Һәгигәти севән ҝәнҹләр

“ҜӘНҸ адам јолуну нә илә тәмизләр?” дејә, мәзмурчу тәхминән 2 400 ил бундан әввәл сорушмушдур (Мәзмур 119:9). Бу суал бу ҝүн дә актуалдыр, чүнки мүасир ҝәнҹләр чохсајлы чәтинликләрлә гаршылашмалы олурлар. Бир чох ҝәнҹ оғлан вә гызлар әхлагсыз ҹинси һәјат тәрзи сүрәрәк, өзләрини ГИЧС хәстәлијинә тутулмаг тәһлүкәсинә дүчар едирләр. Бу хәстәлијә тутуланларын тәхминән јарысы 15 јашындан 24 јашына гәдәр олан ҝәнҹләрдир. Ҝәнҹләр арасында баш верән вахтсыз өлүмүн даһа бир сәбәби дә наркоманијадыр. Әдәбсиз мусигиләр, зоракылыг вә әхлагсызлыгла долу филмләр вә телешоулар, еләҹә дә Интернетдәки порнографија ҝәнҹләрин зеһнинә позуҹу тә’сир ҝөстәрир. Буна ҝөрә дә тәәҹҹүблү дејил ки, мәзмурчунун вердији суал бу ҝүн бир чох валидејнләри вә ҝәнҹләри нараһат едир.

Мәзмурчу өз суалына ҹаваб вериб дејир: “Сәнин сөзүнә ҝөрә ону тутмагла”. Бәли, Аллаһын Кәламы олан Мүгәддәс Китабда чох ҝөзәл нәсиһәтләр вар вә бу нәсиһәтләрә риајәт едән ҝәнҹ оғлан вә гызлар һәјатда мүвәффәгијјәтә наил олурлар (Мәзмур 119:105). Ҝәлин, һамынын зөвг вә зәнҝинлик барәдә дүшүндүјү бир дүнјада Аллаһы севән вә руһән мөһкәм галмаға ҹан атан ҝәнҹләрин бир нечә нүмунәсинә бахаг.

Онлар валидејн нәсиһәтини гијмәтләндирирләр

Хакоб Емануел, Јеһованын Шаһидләринин Мексикадакы филиалына тә’јинат алмаздан әввәл пионер кими хидмәт едирди. О, Аллаһа хидмәтә олан мәһәббәтини неҹә инкишаф етдирдијини хош дујғуларла хатырлајыр: “Руһән јеткин олан бә’зи гардашларла сых үнсијјәтдә олмаг мәнә чох көмәк етсә дә, мәним үчүн әсас валидејнләримин нүмунәси иди. Валидејнләримин сајәсиндә, мән тәблиғ хидмәтини севдим. Онлар мүлајимликлә мәни дүзҝүн јола јөнәлтдиләр, мәни буна мәҹбур етдикләрини һеч вахт һисс етмәдим”.

Артыг бир нечә ил пионер хидмәтиндә олан Дејвид, гардашы илә бирликдә һәлә көрпә икән валидејнләринин хүсуси пионер хидмәтинә башламаларынын она неҹә хош тә’сир бағышладығыны хатырлајыр. Атасынын өлүмүндән сонра, онун анасы хүсуси пионер хидмәтинә давам етди. О, хош хәбәри тәблиғ едир вә ушагларын гајғысына галырды. Дејвид гејд едир: “Валидејнләрим мәни һеч вахт пионер хидмәтинә мәҹбур етмирдиләр, лакин аиләм бу хидмәт нөвүнү чох севирди. Бөјүдүјүм мүһит сајәсиндә мәндә дә пионер олмаг истәји јаранды”. Валидејн нәсиһәти вә гајғысынын ваҹиб ролу һагда данышараг, Дејвид әлавә едир: “Һәр ахшам анам бизә “Итирилмиш ҹәннәтдән гајтарылмыш ҹәннәтә гәдәр” (рус.) китабындан һекајәләр охујурдуa. Анам бу китабы елә охујурду ки, биздә руһани гидаја һәвәс ојанырды”.

Јығынҹаг ҝөрүшләринә мәһәббәт

Бә’зи ҝәнҹләр мәсиһчи ҝөрүшләринә һәвәссиз ҝедирләр. Онлар бу ҝөрүшләрдә валидејнләринин тәһрики илә олурлар. Лакин онлар јығынҹаға ҝетмәјә давам етдикҹә, вахты ҝәләндә белә ҝөрүшләри гијмәтләндирәҹәкләр. Он бир јашында таммүддәтли хидмәтә башлајан Алфредо илә дә белә олмушдур. О е’тираф едир ки, беш јашы оланда јығынҹаг ҝөрүшләринә ҝетмәк истәмирди, чүнки ҝөрүшләрдә ону јуху тутурду, валидејнләри исә она ҝөрүш вахты јатмаға иҹазә вермирдиләр. О хатырлајыр: “Бөјүдүкҹә јығынҹаг ҝөрүшләри мәнә даһа мараглы олурду. Мән охумағы вә јазмағы өјрәндикдән сонра өз сөзләримлә ҹаваб вермәјә башладығым үчүн, јығынҹаг ҝөрүшләринә марағым хүсусилә артды”.

Пионер кими хидмәт едән 17 јашлы Синтија адлы бир гыз данышыр ки, јахшы үнсијјәт даирәсинин онун Аллаһа хидмәтә гаршы мәһәббәтинә бөјүк тә’сири олмушдур. О дејир: “Јығынҹағымдакы баҹы-гардашларла достлуг мүнасибәти, еләҹә дә мүнтәзәм олараг ҝөрүшләрдә иштирак етмәјим сајәсиндә, дүнјәви достларым вә ҝәнҹләр арасында популјар сајылан дискотекалар кими әјләнҹәләр үчүн дарыхмырам. Ҝөрүшләрдә сәсләнән ҹаваблар вә әһвалатлар мәндә, малик олдуғум һәр шеји Јеһоваја вермәк истәји ојадырды. Мән әминәм ки, малик олдуғум вә һал-һазырда верә биләҹәјим ән јахшы шеј ҝәнҹлијимдир. Буна ҝөрә дә ҝәнҹлик илләрими Аллаһа хидмәтә һәср етмәји гәрара алдым”.

Лакин Синтија е’тираф едир: “Вәфтиз олунмамышдан әввәл вахт вар иди ки, ев тапшырыгларынын јеринә јетирилмәмәси, јахуд мәктәб тәдбирләри кими мүхтәлиф бәһанәләр ҝәтирәрәк, ҝөрүшләри асанлыгла бурахырдым. Бир нечә ҝөрүшү бурахдым, бу исә мәним руһани инкишафыма тә’сир етмәјә башлады. Мән Мүгәддәс Китабла марагланмајан оғланла достлуг етмәјә башладым. Һәр шејин өһдәсиндән ҝәлмәкдә мәнә көмәк етдији үчүн Јеһоваја миннәтдарам”.

Шәхси гәрар

Јеһоваја таммүддәтли хидмәт едән Пабло адлы бир ҝәнҹдән сорушдугда ки, онун фикринҹә Аллаһын Кәламындакы һәгигәтә мәһәббәти дәринләшдирмәјә нә көмәк едир, о ҹаваб верди: “Мәним зәннимҹә, ики шәрт вар: мүнтәзәм олараг шәхси өјрәнмә вә тәблиғ хидмәтиндә сә’јлә иштирак етмәк. Валидејнләримә миннәтдарам ки, онлар мәни Јеһованын һәгигәтинә өјрәдибләр. Бу, валидејнләримин мәнә вердикләри ән ҝөзәл һәдијјәдир. Лакин Јеһованы нә үчүн севирәм суалына шәхсән өзүм ҹаваб вермәлијәм. Ҹаваб вермәк үчүн исә, Мүгәддәс Китаб һәгигәтләринин ‘ҝенишлијини вә дәринлијини’ билмәк лазымдыр. Јалныз о заман башгаларына һәгигәт һаггында данышмаг үчүн үрәкләримиздә “јанар бир атәш” олан Јеһованын Кәламына сусајаҹағыг. Сә’јли хидмәтимиз һәгигәтә олан мәһәббәтимизи сөнмәјә гојмајаҹагдыр” (Ефеслиләрә 3:18; Јеремја 20:9).

Јухарыда адыны чәкдијимиз Хакоб Еммануел дә һесаб едир ки, Јеһоваја хидмәт етмәји һәр кәс өзү гәрара алмалыдыр. Валидејнләри ону һеч вахт вәфтиз олунмаға мәҹбур етмирдиләр. “Вахт ҝөстәрди ки, онлар чох мүдрик давранмышлар. Мисал үчүн, јахын достларымдан бә’зиләри бир ҝүндә вәфтиз олунаҹаглары гәрарына ҝәлдиләр. Әлбәттә, бурада пис бир шеј јох иди, лакин мән баша дүшүрдүм ки, бә’зиләри јалныз һиссләрә гапылараг вәфтиз олунурдулар, бир мүддәт кечдикдән сонра исә онлар Падшаһлыг ишләринә сә’јлә јанашмаға сон гојдулар. Мәни исә валидејнләрим Јеһоваја һәср олунмаға мәҹбур етмәдиләр. Мән өзүм бу гәрара ҝәлдим”.

Јығынҹағын ролу

Бә’зи ҝәнҹләр Аллаһын Кәламындакы һәгигәти валидејнләриндән ешитмәјибләр. Онлар үчүн дүзҝүн давранмағы өјрәнмәк вә сечдикләри јолла ҝетмәк хүсусилә чәтиндир.

Ное адлы бир ҝәнҹ һәгигәтин она неҹә мүсбәт тә’сир ҝөстәрдијини хатырлајыр. О, ушаглыгдан гәзәбли вә залым иди. 14 јашында икән Мүгәддәс Китабы өјрәнмәјә башладыгда, онун характериндә әһәмијјәтли дәјишикликләр баш вермәјә башлады. Онун валидејнләри һәмин вахт Мүгәддәс Китабла марагланмасалар да, белә дәјишиклијә чох севинирдиләр. Ное руһән инкишаф етдикҹә, һәјатыны Аллаһа хидмәт етмәјә даһа чох һәср етмәк истәјирди. О, һал-һазырда таммүддәтли хидмәтчидир.

Валидејнләринин һәгигәтә лагејдлик ҝөстәрмәләринә бахмајараг, Алеһандро да Мүгәддәс Китабла чох ҝәнҹ јашларындан марагланмаға башламышдыр. Алеһандро, һәгигәти чох гијмәтләндирир. О дејир: “Мән католик аиләсиндә бөјүмүшәм. Ушаглыгдан мәни нараһат едән суаллара килсәдә ҹаваб тапмадығым үчүн, коммунистләлрин јајдығы атеизмә даһа чох һәвәс ҝөстәрмәјә башладым. Јеһованын Тәшкилаты Аллаһ һаггында билик әлдә етмәјимә көмәк етди вә бу билик һәгиги мә’нада һәјатымы хилас етди. Чүнки Мүгәддәс Китабы өјрәнмәјә башламасајдым, јәгин ки, әхлагсызлығын, алкоголизмин вә ја наркоманијанын чиркабына батардым. Мән һансыса ингилаби дәстәјә гошулардым вә бунун мәни һара апарыб чыхараҹағыны дүшүнмәк белә дәһшәтлидир”.

Валидејн тәрәфиндән мә’нәви көмәји олмајан бир ҝәнҹ, һәгигәти ахтармаға давам етмәји вә ону горујуб сахламағы неҹә баҹара биләр? Ваҹиб ролу, ағсаггаллар вә јығынҹағын диҝәр үзвләри тәрәфиндән ҝөстәрилән көмәк ојнајыр. Ное хатырлајыр: “Мән өзүмү һеч вахт тәрк олунмуш һисс етмирдим, чүнки Јеһова һәр заман мәнимлә иди. Бундан әлавә, мәним үчүн руһани мә’нада аталар, аналар вә гардашлар олан мәһәббәтлә долу баҹы-гардашлар дајаг олурдулар”. Инди о, вахтыны Аллаһа хидмәтә һәср едәрәк, Бејт-Елдә чалышыр. Алеһандро исә хатырлајыр: “Мән јығынҹағын ағсаггалларына вә онларын мәнә гаршы ҝөстәрдикләри шәхси диггәтләринә ҝөрә һәр заман миннәтдар олаҹағам. Мүгәддәс Китабы јениҹә өјрәнмәјә башладығым заман мәнә гаршы ҝөстәрилән белә диггәт мәним үчүн хүсусилә ваҹиб иди. 16 јашым варды вә мән дә, бир чох һәмјашыдларым кими, һәјатда өзүмә јер тапа билмирдим. Јығынҹагда олан аиләләр вә бә’зи баҹы-гардашлар гонагпәрвәрлик ҝөстәриб, мәнимлә тәкҹә евләрини вә јемәкләрини дејил, һәтта үрәкләрини дә бөлүшәрәк, һәмишә көмәк едирдиләр”. Алеһандро артыг 13 илдән чохдур ки, таммүддәтли хидмәтдә чалышыр.

Бә’зиләри зәнн едирләр ки, дин јашлылар үчүндүр. Лакин Мүгәддәс Китаб һәгигәтини ушаглыгдан ешитмиш бир чох ҝәнҹ оғлан вә гызлар, Јеһованы севир вә Она сәдагәтлә хидмәт етмәјә давам едирләр. Бу ҝәнҹләр һаггында Мәзмур 110:3 ајәсиндә олан сөзләри демәк олар: “Сәнин гүдрәтин ҝүнүндә халгын мүгәддәс ҝөзәллик ичиндә көнүллү гурбанлардыр. Сәнин ҝәнҹләрин сәһәрин бағрындан доған шеһ кимидир”.

Ҝәнҹләр үчүн һәгигәти өјрәнмәк вә сечдикләри јолла ҝетмәк һеч дә асан дејил. Неҹә дә севиндириҹидир ки, бир чох ҝәнҹ оғлан вә гызлар Јеһованын тәшкилаты илә әмәкдашлыг етмәк, мүнтәзәм олараг ҝөрүшләрә ҝетмәк вә Мүгәддәс Китабы сә’јлә өјрәнмәк сајәсиндә Аллаһын Кәламыны вә мүгәддәс хидмәти әсл мә’нада севә билмишләр (Мәзмур 119:15, 16).

[Һашијә]