Јеһова халгыны ишыгла ҝөзәлләшдирир
“Галх, [“еј гадын”, ЈД] ајдынлан, чүнки ишығын ҝәлди вә Рәббин иззәти сәнин үзәринә доғду” (ИШАЈА 60:1).
1, 2. а) Бәшәријјәт һансы вәзијјәтдәдир? б) Бәшәријјәти гаранлыға гәрг едән кимдир?
“ЕҺ, КАШ ја Ишаја, ја да мүгәддәс Павел бурада олајды!” Бу сөзләри 1940-ҹы илләрдә АБШ-ын президенти Һарри Трумен бөјүк гүссә илә демишдир. О, нәјә ҝөрә белә демишдир? Она ҝөрә ки, о заман дүнјаја јүксәк әхлаглы рәһбәрләрин нә дәрәҹәдә лазым олдуғуну дәрк едирди. ХХ әсрин ән зүлмәт дөврү — Икинҹи Дүнја мүһарибәси јениҹә сона чатмышды. Анҹаг мүһарибәнин баша чатмасына бахмајараг, дүнјада сүлһ јох иди. Бәшәријјәт гаранлыға бүрүнмүшдү. Бу гаранлыг, инди дә, һәмин мүһарибәнин баша чатдығындан 57 ил сонра да дүнјаны гәрг едир. Президент Трумен сағ олсајды, сөзсүз ки, Ишаја вә һәвари Павел кими јүксәк әхлаглы рәһбәрләрин бәшәријјәтә бу ҝүн дә лазым олдуғуну анлајарды.
2 Бахмајараг ки, президент Труменин бу һагда билиб-билмәмәси мә’лум дејил, амма һәвари Павел инсанлара тә’сир едән гаранлыг һаггында јазмыш вә бу барәдә хәбәрдарлыг етмишдир. Мәсәлән, Павел һәмиманлыларыны хәбәрдар етмишдир: “Мүбаризәмиз ган вә әтә гаршы дејилдир, анҹаг рәјасәтләрә, һакимијјәтләрә, бу гаранлыг дүнјанын һөкмранларына, јә’ни сәмави аләмдә олан пис руһи гүввәләрә гаршыдыр” (Ефеслиләрә 6:12). Бу сөзләрдән ајдын олур ки, Павел јалныз дүнјаны гәрг едән руһани гаранлыг һаггында дејил, һәм дә онун архасында кимин дурдуғуну да билирди. Әслиндә бу, “дүнјанын һөкмранлары” адланан әзәмәтли иблисанә гүввәләрдир. Бу ҹүр әзәмәтли руһани гүввәләрин јаратдығы гаранлығы дағытмаг ади инсанлара мүјәссәр ола биләрми?
3. Бәшәријјәтин гаранлыға гәрг олмасына бахмајараг, Аллаһа садиг кәсләр үчүн Ишаја нәји габагҹадан демишдир?
3 Бәшәријјәтин гәрг олдуғу гаранлыг барәдә Ишаја да бәһс едирди (Ишаја 8:22; 59:9). Лакин о, Аллаһдан илһам алараг бизим ҝүнләр һаггында габагҹадан демишдир ки, һәтта индики зүлмәт дөврдә Јеһова ишығы севәнләри ишыгландыраҹаг. Бәли, Павел вә Ишаја бизимлә олмасалар да, онларын гәләмә алдыглары, һәјатымызда рәһбәр тута биләҹәјимиз илһамланмыш јазылара саһибик. Јеһованы севәнләр үчүн бунун неҹә хејир-дуа олдуғуну анлајаг дејә, “Ишаја” китабынын 60-ҹы фәслиндә јазылмыш пејғәмбәрлик сөзләринә диггәт јетирәк.
Пејғәмбәрликдә олан гадын ишыг сачыр
4, 5. а) Јеһова гадына һансы әмри верир вә она нәји вә’д едир? б) “Ишаја” китабынын 60-ҹы фәслиндә һансы һәјәҹанландырыҹы хәбәр јерләшир?
4 “Ишаја” китабынын 60-ҹы фәслинин илк сөзләри, тамамилә аҹынаҹаглы вәзијјәтдә олан гадына үнванланыб. Гадын зүлмәт ичиндә үзүстә јерә узанмышдыр. Ҝөзләнилмәдән ишыг зүлмәти јарыр, бу заман Јеһова дејир: “Галх, [“еј гадын”, ЈД] ајдынлан; чүнки ишығын ҝәлди вә Рәббин иззәти сәнин үзәринә доғду” (Ишаја 60:1). Бәли, “гадынын” ајаға галхыб, Аллаһын ишыг вә әзәмәтини тәзаһүр етдирмәк вахты чатмышдыр! Нәјә ҝөрә? Ҹавабы нөвбәти ајәдә тапырыг: “Будур, дүнјаны гаранлыг вә үммәтләри зүлмәт өртәҹәк; фәгәт сәнин үзәринә Рәбб доғаҹаг вә иззәти сәнин үзәриндә ҝөрүнәҹәк” (Ишаја 60:2). Гадын Јеһованын әмринә табе олдугда, Аллаһ бунун ҝөзәл нәтиҹә верәҹәјинә ону әмин едир. Јеһова дејир: “Сәнин ишығына милләтләр вә сәнә доған ҝүнүн парлаглығына падшаһлар ҝәләҹәкләр” (Ишаја 60:3).
5 Бу үч ајәдә јазылан һәјәҹанландырыҹы сөзләр “Ишаја” китабынын 60-ҹы фәслинә ҝириш кими хидмәт едир вә гыса олараг онун мәғзини ифадә едир. Бу сөзләр, пејғәмбәрликдә дејилән гадынла нә баш верәҹәјини әввәлҹәдән хәбәр верир вә бәшәријјәти бүрүмүш зүлмәт ичиндә Јеһованын вердији ишыгда јашамағын неҹә мүмкүн олдуғуну бизә ҝөстәрир. Бәс бу үч ҝириш ајәләриндә олан пејғәмбәрлик нүмунәләри нәји тәмсил едир?
6. “Ишаја” китабынын 60-ҹы фәслиндә бәһс олунан гадын кими тәмсил едир вә ону јер үзүндә тәгдим едән кимләрдир?
6 Ишаја 60:1-3 ајәләриндә бәһс едилән гадын, Сиону — Јеһованын руһани мәхлуглардан ибарәт сәмави тәшкилатыны тәмсил едир. Бу ҝүн Сион, “Аллаһын Исраилинин” јер үзүндә галан үзвләри илә, Мәсиһлә ҝөјдә идарә етмәк үмиди илә јашајан, руһла мәсһ едилмиш мәсиһчиләрин үмумдүнја јығынҹағыны тәмсил едир (Галатијалылара 6:16). Бу руһани халгын 144 000 үзвү вар вә “Ишаја” китабынын 60-ҹы фәслинин мүасир иҹрасы, “ахыр ҝүнләрдә” һәмин халгын јер үзүндә јашајан үзвләринә диггәт јетирир (2 Тимотејә 3:1; Вәһј 14:1). Бу пејғәмбәрликдә, мәсһ едилмиш мәсиһчиләрин һәмкарларына, “башга гојун”лардан ибарәт “бөјүк издиһама” да хүсуси диггәт јетирилир (Јәһја 10:16; Вәһј 7:9).
7. Сион 1918-ҹи илдә һансы вәзијјәтдә иди вә пејғәмбәрликдә о неҹә тәсвир едилир?
7 Елә бир заман олубму ки, пејғәмбәрликдә бәһс едилән гадын кими, “Аллаһын Исраили” гаранлыгда јатсын? Бәли, бу һадисә тәхминән 80 ил бундан әввәл баш вериб. Мәсһ едилмиш мәсиһчиләр Биринҹи Дүнја мүһарибәси заманы вар-гүввәләри илә шаһидлик ишини давам етдирмәјә чалышырдылар. Лакин 1918-ҹи илдә, мүһарибәнин сон илиндә тәшкил едилмиш тәблиғ, демәк олар ки, дајанмышды. Үмумдүнја тәблиғ ишинә ҹавабдеһ олан Ҹозеф Рутерфорду вә диҝәр мәс’ул гардашлары јалан иттиһам әсасында узунмүддәтли һәбсә мәһкум етмишдиләр. О заман јер үзүндә јашајан мәсһ едилмишләр “Вәһј” китабында пејғәмбәрҹәсинә белә тәсвир едилирләр: “Мәҹази дилдә Содом вә Мисир адланан бөјүк шәһәрин баш күчәсиндә сәриләҹәкдир” (Вәһј 11:8). Мәсһ едилмиш өвладлары тәрәфиндән тәмсил едилән Сион үчүн бу, һәгигәтән дә зүлмәт дөврү иди!
8. 1919-ҹу илдә һансы кәскин дәјишикликләр баш верди вә бунун нәтиҹәси нә олду?
8 Лакин 1919-ҹу илдә вәзијјәт кәскин сурәтдә дәјишди. Јеһова Сиона ишыг сачды! Аллаһын Исраилинин галан үзвләри галхдылар вә хош хәбәри јенидән ҹәсарәтлә вә’з едәрәк, Јеһованын ишығыны әкс етдирмәјә башладылар (Матта 5:14-16). Бу мәсиһчиләрдә јенидән дирчәлән сә’ј сајәсиндә, Јеһованын ишығына башга инсанлар да ҝәлдиләр. Әввәлҹә Аллаһын Исраилинин јени үзвләри ҝәлмәјә башладылар. Ишаја 60:3 ајәсиндә онлар “падшаһлар” адланырлар, чүнки онлар Аллаһын сәмави Падшаһлығында Мәсиһин һәмварисләри олаҹаглар (Вәһј 20:6). Даһа сонра Јеһованын ишығына башга гојунлардан ибарәт бөјүк издиһам ҝәлмәјә башлады. Пејғәмбәрликдә бу инсанлар “милләтләр” адланыр.
Гадынын өвладлары евә дөнүрләр!
9, 10. а) Гадынын гаршысында һансы ҝөзәл мәнзәрә ачылыр вә бу, ҝәләҹәкдә баш верәҹәк һансы һадисәләри ҝөстәрир? б) Севинмәк үчүн Сионун һансы сәбәбләри вар?
9 Инди Јеһова Ишаја 60:1-3 ајәләриндә верилән пејғәмбәрлик нүмунәләрини ачыгламаға башлајыр. О, гадына јени әмр верир. Јеһованын сөзләринә диггәт јетирин: “Әтрафа ҝөзләрини галдыр да бах”. Гадын әмри јеринә јетирир вә будур, онун гаршысында неҹә дә ҝөзәл мәнзәрә ачылыр! Онун өвладлары евә дөнүрләр. Даһа сонра ајәдә дејилир: “Һамысы топланыб сәнә ҝәлирләр; оғулларын узагдан ҝәләҹәкләр вә гызларын гуҹагда дашынаҹаг” (Ишаја 60:4). Падшаһлыг һаггындакы хәбәрин 1919-ҹу илдә бүтүн дүнјада бәјан едилмәјә башланмасы сајәсиндә Јеһованын хидмәтчиләринә минләрлә јени инсанларын гошулмасы мүмкүн олду. Онлар да Аллаһын Исраилинин мәсһ едилмиш үзвләри, јә’ни Сионун “оғуллары” вә “гызлары” олдулар. Беләликлә, Јеһова 144 000-ин ахырынҹы үзвләрини ишыға ҝәтирмәклә Сиону ҝөзәлләшдирир.
10 Сион өвладлары илә бир јердә олдугда онун севинҹини тәсәввүр едә биләрсинизми? Јеһова Сионун севинҹи үчүн үстәлик башга сәбәбләр дә верир. Биз охујуруг: “О заман ҝөрәҹәксән вә үзүн парылдајаҹаг вә үрәјин чырпынаҹаг вә ҝенишләнәҹәк; чүнки дәнизин боллуғу сәнә дөндәриләҹәк, милләтләрин зәнҝинлији сәнә ҝәләҹәк” (Ишаја 60:5). Бу пејғәмбәрлик сөзләринә мүвафиг олараг 1930-ҹу илләрдән е’тибарән Сиона, јер үзүндә әбәди јашамаг үмидинә малик олан чохсајлы мәсиһчиләр ахышыр. Онлар “дәниз”дән — Аллаһдан узаглашмыш бәшәријјәтдән чыхыр вә “милләтләрин зәнҝинлији”ни тәгдим едирләр. Онлар “милләтләрин дәјәрли” нүмајәндәләридир (Һаггај 2:7; Ишаја 57:20). Диггәт јетирин ки, бу “дәјәрли” инсанлар Аллаһа дағыныг һалда, ајры-ајрылыгда хидмәт етмирләр. Мәсһ едилмиш гардашлары илә бирликдә Аллаһа хидмәт етмәјә башлајараг вә “тәк Чобан”а малик олан “тәк сүрү”нү тәшкил едәрәк, бу инсанлар Сиону даһа ҝөзәлләшдирирләр (Јәһја 10:16).
Сиона таҹирләр вә чобанлар ахышыр
11, 12. Сиона ахышан адамлары тәсвир един.
11 Әввәлҹәдән дејилән бу јығымын сајәсиндә, Јеһоваја иззәт верән инсанларын сајы ити сүр’әтлә артыр. Бунлар, пејғәмбәрлијин нөвбәти сөзләриндә дејилир. Тәсәввүр един ки, сиз “гадынла” Сион дағынын башында дурурсунуз. Шәрг тәрәфә нәзәр салын, нә ҝөрүрсүнүз? “Дәвәләрин чохлуғу, Мидјанын вә Ејфанын бирҝүвәнли дәвәләри сәни өртәҹәк; Шебадан оланларын һамысы ҝәләҹәкләр; алтун вә бухур ҝәтирәҹәкләр вә Рәббин һәмдләрини е’лан едәҹәкләр” (Ишаја 60:6). Чохсајлы таҹирләр дәвә карванлары илә Јерусәлимә апаран јол илә һәрәкәт едирләр. Дәвәләр, демәк олар ки, өлкәни бүрүмүшләр! Таҹирләр гијмәтли бәхшишләр, “алтун вә бухур” апарырлар. Онлар Аллаһын ишығына доғру ҝедирләр ки, Аллаһы инсанлар гаршысында мәдһ етсинләр, “Рәббин һәмдләрини е’лан” етсинләр.
12 Јол бојунҹа ҝөрүнән јалныз таҹирләр дејил. Сиона доғру чобанлар да ахышыр. Пејғәмбәрликдә даһа сонра дејилир: “Кедарын бүтүн сүрүләри сәнә топланаҹаг, Небајотун гочлары сәнә јарајаҹаг” (Ишаја 60:7а). Малдарлыгла мәшғул олан тајфалар өз сүрүләриндән ән јахшы һејванлары Јеһоваја гурбан вермәк үчүн, мүгәддәс шәһәрә ҝәлирләр. Сиона гуллуг етмәк үчүн онлар, һәтта өз хидмәтләрини дә тәклиф едирләр! Јеһова бу әҹнәбиләри неҹә гәбул едәҹәк? Буна Аллаһын өзү ҹаваб верир: “Мәгбул олараг гурбанҝаһыма чыхаҹаглар; вә ҝөзәллијимин евини бәзәјәҹәјәм” (Ишаја 60:7б). Јеһова бу әҹнәбиләрин гурбан вә хидмәтләрини инајәтлә гәбул едир. Онларын иштиракы мә’бәди ҝөзәлләшдирир.
13, 14. Гәрбдән јахынлашмагда олан нәдир?
13 Инди исә гәрбә тәрәф дөнүн. Орада нә ҝөрүрсүнүз? Санки узагда суларын үзәринә јајылмыш булуд ағарыр. Јеһова, ола билсин, сиздә јаранан суалы верир: “Бир булуд кими вә јува дәликләринә учан ҝөјәрчинләр кими бу учанлар кимдир?” (Ишаја 60:8). Елә Өзү дә ҹаваб верир: “Адалар вә өнҹә Таршиш ҝәмиләри мәни ҝөзләјәҹәкләр; та ки, узагдан сәнин оғулларыны, ҝүмүшләри вә алтунлары илә бәрабәр, Аллаһын Рәббин исми үчүн вә Исраилин Мүгәддәси үчүн ҝәтирсинләр; чүнки сәнә ҝөзәллик верән одур” (Ишаја 60:9).
14 Бу мәнзәрәни тәсәввүр едә биләрсинизми? Ағ булуд јахынлашыр вә инди узагда, гәрбдә чохсајлы ағ ләкәләрә бәнзәјир. О, далға үзәриндә учан гушларын дәстәсинә бәнзәјир. Лакин онлар јахынлашдыгда, ҝөрүрсән ки, бунлар јелкәнли ҝәмиләр имиш. Јерусәлимә доғру үзән ҝәмиләр о гәдәр чохдур ки, јуваларына учан ҝөјәрчинләр дәстәсини хатырладыр. Ити сүр’әтлә узаг лиманлардан үзән бу ҝәмиләр, Јерусәлимдә Јеһоваја ибадәт едәҹәк иманлылары дашыјырлар.
Јеһованын тәшкилаты ҝенишләнир
15. а) Ишаја 60:4-9 ајәләриндә һансы артым әввәлҹәдән дејилмишди? б) Мәсиһчиләр һансы руһу тәзаһүр етдирирләр?
15 Һәгиги ибадәтин бүтүн дүнјада ҝенишләнмәсинә даир мәнзәрә 4-9-ҹу ајәләрдә неҹә дә ајдын тәсвир едилир! Бу ҝенишләнмә 1919-ҹу илдән е’тибарән баш верир. Јеһова нәјә ҝөрә Сиону бу ҹүр артымла хејир-дуаландырыр? Она ҝөрә ки, Аллаһын Исраили 1919-ҹу илдән бәри итаәткарлыг ҝөстәрәрәк, даима Јеһовадан ҝәлән ишығы әкс етдирир. Бәс диггәт јетирдинизми ки, 7-ҹи ајәјә әсасән, милләтләрдән ҝәлән јени инсанлар Аллаһын “гурбанҝаһына” чыхырлар? Гурбанҝаһа гурбанлары гојурлар, бу да ки, Јеһоваја хидмәтин гурбанларла бағлы олдуғуну хатырладыр. Һәвари Павел јазырды: “Сизә јалварырам ки, бәдәнләринизи дири, мүгәддәс, Аллаһа мәгбул гурбан кими тәгдим един; мә’нәви ибадәтиниз будур” (Ромалылара 12:1). Павелин сөзләринә әсасән, сәмими гәлбли мәсиһчиләр һәфтәдә бир дәфә дини јығынҹагларда иштирак етмәклә кифајәтләнмирләр. Онлар һәгиги ибадәтин ҝенишләнмәси наминә вахтларыны, гүввәләрини вә имканларыны сәрф едирләр. Мәҝәр бу ҹүр садиг хидмәтчиләр Јеһованын евинә иззәт ҝәтирмирләрми? Ишајанын пејғәмбәрлијинә әсасән еләдир ки, вар. Вә биз дә әмин ола биләрик ки, бу сә’јли хидмәтчиләр өз нөвбәсиндә Аллаһын ҝөзүндә ҝөзәлдирләр.
16. Кечмишдә бәрпаетмә ишинә кимләр көмәк едирди, бәс бизим ҝүнләрдә кимләр көмәк едир?
16 Милләтләрдән ҝәлән јени инсанлар ишләмәк истәјирләр. Пејғәмбәрликдә даһа сонра дејилир: “Әҹнәбиләр сәнин диварларыны тикәҹәкләр вә падшаһлары сәнә хидмәт едәҹәкләр” (Ишаја 60:10). Бу сөзләр биринҹи дәфә, Бабил әсарәтиндән гајыдан заман јеринә јетдикдә падшаһлар вә милләтләрдән олан башга инсанлар һәгигәтән дә Јерусәлимин вә мә’бәдин бәрпасында көмәк етмишләр (Езра 3:7; Неһемја 3:26). Бу пејғәмбәрлијин мүасир иҹрасында исә, бөјүк издиһам һәгиги ибадәти “тикмәк” үчүн мәсһ едилмиш галыға көмәк едир. Бөјүк издиһамын үзвләри мәсиһчи јығынҹағыны јаратмагда көмәк ҝөстәрир вә бунунла да Јеһованын шәһәр “диварларына” бәнзәр тәшкилатыны мөһкәмләдирләр. Онлар, һәмчинин Падшаһлыг вә конгрес Залларынын вә Бејт-Елләрин тикинтисиндә һәгиги мә’нада иштирак едирләр. Беләликлә, онлар мәсһ едилмиш гардашлары илә бирликдә Јеһованын бөјүмәкдә олан тәшкилатынын тәләбатларынын гајғысына галырлар.
17. Јеһованын өз халгыны неҹә ҝөзәлләшдирдијини нүмунә әсасында ҝөстәрин.
17 Ишаја 60:10 ајәсиндә јазылмыш сон сөзләр неҹә дә руһландырыр! Јеһова дејир: “Сәни гәзәбимдә вурдум, фәгәт лүтфүмлә сәнә мәрһәмәт етдим”. Доғрудур, 1918-1919-ҹу илләрдә Јеһова өз халгына өјүд верди. Амма бу кечмишдә галды. Инди Јеһова үчүн мәгам чатыб ки, мәсһ едилмиш хидмәтчиләринә вә онларын һәмкарлары олан башга гојунлара инајәт ҝөстәрсин. Бу һагда, онлары санки ҝөзәлләшдирәрәк хејир-дуа вердији гејри-ади артым шәһадәт едир.
18, 19. а) Јеһова Онун тәшкилатына јени ҝәләҹәк инсанлар һаггында нә вә’д едир? б) Ишаја 60-ҹы фәслин галан ајәләри бизә нәји ҝөстәрир?
18 Һәр ил јүз минләрлә јени “әҹнәбиләр” Јеһованын тәшкилаты илә әмәкдашлыг етмәјә башлајыр вә һәлә чохсајлы инсанларын имканы вар ки, онларын нүмунәсини тәглид етсинләр. Јеһова Сиона мүраҹиәт едир: “Гапыларын даима ачыг дураҹаг; милләтләрин сәрвәтини вә сүрҝүн ҝәтирилән падшаһларыны сәнә ҝәтирсинләр дејә ҝеҹә-ҝүндүз бағланмајаҹаглар” (Ишаја 60:11). Бә’зи әлејһдарлар бу “гапыны” бағламаг истәјирләр, лакин биз билирик ки, онлар буна мүјәссәр олмајаҹаглар. Јеһова өзү сөјләмишдир ки, һәр неҹә олса да, гапылар ачыг галаҹаг. Артым давам едәҹәкдир.
19 Бу ахыр ҝүнләрдә Јеһова өз халгыны ҝөзәлләшдирәрәк башга саһәләрдә дә хејир-дуа верир. Ишаја 60-ҹы фәслин галан ајәләри һәмин саһәләри пејғәмбәрҹәсинә ҝөстәрир.
Изаһ едә биләрсинизми?
• “Ишаја” китабынын 60-ҹы фәслиндәки “гадын” кимдир вә јер үзүндә ону кимләр тәмсил едир?
• Сионун өвладлары нә заман үзүстә узанмышлар вә онлар нә вахт вә неҹә “галхдылар”?
• Јеһова мүхтәлиф символлар васитәсилә Падшаһлығын тәблиғчиләринин артымыны әввәлҹәдән неҹә демишдир?
• Јеһова һансы јолларла өз халгына ишыг верир?
[20-ҹи сәһифәдәки шәкил]
“Гадына” ајаға галхмаг әмри верилир.
[22-ҹи сәһифәдәки шәкил]
Ҝәмиләр үфүгдәки ҝөјәрчинләрә бәнзәјирләр.