Јеһоваја мәхсус олмаг лүтфдүр
«Һәмишә Рәббиник» (РОМ. 14:8).
1, 2. а) Бизә һансы шәрәф верилиб? б) Һансы суаллары нәзәрдән кечирәҹәјик?
ЈЕҺОВА Исраил халгына «сиз бүтүн халглар арасындан Мәнә мәхсус халг олаҹагсыныз» демәклә онлары неҹә дә бөјүк шәрәфә лајиг ҝөрмүшдү (Чых. 19:5). Мүасир мәсиһчи јығынҹағынын үзвләри дә Јеһоваја мәхсус олмаг шәрәфинә маликдирләр (1 Пет. 2:9; Вәһј 7:9, 14, 15). Вә бу, бизә әбәдијјән фајда ҝәтирәҹәк.
2 Јеһоваја мәхсус олмаг шәрәф олмагла јанашы, һәм дә мәсулијјәтдир. Бәзиләри дејә биләрләр: «Ҝөрәсән, Јеһованын мәндән ҝөзләдикләрини јеринә јетирә биләрәмми? Бирдән ҝүнаһ ишләтсәм, О, мәни рәдд етмәзми? Јеһоваја мәхсус олмаг азадлығымы әлимдән алмајаҹаг ки?» Бу суаллары нәзәрдән кечирмәјә дәјәр. Лакин илк нөвбәдә, башга бир суал ҹаваб тәләб едир: Јеһоваја мәхсус олмағын һансы фајдасы вар?
Јеһова мәхсус олмаг хошбәхтлијә јол ачыр
3. Рахавын Јеһоваја хидмәт етмәк гәрары она һансы фајданы ҝәтирди?
3 Јеһоваја мәхсус олмағын һансы фајдасы вар? Ҝәлин гәдим Јерихо шәһәриндә јашамыш фаһишә Рахавын нүмунәсинә бахаг. Ону ушаглыгдан ијрәнҹ Кәнан аллаһларына ибадәт етмәјә өјрәтмишдиләр. Лакин о, Јеһованын Исраил халгына бәхш етдији гәләбәләр һаггында ешидәндә Јеһованын һәгиги Аллаһ олдуғуну анламышды. Рахав Аллаһын сечилмиш халгыны горумаг үчүн һәјатыны тәһлүкә алтына атараг ҝәләҹәјини онлара етибар етмишди. Мүгәддәс Китабда дејилир: «Мәҝәр фаһишә Раһав [Рахав] да ејни ҹүр өз әмәлләринә ҝөрә салеһ сајылмадымы? О, кәшфијјатчылары гәбул етди вә башга јол илә ҝери ҝөндәрди» (Јаг. 2:25). Рахав Аллаһын пак халгынын — Онун Ганунуна, мәһәббәтли вә әдаләтли јолларына өјрәдилмиш бир халгын үзвү оланда алдығы хејир-дуалары бир тәсәввүр един! Чох ҝүман ки, әввәлки һәјатындан јаха гуртаранда о, чох хошбәхт олду. Рахав бир исраилли илә аилә гурду вә Аллаһын хидмәтчиси кими танынан Боаз адлы бир оғул дүнјаја ҝәтирди (Јешуа 6:25; Рут 2:4—12; Мат. 1:5, 6).
4. Јеһоваја хидмәт етмәк гәрары Рута һансы фајданы ҝәтирди?
4 Моавлы Рут да Јеһоваја хидмәт етмәји сечмишди. Ҝөрүнүр, ушаглыгда о, Кемош вә диҝәр Моав аллаһларына ибадәт едирди. Анҹаг Рут һәгиги Аллаһ Јеһованы таныды вә онларын өлкәсиндә далдаланан бир исраилли илә аилә гурду. (Рут 1:1—6 ајәләрини оху.) Мүәјјән вахтдан сонра Рут вә гајны арвады Орпа гајынаналары Наоми илә Бет-Лехемә јола дүшдүләр. Јары јолда Наоми ҝәлинләрини евләринә гајытмалары үчүн дилә тутду. Чүнки Исраилдә јашамаг онлара һеч дә асан олмајаҹагды. Орпа «өз халгынын вә аллаһларынын јанына гајытды», Рут исә јох. О, иманла һәрәкәт едир вә кимә мәхсус олмаг истәдијини јахшы билирди. Рут Наомијә деди: «Мәҹбур етмә ки, сәни тәрк едиб сәнинлә ҝетмәјим. Бил ки, һара ҝетсән, ора ҝедәҹәјәм, һарада галсан, орада галаҹағам; халгын халгым олаҹаг, Аллаһын Аллаһым» (Рут 1:15, 16). Рут Јеһоваја хидмәти сечдији үчүн Ганунда дул гадынлар, касыблар вә торпаг саһәләри олмајанлар үчүн нәзәрдә тутулан имтијазлардан фајдаланды. Јеһованын ганадлары алтында о, хошбәхтлик, тәһлүкәсизлик вә сығынаҹаг тапды.
5. Јеһоваја сәдагәтлә хидмәт едәнләр һагда нә демәк олар?
5 Јәгин ки, сән өзләрини Јеһоваја һәср едиб онилликләрлә Она сәдагәтлә хидмәт едән баҹы-гардашлары таныјырсан. Нәјә ҝөрә Јеһоваја хидмәт етмәјин онлара һансы фајданы ҝәтирдијини сорушмајасан? Гајғысыз инсан јохдур, амма мәзмурчунун сөзләри данылмаздыр: «Нә бәхтијардыр Аллаһы Рәбб олан халг!» (Мәз. 144:15).
Јеһованын тәләбләри ағыр дејил
6. Нәјә ҝөрә Јеһованын тәләбләринә риајәт едиб-едә билмәјәҹәјимиз һагда һәддән артыг нараһат олмамалыјыг?
6 Јәгин, Јеһованын тәләбләринә риајәт едиб-едә билмәјәҹәјин фикри сәни раһат бурахмыр. Јеһованын хидмәтчиси олараг Онун ганунларына ујғун јашамалы вә Онун һаггында башгаларына данышмалы олдуғун үчүн өзүнү нараһат һисс едә биләрсән. Мәсәлән, Јеһова Мусаны исраиллиләрлә вә фиронла данышмаға ҝөндәрәндә о, бу ишин өһдәсиндән ҝәлә билмәјәҹәјини дүшүнүрдү. Лакин Аллаһ Мусадан онун ҝүҹүндән артыг бир шеј тәләб етмирди. Јеһова она ‘нә етмәји өјрәтмишди’. (Чыхыш 3:11; 4:1, 10, 13—15 ајәләрини оху.) Муса Аллаһын көмәјини гәбул етдији үчүн Онун ирадәсини јеринә јетирмәкдән севинҹ дујурду. Ејнилә, Јеһова биздән дә ҝүҹүмүздән артыг һеч нә тәләб етмир. О, гејри-камил олдуғумузу баша дүшүр вә бизә көмәк етмәк истәјир (Мәз. 103:14). Исанын давамчысы кими Аллаһа хидмәт етмәк јүк дејил, әксинә, бизи тәравәтләндирир, чүнки бу һәјат јолу башгаларына фајда ҝәтирир вә Јеһованын үрәјини севиндирир. Иса демишдир: «Мәним јаныма ҝәлин вә Мән сизә раһатлыг верәрәм. Бојундуруғуму үзәринизә ҝөтүрүн вә Мәндән өјрәнин; чүнки Мән һәлим вә гәлбдән тәвазөкарам» (Мат. 11:28, 29).
7. Нәјә ҝөрә әмин ола биләрик ки, Јеһова бизә Онун тәләбләрини јеринә јетирмәјә көмәк едәҹәк?
7 Һәмишә Јеһованын ҝүҹүнә архалансаг, О, еһтијаҹ дујдуғумуз көмәји биздән һеч вахт әсирҝәмәјәҹәк. Мисал үчүн Јеремјанын нүмунәсинә бахаг. Ҝөрүнүр, о, ҹәсарәтлә данышмағы баҹармырды. Буна ҝөрә дә Јеһова ону пејғәмбәр тәјин едәндә о: «Аһ, ја Худавәнд Рәбб! Ахы мәним данышыг габилијјәтим јохдур, чүнки һәлә ҹаванам»,— дејә етираз етди. Бир гәдәр сонра исә о һәтта деди: «Даһа... Онун ады илә данышмајаҹағам» (Јер. 1:6; 20:9). Буна бахмајараг, Јеһованын көмәји илә Јеремја инсанларын ешитмәк истәмәдији хәбәри 40 ил әрзиндә тәблиғ етди. Јеһова ону дәфәләрлә: «Мән сәнинлә олаҹағам ки, Сәни гуртарыб азад едим»,— дејәрәк үрәк-дирәк верирди (Јер. 1:8, 19; 15:20).
8. Јеһоваја етибар етдијимизи неҹә ҝөстәрә биләрик?
8 Јеһова Муса илә Јеремјаны мөһкәмләндирдији кими, бизә дә мәсиһчиләрин гаршысына гојдуғу тәләбләрә ујғун јашамаға көмәк едә биләр. Ән әсасы Аллаһа бел бағламагдыр. Мүгәддәс Китабда дејилир: «Бүтүн гәлбинлә Рәббә ҝүвән, өз идракына етибар етмә. Бүтүн јолларында Ону таны, О сәнин јолларыны дүзәлдәр» (Сүл. мәс. 3:5, 6). Јеһованын Өз Кәламы вә јығынҹағы васитәсилә тәгдим етдији көмәкдән јарарлананда Она етибар етдијимизи ҝөстәририк. Әҝәр өмүр боју Јеһованын аддымларымызы јөнәлтмәсинә јол версәк, Она садиг галмагдан бизи һеч нә чәкиндирә билмәјәҹәк.
Јеһова һәр бир хидмәтчисинин гајғысына галыр
9, 10. Мәзмур 91-дә һансы мүдафиә вәд олунур?
9 Өзләрини Јеһоваја һәср едиб-етмәмәјин үзәриндә дүшүнәркән бәзиләринин ағлына белә фикирләр ҝәлә биләр ки, онлар нә вахтса ҝүнаһ ишләдәрәк Она хидмәт етмәк шәрәфиндән мәһрум олаҹаг вә рәдд едиләҹәкләр. Хошбәхтликдән, Јеһова Онунла дәјәрли мүнасибәтләримизи горумағымыз үчүн бизи лазыми мүдафиә илә тәмин едир. Ҝәлин бунун 91-ҹи мәзмурда неҹә ифадә олундуғуну нәзәрдән кечирәк.
10 Һәмин мәзмур белә сөзләрлә башлајыр: «Һагг-Тааланын пәнаһында јашајан, Күлли-Ихтијарын көлҝәсиндә отуран инсан Рәбб һаггында белә сөјләјир: “О мәним сығынаҹағымдыр, галамдыр, Аллаһымдыр, Она ҝүвәнирәм”. Бил ки, О сәни овчунун тәләсиндән... гуртарар» (Мәз. 91:1—3). Фикир верин ки, Аллаһ Ону севәнләри вә Она бел бағлајанлары мүдафиә етмәји вәд едир. (Мәзмур 91:9, 14 ајәләрини оху.) Сөһбәт һансы мүдафиәдән ҝедир? Дүздүр, гәдимдә Јеһова бәзи хидмәтчиләрини физики тәһлүкәләрдән мүһафизә етмишдир вә бәзи һалларда Онун мәгсәди вәд олунмуш Мәсиһин нәсил шәҹәрәсини горујуб сахламаг иди. Лакин Аллаһын бир чох садиг хидмәтчиләрини Ондан дөндәрмәк үчүн һәбсә атыр, әзаблара мәруз гојур вә вәһшиҹәсинә өлдүрүрдүләр (Ибр. 11:34—39). Онлар бүтүн бунлара таб ҝәтирмәк үчүн лазыми ҹәсарәт тапырдылар, чүнки Јеһова онлара нөгсансызлыгларыны сындыра биләҹәк тәһлүкәләрдән руһани мүдафиә тәгдим едирди. Буна ҝөрә дә, белә бир гәнаәтә ҝәлмәк олар ки, 91-ҹи мәзмурда бизә руһани мүдафиә вәд олунур.
11. ‘Һагг-Тааланын пәнаһы’ һансы јердир вә орада Аллаһ кимләри һифз едир?
11 Мәзмурчунун хатырлатдығы ‘Һагг-Тааланын пәнаһы’ руһани ҹәһәтдән тәһлүкәсиз бир јердир. Орада Аллаһын јанында сығынаҹаг тапанлар Аллаһа иманларыны вә мәһәббәтләрини тәһлүкә алтына алан һәр кәсдән вә һәр шејдән мүдафиә олунурлар (Мәз. 15:1, 2; 121:5). Имансызлар бу тәһлүкәсиз јерин һарада олдуғундан хәбәрсиздирләр. Бурада Јеһова ‘Сән мәним Аллаһымсан, Сәнә ҝүвәнирәм’ дејән халгыны һифз едир. Бу тәһлүкәсиз јердә галырыгса, бизә Шејтанын — «овчунун» тәләсинә дүшүб Аллаһын рәғбәтини итирмәкдән горхмаг лазым дејил.
12. Аллаһла мүнасибәтләримизи тәһлүкә алтына алан нәдир?
12 Аллаһла мүнасибәтләримизи тәһлүкә алтына алан нәдир? Мәзмурчу бир нечә тәһлүкәни садалајыр. Онларын арасында ‘зүлмәтдә доланан ағыр хәстәлијин [вә] мәһведиҹи гырғынын’ адыны чәкир (Мәз. 91:5, 6). ‘Овчу’ бир чохларыны худбин мүстәгиллик арзусу тәләсинә салыр (2 Кор. 11:3). Башгалары тамаһкарлыг, мәғрурлуг вә вар-дөвләт һәрислији тәләсинә дүшүр. Диҝәрләрини о, вәтәнпәрвәрлик, тәкамүл вә јалан дин фәлсәфәсилә аздырыр (Колос. 2:8). Чохлары исә ҹинси әхлагсызлыг тәләсинин гурбаны олур. Руһанилији мәһв едән бу ҹүр бәлалар милјонларла инсанларын Аллаһа мәһәббәтинин сојумасына сәбәб олмушдур. (Мәзмур 91:7—10 ајәләрини оху; Мат. 24:12.)
Аллаһа олан мәһәббәтимизи неҹә горуја биләрик?
13. Јеһова бизи руһани фираванлығымызы тәһлүкә алтына алан шејләрдән неҹә горујур?
13 Јеһова Өз халгыны бу руһани тәһлүкәләрдән неҹә горујур? Мәзмурда дејилир: «Аллаһ сәнә ҝөрә мәләкләринә әмр едәр ки, ҝедәҹәјин һәр јердә сәни горусун» (Мәз. 91:11). Хош хәбәри тәблиғ едә билмәјимиз үчүн сәмави мәләкләр бизи истигамәтләндирир вә мүдафиә едирләр (Вәһј 14:6). Мәләкләрдән башга, мәсиһчи ағсаггаллар бүтүнлүклә Мүгәддәс Китаба әсасланараг тәлим вермәклә бизи јалан мүлаһизәләрә ујмагдан горујурлар. Онлар дүнјанын дүшүнҹә тәрзинә гаршы дурмаг үчүн һәр кәсә көмәк етмәјә һазырдырлар (Тит. 1:9; 1 Пет. 5:2). Һәмчинин «садиг вә ағыллы гул» бизи тәкамүл нәзәријјәсиндән, ширникдириҹи әхлагсыз арзулардан, вар-дөвләт вә ад-сан һәрислијиндән, һәмчинин сајсыз-һесабсыз диҝәр зәрәрли арзу вә тәсирләрдән горумаг үчүн руһани гида илә тәмин едир (Мат. 24:45). Бу кими тәһлүкәләрә гаршы дурмагда сәнә нә көмәк етмишдир?
14. Аллаһын тәгдим етдији мүдафиәдән неҹә јарарлана биләрик?
14 Јеһованын «пәнаһында» галмаг үчүн биз нә етмәлијик? Өзүмүзү бәдбәхт һадисә, ҹинајәт, јахуд хәстәлик кими физики зәрәрләрдән даима ҝөзләмәли олдуғумуз кими, руһани тәһлүкәләрдән дә ҝөзләмәлијик. Буна ҝөрә дә биз Јеһованын нәшрләр, јығынҹаг ҝөрүшләри вә конгресләр васитәсилә тәгдим етдији рәһбәрликдән һәр заман јарарланмалы вә мәсләһәт үчүн ағсаггаллара мүраҹиәт етмәлијик. Һәмчинин баҹы-гардашларымызын тәзаһүр етдирдикләри хүсусијјәтләр бизә јахшы тәсир едир. Јығынҹагла сых үнсијјәтдә олмаг, һәгигәтән дә, бизә мүдрик олмаға көмәк едир. (Сүл. мәс. 13:20; 1 Петер 4:10 ајәсини оху.)
15. Нәјә ҝөрә әмин ола биләрик ки, Јеһова бизи Онун рәғбәтини итирмәјимизә сәбәб олаҹаг шејләрдән горумаға гадирдир?
15 Зәррә гәдәр дә шүбһәмиз олмамалыдыр ки, Јеһова бизи Онун рәғбәтини итирмәјимизә сәбәб олаҹаг һәр шејдән горумаға гадирдир (Ром. 8:38, 39). О, үмумдүнја мәсиһчи јығынҹағыны ҝүҹлү дини вә сијаси дүшмәнләрдән горумушдур; онларын башлыҹа мәгсәди бизи өлдүрмәк јох, мүгәддәс Аллаһымыздан ајры салмаг иди. Јеһова «сәнә гаршы ишләнән һеч бир силаһ ишә јарамајаҹаг» вәдинә садиг чыхды (Јешаја 54:17).
Азадлығы бизә ким верир?
16. Нәјә ҝөрә дүнјадан азадлыг уммаг бош шејдир?
16 Јеһоваја мәхсус олмаг бизи азадлыгдан мәһрум едирми? Әксинә, бу дүнјаја мәхсус олмаг азадлыгдан мәһрум олмаг демәкдир. Дүнја Аллаһдан узаглашыб вә инсанлары көлә едән гәддар аллаһ тәрәфиндән идарә олунур (Јәһ. 14:30). Мәсәлән, Шејтанын системи инсанлары азадлыгдан мәһрум етмәк үчүн игтисади тәзјигләрдән истифадә едир. (Вәһј 13:16, 17 ајәләри илә мүгајисә ет.) Инсанлары көлә етмәк үчүн ҝүнаһ да бөјүк тәсир ҝүҹүнә маликдир (Јәһ. 8:34; Ибр. 3:13). Имансызлар Јеһованын тәлимләринә зидд һәјат тәрзини ҹәлбедиҹи бир шеј кими гәләмә вермәклә азадлыг вәд едирләр, лакин онлара гулаг асан һәр кәс тез бир заманда ҝүнаһлы вә инсаны ләјагәтиндән мәһрум едән һәјат тәрзинин көләси олур (Ром. 1:24—32).
17. Јеһова бизә һансы азадлығы вәд едир?
17 Диҝәр тәрәфдән исә, өзүмүзү Јеһоваја етибар етсәк, О, бизи һәр бир зәрәрдән гуртараҹағына сөз верир. Мүәјјән мәнада бизим вәзијјәтимизи өлүмҹүл хәстәликдән ҹаныны гуртармаг үчүн һәјатыны тәҹрүбәли ҹәрраһа етибар едән инсанын вәзијјәти илә мүгајисә етмәк олар. Һамымыз өлүмҹүл хәстәлији — ҝүнаһы мирас алмышыг. Јалныз Мәсиһин фидјә гурбанлығы әсасында өзүмүзү Јеһоваја етибар етдијимиз тәгдирдә ҝүнаһын тәсириндән азад олаҹағымыза вә әбәди јашајаҹағымыза үмид едә биләрик (Јәһ. 3:36). Ҹәрраһ һаггында даһа чох өјрәндикҹә она олан етибарымыз артдығы кими, Јеһова һаггында билијимиз артдыгҹа да Она даһа чох етибар етмәји өјрәнәҹәјик. Мәһз буна ҝөрә дә биз Аллаһын Кәламыны диггәтлә арашдырырыг ки, Она мәһәббәтимиз даһа да артсын, онда бу мәһәббәт Она мәхсус олмаг горхусуна үстүн ҝәләҹәк (1 Јәһ. 4:18).
18. Јеһоваја мәхсус оланлар нәјә наил олаҹаглар?
18 Јеһова һамыја сечим азадлығы верир. Онун Кәламында дејилир: «Һәјаты сечин ки, сиз вә өвладларыныз јашаја биләсиниз. Аллаһыныз Рәбби севин» (Ганун. т. 30:19, 20). Јеһова истәјир ки, биз Она хидмәт етмәји көнүллү сурәтдә сечәк вә бунунла Она олан мәһәббәтимизи тәзаһүр етдирәк. Севдијимиз Аллаһа мәхсус олмаг бизи азадлыгдан мәһрум етмир, әксинә, бизә хошбәхтлик ҝәтирир.
19. Нәјә ҝөрә биз јалныз Јеһованын лүтфү сајәсиндә Она мәхсус ола биләрик?
19 Ҝүнаһлы олдуғумуз үчүн биз камил Аллаһа мәхсус олмаға лајиг дејилик. Бу јалныз Аллаһын лүтфү сајәсиндә мүмкүндүр (2 Тим. 1:9). Буна ҝөрә дә Павел јазырды: «Јашајырыгса, Рәбб үчүн јашајырыг; өлүрүксә, Рәбб үчүн өлүрүк. Буна ҝөрә, јашајырыгса да, өлүрүксә дә, һәмишә Рәббиник» (Ром. 14:8). Биз Јеһоваја мәхсус олмағы сечдијимизә ҝөрә һеч вахт пешман олмајаҹағыг.
Неҹә ҹаваб верәрдиниз?
• Јеһоваја мәхсус олмаг һансы фајданы ҝәтирир?
• Нәјә ҝөрә Јеһованын гаршымыза гојдуғу тәләбләр ағыр дејил?
• Јеһова хидмәтчиләрини неҹә мүһафизә едир?
[8-ҹи сәһифәдәки шәкилләр]
Баҹы-гардашлардан Јеһоваја хидмәт етмәјин онлара һансы фајданы ҝәтирдијини соруш
[10-ҹу сәһифәдәки шәкил]
Јеһова бизи горумаг үчүн нә тәгдим едир?