Кәдәрли оланлара тәсәлли верин

“Рәбб мәни мәсһ етди... бүтүн јаслылара тәсәлли үчүн” (ИШАЈА 61:1, 2).

1, 2. Биз кимләрә тәсәлли вермәлијик вә нәјә ҝөрә?

ҺӘГИГИ тәсәлли Аллаһы олан Јеһова бизи өјрәдир ки, бәлаја дүшән кәсләрә мәрһәмәт ҝөстәрәк. О, бизи “кәдәрли оланлара” (ЈД) вә үмумијјәтлә бүтүн јаслылара тәсәлли вермәјә өјрәдир (1 Салониклиләрә 5:14). Еһтијаҹ дујулан заман һәмиманлыларымыза тәсәлли веририк. Бундан савајы башга инсанлара да, һәтта әввәлләр бизә һеч мәһәббәт ҝөстәрмәјән кәсләрә дә мәһәббәт бәсләјирик (Матта 5:43-48; Галатијалылара 6:10).

² Иса Мәсиһ белә бир пејғәмбәрлик охуду вә ону өзүнә аид етди: “Рәбб Јеһованын Руһу үзәримдәдир; чүнки тәвазөкарлара мүждәни вә’з етмәк үчүн Рәбб мәни мәсһ етди; үрәји гырыг оланлары сарымаг үчүн... бүтүн јаслылара тәсәлли үчүн” (Ишаја 61:1, 2; Лука 4:16-19). Мүасир дөврдә јашајан мәсһ едилмиш мәсиһчиләр артыг чохдан е’тираф едирләр ки, һәмин тапшырыг онлара да аиддир, “башга гојунлар” исә бу ишдә онлара севинҹлә гошулурлар (Јәһја 10:16).

3. “Аллаһ фәлакәтләрә нә үчүн јол верир?” — дејә сорушан инсанлара биз неҹә көмәк едә биләрик?

³ Бир бәдбәхтлик баш верәндә үрәји гырыг инсанлар чох вахт сорушурлар: “Аллаһ фәлакәтләрә нә үчүн јол верир?” Мүгәддәс Китаб бу суала ајдын ҹаваб верир. Анҹаг Мүгәддәс Китабы тәдгиг етмәјән инсанларын бу ҹавабы там анламалары үчүн бир гәдәр вахт тәләб олуна биләр. Бу саһәдә Јеһованын Шаһидләри тәрәфиндән чап едилән нәшрләр көмәк ола биләрa. Лакин бә’зи инсанлар башланғыҹда Мүгәддәс Китабын Ишаја 61:1, 2 ајәләринә бәнзәр ајәләри ҝөрмәкдән тәсәлли тапырлар, чүнки орадакы сөзләр Аллаһын инсанлара тәсәлли вермәк истәдијини ҝөстәрир.

4. Полшада бир Шаһид баҹымыз мә’јус олан мәктәбли гыза неҹә тәсәлли верә билди вә бу һадисә башгаларына тәсәлли вермәкдә сизә неҹә көмәк едәр?

⁴ Јашлылар кими, ҝәнҹләр дә тәсәллијә еһтијаҹ дујурлар. Полшада бир ҝәнҹ гыз, мәсләһәт алмаг үчүн мә’јус һалда танышына мүраҹиәт етди. Онун танышы — Јеһованын Шаһиди — нәзакәтлә мәсәләнин нә јердә олдуғуну өјрәнәндә мә’лум олду ки, һәмин гыза белә суаллар вә шүбһәләр раһатлыг вермир: “Нәјә ҝөрә бу гәдәр чох пислик вар? Инсанлар нә үчүн изтираб чәкирләр? Мәним баҹым нәјә ҝөрә ифлиҹ хәстәлијиндән әзаб чәкир? Нә үчүн мәним үрәјим хәстәдир? Килсәдә дејирләр ки, Аллаһ белә истәјир. Әҝәр бу беләдирсә, мән артыг Она инанмајаҹағам!” Шаһид баҹымыз үрәјиндә Јеһоваја дуа етдикдән сонра деди: “Мәндән буну сорушмағына шадам. Сәнә көмәк етмәјә чалышарам”. Баҹымыз сөјләди ки, өзү дә ушаглыгда шүбһәләрдән әзаб чәкмиш вә Јеһованын Шаһидләри она көмәк етмишләр. О изаһ етди: “Мән өјрәндим ки, Аллаһ инсанлара изтираб вермир. О, инсанлары севир, онларын јахшылығыны истәјир вә тезликлә јер үзүндә бөјүк дәјишикликләр едәҹәкдир. Хәстәликләр, гоҹалыгла бағлы проблемләр вә өлүм јох олаҹаг, итаәткар инсанлар исә бурада — јер үзүндә әбәди јашајаҹаглар”. Баҹымыз һәмин ҝәнҹ гыза Вәһј 21:3, 4; Ејуб 33:25; Ишаја 35:5-7 вә 65:21-25 ајәләрини ҝөстәрди. Хејли сөһбәт етдикдән сонра гыз бөјүк јүнҝүллүк һисси илә деди: “Инди билирәм ки, һәјатымын мә’насы вар. Олармы јаныныза бир дә ҝәлим?” Шаһид онунла Мүгәддәс Китабы һәфтәдә ики дәфә өјрәнмәјә башлады.

Аллаһын вердији тәсәлли илә

5. Шәфгәт ҝөстәрәрәк әсл тәсәллини неҹә верә биләрик?

⁵ Башгаларына тәсәлли вермәк истәдикдә шәфгәт ҝөстәрмәк чох мүнасибдир. Кәдәрли олан адамы сөзләримизлә вә сәс тонумузла әмин етмәјә чалышырыг ки, онун вәзијјәти илә доғрудан да марагланырыг. Буна мә’насыз сөзләри тәкрар етмәклә наил олмаг мүмкүн дејил. Мүгәддәс Китаб бизә дејир ки, “тәһәммүл вә Мүгәддәс Јазыларын тәсәллиси илә” үмидимиз ола биләр (Ромалылара 15:4). Буну нәзәрә алараг, јери ҝәләндә һәмин адама Аллаһын Падшаһлығынын нә олдуғуну изаһ едә вә бу Падшаһлығын индики проблемләри неҹә һәлл едәҹәјини Мүгәддәс Китаб әсасында ҝөстәрә биләрик. Сонра исә, Мүгәддәс Китабдакы вә’дләрин е’тибара лајиг олдуғуна даир дәлилләр ҝәтирә биләрдик. Бунунла да тәсәлли вермиш оларыг.

6. Инсанларын Мүгәддәс Јазылардакы тәсәллидән там фајдалана билмәси үчүн, онлара нәји анламагда көмәк етмәк лазымдыр?

⁶ Вердијимиз тәсәллидән инсанларын там фајдалана билмәси үчүн онлар һәгиги Аллаһы танымалы, Онун хүсусијјәтләрини билмәли, һәмчинин Аллаһын вә’дләринин е’тибара лајиг олдуғуну дәрк етмәлидирләр. Әҝәр һал-һазырда Јеһованын хидмәтчиси олмајан адама тәсәлли вермәк истәјириксә, она бунлары изаһ етмәјимиз јахшы оларды: 1) Мүгәддәс Китабын вердији тәсәлли һәгиги Аллаһ олан Јеһовадандыр. 2) Јеһова — Гадирдир, ҝөјүн вә јерин Јараданыдыр. О, мәһәббәт Аллаһыдыр, мәрһәмәт вә һәгигәт мәнбәјидир. 3) Әҝәр Аллаһа, Онун Кәламындан дәгиг билик алараг јахынлашырыгса, чәтинликләрин өһдәсиндән ҝәлмәк үчүн гүввә әлдә едә биләрик. 4) Мүгәддәс Китабда, мүхтәлиф шәхсләрин гаршылашдыглары конкрет сынаглара даир ајәләр вар.

7. а) Аллаһын вердији тәсәллинин ‘Мәсиһ тәрәфиндән чохалдығыны’ гејд етмәклә нәјә наил олмаг мүмкүндүр? б) Давранышынын хошаҝәлмәз олдуғуну дәрк едән адама сиз неҹә тәсәлли верә биләрдиниз?

⁷ Бә’зиләри Мүгәддәс Китаб һаггында мә’луматы олан кәдәрли инсанлара 2 Коринфлиләрә 1:3-7 ајәләрини охујараг тәсәлли вермишләр. Бу заман онлар “тәсәллимиз дә Мәсиһ тәрәфиндән чохалдылыр” (И–93) ифадәсини вурғуламышлар. Бу ајәләр Мүгәддәс Китабын тәсәлли мәнбәји олдуғуну вә она даһа чох диггәт јетирмәк лазым ҝәлдијини анламагда инсана көмәк едә биләр. Һәмин ајә, еһтимал ки, башга бир вахт сөһбәти давам етдирмәк үчүн тәмәл ола биләр. Әҝәр бир адам башына ҝәлән бәдбәхтликләри хошаҝәлмәз давранышына ҝөрә верилән ҹәза санырса, биз мүһакимә етмәдән она, 1 Јәһја 2:1, 2 вә Мәзмур 103:11-14 ајәләриндә јазылан сөзләрин неҹә тәсәлли вердијини ҝөстәрә биләрдик. Белә етмәклә, доғрудан да, башгаларына Аллаһын вердији тәсәлли илә тәсәлли верә биләҹәјик.

Зоракылыг вә ја јохсуллуг үзүндән һәјатлары пуч оланлар

8, 9. Зоракылыгдан изтираб чәкән инсанлара мүнасиб тәрздә неҹә тәсәлли вермәк оларды?

⁸ Ҹинајәткарлығын вә мүһарибәләрин төрәтдији зоракылыгдан милјонларла инсанлар изтираб чәкирләр. Биз онлара неҹә тәсәлли верә биләрик?

⁹ Мәсиһчиләр елә давранмаға чалышырлар ки, сөздә вә әмәлдә бу дүнјада баш верән тоггушмаларда һеч кимин тәрәфини тутмасынлар (Јәһја 17:16). Амма онлар Мүгәддәс Китабын мүнасиб ајәләри васитәсилә изаһ едирләр ки, индики амансыз вәзијјәтләр әбәди олараг давам етмәјәҹәкдир. Мәсиһчиләр, Јеһованын зоракылығы севән адамлара гаршы мүнасибәтини ҝөстәрәрәк Мәзмур 11:5 ајәсини охуја биләрләр, јахуд да Мәзмур 37:1-4 ајәләринин көмәјилә изаһ едә биләрләр ки, Аллаһ бизи башгаларындан гисас алмаға јох, Она ҝүвәнмәјә тәшвиг едир. Мәзмур 72:12-14 ајәләри, Бөјүк Сүлејманын, јә’ни һазырда сәмави Падшаһ кими һөкмранлыг едән Иса Мәсиһин зоракылыгдан изтираб чәкән тәгсирсиз инсанлара неҹә мүнасибәт бәсләдијини ҝөстәрир.

10. Абзасда ҝәтирилән ајәләр, мүһарибә јашамыш кәсләрә неҹә тәсәлли верә биләр?

¹⁰ Бә’зи әразиләрдә дөјүшән дәстәләр һакимијјәт уғрунда мүбаризәјә сон гојмур, инсанлар исә бир-биринин ардынҹа баш верән һәрби тоггушмалара таб ҝәтирмәли олурлар. Бу инсанлар мүһарибәни вә онун төрәтдији фәлакәтләри һәјатын ајрылмаз һиссәси санырлар. Онлар вәзијјәтин јахшылашмасында јеҝанә үмиди јолуну башга өлкәјә гачмагда ҝөрүрләр. Лакин онларын әксәријјәти буна наил ола билмәмиш, гачмаға ҹәһд едәнләрин бир чоху исә һәјатларыны итирмишләр. Бунунла белә, башга өлкәјә көчмәјә мүвәффәг оланлар чох вахт ашкар едирләр ки, садәҹә олараг бир проблемдән јаха гуртармыш, башгасы илә гаршылашмышлар. Мәзмур 146:3-6 ајәләри васитәсилә белә инсанларын, мүһаҹирәт етмәкдәнсә даһа е’тибарлы бир шејә үмид әлдә етмәләринә көмәк етмәк олар. Матта 24:3, 7, 14 вә ја 2 Тимотејә 3:1-5 ајәләриндә јазылмыш пејғәмбәрликләр көмәк едә биләр ки, онлар вәзијјәти даһа ајдын шәкилдә ҝөрсүнләр вә мә’руз галдыглары чәтинликләрин мә’насыны, јә’ни көһнә дүнја системинин сонунда јашадығымызы дәрк етсинләр. Мәзмур 46:1-3, 8, 9 вә Ишаја 2:2-4 кими ајәләр исә, сүлһ ичиндә ҝәләҹәјә үмидин доғрудан да мөвҹуд олдуғуну анламагда онлара көмәк едә биләр.

11. Гәрби Африкада бир гадына Мүгәддәс Јазыларын һансы ајәләри тәсәлли олду вә нәјә ҝөрә?

¹¹ Гәрби Африкада узунсүрән мүһарибә заманы бир гадын ҝүллә јағышы алтында өз евини тәрк етди. Онун һәјаты горху, гүссә вә үрәксыхыҹы мә’јуслугла долу иди. Сонра, бу гадынын аиләси башга өлкәдә јашајанда, әри онларын никаһ шәһадәтнамәләрини јандырмаг вә һамилә арвадыны он јашлы оғлу илә бирликдә евдән говмаг, өзү исә кешиш олмаг гәрарына ҝәлди. Бу гадына Филипилиләрә 4:6, 7 вә Мәзмур 55:22 ајәләрини ҝөстәриб, “Ҝөзәтчи Гүлләси” вә “Ојанын!” журналларындан Мүгәддәс Китаба әсасланан фикирләри бөлүшдүкдә, о, нәһајәт ки, тәсәлли вә һәјатынын мә’насыны тапды.

12. а) Игтисади чәтинликләрә мә’руз галан кәсләрә Мүгәддәс Китаб һансы тәсәллини верир? б) Асијада бир Шаһид алыҹы гадына неҹә көмәк етди?

¹² Игтисадијјатын ифласа уғрамасы милјонларла инсанын һәјатыны бәрбад һала салыр. Һәрдән буна мүһарибә вә ја онун нәтиҹәләри дә сәбәб олур. Бә’зән дөвләтин сәһв сијасәти, һәмчинин мә’мурлар тәрәфиндән јол верилән тамаһкарлыг вә ләјагәтсизлик үзүндән инсанлар әмлакларындан мәһрум олур вә ја гәнаәт етдикләри пуллары итирирләр. Башгалары исә һәмишә әрзаг гытлығы ичиндә јашамышлар. Белә инсанлара, Аллаһын Она ҝүвәнәнләрә көмәк едәҹәјинә зәманәт вермәсини вә инсанларын өз зәһмәтләринин сәмәрәсиндән истифадә едәҹәкләри әдаләтли дүнја гураҹағы вә’дини билмәләри тәсәлли олаҹаг (Мәзмур 146:6, 7; Ишаја 65:17, 21-23; 2 Петер 3:13). Асијада бир Шаһид, мағазада алыҹы гадынын өлкәдәки игтисади вәзијјәтдән ҝилејләндијини ешитдикдә, дөвләтләриндә баш верән һадисәләрин үмумдүнја шәраитин сәҹијјәви әламәти олдуғуну изаһ етди. Матта 24:3-14 вә Мәзмур 37:9-11 ајәләринин мүзакирәси, мүнтәзәм Мүгәддәс Китаб өјрәнмәси башламаға сәбәб олду.

13. а) Бош вә’дләрлә алдадылан инсанлара Мүгәддәс Китабын васитәсилә неҹә көмәк едә биләрик? б) Пис шәраит ичиндә јашадыглары үчүн Аллаһын мөвҹуд олмадығыны дүшүнән инсанларла мүлаһизә јүрүтмәјә неҹә ҹәһд етмәк олар?

¹³ Әҝәр инсанлар чох илләр әрзиндә изтираб чәкмиш вә ја дәфәләрлә бош вә’дләрлә алдадылмышларса, “руһдан дүшдүкләри үчүн” (ЈД) Мусаны динләмәјән исраиллиләр кими даврана биләрләр (Чыхыш 6:9). Бу ҹүр инсанларын диггәтини, ҝүндәлик чәтинликләрин өһдәсиндән наилијјәтлә ҝәлмәкдә вә бир чохларынын һәјатыны корлајан ҝәрәксиз проблемләрдән гачынмагда Мүгәддәс Китабын неҹә көмәк едә билдијинә јөнәлтмәк фајдалы оларды (1 Тимотејә 4:8б). Бә’зиләри пис шәраит ичиндә јашадыгларындан, Аллаһын мөвҹуд олмадығыны вә ја онларын гејдинә галмадығыны дүшүнмәјә мејллидирләр. Биз, Мүгәддәс Јазыларын мүнасиб ајәләри үзрә мүлаһизә јүрүдәркән онларын анламасына көмәк едә биләрик ки, Аллаһ көмәк тәгдим едир, амма бу көмәји јалныз аз адамлар гәбул едирләр (Ишаја 48:17, 18).

Туфан вә ја зәлзәләдән сонра

14, 15. Бәдбәхтлик нәтиҹәсиндә кәдәрли оланлара Јеһованын Шаһидләри неҹә гајғы ҝөстәрирдиләр?

¹⁴ Туфан, зәлзәлә, јанғын вә ја партлајыш нәтиҹәсиндә дә бәдбәхтлик үз верә биләр. Бу ҹүр бәдбәхтлик инсанларын чохуна кәдәр ҝәтирир. Сағ галанлара тәсәлли вермәк үчүн нә етмәк олар?

¹⁵ Инсанлар кимә исә лазым олдугларыны билмәјә еһтијаҹ дујурлар. Бир өлкәдә баш верән террор актындан сонра чохлары ҝүҹлү сарсынты кечирмишләр. Инсанларын бир чоху әзизләрини, аилә башчыларыны, достларыны, ишләрини, һәмчинин онларын фикринҹә, малик олдуглары тәһлүкәсизлик һиссини итирмишләр. Јеһованын Шаһидләри гоншулугда јашајан инсанлара баш чәкир, онларын ағыр иткиләринә кәдәрләндикләрини билдирир вә Мүгәддәс Китабдакы сөзләрлә тәсәлли верирдиләр. Белә гајғыја ҝөрә чохлары дәрин миннәтдарлыг етмишләр.

16. Салвадорда баш верән тәбии фәлакәтдән сонра нәјә ҝөрә Шаһидләрин тәблиғ хидмәтләри чох еффектли олду?

¹⁶ Салвадорда 2001-ҹи илдә ҝүҹлү зәлзәләдән сонра ҝәлән бөјүк торпаг сүрүшмәләри чох инсанларын өлүмүнә сәбәб олду. Өләнләр арасында бир баҹымызын 25 јашлы оғлу вә оғлунун нишанлысынын ики баҹысы да варды. Өлән ҝәнҹин анасы вә нишанлысы, бу фәлакәтдән тез сонра бирликдә тәблиғ хидмәтинә ҝетдиләр. Чохлары онлара дејирдиләр ки, өләнләри Аллаһ өз јанына апарыб вә бу бәдбәхтлик Онун ирадәсилә олуб. Шаһидләр Сүлејманын мәсәлләри 10:22 ајәсинә истинад едиб, ҹаваб верирдиләр ки, Аллаһ бизим изтираб чәкмәјимизи истәмир. Онлар Ромалылара 5:12 ајәсини охујараг изаһ едирдиләр ки, инсанлар Аллаһын ирадәсилә јох, ҝүнаһын уҹбатындан өлүрләр. Онлар һәмчинин Мәзмур 34:18, Мәзмур 37:29, Ишаја 25:8 вә Вәһј 21:3, 4 ајәләриндәки тәсәлливериҹи сөзләри дә ҝөстәрирдиләр. Хүсусилә дә бу гадынлар да баш верән фәлакәтдә әзизләрини итирдикләри үчүн инсанлар онлары һәвәслә динләјирдиләр вә бир чох Мүгәддәс Китаб өјрәнмәси башланды.

17. Фәлакәт заманы биз һансы көмәји ҝөстәрә биләрик?

¹⁷ Бир фәлакәт баш вердикдә, физики ҹәһәтдән тә’ҹили көмәјә еһтијаҹы олан инсанлара раст ҝәлә биләрик. Мәсәлән, һәким чағырмаг, кими исә хәстәханаја апармаг вә ја гида вә сығынаҹагла тә’мин етмәк үчүн мүмкүн олан һәр иши ҝөрмәк лазым ҝәлә биләр. 1998-ҹи илдә Италијада олан белә фәлакәт заманы, бир журналистин гејд етдији кими, Јеһованын Шаһидләри “практики иш ҝөрүр, әзаб чәкәнләрин һансы динә мәхсус олдугларыны ајдынлашдырмадан, онлара көмәк әлләрини узадырдылар”. Ахыр ҝүнләрә даир габагҹадан дејилмиш һадисәләр бә’зи өлкәләрдә бөјүк изтираблара сәбәб олур. Бу өлкәләрдә Јеһованын Шаһидләри инсанларын диггәтини Мүгәддәс Китаб пејғәмбәрликләринә јөнәлдир вә онлара, Аллаһын Падшаһлығынын бәшәријјәтә әсл тәһлүкәсизлик ҝәтирәҹәјинә даир Мүгәддәс Китабда јазылан зәманәт сөзләри илә тәсәлли верирләр (Сүлејманын мәсәлләри 1:33; Мика 4:4).

Аилә үзвләриндән бири өләндә

18-20. Аилә үзвләриндән бири өлән кәсләрә тәсәлли вермәк үчүн сиз нә дејәр вә ја нә едәрдиниз?

¹⁸ Һәр ҝүн милјонларла инсанлар әзизләрини итирдикләри үчүн кәдәр ичиндә олурлар. Сән бу ҹүр инсанлара, тәблиғ хидмәтиндә вә ја ҝүндәлик ишләрлә мәшғул оларкән раст ҝәлә биләрсән. Тәсәлли вермәк үчүн онлара нә дејә вә ја нә едә биләрсән?

¹⁹ Инсан гәм-гүссә ичиндәдирми? Евә кәдәрли гоһумлармы јығылыб? Јәгин чох сөз демәк истәрдин, амма белә һалларда бәсирәтли олмаг ваҹибдир (Ваиз 3:1, 7). Еһтимал ки, башсағлығы вермәк, Мүгәддәс Китаба әсасланан мүнасиб нәшр (брошүра, журнал вә ја трактат) сахламаг, бир нечә ҝүндән сонра исә јенидән ҝәлмәк вә сонракы көмәклији ҝөстәрмәјин мүмкүн олуб-олмадығыны өјрәнмәк јериндә оларды. Әлверишли мәгам јетишдикдә, Мүгәддәс Китабдан бә’зи тәсәлливериҹи фикирләрлә бөлүшмәји тәклиф ет. Бунун раһатлыг вә шәфавериҹи тә’сири ола биләр (Сүлејманын мәсәлләри 16:24; 25:11). Әлбәттә ки, Исанын етдији кими, сән өләнләри һәјата гајтара билмәзсән. Лакин инди сәһв тәсәввүрләри тәкзиб етмәјә ҹәһд ҝөстәрмәјин вахты олмадығыны нәзәрә алараг, сән онлара өләнләрин вәзијјәти һагда Мүгәддәс Китабда дејиләнләри сөјләјә биләрсән (Мәзмур 146:4; Ваиз 9:5, 10; Һезекиел 18:4). Кәдәрли адама өлүләрин дирилмәсинә даир Мүгәддәс Китаб вә’дләрини бирҝә охумағы тәклиф едә биләрсән (Јәһја 5:28, 29; Һәвариләрин ишләри 24:15). Мисал үчүн, Мүгәддәс Китабдан дирилмә һаггында һәр һансы бир әһвалаты данышараг, охудуғунуз ајәләрин мә’насыны изаһ едә биләрсән (Лука 8:49-56; Јәһја 11:39-44). Бундан башга, белә үмид верән мәһәббәтли Аллаһын хүсусијјәтләринә дә диггәт јөнәлт (Ејуб 14:14, 15; Јәһја 3:16). Бу тә’лимләрин сәнә неҹә фајда ҝәтирдијини вә онлара нәјә ҝөрә е’тибар етдијини сөјлә.

²⁰ Кәдәрли инсаны Падшаһлыг Залына дә’вәт етсән, онун һәгигәтән дә јахынларыны севән вә бир-бирләрини неҹә инкишаф етдирмәји вә руһландырмағы баҹаран адамларла таныш олмасына көмәк едә биләрсән. Бу, Исвечдә бир гадынын бүтүн һәјаты боју ахтардығы шеј олмушдур (Јәһја 13:35; 1 Салониклиләрә 5:11).

21, 22. а) Бир кимсәјә тәсәлли вермәк истәјириксә биздән нә тәләб олунур? б) Мүгәддәс Китабла артыг јахшы таныш олан кәсләрә неҹә тәсәлли вермәк олар?

²¹ Елә олурму ки, кәдәрли адама — истәр һәмиманлына, истәрсә дә башга бир кәсә — тәсәлли вермәк истәјирсән, амма нә дејәҹәјини вә ја нә едәҹәјини билмирсән? Мүгәддәс Китабда чох вахт “тәсәлли” кими тәрҹүмә едилән јунан сөзү һәрфи мә’нада “јанында олмаг хаһишини” билдирир. Буна ҝөрә дә, әсл тәсәлливериҹи олмаг кәдәрли кәсләрин јанында олмаг демәкдир (Сүлејманын мәсәлләри 17:17).

²² Бәс, әҝәр тәсәлли вермәк истәдијин адам артыг Мүгәддәс Китабын өлүм, фидијә вә дирилмә һаггында олан тә’лимләрини билирсә, онда неҹә? Ејни е’тигада шәрик олан бир достун јанында олмасы да тәсәлли верә биләр. Әҝәр кәдәрли адам данышмаг истәјирсә, диггәтли динләјиҹи ол. Дүшүнмә ки, дурмадан данышмалысан. Әҝәр Мүгәддәс Китабдан ајәләр охујурсунузса, онлары, һәр икинизи мөһкәмләндирән Аллаһын сөзү кими мүзакирә ет. Јеһованын вә’дләринин е’тибарлы олдуғуна даир һәр икинизин малик олдуғунуз мөһкәм әминлији ифадә ет. Аллаһын мәрһәмәтини тәглид едәрәк вә Онун Кәламындан дәјәрли һәгигәтләри бөлүшәрәк, кәдәрли инсанларын “һәр ҹүр тәсәлли верән” Јеһова Аллаһдан тәсәлли вә ҝүҹ алмасына көмәк едә биләрсән (2 Коринфлиләрә 1:3).

[Һашијә]

Неҹә ҹаваб верәрдиниз?

• Инсанларын бир чоху фәлакәтләрин һамысында кими тәгсиркар ҝөрүр вә биз онлара неҹә көмәк едә биләрик?

• Мүгәддәс Китабын вердији тәсәлли инсанларын үрәјинә јол тапсын дејә, биз нә едә биләрдик?

• Әразиниздә јашајанларын чохуна һансы вәзијјәтләр кәдәр ҝәтирир вә сиз онлара неҹә тәсәлли верә биләрсиниз?

[32-ҹи сәһифәдәки шәкилләр]

Фәлакәтләр заманы әсл тәсәлли хәбәри.

[Иҹазә илә]

Refugee camp: UN PHOTO 186811/J. Isaac