Аиләнизи руһән мөһкәмләндирин

“Онлары Рәббин тәрбијә вә нәсиһәти илә бөјүдүн” (ЕФЕСЛИЛӘРӘ 6:4).

1. Аллаһын аиләјә аид нијјәти нә иди, амма нә баш верди?

“СӘМӘРӘЛИ олун вә чохалын вә јер үзүнү долдурун” (Тәквин 1:28). Адәм вә Һәвваја бу сөзләрлә мүраҹиәт едәрәк, Јегова Аллаһ аиләнин тәмәлини гојду (Ефеслиләрә 3:14, 15). Илк инсан ҹүтү ҝәләҹәкдә јер үзүнүн өз нәсилләри илә, јә’ни ҹәннәт дүнјасында хошбәхтлик ичиндә јашајан вә Бөјүк Јараданларына бирликдә ибадәт едән камил гоһумлары илә долаҹағыны тәсәввүр едә биләрди. Анҹаг Адәм вә Һәвва ҝүнаһ ишләтдикләри үчүн јер үзү салеһ, Аллаһдан горхан инсанларла долмады (Ромалылара 5:12). Бунун әвәзинә, аилә тезликлә тәнәззүлә уғрады, нифрәт, зоракылыг вә “тәбии бағлылығын” чатышмазлығы исә хүсусилә бу “ахыр ҝүнләрдә” ҝениш јајылыды (2 Тимотејә 3:1—5, ЈД; Тәквин 4:8, 23; 6:5, 11, 12).

2. Адәмин нәслинин һансы габилијјәтләри варды вә аиләнин руһән мөһкәмләнмәси үчүн нә тәләб олунурду?

² Адәм вә Һәвва Аллаһын сурәтиндә јарадылмышдылар. Адәм ҝүнаһ ишләтмиш олса да, Јегова онун өвладлара саһиб олмасына иҹазә верди (Тәквин 1:27; ­5:1—4). Адәмин нәсли, онун өзү кими, анаданҝәлмә әхлаг дәјәрләринә малик иди вә јахшы илә писи ајырд етмәји өјрәнә биләрди. Онлара Јараданларына ибадәт етмәји вә Ону бүтүн үрәкләри, ҹанлары, дүшүнҹәләри вә гүввәтләри илә севмәји өјрәтмәк мүмкүн иди (Марк 12:30; Јәһја 4:24; Јагуб 1:27). Бундан әлавә, онлары “һагг оланы етмәјә вә мәрһәмәти севмәјә” вә Аллаһлары илә “тәвазөкарлыгла јеримәјә” өјрәтмәк оларды (Мика 6:8). Анҹаг ҝүнаһлы олдугларына ҝөрә, аиләнин руһән мөһкәмләнмәси үчүн онлардан әһәмијјәтли дәрәҹәдә диггәт тәләб олунурду.

“Вахты сатын алын”

3. Ушагларыны мәсиһчи кими тәрбијә етмәк үчүн, валидејнләр “вахты” неҹә “сатын ала” биләрләр?

³ Ушаглар “Рәбби севән” вә “шәрдән нифрәт едән” олсунлар дејә, јашадығымыз бу ағыр вә бөһранлы зәманәдә даһа чох гүввә сәрф етмәк лазымдыр (Мәзмур 97:10). Белә чәтин мәгсәдә наил олмаг үчүн мүдрик валидејнләр “вахты сатын” алаҹаглар (Ефеслиләрә 5:15—17, ЈД). Әҝәр валидејнсинизсә, буну неҹә едә биләрсиниз? Биринҹиси, диггәти “ән үстүн дәјәрләр”ә јөнәлдәрәк ваҹиб олан шејләри мүәјјән етмәлисиниз, бу исә өзүнә ушаглара тәрбијә вә тә’лим вермәји дахил едир (Филипилиләрә 1:10, 11). Икинҹиси, һәјатынызы садәләшдирин. Ола билсин ки, чох ваҹиб олмајан һансыса мәшғулијјәтләрдән вә ја гуллуг ҝөстәрилмәси үчүн артыг вахт тәләб едән ҝәрәксиз әшјалардан имтина етмәли олаҹагсыныз. Мәсиһчи валидејнләр кими, Аллаһдан горхан ушаглар бөјүтмәк үчүн сәрф етдијиниз гүввәјә ҝөрә һеч заман пешман олмајаҹагсыныз (Сүлејманын мәсәлләри 29:15, 17).

4. Аиләнин бирлијини неҹә горумаг олар?

⁴ Ушагларла бирликдә кечирдијиниз, хүсусилә дә руһани мәшғулијјәтләрә сәрф етдијиниз вахтын әвәзи гат-гат артыг өдәниләҹәк вә бу, аиләнин бирлијинә көмәк едәҹәкдир. Амма белә иши башлы-башына бурахмаг олмаз. Бир јердә кечирәҹәјиниз вахты планлашдырын. Бунун үчүн һамынын садәҹә олараг евдә олмасы вә һәр кәсин өз иши илә мәшғул олмасы кифајәт етмир. Ушагларын һәр биринә ҝүндәлик диггәт јетириләндә онлар даһа јахшы инкишаф едирләр. Онлардан мәһәббәт вә гајғыны әсирҝәмәјин. Әр вә арвад валидејн олмағы гәрара алмаздан әввәл, бу мәс’улијјәтин нә дәрәҹәдә бөјүк олдуғу барәдә ҹидди сурәтдә дүшүнмәлидирләр (Лука 14:28). Белә олдугда, онлар ушаглары тәрбијә етмәји хошаҝәлмәз вәзифә санмајаҹаглар. Әксинә, әр вә арвад бу хејир-дуаны јүксәк гијмәтләндирәҹәкләр (Тәквин 33:5; Мәзмур 127:3).

Сөзлә вә нүмунә илә өјрәдин

5. а) Ушаглара Јеговаја мәһәббәти ашыламаг нәдән башлајыр? б) Тәснијә 6:5—7 ајәләриндә валидејнләрә һансы мәсләһәт верилир?

⁵ Ушагларыныза Јеговаја мәһәббәти ашыламаг үчүн, илк нөвбәдә Ону сизин өзүнүз севмәлисиниз. Аллаһа олан ҝүҹлү мәһәббәт, сизи Онун бүтүн нәсиһәтләринә сәдагәтлә риајәт етмәјә тәшвиг едәҹәкдир. Буна, ушаглары “Рәббин тәрбијә вә нәсиһәти илә” бөјүтмәк зәрурилији дә дахил олур (Ефеслиләрә 6:4). Аллаһ валидејнләрә тапшырыр ки, өвладларына нүмунә олсунлар, онларла сөһбәт етсинләр вә онлары өјрәтсинләр. Тәснијә 6:5—7 ајәләриндә дејилир: “Аллаһын Рәбби бүтүн үрәјинлә вә бүтүн ҹанынла вә бүтүн гүввәтинлә севәҹәксән. Вә бу ҝүн сәнә әмр етмәкдә олдуғум бу сөзләр сәнин үрәјиндә олаҹаглар; вә онлары оғулларынын зеһнинә јахшыҹа гојаҹагсан вә евиндә отурдуғун вә јолда јеридијин вә јатдығын вә галхдығын заман бунлар һаггында данышаҹагсан”. Аллаһын әмрләрини, тез-тез едилән нәсиһәтләр вә тәкрарламалар сајәсиндә ушагларын зеһнинә гојмаг олар. Беләликлә ушагларыныз Јеговаја олан мәһәббәтинизи ҝөрәҹәкләр, бу да онлары Јегова илә јахын мүнасибәт јаратмаға тәшвиг едәҹәкдир (Сүлејманын мәсәлләри 20:7).

6. Ушагларын нүмунә әсасында өјрәнмәјә мејлли олдугларыны нәзәрә алараг валидејнләр онлара неҹә көмәк едә биләрләр?

⁶ Ушаглар јени бир шеј өјрәнмәјә ҹан атырлар. Онлар диггәтлә гулаг асыр, һәр шејә фикир верир вә һазырлыгла сизин нүмунәнизи тәглид едирләр. Онлар ҝөрәндә ки, сиз јалныз мадди мәнафе һаггында дүшүнмүрсүнүз, бу онлара Исанын мәсләһәтинә риајәт етмәјә көмәк едәҹәк. Бунунла сиз онлара, мадди шејләр үчүн нараһат олмамағы вә “әввәлҹә Онун [Аллаһын] Падшаһлығыны” ахтармағы өјрәдирсиниз (Матта 6:25—33, И—93). Ушагларынызла Мүгәддәс Китаб һәгигәти, Аллаһын јығынҹағы вә тә’јин едилмиш ағсаггаллар һаггында мүсбәт вә јарадыҹы әһвал-руһијјәдә сөһбәт етмәклә, онлара Јеговаја һөрмәт бәсләмәји вә Онун руһани не’мәтләрини гијмәтләндирмәји өјрәтмиш олурсунуз. Ушаглар ардыҹыллығын олмадығына тез диггәт јетирдикләри үчүн, шифаһи сурәтдә вердијиниз өјүд-нәсиһәтләр, руһани шејләрә ҝөрә дәрин миннәтдарлығынызы ҝөстәрән давраныш вә әһвал-руһијјәнизлә тәсдиг олунмалыдыр. Өзләринин јахшы нүмунәләри сајәсиндә ушагларынын Јегованы сәмими гәлбдән севдикләрини ҝөрмәк валидејнләр үчүн неҹә дә фәрәһлидир! (Сүлејманын мәсәлләри 23:24, 25).

7, 8. Ушаглары еркән јашында өјрәтмәјин ваҹиб олдуғуну һансы нүмунә ҝөстәрир вә өвладларынын наилијјәтләринә ҝөрә валидејнләр кимә борҹлудурлар?

⁷ Ушаглары еркән јашындан өјрәтмәјин ваҹиб олдуғуну, Венесуеладан олан бир нүмунәдән ҝөрә биләрик (2 Тимотејә 3:15). Бу, ҝәнҹ әр-арвад Феликс вә Мајерлинин нүмунәсидир. Онлар пионер хидмәтиндә чалышырдылар. Оғуллары Фелито дүнјаја ҝөз ачандан, онлар вар гүввәләри илә чалышдылар ки, ону Јегованын һәгиги ибадәтчиси кими тәрбијә етсинләр. Мајерлин оғлуна Јегованын Шаһидләри тәрәфиндән нәшр едилән “Мәним Мүгәддәс Китаб һекајәләри китабым” адлы китабы охумаға башлады. Фелито артыг еркән јашларында икән рәсмләрдән Мусаны вә бу китабда адлары чәкилән диҝәр шәхсләри таныјырды.

⁸ Фелито артыг чох ҝәнҹ јашларындан мүстәгил олараг тәблиғ етмәјә башлады. Арзу етдији кими, Падшаһлыг тәблиғчиси олду вә сонрадан вәфтиз олунду. Бир гәдәр сонра исә Фелито таммүддәтли пионер хидмәтинә башлады. Онун валидејнләри хатырлајырлар: “Дәрк едирик ки, Јегованын нәсиһәти сајәсиндә оғлумуз руһән инкишаф едир вә бунун үчүн биз Она борҹлујуг”.

Ушагларын руһани инкишафына көмәк един

9. Биз, садиг вә ағыллы гулун васитәсилә алдығымыз руһани тә’лимләрә ҝөрә нә үчүн миннәтдар олмалыјыг?

⁹ Чохсајлы журналлар, јүзләрлә китаблар вә Интернетдә олан минләрлә сајтлар ушагларын тәрбијәсинә аид мәсләһәтләр верир. Ушаглара һәср едилән “Нјусуик” журналында гејд олундуғу кими, чох вахт “мә’лумат зиддијјәт тәшкил едир... Ән писи исә одур ки, дүзҝүнлүјү габаглар һеч бир шүбһә ојатмајан мә’луматын әслиндә тамамилә сәһв олдуғу мә’лум олур”. Биз Јеговаја, аиләнин тә’лими вә руһани инкишафы үчүн ҝөстәрдији бөјүк гајғыја ҝөрә неҹә дә миннәтдарыг! Сиз, садиг вә ағыллы гулун тәгдим етдији бүтүн вәсаитләрдән там мә’нада истифадә едирсинизми? (Матта 24:45—47).

10. Мүгәддәс Китабын сәмәрәли сурәтдә аиләликҹә өјрәнилмәси һәм валидејнләрә, һәм дә ушаглара неҹә фајда ҝәтирир?

¹⁰ Мүгәддәс Китабы сәрбәст шәраитдә, мүнтәзәм вә ардыҹыл сурәтдә аиләликлә өјрәнмәјин ваҹиблији бөјүкдүр. Бу өјрәнмәнин ибрәтвериҹи, севиндириҹи вә руһландырыҹы олмасы үчүн јахшы һазырлыг тәләб олунур. Ушаглары өз фикирләрини сәмими гәлбдән сөјләмәјә тәшвиг етмәклә, валидејнләр онларын үрәкләриндә оланы вә дүшүнҹәләрини өјрәнә биләрләр. Аиләви өјрәнмәнин нә дәрәҹәдә сәмәрәли олдуғуну, аиләнин бүтүн үзвләринин буну сәбирсизликлә ҝөзләјиб ҝөзләмәдији илә мүәјјән етмәк олар.

11. а) Валидејнләр ушагларыны һансы мәгсәдләрә ҹәһд ҝөстәрмәјә тәшвиг едә биләрләр? б) Јапонијалы бир гыз гаршысына гојдуғу мәгсәдлә нәјә наил олду?

¹¹ Аиләнин руһани мөһкәмлијинә, һәмчинин Мүгәддәс Китаба әсасән гаршыја гојулан мәгсәдләр дә көмәк едир вә валидејнләр ушагларыны гаршыларына белә мәгсәдләр гојмаға тәшвиг етмәлидирләр. Мәсәлән, ушаглар гаршыларына Мүгәддәс Китабы ҝүндәлик охумаг, хош хәбәрин мүнтәзәм тәблиғчиси олмаг вә өзүнү Аллаһа һәср едиб, вәфтиз олунмаг кими мәгсәдләр гоја биләрләр. Диҝәр мәгсәдләр арасында пионер, Бејт-елдә көнүллү хидмәтчи вә ја миссионер кими таммүддәтли хидмәти дә садаламаг олар. Ибтидаи синифдә охујаркән Ајуми адлы јапонијалы бир гыз, һәгигәти бүтүн синиф јолдашларына данышмағы гаршысына мәгсәд гојду. Бу гыз, мүәллим вә шаҝирдләрдә мараг ојатмаг үчүн, Мүгәддәс Китаб әдәбијјатларындан бә’зиләрини мәктәбин китабханасына гојмаг үчүн иҹазә алды. Нәтиҹәдә, Ајуминин ибтидаи синифдә охудуғу алты ил әрзиндә, 13 Мүгәддәс Китаб өјрәтмәси тәшкил олунду. Һәмин өјрәнәнләр арасында бир гыз вә онун гоһумларындан бә’зиләри вәфтиз едилмиш мәсиһчи олдулар.

12. Ушаглар мәсиһчи ҝөрүшләриндән даһа чох фајданы неҹә әлдә едә биләрләр?

¹² Аиләнин руһани сағламлығы үчүн, мүнтәзәм олараг јығынҹаг ҝөрүшләринә дә ҝетмәк лазымдыр. Һәвари Павел һәмиманлыларыны дә’вәт едирди: “Бә’зиләринин адәт етдикләри кими өз јығынҹагларымызы тәрк етмәјәк”. Бу биздә дә адәтә чеврилмәсин, ахы мәсиһчи ҝөрүшләриндә мүнтәзәм иштирак етмәк һәм ҝәнҹләрә, һәм дә јашлылара бөјүк фајда ҝәтирир! (Ибраниләрә 10:24, 25; Тәснијә 31:12). Ушаглары диггәтлә гулаг асмаға өјрәтмәк лазымдыр. Ҝөрүшләрә һазырлашмаг да олдугҹа ваҹибдир, чүнки орада суаллара ҹаваб вериб иштирак етмәклә даһа чох фајда әлдә едирик. Балаҹа ушаг башланғыҹда бир-ики сөзлә вә ја абзасдан бир-ики ҹүмлә охумагла ҹаваб верә биләр, амма сиз ушаглара ҹаваблары мүстәгил олараг тапмаға вә онлары өз сөзләри илә сөјләмәјә өјрәтсәниз, даһа чох фајда әлдә едиләҹәк. Сиз валидејнләр, мүнтәзәм олараг мә’налы шәрһләр вермәклә өвладларыныза нүмунә ҝөстәрирсинизми? Бундан башга, јахшы олар ки, аиләнин һәр бир үзвүнүн Мүгәддәс Китабы, нәғмә китабы вә ҝөрүшләрдә мүзакирә олунан әдәбијјаты олсун.

13, 14. а) Валидејнләр нәјә ҝөрә хидмәтә ушаглары илә бәрабәр ҝетмәлидирләр? б) Тәблиғ хидмәти нәјин сајәсиндә ушаглар үчүн фајдалы вә севиндириҹи олаҹаг?

¹³ Мүдрик валидејнләр тәблиғ фәалијјәтинин ушагларынын һәјатында ваҹиб јер тутмасына көмәк етмәклә, онларын гүввәсини Јеговаја хидмәтә јөнәлдәрләр (Ибраниләрә 13:15). Ушагларын “утанмаға әсасы олмајан вә һәгигәт сөзүнү доғрулугла өјрәдән” хидмәтчиләр олмаларына лазым ҝәлән һазырлығы тә’мин етмәјин јеҝанә үсулу, онларла бәрабәр тәблиғә ҝетмәкдир (2 Тимотејә 2:15). Бәс бу мәсәләдә сизин һаггынызда нә демәк олар? Әҝәр ушагларыныз варса, тәблиғ хидмәтинә һазырлашмагда онлара көмәк едирсинизми? Бу ҹүр һазырлыг, хидмәти севинҹли, мә’налы вә сәмәрәли етмәкдә онлара көмәк едәҹәкдир.

¹⁴ Валидејнләрин ушаглары илә бирликдә хидмәтә ҝетмәләри нәјә ҝөрә фајдалыдыр? Белә олдугда ушаглар валидејнләринин јахшы нүмунәсини ҝөрәҹәк вә онлары тәглид едәҹәкләр. Валидејнләр исә, ушагларынын әһвал-руһијјәсини, неҹә даврандыгларыны вә габилијјәтләрини ҝөрәҹәкләр. Ушаглары өзүнүзлә хидмәтин мүхтәлиф нөвләринә апарын. Мүмкүндүрсә, һәр ушағын тәблиғ үчүн өз чантасы олсун вә онлары өјрәдин ки, чанталарыны сәлигәли вә тәмиз сахласынлар. Ардыҹыл верилән тә’лим вә едилән тәшвиг сајәсиндә, ушаглар тәблиғ хидмәтини Аллаһа вә гоншуларына мәһәббәт ҝөстәрмәк фүрсәти кими гијмәтләндирәҹәкләр (Матта 22:37—39; 28:19, 20).

Руһани сағламлығы горујун

15. Аиләнин руһани сағламлығыны горумаг кими ваҹиб тапшырығы јеринә јетирмәк үчүн һансы вәрдишләр көмәк едәр?

¹⁵ Аиләнин руһани сағламлығыны горумаг олдугҹа ваҹибдир (Мәзмур 119:93). Бунун үчүн, һәр дәфә фүрсәт дүшәндә аиләнизлә руһани мөвзулар барәдә данышмаг олар. Мүгәддәс Китабын ҝүндәлик ајәсини онларла мүзакирә едирсинизми? “Јолда јеријәрәк”, тәблиғ хидмәтиндә баш верән һадисәләри данышмаг вә ја “Ҝөзәтчи Гүлләси” вә “Ојанын!” журналларынын ахырынҹы нөмрәсиндәки фикирләри бөлүшмәјә адәт етмисинизми? Вердији чохсајлы бәхшишләр вә јашадығыныз һәр ҝүн үчүн “јатдығыныз вә галхдығыныз заман” дуада Јеговаја тәшәккүр етмәји унутмурсунуз ки? (Тәснијә 6:6—9). Ушаглар бүтүн ишләриниздә Аллаһа олан мәһәббәтинизи ҝөрүрләрсә, бу, һәгигәти анламагда онлара көмәк едәҹәкдир.

16. Ушаглары мүстәгил тәрздә арашдырмаларла мәшғул олмаға тәшвиг етмәк нә дәрәҹәдә фајдалыдыр?

¹⁶ Јаранан чәтинликләрин өһдәсиндән ҝәлмәк үчүн, ушаглар вахташыры рәһбәрлијә еһтијаҹ дујурлар. Һәр дәфә ушаглара неҹә давранаҹагларыны демәк әвәзинә, онлары мүәјјән мәсәләни мүстәгил олараг арашдырмаға вә Аллаһын нөгтеји-нәзәрини өјрәнмәјә тәшвиг етмәк даһа јахшы олмазмы? Ушаглары “садиг вә ағыллы гул” васитәсилә верилән нәшрләрдән вә вәсаитләрдән ҝениш сурәтдә истифадә етмәјә өјрәтмәклә, онлара, Јегова илә сых мүнасибәт инкишаф етдирмәкдә көмәк етмиш оларсыныз (1 Самуел 2:21б). Онлар, Мүгәддәс Китабын әсасында апардыглары ахтарышларын нәтиҹәсини аилә үзвләри илә бөлүшәндә исә, аиләнин руһани сағламлығы даһа чох мөһкәмләнир.

Јеговаја там сурәтдә ҝүвәнин

17. Ушагларыны мәсиһчи кими бөјүдән тәнһа валидејнләр нә үчүн руһдан дүшмәмәлидирләр?

¹⁷ Бәс ушагларына тәрбијә верән тәнһа валидејнләр аиләни руһән неҹә мөһкәм едә биләрләр? Ахы онлар ушагларын тәрбијәсиндә әлавә чәтинликләрлә дә гаршылашырлар. Ушаглары тәнһа бөјүтсәниз дә руһдан дүшмәјин! Аллаһа ҝүвәнән, Онун нәсиһәтләринә риајәт едән вә руһән ҝүҹлү, сағлам ушаглар бөјүдән чохсајлы тәнһа валидејнләрин тәҹрүбәси ҝөстәрир ки, наилијјәтә мүвәффәг олмаг мүмкүндүр (Сүлејманын мәсәлләри 22:6). Ушагларыны тәнһа тәрбијә едән мәсиһчиләр, шүбһәсиз ки, Јеговаја там сурәтдә ҝүвәнмәлидирләр. Онлар Јегованын көмәк едәҹәјинә иман етмәлидирләр (Мәзмур 121:1⁠—3).

18. Валидејнләр ушагларынын зеһни вә физики ҹәһәтдән һансы тәләбатларына диггәт јетирмәлидирләр, анҹаг үстүнлүјү нәјә вермәк лазымдыр?

¹⁸ Мүдрик валидејнләр анлајырлар ки, “ҝүлмәјин... вә ојнамағын вахты вар” (Ваиз 3:1, 4). Ушағын зеһни вә физики ҹәһәтдән инкишаф етмәси үчүн әјләнҹәләр вә таразлашдырылмыш, сәмәрә ҝәтирән истираһәт ваҹибдир. Инкишаф етдирән мусиги, хүсусән дә Аллаһа һәмд ҝәтирән нәғмәләри охумаг, ушағын һәјата сағлам нәзәр инкишаф етдирмәсинә көмәк едәр, бу исә, онун Јегова илә мүнасибәтиндә әһәмијјәтли рол ојнајыр (Колослулара 3:16). Ҝәнҹлик чағы, һәмчинин Аллаһдан горхан јеткин инсан олмаға һазырлыг дөврүдүр; јалныз белә инсан јер үзү ҹәннәтдә әбәдијјән давам едәҹәк һәјата наил ола биләр (Галатијалылара 6:8).

19. Валидејнләр нә үчүн әмин ола биләрләр ки, ушагларынын тәрбијәсинә чәкдикләри зәһмәтә Јегова хејир-дуа верәҹәкдир?

¹⁹ Јегова истәјир ки, бүтүн мәсиһчи аиләләри руһән мөһкәм олсунлар. Әҝәр биз Аллаһы севир вә Кәламына виҹданла табе олмаға чалышырыгса, О, зәһмәтимизи хејир-дуаландыраҹаг вә рәһбәрлијинә риајәт едә билмәмиз үчүн бизә гүввәт верәҹәкдир (Ишаја 48:17; Филипилиләрә 4:13). Унутмајын ки, ушагларыныза тәрбијә вә нәсиһәт вермәк фүрсәтиниз мәһдуддур вә белә фүрсәт бир даһа әлә дүшмәјәҹәк. Аллаһын Кәламына әсасланан нәсиһәтә баҹардығыныз гәдәр дәгиг риајәт етмәјә чалышын, Јегова да, аиләнизин руһән мөһкәм олмасы үчүн ҝөстәрдијиниз ҹәһдә хејир-дуа верәҹәкдир.

Биз нә өјрәндик?

• Ушаглары тәрбијә едәркән “вахты сатын” алмаг нә үчүн чох ваҹибдир?

• Валидејнләрин јахшы нүмунәси нәјә ҝөрә ваҹибдир?

• Ушагларын руһән бөјүмәләринә һансы үсулларла көмәк етмәк олар?

• Аиләнин руһани сағламлығыны неҹә горумаг олар?

[16 вә 17-ҹи сәһифәләрдәки шәкилләр]

Руһән мөһкәм олан аиләләр Аллаһын Кәламыны мүнтәзәм өјрәнир, мәсиһчи ҝөрүшләриндә иштирак едир вә хидмәтә бирликдә ҝедирләр.