ромалы мәсиһчиләрә вердији “үмидлә севинин” мәсләһәти нә үчүн вахтында иди? б) Мәсиһчинин өз үмидини нәзәрдән гачырмасына нәләр сәбәб ола биләр?
4 Һәвари Павел Ромадакы һәмиманлыларыны әбәди һәјата “үмидлә севинмәјә” дә’вәт едирди (Ромалылара 12:12). Бу, ромалы мәсиһчиләр үчүн вахтында верилән мәсләһәт иди. Павел онлара јазандан тәхминән он ил сонра, онлар амансыз тә’гибләрә мә’руз галдылар, бә’зиләри исә император Неронун сәрәнҹамына әсасән ишҝәнҹә илә өлдүрүлдүләр. Аллаһын онлара һәјат таҹыны верәҹәји вә’динә олан инамлары, шүбһәсиз ки, әзаблара таб ҝәтирмәкдә онлара көмәк едирди. Бәс бизим барәмиздә нә демәк олар?
5 Бир мәсиһчи кими, бизи дә тә’гибләр ҝөзләјир (2 Тимотејә 3:12). Бундан әлавә анлајырыг ки, “вахт вә тәсадүф”дән һеч биримиз мүһафизә олунмамышыг (Ваиз 9:11). Бизә әзиз олан адамлардан ким исә бәдбәхт һадисә нәтиҹәсиндә һәлак ола биләр. Валидејнләримиздән вә ја јахын достларымыздан бири өлүмҹүл хәстәлијә тутула биләр. Әҝәр белә сынаглар заманы даима бүтүн диггәтимизи Падшаһлыг үмидинә јөнәлтмәсәк, руһанилијимиз тәһлүкә алтында олаҹаг. Буна ҝөрә дә өзүмүздән сорушмалыјыг: Мән “үмидлә севинирәмми”? Бу үмид һаггында нә гәдәр тез-тез дүшүнүрәм? Јахынлашмагда олан Ҹәннәт мәним үчүн нә дәрәҹәдә реалдыр? Өзүмү орада тәсәввүр едирәмми? Индики әшјалар системинин сонуну, мәсиһчилик јолуна гәдәм гојдуғум заман олдуғу кими ејни сәбирсизликлә ҝөзләјирәмми? Ахырынҹы суал хүсусилә ваҹибдир. Нә үчүн? Чүнки јахшы сәһһәтимиз, јахшы маашымыз варса вә әҝәр мүһарибәләр ҝетмәјән, јахуд нисбәтән аз олан, аҹлыг вә тәбии фәлакәтләр олмајан әразидә јашајырыгса, биз — һәр һалда индики вахтда — Аллаһын јени дүнјасына олан еһтијаҹы нәзәрдән гачыра биләрик.
6. а) Павел вә Сила әзаба дөзәрәк нә һагда дүшүнүрдүләр? б) Павел илә Силанын нүмунәси бу ҝүн бизләри неҹә руһландыра биләр?
6 Сонра Павел, ромалылара “кәдәрдә сәбирли” олмағы мәсләһәт етди (Ромалылара 12:12, И—93). Павел “кәдәрин” — әзабын нә олдуғуну билирди. Бир дәфә о, рө’јада бир адам ҝөрдү. Һәмин адам ону, инсанларын Јегова һаггында өјрәнмәләринә көмәк етмәк үчүн “Македонијаја кеч”мәји дә’вәт едти (Һәвариләрин ишләри 16:9). Павел бундан сонра, Лука, Сила вә Тимотејлә бирликдә Авропаја јола дүшдү. Сә’јдә зәифләмәјән бу миссионерләри нә ҝөзләјирди? Әзаб! Македонијанын Филипи шәһәриндә тәблиғ етдикдән сонра, Павел вә Силаны дөјүб, һәбсханаја салдылар. Ҝөрүндүјү кими, шәһәр сакинләринин бә’зиләри Падшаһлыг һаггындакы мүждәјә садәҹә лагејдликлә јох, нифрәтлә јанашырдылар. Сә’јдә зәифләмәјән бу миссионерләр вәзијјәтин бу ҹүр дәјишдијинә ҝөрә севинҹләрини итирдиләрми? Хејр. Онлары дөјүб, һәбсханаја салдыгдан сонра, “ҝеҹә јарысына јахын Павел вә Сила дуа едәрәк Аллаһы тәрәннүм едирдиләр” (Һәвариләрин ишләри 16:25, 26). Көтәкләрин ағрысы, әлбәттә ки, Павел илә Силаја севинҹ ҝәтирмирди, анҹаг онлар бу һагда дүшүнмүрдүләр. Онларын бүтүн дүшүнҹәләри Јеговаја вә Онун вердији хејир-дуалара мәркәзләнмишди. Павел илә Сила, “кәдәрдә сәбирли” олараг вә севинҹләрини горујараг, Филипидә вә диҝәр јерләрдә олан гардашлара ҝөзәл нүмунә вердиләр.
7. Нәјә ҝөрә дуаларымыза миннәтдарлыг да дахил олмалыдыр?
7 Павел јазырды: “Дуада мәтанәтли олун” (Ромалылара 12:12). Чәтин анларынызда дуа едирсинизми? Нә һагда дуа едирсиниз? Јәгин ки, Јеговаја конкрет проблеминиз һаггында дејир вә Онун көмәјини диләјирсиниз. Бундан башга, алдығыныз хејир-дуалара ҝөрә дә Она миннәтдарлыг едә биләрсиниз. Проблемләр јаранан заман Јегованын хејирхаһ ишләри вә Онун өз хидмәтчиләри илә неҹә давранмасы барәдә дүшүнмәк, бизә “үмидлә севинмәјә” көмәк едәр. Һәјаты әзабларла долу олан Давуд јазырды: “Ја РӘБ Аллаһым, јаратдығын харигәләр вә бизим үчүн дүшүнҹәләрин чохдур; сәнә бәнзәјән јохдур. Онлары е’лан едиб сөјләмәк истәсәм, саја ҝәлмәз” (Мәзмур 40:5). Әҝәр биз дә, Давуд кими, Јеговадан алдығымыз хејир-дуалар һаггында дүшүнүрүксә, әлбәттә ки, севинәҹәјик.
Мүсбәт әһвал-руһијјәни горујун
8. Тә’гибләрә дүчар олан заман хошбәхт галмагда мәсиһчијә нә көмәк едир?
8 Иса өз давамчыларыны тәшвиг едир ки, онлар мүхтәлиф сынагларла гаршылашан заман мүсбәт әһвал-руһијјәни горујуб сахласынлар. О дејир: “Мәнә ҝөрә инсанлар сизи тәһгир вә тә’гиб едәҹәкләри, јалан сөјләјиб сизә һәр ҹүр бөһтан атаҹаглары заман, сиз нә бәхтијарсыныз!” (Матта 5:11). Биз белә вәзијјәтләрдә нәјә ҝөрә севинә биләрик? Мүгавимәтләрә таб ҝәтирмәк баҹарығы, биздә Јегованын руһу олдуғуна шәһадәтлик едир. Һәвари Петер өз зәманәсинин мәсиһчиләринә деди: “Әҝәр Мәсиһин адындан өтрү тәһгир едилирсинизсә, бәхтијарсыныз. Чүнки иззәтли Руһ, Аллаһын Руһу үзәриниздә галыр” (1 Петер 4:13, 14). Јегова, өз руһунун васитәсилә, бизә дә һәр шејә таб ҝәтирмәкдә вә бунун нәтиҹәси олараг, севинҹимизи горумагда көмәк едәҹәкдир.
9. Иманларына ҝөрә һәбсханада отуран заман, севинмәјә сәбәбләр тапмагда гардашлара нә көмәк етди?
9 Һәтта ән дәһшәтли вәзијјәтләрдә белә, севинмәјә сәбәбләр тапмаг олар. Адолф адлы бир мәсиһчи өз шәхси тәҹрүбәсиндә буна әмин олду. О, Јегованын Шаһидләринин фәалијјәти узун илләр гадаған олунмуш өлкәдә јашајыр. Адолфу вә даһа бир нечә адамы, Мүгәддәс Китаба әсасланан е’тигадларындан имтина етмәдикләринә ҝөрә тутдулар вә узун мүддәтә һәбсә салдылар. Һәбсханадакы һәјат чәтин иди, амма Павел илә Сила кими, Адолф вә онун достлары Аллаһа миннәтдар олмаг үчүн сәбәбләр тапырдылар. Онларын дедикләринә ҝөрә, һәбсханада иманлары мөһкәмләнди вә сәхавәт, мәрһәмәт вә гардашлығы севмәк кими дәјәрли мәсиһчи хүсусијјәтләрини инкишаф етдирдиләр. Мәсәлән, дустаглардан бири евдән бағлама аланда, ону һәмиманлылары илә бөлүрдү; онлар исә бу јардымы, “һәр бир јахшы бәхшиш вә һәр камил һәдијјәни” Бәхшиш верән Јеговадан олан кими гәбул едирдиләр. Хејирхаһлығын бу ҹүр тәзаһүрү һәм верәнә, һәм дә алана севинҹ ҝәтирирди. Нәтиҹәдә елә олду ки, дустагхана һәмин гардашларын иманыны сындырмаг әвәзинә, онлары руһән мөһкәмләтди! (Јагуб 1:17; Һәвариләрин ишләри 20:35).
10, 11. Бир баҹы сонсуз сорғу-суаллара вә узун мүддәтли һәбсә неҹә таб ҝәтирди?
10 Падшаһлығы тәблиғ етмәк фәалијјәти гадаған олунан өлкәдә јашајан Елланы, мәсиһчи үмидини башгалары илә бөлүшдүјүнә ҝөрә һәбсә алдылар. Ону сәккиз ај фасиләсиз сорғу-суала тутдулар. Ахырда мәһкәмә оланда, ону 10 ил азадлыгдан мәһрум етдиләр; һәбсханада исә ондан башга Јегованын хидмәтчиси јох иди. О вахт Елланын ҹәми 24 јашы вар иди.
11 Мә’лум мәсәләдир ки, о өзүнүн ҝәнҹлик илләрини һәбсханада кечирмәк истәмәзди. Лакин Елла вәзијјәти дәјишә билмәдији үчүн, баш верән һадисәјә өз мүнасибәтини дәјишмәји гәрара алды. Дустагхананы өзү үчүн шәһадәтлик саһәси кими һесаб етмәјә башлады. Елла хатырлајыр: “Тәблиғ етмәк үчүн иш чох олдуғуна ҝөрә илләр дә тез өтдү”. Беш илдән артыг вахт кечдикдән сонра, ону јенидән сорғу-суал етдиләр. Ҝөрәндә ки, зиндан онун иманыны сындырмајыб мүстәнтигләр дедиләр: “Биз сәни бурахмајаҹағыг — сән дәјишмәмисән”. Елла гәти ҹаваб верди: “Хејр, дәјишмишәм! Инди мәним әһвал-руһијјәм иш кәсилмәздән әввәл олдуғундан даһа јахшыдыр, иманым исә чох ҝүҹлүдүр!” О, буну да әлавә етди: “Әҝәр мәни бурахмаг истәмирсинизсә, Јегованын мәни азад етмәји лазым билдији вахта гәдәр бурада олаҹағам”. Һәбсдә кечирдији беш ил јарым Елланы севинҹдән мәһрум етмәди! О, һәр бир вәзијјәтдә кифајәтләнмәји өјрәнди. Онун нүмунәсиндә сизин үчүн ибрәт дәрси јохдурму? (Ибраниләрә 13:5).
12. Чәтин вәзијјәтләрдә дахили раһатлыг тапмагда мәсиһчијә нә көмәк едәр?
12 Белә чәтинликләрин өһдәсиндән ҝәлмәк үчүн Елланын хүсуси исте’дада малик олдуғуну дүшүнмәјин. Һөкм чыхарылана гәдәр ону бир нечә ај неҹә сорғу-суала тутдугларыны хатырлајараг, Елла е’тираф едир: “Дишләримин неҹә шаггылдадығы вә өзүмү үркәк сәрчәҹик кими һисс етдијим јадымдадыр”. Лакин Елланын Јеговаја иманы ҝүҹлү иди. О, Јеговаја ҝүвәнмәји өјрәнди (Сүлејманын мәсәлләри 3:5—7). Бунун сајәсиндә, Аллаһ онун үчүн әввәлләр олдуғундан даһа реал олду. Елла әлавә едир: “Һәр дәфә, сорғу-суал етдикләри отаға ҝирәндә раһатлыг һисс едирдим. [...] Вәзијјәт нә гәдәр горхулу олурдуса, раһатлыг бир о гәдәр дә артырды”. Бу раһатлығы верән Јегова иди. Һәвари Павел дејир: “Һеч нәјин гејдинә галмајын, амма һәр шејдә, дуа вә нијаз едәрәк, өз хаһишләринизи Аллаһа шүкранла билдирин. Вә Аллаһын һәр ҹүр ағылдан үстүн олан сүлһү Мәсиһ Иса васитәсилә үрәкләринизи вә дүшүнҹәләринизи горујаҹагдыр” (Филипилиләрә 4:6, 7).
13. Нәјә ҝөрә әмин ола биләрик ки, әзаблара таб ҝәтирмәк үчүн гүввәмиз чатаҹагдыр?
13 Нәтиҹәдә азадлыға бурахылан Елла, һәбсдә кечирдији әзијјәтләрә бахмајараг, севинҹини горуја билди. Анҹаг буну өзүнүн јох, Јегованын гүввәси сајәсиндә етди. Павелин дә башына буна бәнзәр һадисә ҝәлмишди, о јазырды: “Буна ҝөрә, даһа чох өз зәифликләримлә мәмнунијјәтлә өјүнәҹәјәм ки, Мәсиһин гүдрәти ичимдә сакин олсун... чүнки мән зәиф олдуғум заман гүввәтлијәм” (2 Коринфлиләрә 12:9, 10).
14. Мәсиһчинин чәтин вәзијјәтә мүсбәт нәзәрлә неҹә јанаша билдијини вә бунун һансы нәтиҹәјә ҝәтириб чыхара биләҹәјини нүмунәләрлә ҝөстәрин.
14 Бу ҝүн гаршылашдығыныз чәтинликләр, јухарыда нәзәрдән кечирдикләримиздән фәргләнә биләр. Амма чәтинликләр һәр неҹә олса да, онларын өһдәсиндән ҝәлмәк асан дејил. Мисал үчүн, мүдир сизин ишинизә чох тәнгиди, һәтта башга динә гуллуг едән иш јолдашларынызын ишиндән дә тәнгиди јанаша биләр. Башга иш тапмаг мүмкүн дејил. Севинҹи неҹә горумалы? Һәбсханада оларкән ваҹиб хүсусијјәтләри инкишаф етдирмәји өјрәнән Адолфу вә онун достларыны хатырлајаг. Әҝәр сиз — һәтта “сәрт” олса да, мүдирин тәләбини виҹданла јеринә јетирмәјә чалышырсынызса, мәтанәт вә сәбир кими мәсиһчи хүсусијјәтләрини инкишаф етдирмәјә наил олаҹагсыныз (1 Петер 2:18). Бундан әлавә, сиз даһа дәјәрли ишчи олар, бунунла да ҝәләҹәкдә даһа әлверишли иш јери тапмаг шансынызы артырарсыныз. Ҝәлин Јеговаја хидмәтдә севинҹимизи горумағын башга бә’зи үсулларыны мүзакирә едәк.
Һәјаты садәләшдирмәк севинҹ ҝәтирир
15-17. Бир әр-арвад чәтинлијин сәбәби тамамилә арадан галдырылмаса да, һәјатларыны садәләшдирмәјә неҹә наил олду?
15 Һәтта һарада вә һансы ишдә ишләмәји сечмәк имканыныз олмаса да, еһтимал ки, өз һәјатынызда нәји исә дәјишә биләрсиниз. Бир нүмунәјә бахаг.
16 Бир мәсиһчи әр-арвад ағсаггалы шам јемәјинә дә’вәт етди. Сүфрә архасында гардаш арвады илә бәрабәр, ахыр вахтларда һәјатдан јорулдугларыны сөјләдиләр. Онларын һәр икиси там иш ҝүнү чалышырдылар, иш чох вахт тәләб едирди, јени иш јери тапмаг исә мүмкүн дејилди. Белә вәзијјәтә нә гәдәр таб ҝәтирәҹәкләрини онлар билмирдиләр.
17 Бу әр-арвад ағсаггалдан мәсләһәт хаһиш етдикдә, о деди: “Һәјатынызы садәләшдирин”. Неҹә? Ишә ҝетмәк вә ҝери гајытмаг үчүн бу әр-арвадын үч саата јахын вахтлары ҝедирди. Онлары јахшы таныјан бу ағсаггал тәклиф етди ки, јола сәрф олунан вахты гысалтмаг үчүн иш јеринә јахын әразијә көчсүнләр. Гәнаәт едилән вахты исә башга ваҹиб ишләрә, јахуд да истираһәтә сәрф етмәк оларды. Әҝәр һәдсиз ҝәрҝинлик мүәјјән дәрәҹәдә сизи севинҹдән мәһрум едирсә, нәјә ҝөрә һәјаты садәләшдирмәк һаггында дүшүнмәјәсиниз?
18. Гәрар гәбул етмәздән әввәл нәјә ҝөрә һәр шеји ҝөтүр-гој етмәк лазымдыр?
18 Бундан башга, һәјатда ҝәрҝинлији азалтмаг үчүн алдығыныз гәрары јахшы ҝөтүр-гој етмәк лазымдыр. Мәсәлән, бир мәсиһчи ев тикмәк гәрарына ҝәлди. О, бундан әввәл иншаат иши илә мәшғул олмадығы бир һалда, бу тикинти үчүн чох мүрәккәб конструксија сечди. Һәмин мәсиһчи инди дәрк едир ки, евин конструксијасыны сечмәздән әввәл, “өз ҝедишинә диггәт едәрәк” ҝәрәксиз проблемләрдән гачынмаг оларды (Сүлејманын мәсәлләри 14:15). Башга бир мәсиһчи һәмиманлысына борҹ пул алмагда зәманәт вермәјә разы олду. Мүгавиләјә әсасән, әҝәр борҹ алан борҹуну гајтармаг имканында олмазса, һәмин мәбләғ зәманәт верәндән тәләб олунаҹагды. Әввәлҹә һәр шеј өз гајдасында иди, анҹаг сонра борҹ алан мүгавиләни позду. Борҹ верән нараһат олуб, зәманәт верәндән бүтүн борҹу өдәмәсини тәләб етди. Зәманәт верән мүшкүл вәзијјәтдә галды. Лакин әҝәр о, башгасынын борҹуна бојун олмаздан әввәл һәр шеји ҝөтүр-гој етсәјди, бу ҹүр вәзијјәтә дүшмәзди (Сүлејманын мәсәлләри 17:18).
19. Һәјатын ҝәрҝинлијини азалтмаг неҹә мүмкүндүр?
19 Јоруларкән дүшүнмәк лазым дејил ки, шәхси өјрәнмәјә, тәблиғ хидмәтинә вә јығынҹаг ҝөрүшләринә ајырдығымыз вахты гысалтмагла ҝәрҝинлији азалдаҹаг вә јенидән севинҹә наил олаҹағыг. Чүнки Јегованын мүгәддәс руһуну бүтүн бунларын сајәсиндә алырыг, севинҹ исә руһун сәмәрәсидир (Галатијалылара 5:22). Мәсиһчи фәалијјәти һәмишә гүввәт верир вә үмумијјәтлә чох јормур (Матта 11:28—30). Әслиндә јорғунлуға руһани јох, дүнјәви ишләр вә әјләнҹәләр сәбәб олур. Әҝәр биз вахтында јатмағы өјрәнсәк, бу чох көмәк едәр. Бир балаҹа әлавә истираһәт чох шеј верир. Өмрүнүн ахырына гәдәр Јегованын Шаһидләринин Рәһбәрлик шурасында хидмәт едән Нејтан Норр миссионерләрә дејирди: “Руһдан дүшдүјүнүз заман, илк нөвбәдә динҹәлмәк лазымдыр. Тәәҹҹүблүдүр, амма дојунҹа јатанда, санки бүтүн проблемләр даһа јахшы һәлл едилән кими ҝөрүнүр”.
20. а) Севинҹи горумағын бир нечә үсулуну садалајын. б) Севинҹә наил олмаг үчүн нә һагда дүшүнмәк олар? (Сәһифә 23-дә олан чәрчивәјә бахын.)
20 Мәсиһчиләрин “бәхтијар Аллаһа” хидмәт етмәјә ҝөзәл имканлары вар (1 Тимотејә 1:11, ЈД). Артыг ҝөрдүјүмүз кими, һәтта ҹидди проблемләрлә гаршылашанда да севинҹи горумаг мүмкүндүр. Ҝәлин Падшаһлыг үмидини һәмишә хатырлајаг, лазым ҝәлдикдә дүшүнҹәмизи дәјишәк вә һәјатымызы садәләшдирәк. Белә олдугда, дүшдүјүмүз вәзијјәтләрдән асылы олмајараг, һәвари Павелин “Рәббдә һәмишә севинин; вә бир дә дејирәм: севинин” сөзләринә һај верәҹәјик (Филипилиләрә 4:4, И—93).
Нөвбәти суаллар үзәриндә јахшы дүшүнүн
• Падшаһлыг һаггындакы үмиди мәсиһчиләр нә үчүн һәмишә јахшы хатырламалыдырлар?
• Чәтин вәзијјәтләрдә севинҹимизи горумаға нә көмәк едәр?
• Нәјә ҝөрә һәјатымызы садәләшдирмәјә чалышмалыјыг?
• Бә’зиләри өз һәјатларыны нәдә садәләшдирибләр?
[23-ҹү сәһифәдәки чәрчивә/шәкилләр]
Севинҹ үчүн диҝәр сәбәбләр
Биз мәсиһчиләрин севинмәјә чох сәбәби вар. Онлардан бә’зиләри бунлардыр.
1. Биз Јегованы таныјырыг.
2. Аллаһын Кәламындакы һәгигәти өјрәнмишик.
3. Исанын гурбанлығы сајәсиндә ҝүнаһларын бағышланмасына маликик.
4. Аллаһын Падшаһлығы идарә едир. Тезликлә јени дүнја ҝәләҹәк!
5. Јегова бизә руһани ҹәннәт бәхш едиб.
6. Биз фајда ҝәтирән мәсиһчи үнсијјәтинә севинирик.
7. Тәблиғ фәалијјәтиндә иштирак етмәјә ҝөзәл имканымыз вар.
8. Биз сағ-саламатыг, бу вә ја диҝәр тәрздә физики гүввәмиз вар.
Севинмәк үчүн даһа бир нечә сәбәб садалаја биләрсинизми?
[19-ҹу сәһифәдәки шәкил]
Павел вә Сила һәбсханада да севинирдиләр.
[21-ҹи сәһифәдәки шәкилләр]
Сизин нәзәриниз Аллаһын јени дүнјасына олан севинҹли үмидә мәркәзләнибми?