Бөһран дөврүндә тәсәлли
БУ ҜҮН хәбәрләр һеч дә тәсәлливериҹи дејил. Бир нәфәр гејд етмишдир: “Дүнјада о гәдәр хошаҝәлмәз һадисәләр баш верир ки, һәрдән билмирсән ахшам хәбәрләрә бахасан, ја јох?”. Дүнја мүһарибәләр, террор актлары, ҹинајәткарлыг вә хәстәликләрлә долудур. Әҝәр бу фәлакәтләрә артыг мә’руз галмамышыгса, тезликлә мә’руз гала биләрик.
Индики вәзијјәт Мүгәддәс Китабда дәгиглијилә габагҹадан хәбәр верилмишди. Иса бизим зәманәни тәсвир едәркән бөјүк мүһарибәләр, епидемијалар, гида чатышмазлығы вә зәлзәләләрин олаҹағыны демишди (Лука 21:10, 11). Һәвари Павел јазмышды ки, инсанларын рәһмсиз, пулпәрәст вә јахшылығын дүшмәни олаҹаглары “чәтин анлар ҝәләҹәк”. О, һәмин дөврү “ахыр ҝүнләр” адландырмышдыр (2 Тимотејә 3:1-5).
Ҝөрдүјүмүз кими, дүнјанын вәзијјәти һаггында хәбәрләрдә верилән мә’луматларла Мүгәддәс Китабда габагҹадан дејиләнләр арасында мүәјјән охшарлыг вар. Лакин онларын охшарлығы јалныз бундан ибарәтдир. Мүгәддәс Китаб бизә, хәбәрләрдән өјрәнә билмәјәҹәјимиз шејләри ачыглајыр. Аллаһдан илһам алмыш Кәламын сајәсиндә биз јалныз јер үзүндә нә үчүн бу гәдәр чохлу писликләр олдуғуну дејил, һәмчинин ҝәләҹәкдә бизи нәләр ҝөзләдијини дә анлаја билирик.
Аллаһын писликләрә олан мүнасибәти
Мүгәддәс Китаб, Аллаһын буҝүнкү ағыр шәраитә олан мүнасибәтини изаһ едир. Аллаһ бу проблемләрин һамысыны әввәлҹәдән ҝөрмүш олса да, белә вәзијјәт Ону һеч дә гане етмир вә О, бүтүн бунлара даима сәбир етмәјәҹәкдир. Һәвари Јәһја “Аллаһ мәһәббәтдир” дејә јазмышдыр (1 Јәһја 4:8). Јеһова инсанлара дәрин мәһәббәт бәсләјир, пислијә исә нифрәт едир. Биз тәсәлли үчүн Аллаһа әминликлә мүраҹиәт едә биләрик, чүнки О, хејирхаһ вә шәфгәтлидир, һәмчинин јер үзүндән пислији јох етмәк нијјәтиндәдир вә буну етмәк үчүн јетәринҹә гүввәјә маликдир. Мәзмурчу јазмышдыр: “[Аллаһын тә’јин етдији сәмави Падшаһ] фағыры вә јардымчысы олмајан тәвазөкары гуртарар. Јохсула вә дүшкүнә аҹыјар; вә фағырларын ҹанларыны гуртарар. Ҹанларыны һијләдән вә әзијјәтдән гуртарар вә ҝөзүндә онларын ганы дәјәрли олар” (Мәзмур 72:12-14).
Изтираб чәкән инсанлара сиз дә шәфгәт һисси дујурсунузму? Еһтимал ки, дујурсунуз. Шәфгәт — Јеһованын бизә бәхш етдији хүсусијјәтдир, ахы биз Онун сурәтиндә јарадылмышыг (Тәквин 1:26, 27). Биз шүбһә етмәјә биләрик ки, Аллаһ өзү дә инсанларын изтирабларына лагејд дејил. Јеһованы һамыдан јахшы таныјан Иса Мәсиһ, Јеһованын бизимлә јахындан марагландығыны вә чох шәфгәтли олдуғуну дејирди (Матта 10:29, 31).
Аллаһын јаратдығы һәр бир шеј, Онун гајғысы һаггында шәһадәт едир. Иса демишдир: “[Аллаһ] Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир” (Матта 5:45). Һәвари Павел Листра шәһәринин сакинләринә деди: “[Аллаһ] ҝөјдән бизә јағмурлар вә сәмәрәли мөвсүмләр верәрәк, үрәкләримизи гида вә севинҹлә долдуруб, јахшылыг едәрәк, Өзүнү шаһидсиз гојмамышдыр” (Һәвариләрин ишләри 14:17).
Писликләрә ҝөрә ким мәс’улијјәт дашыјыр?
Һәвари Павелин Листра сакинләринә дедији диҝәр сөзләрә дә диггәт јетирин: “[Аллаһ] кечмиш нәсилләрдә бүтүн халгларын өз јоллары илә ҝетмәләринә изин вермишдир”. Бу сөзләрдән ҝөрүнүр ки, халглар, јә’ни инсанлар, гаршылашдыглары проблемләрә ҝөрә өзләри ҹавабдеһдирләр. Бу проблемләрә ҝөрә Аллаһы ҝүнаһландырмаг олмаз (Һәвариләрин ишләри 14:16).
Бәс Јеһова фәлакәтләрин баш вермәсинә нә үчүн јол верир? О, һәр һансы тәдбир ҝөрәҹәкми? Бу суалларын ҹавабыны јалныз Аллаһын Кәламында тапмаг олар, чүнки бу суаллар башга бир руһани варлыгла вә онун, бизим үчүн ҝөрүнмәз олан руһани тәбәгәдә галдырдығы мүбаһисәли суалла сых бағлыдыр.
[4-ҹү сәһифәдәки шәкилләр]
Әҝәр Аллаһ инсанлара шәфгәт һисси бәхш едибсә, Онун өзү инсанларын изтираб чәкмәсинә е’тинасыз јанаша биләрми?
[Иҹазә илә]
ҸИЛД: Танк: N PHOTO 158181/J. Isaac; zəlzələ: San Hong R-C Picture Company
[Иҹазә илә]
Солдан јухары: Һорватија: UN PHOTO 159208/S. Whitehouse; aclıq çəkən uşaq: UN PHOTO 146150 BY O. MONSEN