Һәгиги тәсәллини һарадан тапмаг олар?
“Рәббимиз Иса Мәсиһин Аллаһы вә Атасы... бизә һәр сыхынтымызда тәсәлли верир” (2 КОРИНФЛИЛӘРӘ 1:3, 4).
1. Һансы вәзијјәтләрдә инсанлар тәсәллијә сон дәрәҹә еһтијаҹ дуја биләрләр?
ӘЛИЛ адам һәјатынын пуч олдуғуну дүшүнә биләр. Зәлзәләдән, туфандан вә ја гытлыгдан сонра инсанлар һәр шејдән мәһрум олурлар. Мүһарибә инсанын әзизләринин өлүмүнә, евинин виран галмасына вә ја хилас олмаг мәгсәдилә һәр шејини атараг гачмасына сәбәб ола биләр. Әдаләтсизлик инсанларда елә һисс јарада биләр ки, артыг һеч јандан көмәк ҝөзләмәјә үмидләри галмаз. Бу ҹүр фәлакәтләрә дүчар олан кәсләр тәсәллијә сон дәрәҹә еһтијаҹ дујурлар. Бәс тәсәллини һарадан тапмаг олар?
2. Нәјә ҝөрә Јеһованын вердији тәсәллијә бәрабәр тәсәлли јохдур?
2 Бә’зи инсанлар вә тәшкилатлар тәсәлли вермәјә ҹәһд ҝөстәрирләр. Хош сөзләр миннәтдарлыгла гәбул едилир. Мадди јардым инсанларын ҝүндәлик тәләбатларыны тә’мин едир. Лакин јалныз һәгиги Аллаһ олан Јеһова бүтүн зәрәри арадан галдыра биләр вә бу ҹүр фәлакәтләрин бир даһа тәкрарланмамасынын гејдинә гала биләр. Јеһова һаггында Мүгәддәс Китабда дејилир: “Рәббимиз Иса Мәсиһин Аллаһы вә Атасына һәмд олсун. О, мәрһәмәтли Ата вә һәр ҹүр тәсәлли верән Аллаһдыр. О, бизә һәр сыхынтымызда тәсәлли верир ки, биз дә һәр ҹүр сыхынты ичиндә оланлара, Аллаһын бизә вердији тәсәлли илә тәсәлли верә биләк” (2 Коринфлиләрә 1:3, 4). Бәс Јеһова бизә тәсәллини неҹә верир?
Проблемләрин көкү
3. Аллаһын вердији тәсәлли бәшәри проблемләрин көкүнү һансы тәрздә ачыглајыр?
3 Адәмин ҝүнаһы үзүндән бүтүн бәшәр аиләси гејри-камиллији мирас алды вә нәтиҹәдә өлүмә ҝәтириб чыхаран сајсыз-һесабсыз проблемләрә јол ачды (Ромалылара 5:12). Шејтан Иблис “бу дүнјанын рәиси” олдуғу үчүн вәзијјәт ҝет-ҝедә ағырлашыр (Јәһја 12:31; 1 Јәһја 5:19). Бәс Јеһова һансы тәдбири ҝөрдү? О, инсанларын дүшдүкләри аҹынаҹаглы вәзијјәтләрлә әлагәдар тәәссүф һисси билдирмәклә кифајәтләнмәди. Јеһова бизләри хилас етмәк үчүн ваһид Оғлуну фидијә олараг верди вә бизи әмин етди ки, әҝәр Оғула иман етсәк, Адәмин ҝүнаһынын нәтиҹәләриндән азад ола биләрик (Јәһја 3:16; 1 Јәһја 4:10). Аллаһ габагҹадан билдирди ки, ҝөјдә вә јер үзүндә бүтүн һакимијјәтә саһиб олан Иса Мәсиһ Шејтаны вә онун натәмиз дүнјасыны тамамилә мәһв едәҹәк (Матта 28:18; 1 Јәһја 3:8; Вәһј 6:2; 20:10).
4. а) Гуртулуша даир вә’дләринә е’тибарымызы мөһкәмләндирмәк үчүн Јеһова бизә нә вериб? б) Гуртулушун нә заман ҝәләҹәјини анламагда Јеһова бизә неҹә көмәк едир?
4 Аллаһ, Онун вә’дләринә е’тибарымызын мөһкәмләнмәси үчүн, габагҹадан дедији һәр бир шејин јеринә јетдијини сүбут едән чохсајлы дәлилләри горујуб сахламышдыр (Јешу 23:14). Аллаһ, инсан нөгтеји-нәзәриндән үмидсиз олан вәзијјәтләрдә хидмәтчиләрини азад етмәк үчүн һансы тәдбирләри ҝөрдүјүнү дә Мүгәддәс Китабда јаздырыб (Чыхыш 14:4-31; 2 Краллар 18:13–19:37). Бундан әлавә Јеһова Иса Мәсиһин васитәсилә ҝөстәрди ки, Онун нијјәтинә инсанлара ‘һәр нөв хәстәликдән’ шәфа вермәк, һәтта өләнләри һәјата гајтармаг да дахилдир (Матта 9:35; 11:3-6). Бүтүн бунлар нә заман олаҹаг? Мүгәддәс Китаб бу суала ҹаваб олараг, Аллаһын вә’д етдији јени ҝөјләрин вә јени јерин ҝәлмәсиндән әввәл мөвҹуд олан көһнә системин сон ҝүнләрини тәсвир едир. Исанын садаладығы әламәтләр бизим зәманәјә мүвафигдир (Матта 24:3-14; 2 Тимотејә 3:1-5).
Чәтин анларда тәсәлли
5. Јеһова гәдим Исраилә тәсәлли верәркән онларын диггәтини нәјә јөнәлдирди?
5 Јеһованын гәдим Исраилә олан мүнасибәтиндән, Онун чәтин анларда өз халгына неҹә тәсәлли вердијини өјрәнирик. О, исраиллиләрә өзүнүн неҹә Аллаһ олдуғуну хатырлатмышды. Бу исә, онларын Аллаһын вә’дләринә олан е’тибарыны мөһкәмләндирмишди. Јеһова пејғәмбәрләри васитәсилә Онунла бүтләр арасындакы фәрги ајдын сурәтдә тәсвир едирди. Бу тәсвирдә Јеһованын һәгиги вә јашајан Аллаһ, бүтләрин исә өзләринә вә хидмәтчиләринә көмәк етмәк игтидарында олмадыглары ајдын ҝөрүнүрдү (Ишаја 41:10; 46:1; Јеремја 10:2-15). Јеһова Ишајанын васитәсилә “тәсәлли един, халгымы тәсәлли един” дејәркән, пејғәмбәрини тәшвиг етди ки, јеҝанә һәгиги Аллаһ кими Онун бөјүклүјүнү вурғуламаг үчүн, јаратдыгларындан әјани нүмунә кими истифадә етсин (Ишаја 40:1-31).
6. Јеһова гуртулуш вахтына даир бә’зән нәји мә’лум едирди?
6 Бә’зән Јеһова, халгыны азад едәҹәји вахтын јахын вә ја узаг олдуғуну дәгиг мүәјјән етмәклә дә тәсәлли верирди. Мисирдән азад едилмәјин вахты јахынлашаркән, Аллаһ сыхынты ичиндә олан исраиллиләрә деди: “Артыг Фир’онун үзәринә вә Мисирин үзәринә бир бәла даһа ҝәтирәҹәјәм; ондан сонра сизи бурадан бурахаҹагдыр” (Чыхыш 11:1). Јеһошафат падшаһын ҝүнләриндә Јәһуда дијарына үч халгын бирләшмиш ордусу басгын етдикдә Јеһова јәһудиләрә билдирди ки, онлары мүдафиә етмәк үчүн “сабаһ” мүдахилә едәҹәкдир (2 Тарихләр 20:1-4, 14-17). Диҝәр тәрәфдән, јәһудиләрин Бабилдән азад олунмалары барәдә Ишаја тәхминән 200 ил габаг јазмыш, әлавә тәфсилатлар исә Јеремја тәрәфиндән, демәк олар ки, 100 ил әввәл тәсвир едилмишди. Гуртулуш вахты јахынлашдыгҹа һәмин пејғәмбәрликләр Аллаһын хидмәтчиләринә неҹә дә тәсәлли верирди! (Ишаја 44:26–45:3; Јеремја 25:11-14).
7. Гуртулуш һаггындакы вә’дләр чох вахт нә илә бағлы олурду вә бунлар садиг исраиллиләрә неҹә тә’сир едирди?
7 Гејд етмәк лазымдыр ки, Аллаһын халгына тәсәлли ҝәтирән вә’дләр чох вахт Мәсиһлә бағлы олурду (Ишаја 53:1-12). Бу, нәсилдән-нәслә садиг инсанлара үмид верир вә онлары чохсајлы сынагларда мөһкәмләндирирди. Лука 2:25 ајәсиндә охујуруг: “О заман Јерусәлимдә Шимон адында бир адам вар иди; салеһ вә мө’минди, Исраилин тәсәлли тапаҹағыны [әслиндә Мәсиһин ҝәлишини] ҝөзләјирди; вә Мүгәддәс Руһ онун үзәриндә иди”. Шимон Мүгәддәс Јазыларда Мәсиһлә бағлы пејғәмбәрликләри билир вә онун ҝәлишинә үмид бәсләјәрәк јашајырды. О, бүтүн бунларын неҹә баш верәҹәјини анламаса вә вә’д едилән гуртулушун реаллашдығы вахта гәдәр јашамаса да, Аллаһын ‘һазырламыш олдуғу гуртулушун’ ким олдуғуну билдикдә севинди (Лука 2:30).
Мәсиһ васитәсилә тәсәлли
8. Исанын ҝөстәрдији көмәк инсанларын бир чохунун үмидинә нә дәрәҹәдә мүвафиг ҝәлирди?
8 Иса Мәсиһ јер үзүндә хидмәт едәркән инсанлара, онларын лазым билдикләри көмәји һәмишә ҝөстәрмирди. Бә’зиләри, нифрәт бәсләдикләри Рома һөкмранлығындан онлары азад едәҹәк Мәсиһин ҝәлишини һәсрәтлә ҝөзләјирдиләр. Амма Иса ингилаб тәрәфдары дејилди; о, инсанлара “гејсәринкини гејсәрә... верин” деди (Матта 22:21). Аллаһын нијјәтинә, инсанлары һәр һансы сијаси режимин әсарәтиндән азад етмәкдән даһа ваҹиб шејләр дахил иди. Халг Исаны падшаһ етмәк истәјирди, анҹаг о деди ки, “бир чохлары үчүн ҹаныны фидијә олараг” верәҹәкдир (Матта 20:28; Јәһја 6:15). Онун һөкмранлыг етмәк вахты һәлә ҝәлмәмишди, һәмчинин о, падшаһлыг сәлаһијјәтини нараһат издиһамдан дејил, Јеһовадан гәбул етмәли иди.
9. а) Иса һансы тәсәлли хәбәрини бәјан едирди? б) Иса неҹә ҝөстәрирди ки, сөјләдији хәбәр инсанларын ҝүндәлик проблемләри илә бирбаша бағлыдыр? в) Иса хидмәт едәркән һансы тәмәли гојду?
9 Исанын вердији тәсәлли, Аллаһын Падшаһлығы һаггындакы хош хәбәрин бир һиссәси иди. О, бу хәбәри ҝетдији һәр бир јердә бәјан едирди (Лука 4:43). О, Хиласкар Һөкмдар кими бәшәријјәт үчүн едәҹәји ишләри ҝөстәрәрәк, инсанларын диггәтини тәблиғ етдији хош хәбәрә бирбаша онларын ҝүндәлик проблемләри илә бағлы олдуғуна јөнәлдирди. Иса изтираб чәкән инсанларын ҝөзләринә вә нитгинә шәфа вермәклә (Матта 12:22; Марк 10:51, 52), ифлиҹ олмуш үзвләрини сағалтмагла (Марк 2:3-12), һәмјерлиләрини дәһшәтли хәстәликләрдән (Лука 5:12, 13) вә ағыр дәрдләрдән азад етмәклә (Марк 5:25-29) онларда јашамаг истәји ојадырды. О, кәдәр ичиндә олан аиләләрә, онларын өлән ушагларыны дирилтмәклә бөјүк тәсәлли ҝәтирирди (Лука 7:11-15; 8:49-56). Иса ҝөстәрди ки, тәһлүкәли гасырғалары идарә етмәјә вә чохсајлы инсанларын гидаја тәләбатларыны тә’мин етмәјә дә гадирдир (Марк 4:37-41; 8:2-9). Бундан башга, Иса онлара неҹә јашамағы да өјрәдирди, онун тә’лимләри исә инсанлара мөвҹуд олан проблемләрин өһдәсиндән ҝәлмәкдә көмәк едир вә үрәкләриндә Мәсиһин әдаләтли һөкмранлығына үмиди аловландырырды. Беләликлә, Иса хидмәт едәркән һәмин вахт ону иманла динләјәнләрә тәсәлли вермәклә јанашы, инсанларын сонракы минилликләр боју тәсәлли тапмалары үчүн дә тәмәл гојду.
10. Исанын гурбанлығы сајәсиндә нәләр мүмкүн олду?
10 Исанын инсан һәјатыны гурбан вермәсиндән вә сәмави һәјата дирилдилмәсиндән 60 ил кечдикдән сонра, һәвари Јәһја Аллаһдан илһам алараг јазмышдыр: “Өвладларым! Бунлары сизә она ҝөрә јазырам ки, ҝүнаһ ишләтмәјәсиниз. Әҝәр бири ҝүнаһа батса белә, Атанын јанында Мүдафиәчијә, јә’ни адил олан Иса Мәсиһә маликик. О Өзү ҝүнаһларымыз вә јалныз бизим дејил, бүтүн дүнјанын ҝүнаһлары үчүн әфв тә’мин едән гурбандыр” (1 Јәһја 2:1, 2). Исанын камил инсан һәјатынын гурбанлығындан әлдә едилән фајдалар бизә бөјүк тәсәлли верир. Биз ҝүнаһларын әфвинә, тәмиз виҹдана, Аллаһын илтифатына, Онунла јахшы мүнасибәтләрә вә әбәди һәјат үмидинә малик ола биләрик (Јәһја 14:6; 1 Петер 3:21; Ромалылара 6:23; Ибраниләрә 9:24-28).
Мүгәддәс руһун ҝәтирдији тәсәлли
11. Иса өлүмүндән әввәл һансы тәсәлли мәнбәјини вә’д етди?
11 Иса, өзүнүн гурбанлыг өлүмүндән әввәлки сонунҹу ахшам һәвариләри илә сөһбәт едәркән, Атасынын тәгдим етдији даһа бир тәсәлли мәнбәјини хатырлатды. Иса деди: “Мән дә Атадан хаһиш едәҹәјәм ки, О, даим сизинлә бәрабәр олмаг үзрә сизә башга бир Тәсәлливериҹи [јунанҹа парáклитос] версин. Бу, һәгигәт Руһудур”. Сонра Иса онлара зәманәт верди: “Тәсәлливериҹи, Мүгәддәс Руһ сизә һәр шеји өјрәдәҹәк вә сизә сөјләдијим һәр шеји сизә хатырладаҹагдыр” (Јәһја 14:16, 17, 26). Бәс мүгәддәс руһ онлара неҹә тәсәлли ҝәтирирди?
12. Исанын сөзләрини јадда сахламалары үчүн мүгәддәс руһун шаҝирдләрә көмәји сајәсиндә, бир чох инсанлар тәсәллини неҹә алырлар?
12 Иса һәвариләринә чох шеј өјрәдирди. Сөзсүз ки, бу онларда чохсајлы тәәссүрат ојатмышды, бәс онлар Исанын дедикләрини јадда сахлајаҹагдылармы? Јаддашлары гејри-камил олдуғундан ваҹиб олан нәсиһәтләр унудулмајаҹагдымы? Иса онлара зәманәт верди ки, дедији һәр бир шеји мүгәддәс руһ онлара хатырладаҹаг. Беләликлә, Исанын өлүмүндән тәхминән 8 ил сонра Матта биринҹи Мүждәни јаза билди. Бу Мүждәјә — тә’сирбағышлајыҹы Дағүстү тәблиғ, Падшаһлыг һаггындакы бир чох мәсәлләр вә Мәсиһин иштиракына даир әламәтин әтрафлы тәсвири дахил олурду. 50 илдән чох сонра исә һәвари Јәһја, Исанын јер үзүндәки һәјатынын ахырынҹы бир нечә ҝүнү һаггындакы чохсајлы тәфсилатла бағлы е’тибарлы әһвалатлары јаза билди. Аллаһдан илһам алмыш бу јазылар бизим ҝүнләрдә дә руһландырыҹыдыр!
13. Мүгәддәс руһ илк мәсиһчиләрә һансы мә’нада бир мүәллим кими хидмәт етди?
13 Мүгәддәс руһ шаҝирдләрә Исанын сөзләрини хатырлатмагла јанашы, онлары өјрәдир вә Аллаһын нијјәтләрини там анламагда бәләдчилик едирди. Иса шаҝирдләри илә оларкән, бә’зән онларын һәмин вахт ајдын баша дүшмәдикләри фикирләр сөјләјирди. Лакин сонрадан, мүгәддәс руһла һәрәкәтә ҝәтирилән Јәһја, Петер, Јагуб, Јәһуда вә Павел өз мәктубларында Аллаһын нијјәтләрилә бағлы јени тәфсилатлары изаһ едә билдиләр. Беләликлә мүгәддәс руһ, Аллаһын рәһбәрлик етмәсинә даир шаҝирдләрә дәјәрли зәманәт верәрәк, бир мүәллим кими хидмәт етмиш олду.
14. Мүгәддәс руһ Јеһованын халгына һансы саһәләрдә көмәк едирди?
14 Мүгәддәс руһун валеһедиҹи ән’амлары, Аллаһын артыг ҹисмани Исраилә дејил, мәсиһчи јығынҹағына илтифат ҝөстәрдијини анламагда инсанлара көмәк етди (Ибраниләрә 2:4). Бундан әлавә, мәсиһчиләрин өз һәјатларында руһун сәмәрәсини тәзаһүр етдирмәләри сајәсиндә мүәјјән етмәк оларды ки, онлар доғрудан да Исанын шаҝирдләридирләр (Јәһја 13:35; Галатијалылара 5:22-24). Һәмчинин мүгәддәс руһ јығынҹағын үзвләринә ҹәсарәтли вә горхмаз олмалары үчүн дә гүввәт верирди (Һәвариләрин ишләри 4:31).
Ағыр вәзијјәтләрдә көмәк
15. а) Кечмишдә вә инди мәсиһчиләр һансы сынагларла гаршылашмалы олмушлар? б) Нәјә ҝөрә башгаларыны руһландыран кәсләрин өзләри дә бә’зән руһландырылмаға еһтијаҹ дуја биләрләр?
15 Јеһоваја сәдагәтли оланларын һамысы мүхтәлиф нөв тә’гибләрә мә’руз галырлар (2 Тимотејә 3:12). Лакин бир чох мәсиһчиләр олдугҹа ағыр сынагларла гаршылашмыш вә гаршылашмагдадырлар. Мүасир дөврдә бә’зиләри издиһам тәрәфиндән едилән һүҹумларын гурбаны олмуш, диҝәрләрини исә һәддиндән артыг пис шәраити олан һәбс вә ислаһ-әмәк дүшәрҝәләринә, јахуд да һәбсханалара салмышлар. Бә’зән һаким даирәләр фәал тә’гибчи ролунда олур, ја да ҹинајәткар групларын гејри-гануни сурәтдә галмагал салмасыны ҹәзасыз гојур. Бундан савајы, мәсиһчиләр сәһһәтләри илә бағлы ҹидди чәтинликләр вә ја мүрәккәб аилә проблемләри үзүндән дә әзаб чәкирләр. Бир чох һәмиманлысына чәтин вәзијјәтләрин өһдәсиндән ҝәлмәкдә көмәк едән јеткин мәсиһчи дә мә’јуслуг һисс едә биләр. Белә һалларда, башгаларыны руһландыран кәсин өзү дә руһландырылмаға еһтијаҹ дуја биләр.
16. Давуд чох ағыр вәзијјәтдә оларкән көмәји неҹә алды?
16 Саул падшаһ Давуду өлдүрмәк үчүн тә’гиб едәркән, Давуд Аллаһдан көмәк диләди: “Еј Аллаһ, дуамы динлә”. Һәмчинин деди: “Сәнин ганадларынын көлҝәсинә сығынарам” (Мәзмур 54:2, 4; 57:1). Давуд көмәк алдымы? Әлбәттә, алды. Һәмин ҝүнләрдә Јеһова пејғәмбәр Ҝад вә каһин Абиатар васитәсилә Давуда јол ҝөстәрир вә ону мөһкәмләндирмәк үчүн Саулун оғлу Јонатаны истифадә едирди (1 Самуел 22:1, 5; 23:9-13, 16-18). Јеһова һәмчинин, Саул Давуду тә’гиб етмәкдән јајынсын дејә, филистимлиләрин Исраил дијарына һүҹум етмәләринә јол верди (1 Самуел 23:27, 28).
17. Иса, шиддәтли изтираблар чәкәркән көмәји һарада ахтарырды?
17 Иса Мәсиһ јер үзүндәки һәјатынын сонуна јахын ҝүҹлү изтираблара мә’руз галды. О, өз давранышынын сәмави Атасынын адына вә бүтүн бәшәр өвладларынын ҝәләҹәјинә неҹә тә’сир едә биләҹәјини ајдын сурәтдә дәрк едирди. О, “шиддәтли изтираб ичиндә” оланда белә сә’јлә дуа едирди. Аллаһ гајғы ҝөстәрди ки, Иса чәтин анларда лазым олан көмәји алсын (Лука 22:41-44).
18. Шиддәтли тә’гибләр заманы Аллаһ илк мәсиһчиләрә неҹә тәсәлли верирди?
18 Илк мәсиһчи јығынҹағы тәшкил олундугдан сонра шаҝирдләр елә шиддәтли тә’гибләрлә гаршылашдылар ки, һәвариләрдән савајы һамысы Јерусәлими тәрк едиб, мүхтәлиф јерләрә дағылдылар. Киши вә гадынлары сөзүн әсл мә’насында евләриндән сүрүјүб чыхарырдылар. Аллаһ онлара неҹә тәсәлли верирди? Өз Кәламында онлара зәманәт верирди ки, онлар ‘даһа јахшы вә даими мала’, јә’ни ҝөјләрдә Мәсиһлә бирликдә әбәди мираса маликдирләр (Ибраниләрә 10:34; Ефеслиләрә 1:18-20). Шаҝирдләр, тәблиғ ишини давам етдирәрәк, Аллаһын руһунун онларла олдуғунун сүбутуну ҝөрүрдүләр, башларына ҝәлән әһвалатлар исә севинмәләри үчүн әлавә сәбәбләр верирди (Матта 5:11, 12; Һәвариләрин ишләри 8:1-40).
19. Шиддәтли тә’гибләрә мә’руз галса да, Павел Аллаһын вердији тәсәлли барәдә нә дүшүнүрдү?
19 Бир вахтлар амансыз тә’гибчи олан Шаулун (Павел) өзү дә сонрадан мәсиһчи олдуғуна ҝөрә тә’гибләрә мә’руз галды. Павел Кипр адасында бир сеһрбаза раст ҝәлди. Һәмин сеһрбаз јалана әл атараг вә Јеһованын јолуну тәһриф едәрәк Павелин хидмәтинә мане олмаға чалышырды. Галатијада Павели даша басдылар вә ону өлмүш саныб, шәһәрдән кәнара сүрүдүләр (Һәвариләрин ишләри 13:8-10; 14:19). Македонијада ону дәјәнәклә дөјдүләр (Һәвариләрин ишләри 16:22, 23). Ефесдә издиһамын һүҹуму илә гаршылашдыгдан сонра, Павел јазырды: “Биз һәддиндән артыг, таб ҝәтирә билмәдијимиз дәрәҹәдә чәтинлијә дүшмүшдүк вә сағ галаҹағымыза белә үмид бәсләмирдик. Лакин биз дахилән өлүм һөкмүнү һисс етдик” (2 Коринфлиләрә 1:8, 9). Лакин Павел елә һәмин мәктубунда, бу мәгаләнин 2-ҹи абзасында ситат ҝәтирилән тәсәлливериҹи сөзләри јазмышды (2 Коринфлиләрә 1:3, 4).
20. Нөвбәти мәгаләдә нәји мүзакирә едәҹәјик?
20 Бәс сән башгаларына неҹә тәсәлли верә биләрсән? Бу ҝүн чохлары тәсәллијә еһтијаҹ дујур. Бир чохлары бөјүк фәлакәтдән зәрәр чәкмиш, диҝәрләри исә өз кәдәрләриндән раһатлыг тапа билмирләр. Белә вәзијјәтдә олан кәсләрә неҹә тәсәлли верә биләҹәјимизи нөвбәти мәгаләдә нәзәрдән кечирәҹәјик.
Хатырлајырсынызмы?
• Нәјә ҝөрә Аллаһдан ҝәлән тәсәлли даһа бөјүк дәјәрә маликдир?
• Мәсиһ васитәсилә һансы тәсәллијә маликик?
• Мүгәддәс руһ һансы тәрздә тәсәлливериҹи олду?
• Аллаһын ағыр вәзијјәтләрдә өз халгына тәсәлли вермәсинә даир нүмунәләр ҝәтирин.
[23-ҹү сәһифәдәки шәкилләр]
Мүгәддәс Китаб бизә ҝөстәрир ки, Јеһова өз халгыны азад етмәклә тәсәлли верирди.
[24-ҹү сәһифәдәки шәкилләр]
Иса тә’лим вә шәфа вермәклә, һәмчинин өлүләри дирилтмәклә инсанлара тәсәлли верирди.
[26-ҹы сәһифәдәки шәкил]
Иса көмәји Аллаһдан алырды.