Јеһова Онунла таныш олмаға лајиг Аллаһдыр

ҺӘЈАТЫНЫЗДА ваҹиб олан нәји исә әлдән вермирсиниз ки? Әҝәр Аллаһ һаггында олан билијиниз аздырса, онда вәзијјәт мәһз беләдир. Нәјә ҝөрә? Она ҝөрә ки, милјонларла инсанларын дәрк етдији кими, Мүгәддәс Китабда тәсвир олунан Аллаһ һаггында билик әлдә етмәк һәјатда әһәмијјәтли дәрәҹәдә фајда ҝәтирир. Бу фајда дәрһал һисс едилир вә даһа сонра да давам едир.

Мүгәддәс Китабын Мүәллифи Јеһова Аллаһ истәјир ки, биз Ону таныјаг. Мәзмурчу јазырды: “Та ки, билсинләр, сән ки исмин Рәбдир [“Јеһовадыр”, ЈД], бүтүн дүнја үзәриндә јалныз сән Уҹасан”. Аллаһ билир ки, Ону танымаг бизим шәхси рифаһымыза хидмәт едир. “Фајдалы оланы сәнә өјрәдән... Аллаһын Рәбб [“Јеһова”, ЈД] мәнәм”. Уҹа олан Јеһова Аллаһла таныш олараг биз һансы фајданы әлдә едирик? (Мәзмур 83:18; Ишаја 48:17).

Реал фајдалардан бири одур ки, Аллаһ бизә ҝүндәлик проблемләрин өһдәсиндән ҝәлмәкдә рәһбәрлик ҝөстәрир, һәмчинин дахили раһатлыг вә ҝәләҹәјә мөһкәм үмид верир. Бундан әлавә, Јеһова илә јахындан таныш олараг, бу ҝүн бүтүн дүнјада инсанлары нараһат едән һәјати суаллара башга ҹүр јанашмаға башлајырыг. Бу һансы суаллардыр?

Һәјатынызын мә’насы вармы?

Валеһедиҹи елми вә техники инкишафлара бахмајараг, инсанлар јенә дә: “Мән нә үчүн јашајырам?” “Ҝәләҹәкдә мәни нә ҝөзләјир?” “Һәјатын мә’насы нәдәдир?” кими һәјати ваҹиб суаллара ҹаваб ахтарырлар. Инсан бу кими суаллара гәнаәтбәхш ҹаваб алмазса, јашамаг үчүн мәгсәди олмајаҹаг. Инсанлар һәјатларында руһани бошлуг һисс едирләрми? 1990-ҹы илләрин ахырларында Алманијада апарылан арашдырма заманы сорғуда иштирак едәнләрин јарысы гејд етмишләр ки, чох вахт вә ја бә’зән онлара елә ҝәлир ки, һәјатын мә’насы јохдур. Еһтимал ки, сизин јашадығыныз әразидә дә вәзијјәт бу ҹүрдүр.

Инсан һәјатда мә’на ҝөрмәјәндә, үзәриндә ҝәләҹәјини гура биләҹәји бүнөврәси олмур. Кар­је­ра гурмаға вә ја вар-дөвләт топламаға чалышараг, бир чохлары бу бошлуғу долдурмаға чалышырлар. Лакин бошлуг онлары тәрк етмир. Һәјатын мә’насыз олмасы бә’зиләрини елә вәзијјәтә ҝәтириб чыхарыр ки, онлар артыг јашамаг истәмирләр. Һаггында “Интернешонал Һералд Трибун”да јазылан ҝөзәл ҝәнҹ бир гадынла да вәзијјәт белә олмушдур. О, “ағласығмаз вар-дөвләт вә һүдудсуз имтијазлар ичиндә” бөјүмүшдүр. Ҹаһ-ҹәлал ичиндә јашамасына бахмајараг, өзүнү тәнһа һисс едир вә һәјатынын мә’насыз олдуғуну дүшүнүрдү. Бу гадын дәрман гәбул етмиш вә ону өлү тапмышдылар. Еһтимал ки, сиз фаҹиәли тәрздә өлән башга тәнһа адамлары да таныјырсыныз.

Инсанларын елм сајәсиндә һәјатын бүтүн сирләринин ачылаҹағыны иддиа етдикләрини ешитмисинизми? “Вохе” һәфтәлик алман гәзетиндә дејиләнләрә диггәт јетирин: “Елм бүтүн доғрулуғу илә руһани рәһбәрлик верә билмир. Ҝөрүнүр, тәкамүл нәзәријјәси кифајәт гәдәр инкишаф етмәмишдир вә һәтта кванта физикасы белә өзүнүн бүтүн ҝөзләнилмәз флуктуасијалары илә тәсәлли вә тәһлүкәсизлик һисси верә билмир”. Елми кәшфләр, һәјатын мүхтәлиф формаларыны тәсвир етмәк вә һәјаты давам етдирән тәбиәт дөврәләрини вә баш верән просесләри изаһ етмәк үчүн чох көмәк етмишдир. Лакин елм, нә үчүн јашадығымызы вә ҝәләҹәкдә бизи нә ҝөзләдијини изаһ едә билмир. Јалныз елмә әсасландығымыз үчүн, һәјатын мә’насы һаггында суалларымыз ҹавабсыз галыр. “Зүддојче сајтунг” гәзетинин сөзләринә ҝөрә, инсанлар белә нәтиҹәјә ҝәлмишләр ки, “рәһбәрлијә һәр јанда еһтијаҹ дујулур”.

Јараданын вердији рәһбәрликдән даһа јахшы рәһбәрлији ким верә биләр? Мадам ки, башланғыҹдан инсанлары јер үзүндә јерләшдирән Одур, онларын нәјә ҝөрә јашадыгларыны да О билир. Мүгәддәс Китабда нәгл едилир ки, Јеһова инсанлары јер үзүнү мәскун етмәләри вә она гајғы ҝөстәрмәләри, јер күрәсинин мүһафизәчиси олмалары үчүн јаратмышды. Инсанлар бүтүн әмәлләриндә Аллаһа хас олан әдаләт, мүдриклик вә мәһәббәт кими хүсусијјәтләри әкс етдирмәли идиләр. Јеһованын бизи һансы мәгсәдлә јаратдығыны билдикдә, нә үчүн јашадығымызы даһа јахшы баша дүшүрүк (Тәквин 1:26-28).

Нә етмәк олар?

Әҝәр: “Мән нә үчүн јашајырам?” “Мәни неҹә ҝәләҹәк ҝөзләјир?” “Һәјатын мә’насы нәдәдир?” кими суаллара ҹаваб тапмамысынызса, онда неҹә? Мүгәддәс Китаб сизә Јеһова илә јахындан таныш олмағы мәсләһәт ҝөрүр. Иса өзү белә демишдир: “Әбәди һәјат о демәкдир ки, Сәни, ваһид һәгиги Аллаһы вә ҝөндәрдијин Иса Мәсиһи танысынлар”. Мүгәддәс Китаб һәмчинин тәшвиг едир ки, биз Аллаһа мәгбул хүсусијјәтләри, хүсусилә дә мәһәббәти инкишаф етдирәк вә јахынлашмагда олан Аллаһын Хиласкар Падшаһлығынын рәһбәрлији алтында јашамаға вар гүввәмизлә ҹәһд ҝөстәрәк. Әҝәр белә даврансаныз, һәјатыныз мә’налы олаҹаг вә ҝәләҹәјә ҝөзәл, мөһкәм үмид әлдә едәҹәксиниз. Вә сизи индијә кими чәтинлијә салан һәјати суаллар, еһтимал ки, артыг нараһат етмәјәҹәк (Јәһја 17:3; Ваиз 12:13).

Бу доғруданмы белә ваҹибдир? Бунун нә гәдәр ваҹиб олдуғуну Һанс дејә биләрa. Әввәлләр о, Аллаһа бир гәдәр инанса да, бу онун һәјатына һеч ҹүр тә’сир ҝөстәрмирди. Һанс наркотик маддәләрә, позғун гадынлара, мотосиклетләрә алудә олмушду, һәмчинин хырда ҹинајәтләр төрәдирди. О хатырлајыр: “Мәним һәјатым бош кечирди, һәгиги мәмнунлуг дујмурдум”. Һансын тәхминән 25 јашы оланда Аллаһы даһа јахындан танымаг гәрарына ҝәлди вә Мүгәддәс Китабы диггәтлә охумаға башлады. Јеһова илә јахындан таныш олдугдан вә һәјатын нәјә ҝөрә дәјәрли олдуғуну дәрк етдикдән сонра, Һанс һәјат тәрзини дәјишмиш вә вәфтиз олунуб Јеһованын Шаһиди олмушдур. Һал һазырда артыг он илдир ки, таммүддәтли хидмәтдәдир. О, сәмимиликлә дејир: “Јеһоваја едилән хидмәт ән ҝөзәл һәјат јолудур. Буну һеч нә илә мүгајисә етмәк олмаз. Јеһова илә таныш олмағым һәјатымы мә’налы едиб”.

Әлбәттә, һәјатын мә’насы һаггында суал, инсанлары нараһат едән суаллардан јалныз биридир. Дүнјадакы вәзијјәт писләшдикҹә, даһа чох инсанлары башга бир ваҹиб суал нараһат едир.

Бәдбәхтликләр нәјә ҝөрә баш верир?

Бәдбәхтлик баш верәндә, инсаны бир суал чох дүшүндүрүр: Бу нә үчүн баш верди? Бәдбәхтликдән сонра инсанын нормал һәјата гајыда билмәси, әһәмијјәтли дәрәҹәдә бу суала дүзҝүн ҹаваб тапмасындан асылыдыр. Әҝәр инсан кифајәтләндириҹи ҹаваб алмазса, изтираб чәкәҹәк, һәтта гәддарлаша да биләр. Мисал үчүн, Брунинин башына ҝәлән һадисәјә бахаг.

Бруни адлы орта јашлы гадын сөјләјир: “Бир нечә ил әввәл көрпә гызым өлдү. Мән Аллаһа инанырдым вә буна ҝөрә тәсәлли үчүн кешишә мүраҹиәт етдим. О деди ки, Аллаһ мәним Зузаннамы ҝөјә апарыб вә инди о орада мәләкдир. Онун өлүмү үзүндән дүнјамын алт-үст олмасы аз имиш кими, һәлә үстәлик гызымы әлимдән алдығы үчүн Аллаһа да гәзәбләндим”. Бруни бир нечә ил шиддәтли изтираб чәкди. О давам едир: “О заман Јеһованын Шаһиди олан бир гадын, Мүгәддәс Китабдан ҝөстәрди ки, Аллаһа гәзәбләнмәјә һеч бир сәбәб јохдур. Јеһова Зузаннаны ҝөјә апармамыш вә гызым мәләк олмамышдыр. О, инсанын гејри-камиллији үзүндән хәстәләнмишдир. Зузанна өлүм јухусундадыр вә Јеһованын ону дирилдәҹәји ҝүнү ҝөзләјир. Мән һәмчинин өјрәндим ки, Јеһова инсанлары јер үзү ҹәннәтдә әбәдијјән јашамаг үчүн јарадыб вә Онун бу нијјәти тезликлә һәјата кечәҹәк. Јеһованын неҹә шәхсијјәт олдуғуну дәрк етмәјә башладыгда, мән Она даһа јахын олдум вә кечирдијим ағры азалмаға башлады” (Мәзмур 37:29; Һәвариләрин ишләри 24:15; Ромалылара 5:12).

Милјонларла инсанлар мүхтәлиф бәдбәхтликләр, мәсәлән, шәхси һәјатларында баш верән фаҹиәләр, мүһарибәләр, аҹлыг вә тәбии фәлакәтләр уҹбатындан изтираб чәкирләр? Бруни Јеһованын бәдбәхтликләримиздә ҝүнаһкар олмадығыны, һеч заман инсанларын изтираб чәкмәләрини истәмәдијини вә тезликлә пислији јох едәҹәјини Мүгәддәс Китабдан өјрәндикдә раһатлыг һисси дујду. Һагсызлығын артмасы — индики системин ‘ахыр ҝүнләриндә’ јашадығымыза әламәтдир. Сәбирсизликлә ҝөзләдијимиз ҝөзәл дәјишикликләр артыг чох јахындыр (2 Тимотејә 3:1-5; Матта 24:7, 8).

Аллаһла таныш олмағын үсулу

Һанс вә Бруни Аллаһ һаггында јалныз думанлы тәсәввүрләрә малик идиләр. Аллаһ һаггында чох билмәсәләр дә, Она инанырдылар. Анҹаг Јеһова һаггында дәгиг билик әлдә етмәјә вахт ајырмаға башладыгда, онларын сә’ји мүкафатланды. Онлар ҝүнүмүзүн ән зәрури суалларына ајдын ҹаваблар алдылар. Бу онлара дахили раһатлыг ҝәтирмиш вә ҝәләҹәјә мөһкәм үмид вермишдир. Милјонларла Јеһованын хидмәтчиләри буна бәнзәр һиссләри кечирмишләр.

Јеһова илә таныш олмаг истәјириксә, Онун ким олдуғуна вә биздән нә тәләб етдијинә даир мә’лумат верән Мүгәддәс Китабы диггәтлә өјрәнмәкдән башламаг дүз оларды. Биринҹи әсрдә јашајан бә’зи инсанлар бу ҹүр давранырдылар. Тарихчи вә һәким Лука мә’лумат верир ки, Веријадакы (Јунаныстан) јәһуди ҹәмијјәтинин үзвләри “бу тә’лимләр доғрудурму?” — дејәрәк һәр ҝүн Мүгәддәс Јазылары арашдырараг Аллаһ кәламыны [Павел вә Силадан] бөјүк шөвглә гәбул етдиләр” (Һәвариләрин ишләри 17:10, 11).

Биринҹи әсрин мәсиһчиләри дә бирликдә топлашыр вә јығынҹаг ҝөрүшләри кечирирдиләр (Һә­вариләрин ишләри 2:41, 42, 46; 1 Коринфлиләрә 1:1, 2; Галатијалылара 1:1, 2; 2 Салониклиләрә 1:1). Бу ҹүр јығынҹаглар инди дә кечирилир. Јеһованын Шаһидләри инсанлара Јеһоваја јахынлашмагда вә Она севинҹлә хидмәт етмәкдә јардым ҝөстәрмәк мәгсәдилә мүштәрәк ҝөрүшләр кечирирләр. Јахынлыгда јашајан Шаһидләрлә үнсијјәтдә олмаг даһа бир фајда ҝәтирәҹәк. Мадам ки, инсанлар тәдриҹән хидмәт етдикләри Аллаһа бәнзәмәјә башлајырлар, Јеһованын Шаһидләри — бу вә ја диҝәр тәрздә Јеһованын тәзаһүр етдирдији кејфијјәтләри әкс етдирирләр. Буна ҝөрә дә Шаһидләрлә үнсијјәтдә олмаг Јеһованы даһа јахшы танымаға көмәк едир (Ибраниләрә 10:24, 25).

Сиз соруша биләрсиниз: “Јалныз бир Шәхсијјәтлә таныш олмаг үчүн бу гәдәр сә’ј ҝөстәрмәк лазымдыр?” Сә’ј ҝөстәрмәк, сөзсүз ки, лазымдыр. Бәс наил олмаг истәдијимиз башга мәгсәдләрдә дә сә’ј тәләб олунмурму? Мәшһур идманчыларын мәшг заманы нә гәдәр сә’ј ҝөстәрдикләри һагда дүшүнүн. Мисал үчүн, олимпиада ојунларында ајаг хизәји үзрә јарышларда гызыл медал газанмыш франсалы идманчы Жан-Клод Кили бејнәлхалг јарышларда мүвәффәгијјәт газанмаг үчүн һансы шәртләрә әмәл едилмәли олдуғуну дејир: “Һазырлыға 10 ил габаг башламаг, илдән илә планлашдырмаг, ҝүнү-ҝүндән бу һагда дүшүнмәк лазымдыр... Бу, илдә 365 ҝүн әрзиндә әгли вә физики әмәкдир”. Бу гәдәр вахт вә сә’ј, ола билсин, јалныз 10 дәгигәлик јарышда иштирак етмәк үчүн тәләб олунур. Белә һалда, Јеһова һаггында билик әлдә едәрәк, нә гәдәр шејләрә наил олмаг мүмкүндүр!

Ҝүнү-ҝүндән мөһкәмләнән мүнасибәт

Һәјатда ваҹиб бир шеји ким әлдән гачырмаг истәјир? Һеч ким. Буна ҝөрә, әҝәр һәјатынызын һәгиги мә’насынын олмадығыны дүшүнүр вә ја бәдбәхтликләрин нәјә ҝөрә баш вердијини билмәк истәјирсинизсә, Јеһованы — һаггында Мүгәддәс Китабда бәһс олунан Аллаһы танымагда мөһкәм гәрарлы олун. Онун һаггында билик әлдә едәрәк, һәјатынызы јахшылашдыраҹагсыныз, бунун фајдасы исә даима һисс олунаҹаг.

Јеһова һаггында өјрәнмәји биз нә вахтса дајандыраҹағыгмы? Аллаһа онилликләр әрзиндә хидмәт едән инсанлар Онун һаггында өјрәндикләри вә өјрәнмәјә давам етдикләри шејләрә һәлә дә валеһ олурлар. Бу ҹүр билик әлдә етмәк просеси бизә хошбәхтлик ҝәтирир вә бизи Јеһова илә даһа јахынлашдырыр. Биз һәвари Павелин јаздығы бу сөзләрлә разылаша биләрик: “Еј Аллаһын зәнҝинлик вә һикмәт вә елминин дәринлији! Онун һөкмләри нә дәрәҹәдә ағласығмаз вә Онун јоллары нә дәрәҹәдә кәшфедилмәздир! Ахы Рәббин ағлыны ким дәрк етмишдир? Вә мәҝәр кимсә Она мәсләһәтчи олмушму?” (Ромалылара 11:33, 34).

[Һашијә]

[5-ҹи сәһифәдәки јазы]

Инсанлар јенә дә: “Мән нә үчүн јашајырам?” “Ҝәләҹәкдә мәни нә ҝөзләјир?” “Һәјатын мә’насы нәдәдир?” кими һәјати ваҹиб суаллара ҹаваб ахтарырлар.

[6-ҹы сәһифәдәки јазы]

“Јеһованын неҹә шәхсијјәт олдуғуну дәрк етмәјә башладыгда, мән Она даһа јахын олдум”.

[7-ҹи сәһифәдәки јазы]

“Јеһоваја едилән хидмәт ән ҝөзәл һәјат јолудур. Буну һеч нә илә мүгајисә етмәк олмаз. Јеһова илә таныш олмағым һәјатымы мә’налы едиб”.