Дин мәним сечимимдир, јохса валидејнләримин?

ПОЛШАДА тәблиғ заманы Јеһованын Шаһидләринә чох вахт дејирләр: «Мәним өз диним вар, өләнә кими дә онда галаҹағам». Бу о демәкдир ки, онларын зәннинҹә, дин нәсилдән-нәслә өтүрүлмәлидир. Сизин әразидә дә динә гаршы белә мүнасибәт мүшаһидә олунурму? Адәтән, белә дүшүнҹә тәрзинин нәтиҹәси нә олур? Дин садәҹә формал характер дашымаға башлајыр вә аилә әнәнәсинә чеврилир. Ејни һал дәјәрли руһани һәгигәтләри валидејнләриндән, јахуд нәнә-бабаларындан мирас алан Јеһованын Шаһидләри илә дә баш верә биләрми?

Садиг анасы вә нәнәси тәрәфиндән һәгиги Аллаһа мәһәббәт вә иман ашыланан Тимотеј үчүн дин бу ҹүр формал характер дашымырды. Тимотеј Мүгәддәс Јазылары ‘ушаглыгдан етибарән билирди’. Мүәјјән вахтдан сонра о, анасы вә нәнәси илә бирҝә мәсиһчилијин һәгигәт олдуғуна иман ҝәтирди. О, Мүгәддәс Јазылардан Иса Мәсиһлә бағлы ешитдикләринә шәхсән ‘әмин олду’ (2 Тим. 1:5; 3:14, 15). Бу ҝүн мәсиһчи валидејнләр өвладларынын Јеһованын хидмәтчиләри олмасы үчүн әлләриндән ҝәләни етсәләр дә, бу истәји ушагларын өзләри инкишаф етдирмәлидирләр (Марк 8:34).

Јеһоваја мәһәббәтдән ирәли ҝәләрәк хидмәт етмәк вә сынаглара бахмајараг, Она садиг галмаг истәјән һәр бир кәс әсаслы дәлилләр сајәсиндә өјрәндикләринин һәгигәт олдуғуна әмин олмалыдыр. Онда онун иманы сарсылмаз олаҹаг вә дәрин көк салаҹаг (Ефес. 3:17, 18; Колос. 2:6, 7).

Ушагларын вәзифәси

Јеһованын Шаһидләри аиләсиндә боја-баша чатмыш Албертa дејир: «Јеһованын Шаһидләринин дининин һәгигәт олдуғуну һәмишә билирдим, анҹаг бир ара онларын һәјат тәрзини гәбул етмәк мәним үчүн чәтин иди». Әҝәр сән ҝәнҹсәнсә, јәгин, сән дә онун фикринә шәриксән. Аллаһын ирадәсини јеринә јетирмәк сәнә зөвг версин дејә нәјә ҝөрә сәј ҝөстәриб Онун биздән һансы һәјат тәрзи сүрмәјимизи истәдијини арашдырмајасан? (Мәз. 40:8). Алберт дејир: «Мән садәҹә дуа етмәјә башладым. Башланғыҹда бу һеч дә асан дејилди. Өзүмү мәҹбур етмәли олурдум. Лакин тезликлә баша дүшдүм ки, дүзҝүн оланы етмәјә чалышсам, Аллаһын ҝөзүндә дәјәрли ола биләрәм. Бу, мәнә лазыми дәјишикликләр етмәјә көмәк етди». Јеһова илә шәхси мүнасибәтләрини мөһкәмләндирмәклә өзүндә Онун тәләбләрини һәјата кечирмәк арзусуну јетишдирә биләрсән (Мәз. 25:14; Јаг. 4:8).

Нә вахтса ојнадығын столүстү ојун, јахуд һансыса идман нөвү барәдә дүшүн. Әҝәр ојунун гајдалары илә таныш дејилсәнсә вә ја јахшы ојнамағы баҹармырсанса, ојун сәнин үчүн марагсыз олаҹаг. Амма гајдалары вә ојнамағы өјрәнсән, сөзсүз ки, ојнајаҹағын вахты сәбирсизликлә ҝөзләјәҹәк, һәтта бунун үчүн фүрсәт ахтараҹагсан. Ејни шеји руһани фәалијјәтимиз барәдә дә демәк олар. Буна ҝөрә дә мәсиһчи ҝөрүшләринә һазырлашмаг үчүн өзүн тәшәббүс ҝөстәр. Буну башдансовду етмә. Ҝәнҹ олсан да, сәнин нүмунән башгалары үчүн тәшвигедиҹи ола биләр! (Ибр. 10:24, 25).

Јухарыда дејиләнләри етигадымызы башгалары илә бөлүшмәјә дә шамил едә биләрик. Сән буну мәҹбури јох, мәһәббәтдән ирәли ҝәләрәк етмәлисән. Өзүндән соруш: «Мән башгаларына Јеһова һаггында нәјә ҝөрә данышмаг истәјирәм? Ону севмәк үчүн һансы сәбәбләрим вар?» Сән Јеһованын мәһәббәтли Ата олдуғуну өјрәнмәлисән. О, Јеремја васитәсилә демишди: «Мәни ахтараҹагсыныз, әҝәр бүтүн гәлбинизлә ахтарсаныз, тапаҹагсыныз» (Јер. 29:13, 14). Бунун үчүн сәндән нә тәләб олуна биләр? Јагуб адлы бир ҝәнҹ белә дејир: «Мән дүшүнҹә тәрзими дәјишмәли олдум. Ушаглыгдан јығынҹаг ҝөрүшләринә вә хидмәтә ҝедирдим, лакин бунлар мәним үчүн ади бир шеј иди. Јалныз Јеһованы јахшы таныдыгдан вә Онунла сых мүнасибәт гурдугдан сонра, демәк олар ки, һәгигәт үрәјимә јол тапды».

Руһландырыҹы, ҝөзәл үнсијјәтин дә хидмәтимиздән бөјүк севинҹ әлдә етмәјимиздәки ролу данылмаздыр. «Һикмәтли илә отуруб-дуран һикмәт газанар»,— дејә бир мәсәлдә гејд едилир (Сүл. мәс. 13:20). Руһани мәгсәдләрә ҹан атан вә Јеһоваја хидмәтдән севинҹ дујан инсанларла достлуг ет. Јола адлы баҹымыз дејир: «Фикир вермишәм ки, Јеһоваја ҹанла-башла хидмәт едән ҝәнҹләрлә үнсијјәтдә олмаг чох руһландырыҹыдыр. Бунун сајәсиндә хидмәтдә мүнтәзәм олараг иштирак етмәјә башладым вә севинҹим бирә-беш артды».

Валидејнләрин ролу

«Мәнә Јеһова һаггында өјрәтдикләринә ҝөрә валидејнләримә өмрүм боју миннәтдар олаҹағам»,— дејә Јола сөзүнә давам едир. Һәвари Павел јазмышды: «Еј аталар,.. ушагларынызы... Рәббин тәрбијә вә нәсиһәти илә бөјүдүн» (Ефес. 6:4). Аллаһдан илһам алмыш бу мәсләһәтдән ајдын ҝөрүнүр ки, валидејнләрин вәзифәси ушагларына өзләринин јох, Јеһованын јолларыны өјрәтмәкдир. Валидејнләр онларын гаршысына өзләри истәдикләри мәгсәдләри гојмагданса, неҹә дә јахшы оларды ки, Јеһованын нијјәтинә ујғун јашамағын һәјатларында әсас мәгсәд олмасына көмәк етсинләр!

Сиз Јеһованын кәламларыны ушагларыныза ашылаја вә ‘евдә отуранда, јол ҝедәндә, јатанда, дуранда бунлар барәдә даныша’ биләрсиниз (Ганун. т. 6:6, 7). Үч оғул бөјүтмүш Ева вә Ришард хатырлајыр: «Биз тез-тез таммүддәтли хидмәтин мүхтәлиф нөвләриндән сөһбәт ачардыг». Бу, һансы бәһрәләри ҝәтирди? «Ушаглар артыг еркән јашларында Теократик Хидмәт Мәктәбинә јазылмаг истәдиләр, тәблиғчи олдулар вә нәтиҹәдә, өзләри вәфтиз олмаг гәрарына ҝәлдиләр. Сонралар онлардан кимиси бет-елли, кимиси исә пионер олду».

Валидејнләрин јахшы нүмунә вермәси чох ваҹибдир. Ришард дејир: «Биз икили һәјат тәрзи сүрмәмәјә, јәни евдә бир ҹүр, јығынҹагда исә башга ҹүр давранмамаға гәти гәрарлы идик». Буна ҝөрә дә өзүнүздән сорушун: «Ушаглар мәндән нә ҝөтүрүр? Јеһованы һәгигәтән дә севдијими ҝөрүрләрми? Бу мәһәббәт дуаларымда вә шәхси өјрәнмәмдә әкс олунурму? Буну тәблиғ хидмәтинә, әјләнҹәләрә вә мадди шејләрә мүнасибәтимдә, о ҹүмләдән јығынҹаг үзвләри барәдә сөһбәтимдә ҝөрүрләрми?» (Лука 6:40). Ушаглар валидејнләринин давранышыны мүшаһидә едир вә сөзләри илә әмәлләри арасында ҹүзи тәзад белә онларын нәзәриндән гачмыр.

Ушагларын тәрбијәсиндә интизам тәдбирләри бөјүк рол ојнајыр. Амма Аллаһын Кәламы бизә ‘ушағы ҝедәҹәји јола ҝөрә јетишдирмәји’ мәсләһәт ҝөрүр (Сүл. мәс. 22:6, КМ). Ева вә Ришард дејир: «Биз һәр ики оғлумузла ајры-ајрылыгда Мүгәддәс Китаб өјрәнмәси кечирмәк үчүн вахт ајырырдыг». Әлбәттә, ушагларынын ајры-ајрылыгда белә өјрәнмәјә еһтијаҹлары олуб-олмадығына валидејнләр гәрар верирләр. Амма һәр ушағын фәрди јанашмаја еһтијаҹы вар. Бунун үчүн дәрракә вә мүдриклик тәләб олунур. Мәсәлән, ушагларыныза садәҹә һансыса мусигинин пис олдуғуну демәкдәнсә, онлара мүдрик гәрарлар гәбул етмәји вә бунун һансы Мүгәддәс Китаб принсипләри илә бағлы олдуғуну өјрәтмәк даһа јахшы олмаздымы?

Ола билсин, ушагларыныз онлардан нә тәләб етдијинизи јахшы билирләр вә сизә елә ҝәлә биләр ки, онлар сизин истәкләринизә әмәл едирләр. Бунунла белә, һәлә дә онларын үрәјинә јол тапмаг лазымдыр. Унутмајын, «үрәјин дүшүнҹәләри дәрин сулара охшар, дәрракәли адам ону чәкиб чыхарар» (Сүл. мәс. 20:5). Ҝөзүачыг олун, ушағынызын үрәјиндә олан проблемин һәр бир әламәтини сезмәјә чалышын вә дәрһал тәдбир ҝөрүн. Иттиһам етмәдән нараһат олдуғунузу ҝөстәрин вә мүнасиб суаллар верин. Амма һәддән артыг чох сорғу-суала тутмајын. Сәмими нараһатчылығыныз онларын үрәјинә јол тапаҹаг вә сиз онлара көмәк едә биләҹәксиниз.

Јығынҹағын вәзифәси

Аллаһын бир хидмәтчиси кими, сән јығынҹагдакы ҝәнҹләрә руһани мирасларыны гијмәтләндирмәјә көмәк едә биләрсәнми? Ушагларын тәрбијәсиндә валидејнләр әсас рол ојнаса да, јығынҹағын диҝәр үзвләри, әсасән дә ағсаггаллар онларын әмәјини дәстәкләјә биләрләр. Дини ҹәһәтдән бөлүнмүш аиләләрин буна хүсусилә еһтијаҹы вар.

Ҝәнҹләрин Јеһованы севмәси вә өзләрини лазымлы вә дәјәрли һисс етмәләри үчүн ағсаггаллар нә едә биләрләр? Полшада јығынҹагларын бириндә ағсаггал кими хидмәт едән Мариуш гардаш дејир: «Ағсаггаллар ҝәнҹләрлә үнсијјәт етмәли, үнсијјәт етмәли, јенә дә үнсијјәт етмәлидирләр! Буну јалныз проблемләр јарананда јох, һәмчинин хидмәтдә, ҝөрүшдән сонра, јахуд чај сүфрәси архасында да етмәк олар». Нәјә ҝөрә ҝәнҹләрлә сөһбәт заманы јығынҹагда ишләринин неҹә ҝетдији илә марагланмајасан? Белә ачыг үнсијјәт ҝәнҹләрә јығынҹаға даһа чох бағланмаға вә өзләрини онун бир һиссәси олдугларыны һисс етмәјә көмәк едир.

Әҝәр сән ағсаггалсанса, јығынҹағындакы ҝәнҹләрлә јахындан таныш олурсанмы? Јухарыда ады чәкилән Алберт инди ағсаггал олса да, јенијетмәлик јашларында мүхтәлиф чәтинликләрлә үзләширди. О дејир: «Бир јенијетмә кими, ағсаггал башчәкмәсинә чох еһтијаҹым варды». Аллаһа хидмәтдә уғур газанмалары үчүн ағсаггаллар ҝәнҹләрә ҝөрә дуа етмәклә дә онларла шәхсән марагландыгларыны ҝөстәрә биләрләр (2 Тим. 1:3).

Ҝәнҹләрин јығынҹаг ишләриндә јахындан иштирак етмәси зәруридир. Әкс тәгдирдә, онлар дүнјәви мәгсәдләрә ҹан атаҹаглар. Сиз бөјүкләр, онларла хидмәтә чыха вә достлаша биләрсинизми? Сәмими вә меһрибан аб-һава јарадараг асудә вахтыны ҝәнҹләрлә кечир. Јола хатырлајыр: «Бир пионер баҹы мәнә хүсуси диггәт јетирирди. Илк дәфә иди ки, мән хидмәтә көнүлсүз ҝетмирдим».

Сәнин шәхси сечимин

Еј ҝәнҹләр, өзүнүзә суал верин: «Гаршыма һансы мәгсәдләри гојмушам? Әҝәр һәлә вәфтиз олунмамышамса, буна ҹан атыраммы?» Вәфтиз олмаг гәрары аиләмизин хатиринә јох, Јеһоваја дәрин мәһәббәт һиссиндән ирәли ҝәләрәк гәбул едилмәлидир.

Гој Јеһова сәнин һәгиги достун, һәгигәт исә хәзинән олсун. Јеһова Јешаја пејғәмбәр васитәсилә әминлик верир: «Дәһшәтә ҝәлмә, чүнки Аллаһын Мәнәм». Бәли, нә гәдәр ки Јеһованын достусан, О, сәни әсла тәрк етмәјәҹәк. О, һөкмән сәни гүввәтләндирәҹәк вә ‘садиг сағ әли илә сәнә дајаг олаҹаг’ (Јешаја 41:10).

[Һашијә]

[4-ҹү сәһифәдәки шәкил]

Ушағынын үрәјиндә оланлары сезмәјә чалыш

[6-ҹы сәһифәдәки шәкил]

Вәфтиз олунмаг гәрары Јеһоваја дәрин мәһәббәтдән ирәли ҝәлир