Бөјүк мүәллими тәглид един

“Ҝедин, бүтүн халглары шаҝирдим един... сизә әмр етдијим һәр шејә риајәт етмәји онлара өјрәдин” (МАТТА 28:19, 20).

1, 2. а) Нә үчүн демәк олар ки, бизләрдән һәр биримиз мүәјјән дәрәҹәдә мүәллимик? б) Һәр бир мәсиһчијә тә’лим вермәклә бағлы һансы мәс’улијјәт һәвалә олунуб?

СӘН мүәллимсәнми? Бизләрдән һәр биримиз мүәјјән дәрәҹәдә мүәллимик. Јолу азан сәјаһәтчијә јол ҝөстәрдијимиз, һәмкарымыза бу вә ја диҝәр иши неҹә етмәји баша салдығымыз, јахуд ушаға чәкмә гајтанларыны неҹә бағламағы ҝөстәрдијимиз һәр дәфә нә исә өјрәтмиш олуруг. Бүтүн бу ишләрдә башгаларына көмәк едәркән мәмнунлуг һисси дујуруг, елә дејилми?

² Һәр бир мәсиһчијә, тә’лим вермәклә бағлы хүсуси мәс’улијјәт һәвалә олунуб. Бизә ‘халглар арасында шаҝирдләр һазырламаг... онлары өјрәтмәк’ тапшырылыб (Матта 28:19, 20, ЈД). Бә’зән јығынҹагда да өјрәтмәк имканына малик олуруг. Мүнасиб гардашлар јығынҹағын руһән мөһкәмләнмәси үчүн “ҹәмијјәтин ҝөзәтчиси вә мүәллими” кими хидмәт етмәјә тә’јин олунурлар (Ефеслиләрә 4:11-13). Ҝүндәлик мәсиһчи фәалијјәтилә мәшғул олараг, јеткин баҹылар ҝәнҹ гадынлара ‘хејирхаһлыг тә’лим етмәлидирләр’ (Титуса 2:3-5). Һамымыз һәмиманлыларымызы руһландырмаға дә’вәт олунуруг вә Мүгәддәс Китабын васитәсилә бир-биримизи инкишаф етдирәрәк бу дә’вәтә диггәт јетирә биләрик (1 Салониклиләрә 5:11). Аллаһын Кәламынын мүәллими олмаг вә узунмүддәтли фајдалар ҝәтирмәјә гадир олан руһани дәјәрләри бөлүшмәк неҹә дә шәрәфдир!

3. Мүәллим кими неҹә тәкмилләшә биләрик?

³ Бәс биз мүәллим кими неҹә тәкмилләшә биләрик? Илк нөвбәдә, Бөјүк Мүәллим Исаны тәглид етмәклә. Амма ким исә соруша биләр: “Биз Исаны неҹә тәглид едә биләрик? Ахы, о камил иди?” Доғрудур, биз камил мүәллим ола билмәрик. Бунунла белә, габилијјәтимиздән асылы олмајараг, Исанын тә’лимвермә үсулуну тәглид етмәк үчүн виҹданла чалыша биләрик. Ҝәлин мүзакирә едәк ҝөрәк онун өјрәтмәк үсулундан дөрдүнү — садәликлә өјрәтмәк, суаллардан еффектли шәкилдә истифадә етмәк, мәнтиглә мүһакимә јүрүтмәк вә мүнасиб мәсәлләр чәкмәк үсулуну неҹә тәтбиг едә биләрик.

Садәликлә өјрәтмәк

4, 5. а) Нәјә ҝөрә садәлик Мүгәддәс Китаб һәгигәтинин ваҹиб хүсусијјәтләриндән биридир? б) Садәликлә өјрәтмәк үчүн, фикирләримизи неҹә сөјләдијимизә диггәт јетирмәк нәјә ҝөрә ваҹибдир?

⁴ Аллаһын Кәламынын әсас һәгигәтләри мүрәккәб дејил. Иса дуасында демишдир: “Ата, шүкүр едирәм Сәнә ки, бу шејләри мүдрикләрдән вә ағыллылардан ҝизләдиб, көрпәләрә ачдын” (Матта 11:25). Јеһова өз нијјәтләрини сәмими вә һәлим үрәкли инсанлара ачыр (1 Коринфлиләрә 1:26-28). Беләликлә садәлик, Мүгәддәс Китаб һәгигәтинин әсас хүсусијјәтләриндән биридир.

⁵ Евдә Мүгәддәс Китаб өјрәнмәси кечирәркән вә ја марагланан инсанлара тәкрарән баш чәкәркән садәликлә неҹә өјрәтмәк олар? Бөјүк Мүәллимин нүмунәси бизи нәјә өјрәдир? Әксәријјәти “охумамыш, авам” олан динләјиҹиләринин үрәјинә јол тапмаг үчүн, Иса онларын баша дүшдүкләри садә сөз вә ифадәләр ишләдирди (Һәвариләрин ишләри 4:13). Демәли, садәликлә өјрәтмәк үчүн илк нөвбәдә фикирләримизи неҹә сөјләдијимизә диггәт јетирмәлијик. Аллаһын Кәламыны даһа инандырыҹы етмәк мәгсәдилә, гәлиз ифадә вә сөзләр ишләтмәјә еһтијаҹ јохдур. Бу ҹүр “кәлам... үлвијјәти” динләјиҹиләри, хүсусилә дә тәһсили вә габилијјәти мәһдуд олан кәсләри горхуда биләр (1 Коринфлиләрә 2:1, 2). Исанын нүмунәси ҝөстәрир ки, диггәтлә сечилән садә сөзләр һәгигәти даһа тә’сирли шәкилдә чатдыра биләр.

6. Неҹә етмәк олар ки, Мүгәддәс Китабы өјрәнән адамы мә’луматла јүкләмәјәк?

⁶ Садәликлә өјрәтмәк үчүн, һәмчинин еһтијатлы олмаг лазымдыр ки, Мүгәддәс Китабы өјрәнән адамы чох мә’луматла јүкләмәјәк. Иса шаҝирдләринин мәһдуд имкана малик олдугларыны нәзәрә алырды (Јәһја 16:12). Биз дә өјрәтдијимиз кәсләрин имканларыны нәзәрә алмалыјыг. Мисал үчүн, “Әбәди һәјата апаран билик” китабы үзрә өјрәнмә кечирәркән, һәр тәфсилаты изаһ етмәјә еһтијаҹ јохдурa. Тәләсмәк дә лазым дејил, чүнки мәгсәдимиз мүәјјән һәҹмли мә’луматы бир дәфәјә кечмәк дејил. Өјрәнмәнин сүр’әтини өјрәнән адамын тәләбат вә габилијјәтини нәзәрә алараг мүәјјән етмәк даһа дүзҝүн оларды. Бизим мәгсәдимиз, һәмин адама Мәсиһин шаҝирди вә Јеһованын хидмәтчиси олмагда көмәк етмәкдир. Өјрәнән адамын кечилән материалы ајдын баша дүшмәсинә көмәк етмәк үчүн, тәләб олунан гәдәр вахт ајырмаг лазымдыр. Бунун сајәсиндә, һәгигәт онун үрәјинә тә’сир ҝөстәриб, фәалијјәтә тәшвиг едә биләр (Ромалылара 12:2).

7. Јығынҹагда мә’рузә илә чыхыш едәркән, садәликлә өјрәтмәкдә бизә һансы мәсләһәтләр көмәк ола биләр?

⁷ Јығынҹагда мә’рузә илә чыхыш едәркән, хүсусилә дә залда ҝөрүшләрә јени ҝәләнләр варса, неҹә етмәлијик ки, “анлашылмајан сөзләр” сөјләмәјәк? (1 Коринфлиләрә 14:9). Үч фајдалы мәсләһәти нәзәрдән кечирәк. Биринҹиси, ишләтдијин намә’лум терминләри изаһ ет. Аллаһын Кәламыны өјрәнәркән биз хүсуси сөз еһтијаты мәнимсәмишик. Әҝәр “садиг вә ағыллы гул”, “башга гојунлар” вә “Бөјүк Бабил” кими сөз бирләшмәләри ишләдириксә, о заман гыса изаһатлар вермәк лазым ҝәлә биләр. Икинҹиси, узун-узады данышмагдан узаг ол. Артыг сөзләр вә мүрәккәб ифадәләр уҹбатындан динләјиҹиләрин марағы итә биләр. Фикирләри ајдын ифадә етмәк үчүн, артыг сөз вә ифадәләри кәнар ет. Үчүнҹүсү, бөјүк һәҹмли материалдан истифадә етмәјә чалышма. Һазырлашан заман чохлу мараглы тәфсилат тапмаг олар. Лакин јахшы олар ки, чыхышында бир нечә әсас фикри ајырыб, јалныз һәмин фикирләри тәсдиг едән вә ајрылан вахт әрзиндә ајдын изаһ едилмәси мүмкүн олан мә’луматы истифадә едәсән.

Суаллардан еффектлә истифадә етмәк

8, 9. Суалы ев саһибинин марагларына неҹә ујғунлашдыра биләрик? Нүмунәләр ҝәтирин.

⁸ Јадымыза салаг ки, Иса шаҝирдләринә өз фикирләрини ачыг сөјләмәкдә көмәк етмәк, онлары дүшүнмәјә вә тәфәккүр габилијјәтләрини инкишаф етдирмәјә тәшвиг етмәк үчүн, суаллардан мәһарәтлә истифадә едирди. Өз суаллары илә Иса онларын үрәјинә гајғыкешлик вә мәһәббәтлә јол тапырды (Матта 16:13, 15; Јәһја 11:26). Бәс, Иса кими, биз суаллардан еффектлә неҹә истифадә едә биләрик?

⁹ Евдән-евә тәблиғ едәркән, инсанларда мараг ојатмаг, бунунла да Аллаһын Падшаһлығы һаггында сөһбәт етмәјә тәмәл гојмаг үчүн суаллардан истифадә едә биләрик. Бәс суалы ев саһибинин марагларына неҹә ујғунлашдыра биләрик? Диггәтли ол. Евә јахынлашаркән әтрафа ҝөз ҝәздир. Әтрафда о евдә ушагларын олдуғуну ҝөстәрән ојунҹаглар вармы? Әҝәр варса, ев саһибиндән сорушмаг олар: “Ушагларыныз бөјүјәндә дүнјанын неҹә олаҹағы барәдә нә вахтса дүшүнмүсүнүзмү?” (Мәзмур 37:10, 11). Гапыда бир нечә гыфыл, јахуд сигнализасија гурулмушса, онда сорушмаг олар: “Сизҹә, елә бир вахт ҝәләҹәкми ки, биз өзүмүзү евдә вә күчәдә тәһлүкәсиз һисс едәк?” (Мика 4:3, 4). Әлил арабасынын ҝириб-чыхмасы үчүн јол ҝөрүрсәнсә, белә суал вермәк олар: “Бүтүн инсанларын јахшы сәһһәти олаҹаг бир зәманә ҝәләҹәкми?” (Ишаја 33:24). “Мүгәддәс Китаб әсасында сөһбәтә башламағын вә давам етмәјин үсулу” (рус.) брошүрасында чохлу мәсләһәтләр тапмаг оларb.

10. Өјрәнән адамын үрәјиндәки дүшүнҹә вә һиссләри суаллар васитәсилә неҹә “чәкиб чыхара” биләрик, анҹаг һәмишә нәји јадда сахламалыјыг?

¹⁰ Бәс Мүгәддәс Китаб өјрәнмәси кечирәркән суаллардан еффектлә неҹә истифадә едә биләрик? Исадан фәргли олараг, биз инсанларын үрәјиндә оланлары билмирик. Лакин нәзакәтлә, ејни заманда анлајышла верилән суаллар, өјрәнән адамын үрәјиндәки дүшүнҹә вә һиссләри ‘чәкиб чыхармагда’ бизә көмәк едәр (Сүлејманын мәсәлләри 20:5). Фәрз едәк ки, “Билик” китабындан “Аллаһа мәгбул һәјат тәрзи нә үчүн хошбәхтлик ҝәтирир?” фәслини өјрәнирик. Һәмин фәсилдә, Аллаһын јалана, зинаја вә бу кими ишләрә олан мүнасибәти мүзакирә олунур. Өјрәнән адам китабдакы суаллара дүзҝүн ҹаваб верә биләр, бәс о, өјрәндикләри илә разыдырмы? Биз ондан соруша биләрик: “Сиз, Аллаһын бу мәсәләләрә олан нөгтеји-нәзәрини мүдрик санырсынызмы? Мүгәддәс Китабын бу принсипләрини һәјатынызда неҹә тәтбиг едә биләрсиниз?” Анҹаг һәмишә јадда сахламалыјыг ки, өјрәнән адамын шәхси ләјагәтинә һөрмәтлә јанашмаг лазымдыр. Биз, Мүгәддәс Китабы өјрәнән кәси утандыран вә ја алчалдан суаллар вермәк истәмирик (Сүлејманын мәсәлләри 12:18).

11. Мә’рузә илә чыхыш едәркән суаллардан еффектлә неҹә истифадә етмәк олар?

¹¹ Аудиторија гаршысында чыхыш едәркән дә суаллардан еффектлә истифадә етмәк олар. Динләјиҹиләрин әл галдырыб ҹаваб вермәләри тәләб олунмајан риторик суаллар, онлары дүшүнмәјә вә фикир јүрүтмәјә тәшвиг едә биләр. Иса јери ҝәләндә бу ҹүр суаллар верирди (Матта 11:7-9). Бундан әлавә, мә’рузәчи ҝириш сөзләриндән сонра бир сыра суаллар верә биләр ки, мә’рузәсиндәки әсас фикирләри гыса шәкилдә анлатсын. О дејә биләр: “Бу мә’рузәдә биз нөвбәти суалларын ҹавабыны нәзәрдән кечирәҹәјик...” Ахырда исә, әсас фикирләри тәкрар етмәк мәгсәдилә, о, һәмин суаллара гајыда биләр.

12. Мәсиһчи ағсаггалларынын, Аллаһын Кәламындан тәсәлли алмагда һәмиманлыларына көмәк етмәк үчүн суаллардан неҹә истифадә едә биләҹәкләринә даир нүмунә ҝәтирин.

¹² Мәсиһчи ағсаггаллары да чобанлыг фәалијјәтләриндә, мәсәлән, “руһдан дүшәнләрә” (ЈД) Јеһованын Кәламындан тәсәлли алмагда көмәк едәркән суаллар верә биләрләр (1 Салониклиләрә 5:14). Мәсәлән, өзүнү мә’јус һисс едән адама көмәк етмәк үчүн, ағсаггал онун диггәтини Мәзмур 34:18 ајәсинә јөнәлдә биләр. Орада дејилир: “Рәбб үрәји гырыг оланлара јахындыр вә руһу әзилмиш оланлары гуртарар”. Руһдан дүшмүш адамын бу сөзләри шәхсән өзүнә аид етдијинә әмин олмаг үчүн, ағсаггал соруша биләр: “Јеһова кимә јахындыр? Һәрдән өзүнү “үрәји гырыг” вә “руһу әзилмиш” кими һисс едирсәнми? Әҝәр Мүгәддәс Китаб Јеһованын белә адамлара јахын олдуғуну дејирсә, бу, Онун сәнә дә јахын олдуғуну билдирмирми?” Бу ҹүр гајғыкеш әминлик, гәлби сынмыш адамы руһландыра биләр (Ишаја 57:15).

Мәнтиглә мүһакимә јүрүтмәк

13, 14. а) Ҝөзлә ҝөрмәдији Аллаһа инанмадығыны сөјләјән инсанла биз неҹә фикир јүрүдә биләрик? б) Нәјә ҝөрә һамыны инандыраҹағымызы ҝөзләмәли дејилик?

¹³ Хидмәтдәки мәгсәдимиз — мәнтиги, инандырыҹы фикирләрлә инсанларын үрәјинә јол тапмагдыр (Һәвариләрин ишләри 19:8; 28:23, 24). Бу о демәкдирми ки, башгаларыны Аллаһын Кәламындакы һәгигәтә инанмаға тәшвиг етмәк үчүн, алимлик етмәлијик? Әсла јох. Инандырыҹы фикирләрин мүрәккәб олмасы ваҹиб дејил. Чох вахт, садә формада тәгдим едилән мәнтиги фикирләр даһа еффектли олур. Ҝәлин бир нүмунәјә диггәт јетирәк.

¹⁴ Ҝөзлә ҝөрә билмәдији Аллаһа инанмадығыны сөјләјән инсана неҹә ҹаваб вермәк олар? Биз сәбәб вә нәтиҹә ганунуна истинад едә биләрик. Нәтиҹәни ҝөрәндә баша дүшүрүк ки, сәбәб олмалыдыр. Биз дејә биләрик: “Сиз сәһралыгда әрзаг еһтијаты олан јахшы бир евә (нәтиҹә) раст ҝәлсәјдиниз, һәмин еви киминсә (сәбәб) тикдијинә вә анбары әрзагла долдурдуғуна шүбһә етмәздиниз. Јахуд тәбиәтин мүкәммәл системә малик олдуғуну вә Јерин “анбарынын” әрзагла (нәтиҹә) долу олдуғуну ҝөрдүкдә, мәҝәр бүтүн бунларын Кимсә (сәбәб) тәрәфиндән едилдијини дүшүнмүрүкмү?” Мүгәддәс Китабда јазыландан даһа јахшы дәлил ҝәтирмәк мүмкүн дејил: “Һәр бир евин бәннасы вардыр, һәр шејин бәннасы исә Аллаһдыр” (Ибраниләрә 3:4). Лакин сөјләдијимиз фикир һәр нә гәдәр мәнтиги олса да, һамыны инандыра билмәјәҹәјик. Мүгәддәс Китаб бизә хатырладыр ки, јалныз дүзҝүн “мејлли” (ЈД) инсанлар иманлы олаҹаглар (Һәвариләрин ишләри 13:48; 2 Салониклиләрә 3:2).

15. Инсанларын диггәтини Јеһованын хүсусијјәт вә јолларына јөнәлтмәк үчүн, биз неҹә фикир јүрүдә биләрик вә буну неҹә едә биләҹәјимизи һансы ики нүмунә ҝөстәрир?

¹⁵ Истәр тәблиғ хидмәтиндә, истәрсә дә јығынҹагда олсун, башгаларыны өјрәдәркән онларын диггәтини Јеһованын хүсусијјәт вә јолларына јөнәлтмәк үчүн, мәнтиги фикирләрдән истифадә едә биләрик. Исанын бә’зән истифадә етдији “нә гәдәр јәгиндир” ифадәси васитәсилә фикир јүрүтмәк хүсусилә еффектлидир (Лука 11:13; 12:24). Гаршы-гаршыја гојулмаја әсасланан мәнтиг дәрин тә’сир бағышлајыр. Одлу ҹәһәннәм һаггындакы тә’лимин ҹәфәнҝијат олдуғуну ҝөстәрмәк үчүн, белә дејә биләрик: “Севән ата һеч заман ушағынын әлини одун үстүнә тутараг ҹәзаландырмаз. Олсун ки, бу фикир севән сәмави Атамыза нә гәдәр ијрәнҹдир!” (Јеремја 7:31). Јеһованын өз хидмәтчиләриндән һәр биринин гејдинә галдығыны изаһ едиб, дејә биләрик: “Әҝәр Јеһова милјардларла улдузларын һәр бирини “адлары илә” таныјырса, онда Ону севән вә Оғлунун гијмәтли ганы баһасына алынан инсанлар Она нә гәдәр әзиздирләр!” (Ишаја 40:26; Һәвариләрин ишләри 20:28). Бу ҹүр инандырыҹы сүбутлар, инсанларын үрәјинә јол тапмагда бизә көмәк едәҹәк.

Мүнасиб мәсәлләр

16. Нәјә ҝөрә мәсәлләр тә’лим вермәкдә көмәк едир?

¹⁶ Еффектли мәсәлләр — башгаларына өјрәтдијимиз шејләри “даһа дадлы” едән әдвијјат кимидир. Нәјә ҝөрә мәсәлләр тә’лим вермәкдә көмәк едир? Бир педагог гејд едир: “Мүҹәррәд дүшүнҹә, инсана ән чәтин баша ҝәлән габилијјәтләрдән биридир”. Мәсәлләр бејнимиздә, јени фикирләри там гаврамагда бизә көмәк едәҹәк сурәтләр јарадыр. Иса мәсәлләрдән мәһарәтлә истифадә едирди (Марк 4:33, 34). Ҝәлин ҝөрәк бу мүәллимлик үсулундан неҹә истифадә едә биләрик?

17. Чәкилән мәсәли һансы дөрд амил еффектли едир?

¹⁷ Мәсәлләри еффектли едән нәдир? Биринҹиси, мәсәл динләјиҹиләрә мүнасиб олмалы, диггәтләрини онлара јахшы таныш вә ајдын олан вәзијјәтләрә јөнәлтмәлидир. Јадымыза салаг ки, Иса чәкдији мәсәлләрин чохуну динләјиҹиләринин ҝүндәлик һәјатындан ҝөтүрүрдү. Икинҹиси, мәсәл, гејд етмәк истәдијимиз саһәјә ујғун ҝәлмәлидир. Әҝәр апарылан мүгајисә ујғун ҝәлмирсә, чәкилән мәсәл јалныз диггәти јајындыраҹаг. Үчүнҹүсү, мәсәлә ҝениш мә’луматлар дахил олмалы дејил. Хатырлајаг ки, Иса лазыми мә’луматлара истинад едир, әһәмијјәтсиз оланлары исә тә’хирә салырды. Дөрдүнҹүсү, мәсәлдән истифадә едәркән, она нәјә ҝөрә истинад етдијимизи изаһ етмәлијик. Әкс тәгдирдә бә’зиләри чәкдијимиз мәсәлин сәбәбини анламаја биләрләр.

18. Мүнасиб мәсәли неҹә сечә биләрик?

¹⁸ Мүнасиб мәсәли неҹә сечә биләрик? Узун-узады, гәлиз әһвалатлар ујдурмаға еһтијаҹ јохдур. Гыса мәсәлләр чох еффектли олур. Мүзакирә етдијин фикри мәсәлләрлә изаһ етмәјин неҹә мүмкүн олдуғуну тәсәввүр етмәјә чалыш. Тутаг ки, сөһбәт Аллаһын бағышламаға һазыр олмасындан ҝедир, биз исә, Һәвариләрин ишләри 3:19 ајәсиндәки фикри мәсәлләрлә изаһ етмәк истәјирик. Һәмин ајәдә дејилир ки, Јеһова бизим ҝүнаһларымызы ‘силир’, јә’ни јујур. Бу сөзләрин өзү ајдын тәсвирдир, амма бу фикри һансы конкрет мәсәл илә изаһ етмәк оларды? Бәлкә, позанла? Биз белә дејә биләрик: “Јеһова ҝүнаһларымызы бағышлајанда, онлары санки позанла силир”. Бу ҹүр садә мәсәлин нәјә ҝөрә чәкилдијни анламаг чәтин дејил.

19, 20. а) Јахшы мәсәлләри һарадан тапмаг олар? б) Нәшрләримиздә һансы мәсәлләр ҝәтирилир? (Һәмчинин чәрчивәјә бахын.)

¹⁹ Мүнасиб мәсәли һарадан тапмаг олар? Бу, бизимлә вә ја һәмиманлыларымызла баш верән һадисәләр ола биләр. Бир чох башга мәнбәләр дә вар: ҹанлы вә ҹансыз әшјалар, мәишәт әшјалары, јахуд һазырда баш верән, һамыја мә’лум олан һадисәләр. Бурада әсас мәсәлә диггәтли олмагда, ҝүндәлик ҝөрдүјүмүз шејләри диггәтлә ‘тәдгиг етмәк’ баҹарығындадыр (Һәвариләрин ишләри 17:22, 23). Натиглик баҹарығына даир бир арајыш китабчасында дејилир: “Инсанларын һәјат вә фәалијјәтләрини мүшаһидә едән, мүхтәлиф адамларла данышан, ҹүрбәҹүр әшјалара ҹанлы мараг ҝөстәрән вә һәр шеји ајдынлашдыранадәк суаллар верән мә’рузәчи, лазым ҝәлдикдә чох фајдалы ола билән бир сыра мәсәлләр топлајыр”.

²⁰ Еффектли мәсәлләрин даһа бир зәнҝин мәнбәји вар — бу, Јеһованын Шаһидләри тәрәфиндән нәшр едилән “Ҝөзәтчи Гүлләси”, “Ојанын!” вә башга нәшрләрдир. Бу нәшрләрдә мәсәлләрин неҹә истифадә едилдијинә диггәт јетирмәклә чох шеј өјрәнмәк оларc. Мисал үчүн, “Билик” китабынын 17-ҹи фәслинин 11-ҹи абзасында истифадә едилән нүмунәни нәзәрдән кечирәк. Орада јығынҹағын мүхтәлиф үзвләри, сәнинлә јанашы јол ҝедән мүхтәлиф машынларла мүгајисә олунур. Бу нүмунәни еффектли едән нәдир? Фикир верәк ки, һәмин нүмунә бизим ҝүндәлик ҝөрдүјүмүз сәһнәни тәсвир едир вә изаһ етдији мәсәләјә ујғундур, буна ҝөрә дә онун нәјә аид олдуғу динләјиҹиләрә ајдындыр. Биз тә’лим верәркән, әдәбијјатымызда олан мәсәлләрдән истифадә едә биләрик, лазым ҝәлдикдә исә, онлары Мүгәддәс Китабы өјрәнән шәхсин тәләбатларына вә ја мә’рузәјә ујғунлашдыра биләрик.

21. Аллаһын Кәламыны еффектлә өјрәдән адамлар һансы хејир-дуалары алырлар?

²¹ Еффектлә тә’лим верән адам зәнҝин хејир-дуалар алыр. Ахы башгаларыны өјрәдәркән биз билијимизи онларла бөлүшүрүк, онлара көмәк етмәјә чалышырыг вә өзүмүзүн бир һиссәмизи онлара веририк. Бу ҹүр вермәк исә хошбәхтлик ҝәтирир, чүнки Мүгәддәс Китабда дејилир: “Вермәк алмагдан даһа бөјүк бәхтијарлыг ҝәтирир” (Һәвариләрин ишләри 20:35). Аллаһ Кәламынын мүәллимләри олан бизләр үчүн бу хошбәхтлик ондан ибарәтдир ки, биз башгалары илә һәгиги вә даими дәјәри — Јеһова һаггындакы һәгигәти бөлүшдүјүмүзү анладығымыз үчүн севинҹ әлдә едирик. Һәмчинин Бөјүк Мүәллим Иса Мәсиһи тәглид етдијимизи биләрәк дә мәмнунлуг һисси дујуруг.

[Һашијәләр]

Јадыныздадырмы?

• Евдә Мүгәддәс Китаб өјрәнмәси кечирәндә вә јығынҹагда мә’рузә илә чыхыш едәндә садәликлә неҹә өјрәдә биләрик?

• Евдән-евә тәблиғ едәркән, суаллардан еффектлә неҹә истифадә едә биләрик?

• Мәнтиглә фикир сөјләјәркән, диггәти Јеһованын хүсусијјәтләринә вә јолларына неҹә јөнәлдә биләрик?

• Мүнасиб мәсәлләри һарадан тапмаг олар?

[32-ҹи сәһифәдәки чәрчивә/шәкил]

Бу мәсәлләр јадындадырмы?

Ашағыда садәҹә бир нечә еффектли мәсәл ҝәтирилир. Нәјә ҝөрә истинад едилән журнала вә ја китаба бахыб, мәсәлин мүзакирә олунан фикри неҹә вурғуладығына диггәт јетирмәјәсән?

• Һава акробатларында вә ја фигурлу сүрүшмә ојунчуларында олдуғу кими, аилә һәјатында хошбәхтлијә ҹан атан кәсләрин јахшы јолдашы олмалыдыр (“Ҝөзәтчи Гүлләси”, 2001-ҹи ил 1 август, сәһифә 10).

• Фикирләри сөјләмәк, башгасына топ атмаг кими бир шејдир. Ону ја астаҹа, ја да инсана зәрбә вураҹаг дәрәҹәдә атмаг олар (“Әбәди һәјата апаран билик”, сәһифә 144).

• Мәһәббәт тәзаһүр етдирмәји өјрәнмәк, хариҹи дил өјрәнмәјә бәрабәрдир (“Ҝөзәтчи Гүлләси”, 1999-ҹу ил, 15 феврал, сәһифә 18, 22, 23, рус.).

• Исанын, Адәмин нәслинә көмәк етмәсини, имканлы хејирхаһ бир адамын һәр һансы фирманын (виҹдансыз саһибкар үзүндән јығылмыш) борҹларыны өдәмәси вә ону јенидән ачараг фирманын чохсајлы ишчиләрини хилас етмәси илә мүгајисә етмәк олар (“Ҝөзәтчи Гүлләси”, 1999-ҹу ил, 15 феврал, сәһифә 16, рус.).

• Тәсвири инҹәсәнәт һәвәскарлары, бөјүк сәнәткарларын ишләрини шедевр сандыглары үчүн, онларын зәдәләнмиш рәсмләрини бәрпа етмәјә бә’зән һәдсиз гүввә сәрф едирләр. Бунун кими, Јеһованын нәзәри бизим гејри-камиллијимиздән узаглара јөнәлир, О биздә јахшы ҹәһәтләри ҝөрүр вә Адәмин үзүндән итирилмиш камиллији нәһајәтдә бизим үчүн бәрпа едәҹәкдир (“Јеһоваја јахынлаш”, сәһифә 246, рус.).

• Мирас алынмыш ҝүнаһы, компүтер фајлыны корлајан вирусла мүгајисә етмәк олар (“Гајғыкеш Јарадан мөвҹуддурму?”, сәһифә 156, рус.).

• Тәлә јеми овчулара неҹә хидмәт едирсә, спиритизм дә ҹинләрә о ҹүр хидмәт едир. Ову өзүнә ҹәлб едир (“Әбәди һәјата апаран билик”, сәһифә 111).

[28-ҹи сәһифәдәки шәкилләр]

Мәсиһчиләр Аллаһын Кәламынын мүәллимләридир.

[29-ҹу сәһифәдәки шәкил]

Ағсаггаллар һәмиманлыларына Аллаһын Кәламындан тәсәлли алмагда көмәк етмәк үчүн, суаллар верә биләрләр.