Јеһова бизим сығынаҹаг јеримиздир

“Чүнки сән [дедин] ја Рәбб, сығынаҹаг јеримсән... шәр сәнә тохунмајаҹагдыр” (МӘЗМУР 91:9, 10).

1. Нәјә ҝөрә дејә биләрик ки, Јеһова бизә сығынаҹаг јеридир?

ЈЕҺОВА һәгигәтән дә өз халгы үчүн сығынаҹаг јеридир. Әҝәр Она там садиг галырыгса, һәтта “һәр тәрәфдән сыхышдырыл”саг белә “әзилмирик; чашгынлыг ичиндәјик, лакин чарәсиз дејилик; тә’гиб едилирик, амма тәрк едилмәмишик; јыхылырыг, амма јох едилмирик”. Нәјә ҝөрә? Она ҝөрә ки, Јеһова бизә “ән үстүн гүдрәт” верир (2 Коринфлиләрә 4:7-9). Бәли, сәмави Атамыз дүзҝүн јашамағымыза көмәк едир вә биз мәзмурчунун: “Чүнки сән [дедин] ја Рәбб, сығынаҹаг јеримсән! Уҹа Оланы өзүнә мәскән гылдын; шәр сәнә тохунмајаҹагдыр” сөзләрини үрәкдән гәбул едирик (Мәзмур 91:9, 10).

2. Мәзмурун 91-ҹи фәсли һаггында нә демәк олар вә орада нә вә’д олунур?

² Мәзмурун 91-ҹи фәслиндәки бу сөзләри, еһтимал ки, Муса јазмышдыр. 90-ҹы Мәзмурун биринҹи ајәсиндә һәмин Мәзмурун Муса тәрәфиндән јазылдығы гејд олунур. 91-ҹи Мәзмурун башланғыҹында исә онун ким тәрәфиндән јазылдығы барәдә һеч бир мә’лумат верилмир. Ола билсин ки, 91-ҹи Мәзмур антифон принсипинә ҝөрә охунурду, јә’ни бир адам охумаға башлајыр (91:1, 2), хор исә она ҹаваб верирди (91:3-8). Еһтимал ки, бундан сонра јенидән бир адам охујур (91:9а), хор исә она ҹаваб верирди (91:9б-13). Сонра бир нәфәр сон сөзләри охујурду (91:14-16). Һәр неҹә олса да, 91-ҹи Мәзмур бир синиф кими мәсһ едилмиш мәсиһчиләрә руһани тәһлүкәсизлији вә’д едир вә бир груп кими онларын садиг һәмкарларына да буна бәнзәр тә’минат верирa. Ҝәлин, бу Мәзмуру Јеһованын бүтүн хидмәтчиләринин нөгтеји-нәзәриндән мүзакирә едәк.

“Уҹа Оланын өртүјүндә” мөвҹуд олан тәһлүкәсизлик

3. а) “Уҹа Оланын өртүјү” ифадәси алтында нә нәзәрдә тутулур? б) “Гадирин көлҝәсиндә сакин” олараг биз һансы фајданы әлдә едирик?

³ Мәзмурчу охујур: “Уҹа Оланын өртүјүндә отуран, Гадирин көлҝәсиндә сакин олар. Рәбб үчүн дејәрәм: Сығынаҹаг јерим вә галамдыр; Аллаһымдыр, она ҝүвәнәрәм” (Мәзмур 91:1, 2). “Уҹа Оланын өртүјү” - һәм бизим үчүн, һәм дә Иблисин хүсуси һәдәф мәнбәји олан мәсһ едилмишләр үчүн символик сығынаҹаг јеридир (Вәһј 12:15-17). Әҝәр Аллаһын руһани мәскәниндә малик олдуғумуз мүдафиә олмасајды, Иблис һәр биримизи мәһв едәрди. “Гадирин көлҝәсиндә сакин” олараг, санки онун көлҝәси илә өртүлүрүк (Мәзмур 15:1, 2; 121:5). Уҹа олан Рәббимиз Јеһовадан савајы даһа тәһлүкәсиз сығынаҹаг јеримиз вә ја алынмаз галамыз јохдур (Сүлејманын мәсәлләри 18:10).

4. “Овчу”, јә’ни Шејтан нәдән истифадә едир вә биз ондан неҹә гуртулуруг?

⁴ Мәзмурчу һәмчинин дејир: “О [Јеһова] сәни овчунун тәләсиндән, һәлак едән вәбадан азад едәр” (Мәзмур 91:3). Гәдим Исраилдә гушлары адәтән торун вә ја тәләнин көмәји илә тутурдулар. “Овчунун”, јә’ни Шејтанын еһтијатында исә онун гәзәбли тәшкилаты вә мүхтәлиф “һијләләри” дурур (Ефеслиләрә 6:11). Бизи бу дүнјанын ганунсузлуғуна ҹәлб етмәк вә руһанилијимизи тәләф етмәк үчүн јолумуза ҝизли торлар гојулур (Мәзмур 142:3). Лакин әдаләтсизлији рәдд етдијимиз үчүн, “ҹанымыз овчуларын тәләсиндән бир гуш кими” гуртулур (Мәзмур 124:7, 8). Бизи һијләҝәр “овчудан” гуртардығы үчүн Јеһоваја неҹә дә миннәтдарыг! (Матта 6:13).

5, 6. “Һәлак” ҝәтирән “вәба” һансыдыр, амма нәјә ҝөрә Јеһованын хидмәтчиләри она гаршы дура билирләр?

⁵ Мәзмурчу бурада “һәлак едән вәбаны” хатырладыр. Јолухуҹу хәстәлијә бәнзәр бир шеј, үмумијјәтлә бәшәријјәтә, о ҹүмләдән Јеһованын һөкмранлығынын тәрәфдарларына “һәлак” ҝәтирир. Тарихчи Арнолд Тојнби бу һагда јазырды: “Икинҹи Дүнја мүһарибәсиндән сонра милләтчилик уҹбатындан мүстәгил суверен дөвләтләрин сајы икигат артды... Һал-һазырда бәшәријјәт ајрылыға даһа чох ҹан атыр”.

⁶ Әсрләр боју бә’зи һөкмдарлар милләтләрарасы дүшмәнчилик аловуну гызышдырырдылар. Онлар һәмчинин өзләринә вә ја мүхтәлиф сурәт вә символлара ситајиш тәләб едирдиләр. Лакин Јеһова өз садиг хидмәтчиләрини һеч заман бу ҹүр “вәба” гаршысында јалныз гојмурду (Даниел 3:1, 2, 20-27; 6:7-10, 16-22). Биз мәһәббәтли үмумдүнја гардашлығы кими, Мүгәддәс Китабын тәләбинә әсасән Јеһоваја һәдсиз сәдагәт әкс етдирир, битәрәфлији горујур вә инсанларын кимсәлијинә бахмадан е’тираф едирик ки, “һәр халгдан олуб, Ондан [Аллаһдан] горхан вә һагг иш ҝөрән Она мәгбулдур” (Һәвариләрин ишләри 10:34, 35; Чыхыш 20:4-6; Јәһја 13:34, 35; 17:16; 1 Петер 5:8, 9). “Һәлакдан”, даһа доғрусу мәсиһчи олдуғумуз үчүн бизә гаршы едилән тә’гибдән изтираб чәксәк дә, севинир вә “Уҹа Оланын өртүјүндә” өзүмүзү руһән тәһлүкәсиз һисс едирик.

7. Јеһова бизи өз “ганадлары илә” неҹә горујур?

⁷ Јеһова бизим сығынаҹаг јеримиздир вә биз: “Сәни ганадлары илә өртәр вә ҹинаһлары алтына сығынарсан; һәгигәти галхан вә сипәрдир”, сөзләриндән тәсәлли алырыг (Мәзмур 91:4). Аллаһ бизи, балалары үзәриндә сүзәрәк онлары мүдафиә едән гуш кими горујур (Ишаја 31:5). О бизи “ганадлары илә өртәр”. Гуш балаларыны ганадлары илә өртәрәк онлары јыртыҹы һејванлардан горујур. Биз, тәшбеһләрлә десәк, гуш балалары кими Јеһованын ганадлары алтында тәһлүкәсизликдәјик, чүнки мәсиһчиләрин тәшкилатында сығынаҹаг тапмышыг (Рут 2:12; Мәзмур 5:1, 11).

8. Јеһованын “һәгигәти” һансы мә’нада галхан вә сипәр кимидир?

⁸ Биз Јеһованын “һәгигәти”нә, јә’ни сәдагәтинә ҝүвәнирик. Онун “һәгигәти”, формасына ҝөрә гапыны хатырладан вә дөјүшчүнү бүтүнлүклә өртән гәдим дөврүн галханына бәнзәјир (Мәзмур 5:12). Белә мүдафиәјә әминлик бизи горхудан азад едир (Тәквин 15:1; Мәзмур 84:11). Иманымыз кими, Јеһованын “һәгигәти” бизи Шејтанын гызмар охларындан вә дүшмәнләримизин зәрбәләриндән горујан галхандыр (Ефеслиләрә 6:16). О һәмчинин сарсылмаз галмағымыза имкан јарадан “сипәр”, јә’ни бөјүк горујуҹу бина кимидир.

Горхмуруг

9. Ҝеҹә нә үчүн горху һисси јарада биләр, амма нәјә ҝөрә биз бундан горхмуруг?

⁹ Аллаһын мүдафиәсини нәзәрә алараг мәзмурчу дејир: “Нә ҝеҹәнин дәһшәтиндән, нә ҝүндүз учан охдан; нә гаранлыгда ҝәзән вәбадан, нә дә ҝүнорта битирән гырғындан горхарсан” (Мәзмур 91:5, 6). Адәтән писликләр гаранлыг заманы баш вердији үчүн, ҝеҹә биздә горху һисси јарада биләр. Инди јери руһани гаранлыг өртдүјүнә ҝөрә дүшмәнләр бизим руһанилијимизи позмаг вә тәблиғ ишини дајандырмаға чалышараг, адәтән ҝизли вә мәкрли сурәтдә фәалијјәт ҝөстәрирләр. Лакин биз “ҝеҹәнин дәһшәтиндән” горхмуруг, чүнки бизи Јеһова мүдафиә едир (Мәзмур 64:1, 2; 121:4; Ишаја 60:2).

10. а) Ҝөрүндүјү кими, “ҝүндүз учан ох” нәји нәзәрдә тутур вә биз буна неҹә мүнасибәт ҝөстәририк? б) “Гаранлыгда ҝәзән вәба” нәдир вә биз нә үчүн ондан горхмуруг?

¹⁰ Ҝөрүнүр ки, “ҝүндүз учан ох” сөзлә едилән һүҹумлары нәзәрдә тутур (Мәзмур 64:3-5; 94:20). Һәмишә инсанлара һәгигәти чатдырмаг истәјимиз олдуғуна ҝөрә, мүгәддәс хидмәтимизә олан белә ачыг мүгавимәт һеч бир нәтиҹә вермир. Бундан әлавә, “гаранлыгда ҝәзән вәбадан” да горхмуруг. Бу символик “вәба”, Шејтанын һакимијјәти алтында олан дини вә әхлаги ҹәһәтдән хәстә дүнјанын гаранлығында јараныр (1 Јәһја 5:19). “Вәба”, инсанларын ағлында вә үрәјиндә сон дәрәҹәдә тәһлүкәли вәзијјәт јарадараг, онлары Јеһова, Онун нијјәтләри вә мәһәббәтдән ирәли ҝәләрәк вердији һәдијјәләри һаггында гаранлыгда гојур (1 Тимотејә 6:4). Әтрафымызда гаранлыг һөкм сүрсә дә, биз парлаг руһани ишыгда јашадығымыз үчүн горху һисси кечирмирик (Мәзмур 43:3).

11. “Ҝүнорта битирән гырғын”ын гурбаны оланларла нә баш верир?

¹¹ “Ҝүнорта битирән гырғын” да бизи горхутмур. “Ҝүнорта”, еһтимал ки, бу дүнјанын маарифләндирмә ишини нәзәрдә тутур. Дүнја илә бирликдә мадди дәјәрләрә ҹан атанлар руһән өлүрләр (1 Тимотејә 6:20, 21). Биз, Падшаһлыг һаггында мүждәни ҹәсарәтлә е’лан едәрәк һеч бир дүшмән гаршысында горху һисси кечирмирик, чүнки мүдафиәмиз Јеһовадыр (Мәзмур 64:1; Сүлејманын мәсәлләри 3:25, 26).

12. Кимин јанында вә һансы мә’нада минләрлә дүшүрләр?

¹² Мәзмурчу давам едир: “Јанында мин вә сағында он мин дүшәр; фәгәт сәнә јахынлашмаз. Анҹаг сән ҝөзләринлә бахарсан вә писләрин ҹәзасыны ҝөрәрсән” (Мәзмур 91:7, 8). Чохлары елә јанымызда руһән өләрәк дүшүрләр, она ҝөрә ки, онлар сығынаҹаг јери кими Јеһованы сечмәмишләр. Бу ҝүнкү руһани исраиллиләрин “сағында” санки “он мин”ләрлә инсанлар дүшүр (Галатијалылара 6:16). Лакин биз - неҹә ки, мәсһ едилмиш мәсиһчиләр, еләҹә дә онларын садиг һәмкарлары - мөһкәм олараг Аллаһын “өртүјү” алтында мүдафиә олунмушуг. Биз тиҹарәт, дин вә диҝәр саһәләрдә мүсибәтә дүчар оланлара, анҹаг бахыр вә писләрин ҹәзасыны ҝөрүрүк (Галатијалылара 6:7).

Шәр бизә тохунмајаҹагдыр

13. Һансы бәдбәхтликләрә дүчар олмуруг вә нәјә ҝөрә?

¹³ Бу дүнјада тәһлүкәсизлик тапмаг ҝет-ҝедә чәтинләшир дејә, биз илк нөвбәдә Аллаһ үчүн јашајыр вә мәзмурчунун сөзләриндән ҹәсарәт әлдә едирик. О дејир: “Чүнки сән [дедин], ја Рәбб, сығынаҹаг јеримсән! Уҹа Оланы өзүнә мәскән гылдын; шәр сәнә тохунмајаҹагдыр, чадырына вәба да јахынлашмајаҹагдыр” (Мәзмур 91:9, 10). Бәли, Јеһова бизим сығынаҹаг јеримиздир. Бундан савајы, Уҹа Олан тәһлүкәсизлик тапдығымыз “мәскән”имиздир. Биз, Јеһоваја Каинатын Һөкмдары кими иззәт ҝәтирир, Мәскәнимиз кими Она сығыныр вә Падшаһлығы һаггындакы хош хәбәри е’лан едирик (Матта 24:14). Буна ҝөрә дә, “шәр” бизә тохунмајаҹагдыр, јә’ни Мәзмурда һаггында әввәлҹәдән јазылан шәрләрин һеч бири бизә тохунмајаҹаг. Зәлзәлә, туфан, дашгын, аҹлыг вә мәһведиҹи мүһарибәләр кими “шәр”ләр башгалары илә баш ведији кими бизимлә дә баш версә дә, бу иманымызы вә руһани тәһлүкәсизлијимизи мәһв едә билмәјәҹәкдир.

14. Биз, Јеһованын хидмәтчиләри, нә үчүн өлдүрүҹү вәбалара тутулмамышыг?

¹⁴ Мәсһ едилмиш мәсиһчиләр пис системдән ајрылараг, чадырларда мүвәггәти јашајан сакинләрә бәнзәјирләр (1 Петер 2:11). Онларын “чадырына вәба да” јахынлашмыр. Ҝөјләр вә ја јер үмидимиз олмасындан асылы олмајараг, биз бу дүнјадан дејилик; әхлагсызлыг, вар-дөвләт далынҹа дүшмәк, јалан дин вә “ҹанавар”а, онун сурәтинә, јә’ни Бирләшмиш Милләтләр Тәшкилатына ибадәт кими руһән өлдүрүҹү вәбалара дүчар дејилик (Вәһј 9:20, 21; 13:1-18; Јәһја 17:16).

15. Мәләкләр бизә нәдә көмәк едирләр?

¹⁵ Бизим мүдафиәмиз һаггында мәзмурчу әлавә едир: “Чүнки бүтүн јолларында сәни тутсунлар дејә, мәләкләринә сәнин үчүн әмр едәҹәкдир. Ајағыны бир даша чарпмајасан дејә, әлләри үзәриндә сәни дашыјаҹаглар” (Мәзмур 91:11, 12). Бизи мүдафиә етмәк үчүн мәләкләрә һакимијјәт верилиб (2 Краллар 6:17; Мәзмур 34:7-9; 104:4; Матта 26:53; Лука 1:19). Онлар бизи “бүтүн” јолларымызда горујурлар (Матта 18:10). Мәләкләр, Падшаһлығын мүждәчиләри олан бизләрә рәһбәрлик едир вә бизи мүһафизә едирләр. Буна ҝөрә дә руһани мә’нада ајағымызы даша чарпмырыг, јә’ни бүдрәмирик (Вәһј 14:6, 7). Һәтта фәалијјәтимизин гадаған олунмасы кими “даш”лар да, бизи бүдрәтмир вә буна ҝөрә дә Аллаһын мәрһәмәтини итирмирик.

16. “Ҝәнҹ аслан”ла “кобра”нын һүҹуму нә илә фәргләнир вә биз онлара неҹә мүнасибәт ҝөстәририк?

¹⁶ Мәзмурчу давам едир: “Аслан вә ҝүрзә [“кобра”, ЈД] үзәриндән басыб кечәҹәксән; ҝәнҹ асланы вә ири иланы чејнәјәҹәксән” (Мәзмур 91:13). Ҝәнҹ аслан ҝизләнмәдән гаршыдан һүҹум етдији кими, бизим дә бә’зи дүшмәнләримиз, фәалијјәтимизи дајандырмаг мәгсәди илә ганунлар тәртиб едир вә бизә гаршы олан әдавәтләрини ачыг ҝөстәрирләр. Лакин пусгуда дуруб ҝөзләнилмәдән овунун үзәринә атылан кобранын һүҹумуна бәнзәр башга һүҹумлара да мә’руз галырыг. Пәрдә архасында ҝизләнән руһаниләр синифи ганунвериҹиләрин, һакимләрин вә диҝәр вәзифәли шәхсләрин васитәсилә фәалијјәт ҝөстәрәрәк бизә һүҹум едирләр. Лакин Јеһованын мүдафиәси алтында биз “Мүждәни мүдафиә вә тәсдиг” етмәјә чалышараг, сүлһ јолу илә мәһкәмәләрдә гануни көмәк ахтарырыг (Филипилиләрә 1:7; Мәзмур 94:14, 20-22).

17. Биз һансы мә’нада “ҝәнҹ асланы” чејнәјирик?

¹⁷ Мәзмурчу “ҝәнҹ асланын” вә “ири иланын” чејнәнмәси һаггында данышыр. Ҝәнҹ аслан олдугҹа азғын, ири илан исә бөјүк өлчүдә олур (Ишаја 31:4). Лакин бу аслан нә гәдәр азғын олса да, бизә гаршыдан һүҹум едән заман, биз аслана бәнзәр инсанлара вә тәшкилатлара дејил, Аллаһа табе олараг, тәшбеһләрлә десәк, ону чејнәјирик (Һәвариләрин ишләри 5:29). Она ҝөрә дә азғын “аслан” бизә һеч бир руһани зәрәр ҝәтирмир.

18. “Ири илан” бизә нәји хатырладыр вә әҝәр һүҹумлара мә’руз галырыгса нә етмәлијик?

¹⁸ Јунан Септуагинтасында “ири илан”, “әждаһа” адланыр. Бу бизә “иблис вә шејтан адланан бөјүк әждаһа... гәдим илан”ы хатырладыр (Вәһј 12:7-9; Тәквин 3:15). О өз овуну боғуб удан, сүрүнән һејвана бәнзәјир (Јеремја 51:34). Шејтан бизи әһатә етмәјә чалышанда, бу дүнјанын васитәсилә бизи боғуб, удмаг истәјәндә, ҝәлин ондан азад олаг вә бу “ири иланы” чејнәјәк (1 Петер 5:8). Ромалылара 16:20 ајәсинин иҹрасында иштирак етмәк истәјән мәсһ едилмишләрин галығы белә давранмалыдыр.

Хиласымыз Јеһовадандыр

19. Биз нәјә ҝөрә Јеһовада сығынаҹаг тапырыг?

¹⁹ Мәзмурчунун сөзләринә ҝөрә, Аллаһ, Она дүзҝүн вә үрәкдән ситајиш едән адам һаггында дејир: “Мәнә мәһәббәт бағладығы үчүн, ону азад едәҹәјәм. Ону јүксәлдәҹәјәм, чүнки исмими таныды” (Мәзмур 91:14). “Ону јүксәлдәҹәјәм” кими һәрфи тәрҹүмә олунмуш ифадә, мүасир тәрҹүмәдә “ону горујаҹағам” кими верилир. Биз, Јеһованын хидмәтчиләри онда мәскән тапырыг, бунун башлыҹа сәбәби исә ондадыр ки, биз Она “мәһәббәт бағламышыг” (Марк 12:29, 30; 1 Јәһја 4:19). Аллаһ да өз нөвбәсиндә бизи дүшмәнләримиздән “азад” едир. Биз һеч заман мәһв олмајаҹағыг. Әксинә, биз хилас олаҹағыг, она ҝөрә ки, Аллаһын адыны билир вә ону инамла чағырырыг (Ромалылара 10:11-13). Биз “әбәдијјән Аллаһымыз Рәббин исмилә” јеримәјә там гәтијјәтлијик (Мика 4:5; Ишаја 43:10-12).

20. Мәзмурун 91-ҹи фәслинин сонунда Јеһова өз садиг хидмәтчисинә нәји вә’д едир?

²⁰ Мәзмурун 91-ҹи фәслинин сонунда Јеһова өз садиг хидмәтчиси һаггында дејир: “Мәни чағыраҹаг вә она ҹаваб верәҹәјәм; сыхынтыда онунла бәрабәр олаҹағам; азад едиб она иззәт верәҹәјәм. Узун өмүрлә ону дојураҹағам вә гуртарышымы она ҝөстәрәҹәјәм” (Мәзмур 91:15, 16). Биз, Аллаһа мүраҹиәт едиб, Онун ирадәсинә ујғун дуа едириксә, О, бизи ешидир (1 Јәһја 5:13-15). Шејтанын аловландырдығы әдавәт уҹбатындан, биз артыг бир чох мүсибәт вә бәдбәхтликләрлә үзләшмишик. Лакин “сыхынтыда онунла бәрабәр олаҹағам” сөзләри бизи ҝәләҹәк сынаглара һазырлајыр вә бу пис системин мәһви заманы Аллаһын бизи мүдафиә едәҹәјинә зәманәт верир.

21. Мәсиһчиләр һансы мә’нада артыг иззәтләнмишләр?

²¹ Шејтанын кәскин мүгавимәтинә бахмајараг, арамызда олан мәсһ едилмишләрин һамысы јер үзәриндә “узун өмүрлүлүк”дән дојдугдан сонра Јеһованын мүәјјән етдији вахтда ҝөјләрдә иззәтләнәҹәкләр. Бизим ҝүнләрдә мәсһ едилмиш мәсиһчиләрин, Аллаһ тәрәфиндән дәфәләрлә мө’ҹүзәви сурәтдә хилас едилмәси, онлара артыг индидән иззәт ҝәтирмишдир. Бу сон ҝүнләрдә Јеһованын Шаһидләри арасында рәһбәрлији өз үзәринә ҝөтүрмәк онлар үчүн неҹә дә бөјүк шәрәфдир! (Ишаја 43:10-12). Аллаһ Һөкмранлығыны сүбута јетириб адыны мүгәддәс тутан заман, бөјүк мүһарибә Һар-Меҝидонда өз халгынын хиласыны иҹра едәҹәкдир (Мәзмур 83:18; Һезекиел 38:23; Вәһј 16:14, 16).

22. Јеһованын гуртарышыны кимләр ҝөрәҹәк?

²² Мәсһ едилмишләр вә ја онларын Аллаһа һәср олунмуш һәмкарлары олмағымыздан асылы олмајараг, биз хиласы Аллаһда ахтарырыг. “Рәббин бөјүк вә горхунҹ ҝүнү”ндә Аллаһа һәдсиз сәдагәтлә хидмәт едән кәсләр хилас олаҹагдыр (Јоел 2:30-32). Һар-Меҝидондан сағ чыхыб, Аллаһын јени дүнјасына дахил олан “бөјүк издиһамы” тәшкил едән вә сонунҹу сынаг заманы садиг галан бизләр “узун өмүрлүлүк”дән, јә’ни сонсуз һәјатдан ләззәт алаҹағыг. Бундан савајы, Аллаһ һәм дә күлли мигдарда инсанлары дирилдәҹәк (Вәһј 7:9; 20:7-15). Јеһова, Иса Мәсиһин васитәсилә гуртарышыны бизә ҝөстәрмәкдән бөјүк севинҹ дујаҹаг (Мәзмур 3:8). Әҝәр гаршымызда белә ҝөзәл бир ҝәләҹәк дурурса, ҝәлин ҝүнләримизин Аллаһа шәрәф ҝәтирмәси үчүн Онун көмәјинә ҝүвәнмәјә давам едәк. Ҝәлин, сөзләримиз вә давранышымызла Јеһованын бизим сығынаҹаг јеримиз олдуғуну сүбут етмәкдә давам едәк.

[Һашијә]

Сиз неҹә ҹаваб верәрдиниз?

• “Уҹа Оланын өртүјү” нәдир?

• Биз нә үчүн горхмуруг?

• Һансы мә’нада “шәр” бизә тохунмајаҹагдыр?

• Нәјә ҝөрә демәк олар ки, хиласымыз Јеһовадандыр?

[26-ҹы сәһифәдәки шәкилләр]

Ҝөзләнилмәз һүҹумлара вә ачыг мүгавимәтләрә бахмајараг, мүгәддәс хидмәти јеринә јетирмәләри үчүн Јеһова халгына көмәк едир.

[Иҹазә илә]

Cobra: A. N. Jagannatha Rao, Trustee, Madras Snake Park Trust

[29-ҹу сәһифәдәки шәкил]

Јеһованын һәгигәтинин бизим үчүн неҹә бөјүк бир галхан олдуғуну билирсинизми?