“Будур, Аллаһымыз”

Өјрәниләҹәк бу ики мәгалә, 2002–2003-ҹү илләрдә бүтүн дүнјада кечирилән вилајәт конгресләриндә е’лан едилән “Јеһоваја јахынлаш” китабынын әсасында һазырланыб. (30-ҹу сәһифәдәки “Мәһз буна еһтијаҹым варды” адлы мәгаләјә бахын).

“Будур, Аллаһымыз будур; ону ҝөзләдик вә бизи гуртараҹагдыр; Рәбб будур” (ИШАЈА 25:9).

1, 2. а) Јеһова тајфа башчысы Ибраһими неҹә адландырмышдыр вә бунунла бағлы биздә һансы суал јарана биләр? б) Аллаһла јахын мүнасибәтләрин мүмкүн олмасына Мүгәддәс Китаб бизи неҹә әмин едир?

“ДОСТУМ”. Јерин-ҝөјүн Јараданы олан Јеһова тајфа башчысы Ибраһим һаггында белә демишдир (Ишаја 41:9). Јалныз тәсәввүр ет, ади инсан Һөкмдар Аллаһла достлуг едирди! Сәндә суал јарана биләр: “Мән дә Аллаһа белә јахынлаша биләрәмми?”

² Мүгәддәс Китаб бизи әмин едир ки, Аллаһла јахын мүнасибәтләр мүмкүндүр. Ибраһим “Аллаһа иман етди”ји үчүн, она Јеһова илә достлуг бәхш едилди (Јагуб 2:23). Бу ҝүн дә ејнилә, “Рәббин [Јеһованын] достлуғу доғруларладыр” (Сүлејманын мәсәлләри 3:32). Јагуб 4:8 ајәсиндә Мүгәддәс Китаб бизи тәшвиг едир: “Аллаһа јахынлашын, О да сизә јахынлашар”. Ајдындыр ки, әҝәр биз өз тәрәфимиздән Јеһоваја јахынлашсаг, әвәзиндә О да бизә јахынлашаҹагдыр. Аллаһдан илһам алан бу сөзләр о демәкдирми ки, биринҹи аддымы ҝүнаһлы вә гејри-камил олан биз инсанлар атырыг? Әлбәттә ки, јох! Јеһова илә јахын мүнасибәтләр, севән Аллаһымызын ики ваҹиб аддымы атмасы сајәсиндә мүмкүн олмушдур (Мәзмур 25:14).

3. Јеһова бизим Онун достлары ола билмәмиз үчүн һансы ики аддымы атмышдыр?

³ Биринҹиси, Јеһова Исаны ҝөндәрди ки, “бир чохлары үчүн ҹаныны фидијә олараг” версин (Матта 20:28). Мәһз онун фидијә гурбанлығынын сајәсиндә бизим Аллаһа јахынлашмаг имканымыз вар. Мүгәддәс Китабда дејилир: “Биз Ону [Аллаһы] севирик, чүнки О бизи биринҹи севмишдир” (1 Јәһја 4:19). Бәли, Аллаһ “бизи биринҹи севмишдир” дејә, достлуг үчүн тәмәли дә О гојмушдур. Икинҹиси, Јеһова өзүнү бизә ашкар едиб. Инсаны даһа јахшы таныдыгда, онун сәҹијјәви характерини гијмәтләндирдикдә, бу заман онунла јахын достлуг мүнасибәтләри јараныр. Бунун нә демәк олдуғунун үзәриндә дүшүн. Әҝәр Јеһова сирли, дәркедилмәз Аллаһ олсајды, биз һеч заман Она јахынлаша билмәздик. Амма О, өзүнү биздән ҝизләтмир, әксинә истәјир ки, Онун неҹә Аллаһ олдуғуну биләк (Ишаја 45:19). Јеһова Өз Кәламы олан Мүгәддәс Китабда Өзү һаггында бизим гавраја биләҹәјимиз дилдә данышыр вә бунунла да јалныз бизи севдијини дејил, һәм дә бизим Онунла таныш олмағымызы вә Ону сәмави Атамыз кими севмәјимизи истәдијини ҝөстәрир.

4. Јеһованын хүсусијјәтләри илә даһа јахшы таныш олдугҹа, Она гаршы биздә һансы һиссләр јаранаҹагдыр?

⁴ Балаҹа ушағын: “Бу мәним атамдыр” дејә өз атасыны достларына фәрәһлә ҝөстәрмәсинин шаһиди олмусанмы? Јеһованын хидмәтчиләринин дә Аллаһа гаршы бу ҹүр һиссләр бәсләмәјә там әсаслары вар. Мүгәддәс Китабда Аллаһын садиг хидмәтчиләринин: “Будур, Аллаһымыз” дејә, нида едәҹәкләри вахт әввәлҹәдән дејилмишдир (Ишаја 25:8, 9). Јеһованын хүсусијјәтләрини нә гәдәр дәриндән тәдгиг етсәк, Онун ән јахшы Ата вә дүнјада ән јахын Дост олдуғуна бир о гәдәр чох әмин олаҹағыг. Бәли, Јеһованын хүсусијјәтләрини анламағымыз бизи Она јахынлашмаға тәшвиг едәҹәкдир. Беләликлә, ҝәлин Јеһованын әсас хүсусијјәтләри олан гүввә, әдаләт, мүдриклик вә мәһәббәтин Мүгәддәс Китабда неҹә ачыгландығыны ҝениш сурәтдә мүзакирә едәк. Бу мәгаләдә онлардан үчүнү нәзәрдән кечирәҹәјик.

Гүввәдә јүксәк

5. Нәјә ҝөрә јалныз Јеһова “Күлл-Ихтијар” адланыр вә О, Өз валеһедиҹи гүввәсини неҹә тәзаһүр етдирир?

⁵ Јеһова “гүдрәтдә... [гүввәдә] јүксәкдир” (Ејуб 37:23). Јеремја 10:6 ајәсиндә дејилир: “Сәнин кимиси јохдур, ја Рәбб; сән бөјүксән вә әзәмәтдә исмин бөјүкдүр”. Јаратдығы һәр бир варлыгдан фәргли олараг, Јеһова сонсуз гүввәјә маликдир. Буна ҝөрә дә јалныз О, “Күлл-Ихтијар” адланыр (Вәһј 15:3). Јеһова валеһедиҹи гүввәсини јаратмаг, мәһв етмәк, мүдафиә вә бәрпа етмәк кими мәгсәдләрдә тәзаһүр етдирир. Ҝәлин, Онун јарадыҹы вә хиласедиҹи гүввәсиндән неҹә истифадә етдијини нәзәрдән кечирәк.

6, 7. Ҝүнәш һансы ҝүҹә маликдир вә о, һансы ваҹиб һәгигәтә шәһадәт едир?

⁶ Ајдын ҝүнәшли ҝүндә күчәјә чыхдыгда нә һисс едирсән? Ҝүнәшин зәриф шүаларынын истисини, елә дејилми? Јеһованын јарадыҹы гүввәси дә елә бунда тәзаһүр олунур. Ҝүнәш нә дәрәҹәдә ҝүҹлүдүр? Ҝүнәшин нүвәсиндәки истилик 15 милјон дәрәҹә Селсијә чатыр. Әҝәр ҝүнәшин нүвәсиндән буғда дәнәҹији бојда һиссә Јерә гојулса, бу балаҹа “печә” 140 километрдән јахын дурмаг мүмкүн олмазды! Ҝүнәш һәр санијә, јүз мил­јонларла нүвә бомбасынын партлајышына бәрабәр енержи ајырыр. Јер бу истилик-нүвә реакторундан идеал мәсафәдә фырланыр. Әҝәр Јер Ҝүнәшә бир аз јахын олсајды, орадакы су еһтијаты тамамилә бухарланарды, амма әҝәр бир аз узаг олсајды, су садәҹә донарды. Ҹүз’и мигдарда нормадан кәнара чыхма планетимизи ҹансыз һала ҝәтирәрди.

⁷ Инсанларын һәјатынын бүтүнлүклә Ҝүнәшдән асылы олмасына бахмајараг, әксәријјәт она ади бир шеј кими јанашыр. Белә инсанлар Ҝүнәшдән өјрәнә биләҹәкләри бир шеји нәзәрдән гачырырлар. Мәзмур 74:16 ајәсиндә Јеһова һаггында дејилир: “Нуру вә ҝүнәши сән һазырладын”. Бәли, Ҝүнәш “ҝөјләри вә јери... јарадан” Јеһоваја иззәт ҝәтирир (Мәзмур 146:6). Лакин Ҝүнәш, Јеһованын түкәнмәз гүввәсинә шәһадәт едән сајсыз-һесабсыз варлыглардан јалныз биридир. Јеһованын јарадыҹы гүввәси һаггында нә гәдәр чох өјрәнириксә, бир о гәдәр дә Јараданымыз гаршысында үрәјимиз еһтирам һисси илә долур.

8, 9. а) Јеһова Өз хидмәтчиләрини горумаға вә онларын гајғысына галмаға һазыр олдуғуну һансы тә’сирли образларын көмәји илә ҝөстәрир? б) Кечмишдә чобан өз гојунларынын гајғысына неҹә галырды вә бу нүмунә Бөјүк Чобанымыз һаггында бизә нәји өјрәдир?

⁸ Јеһова Өз бөјүк гүввәсиндән хидмәтчиләрини мүдафиә етмәк вә онларын гајғысына галмаг үчүн дә истифадә едир. Мүгәддәс Китабда, Јеһованын шәфгәтли гајғысыны вә хидмәтчиләрини горумаға һазыр олдуғуну тәсвир едән ајдын, бә’зән исә тә’сирли образлара раст ҝәлирик. Мисал үчүн, Ишаја 40:11 ајәсини нәзәрдән кечирәк. Бурада Јеһова Өзүнү Чобанла, халгыны исә “гојунларла” мүгајисә едир. Ајәдә дејилир: “Сүрүсүнү чобан кими ҝүдәҹәк, әли илә гузулары топлајаҹаг вә синәсиндә дашыјаҹаг вә әмзикли оланлары еһтијатла отараҹаг”. Ҝәлин, бу ајәдә дејиләнләри хәјалән тәсәввүр едәк?

⁹ Гојун-гузу гәдәр көмәксиз олан һејванлар аздыр. Кечмишдә гојунлары ҹанавардан, ајыдан вә ширдән горумаг үчүн чобана ҹәсарәтли олмаг лазым иди (1 Самуел 17:34-36; Јәһја 10:10-13). Лакин бә’зән гојунлары горумаг вә онларын гајғысына галмаг үчүн чобан ҝәрәк шәфгәт дә ҝөстәрәјди. Елә олурду ки, гојун ағылдан узагда балалајырды. Бәс онда чобан көмәксиз гузуну неҹә мүдафиә едирди? Чобан гузуну, ола билсин, бир нечә ҝүн “синәсиндә”, үст палтарынын арасында ҝәздирирди. Бәс бу балаҹа гузу чобанын ‘синәсинә’ неҹә чыхмышды? Бәлкә дә, гузу өзү чобана јахынлашмыш вә онун диггәтини ҹәлб етмәјә чалышараг ајағына тохунмушду. Һәр неҹә олса да, мәһз чобан әјилмәли, гузуну әлинә ҝөтүрмәли вә меһрибанҹасына бағрына басмалы иди ки, гузу орада өзүнү тәһлүкәсиз һисс етсин. Неҹә дә тә’сирли нүмунәдир! Вә бу нүмунә Бөјүк Чобанымызын Өз хидмәтчиләрини горумаға вә онларын гајғысына галмаға һазыр олдуғуну ајдын шәкилдә тәсвир едир!

10. Јеһова бу ҝүн бизи неҹә мүдафиә едир вә бу ҹүр мүдафиә нәјә ҝөрә хүсусилә ваҹибдир?

¹⁰ Јеһова јалныз мүдафиә едәҹәјини вә’д етмәмишдир. Мүгәддәс Китабын јазылдығы дөврләрдә Аллаһ “Она ихлас едәнләри имтаһандан... хилас етмәк” гүввәсиндә олдуғуну валеһедиҹи шәкилдә сүбут етмишдир (2 Петер 2:9). Бәс бизим ҝүнләримиз һаггында нә демәк олар? Билирик ки, һазырда Јеһова бизи бүтүн фәлакәт вә бәлалардан горумаг үчүн гүввәсиндән истифадә етмир. Лакин О, бизә даһа ваҹиб олан руһани мүдафиәни тәгдим едир. Севән Аллаһымыз бизим сынаглара таб ҝәтирмәјимиз вә Онунла олан јахын мүнасибәтләримизи горуја билмәјимиз үчүн лазым олан һәр шеји вермәклә, бизи руһани зәрәрдән горујур. Мәсәлән, Лука 11:13 ајәсиндә дејилир: “Мадам ки, сиз пис олдуғунуз һалда өз өвладларыныза јахшы һәдијјәләр верә билирсиниз, Сәмави Атанызын Ондан диләјәнләрә Мүгәддәс Руһу верәҹәји нә гәдәр јәгиндир!” Бу бөјүк гүввәнин сајәсиндә биз истәнилән сынаг вә проблемләрин өһдәсиндән ҝәлә биләрик (2 Коринфлиләрә 4:7). Јеһованын көмәји илә биз һәјатымызы тәкҹә јахын бир нечә ил әрзиндә дејил, әбәдијјән горуја биләҹәјик. Әҝәр буну унутмасаг, бу системдә баш верән һәр бир сыхынты әслиндә бизә “мүвәггәти вә јүнҝүл” ҝөрүнәҹәкдир (2 Коринфлиләрә 4:17). Мәҝәр гүввәсини бизим хејримизә бу ҹүр мәһәббәтлә тәтбиг едән Аллаһа јахынлашмаг истәмәздикми?

Јеһова әдаләти севир

11, 12. а) Нәјә ҝөрә Јеһованын әдаләти бизи Она јахынлашдырыр? б) Јеһованын әдаләти үзәриндә дүшүндүкдә Давуд һансы гәнаәтә ҝәлди вә онун Аллаһын мүгәддәс руһу алтында јаздығы сөзләри бизә неҹә тәсәлли ола биләр?

¹¹ Јеһова һәмишә дүзҝүн давраныр вә һеч заман ајры-сечкилик етмир. Онун әдаләти сојуг дејил. Бу, бизи Аллаһдан узаглашдыран јох, әксинә, Она јахынлашдыран ҹәлбедиҹи кејфијјәтдир. Мүгәддәс Китабдан билирик ки, Јеһованын әдаләти бирбаша шәфгәтлә бағлыдыр. Ҝәлин, Јеһованын әдаләти тәзаһүр етдирдији үч саһәни нәзәрдән кечирәк.

¹² Биринҹиси, Јеһованын әдаләти Ону Өз хидмәтчиләринә садиглик ҝөстәрмәјә тәшвиг едир. Мәзмурчу Давуд буна өз тәҹрүбәсиндә әмин олду. Јеһованын әдаләти вә шәхсән онунла неҹә даврандығы һаггында дүшүнәрәк Давуд һансы гәнаәтә ҝәлди? О, белә деди: “Рәбб һаггы [әдаләти] севәр вә мүгәддәсләрини [“садигләри”, ЈД] тәрк етмәз; онлар әбәдијјән горунар” (Мәзмур 37:28). Неҹә дә бөјүк тәсәллидир! Аллаһымыз һеч вахт Она садиг олан кәсләри тәрк етмир. Биз һәмишә Она ҝүвәниб, Онун мәһәббәтли гајғысыны өз үзәримиздә һисс едә биләрик. Бизи буна Онун әдаләти әмин едир! (Сүлејманын мәсәлләри 2:7, 8).

13. Јеһованын мәзлумлара гаршы гајғысы гәдим Исраилә вердији Ганунда өзүнү неҹә ҝөстәрир?

¹³ Икинҹиси, Аллаһын әдаләти мәзлум инсанларын тәләбләрини нәзәрә алыр. Јеһованын бу ҹүр инсанлар үчүн чәкдији гајғы, гәдим Исраилә вердији Ганунда ајдын шәкилдә өзүнү ҝөстәрир. Мәсәлән, Ганунда јетимләрә вә дуллара һансы көмәји ҝөстәрмәјин лазым олдуғу ајрыҹа јазылмышды (Тәснијә 24:17-21). Бу ҹүр аиләләрин неҹә чәтинлик чәкдикләрини билән Јеһова онларын гајғыкеш Һакими вә Мүдафиәчиси ролуну Өз үзәринә ҝөтүрмүшдү (Тәснијә 10:17, 18). Аллаһ исраиллиләри хәбәрдар етмишди ки, әҝәр мүдафиәсиз гадын вә ушаглары инҹидәрләрсә, О, мүтләг онларын фәрјадыны ешидәҹәкдир. Чыхыш 22:22-24 ајәләринә әсасән Јеһова онлара демишди: ‘Гәзәбим аловланаҹаг’. Гәзәб Јеһованын әсас хүсусијјәтләриндән бири олмаса да, башгаларына гаршы гәсдән әдаләтсиз давраныш, хүсусилә дә бу ҹүр давранышын гурбаны зәиф вә мүдафиәсизләр оларса, бу, Јеһовада һаглы олараг һиддәт һисси доғурур (Мәзмур 103:6).

14. Јеһованын ајры-сечкилик етмәдијинә даир һансы ҝөзәл нүмунәни ҝәтирмәк олар?

¹⁴ Үчүнҹүсү, Тәснијә 10:17 ајәсиндә Мүгәддәс Китаб бизи әмин едир ки, Јеһова “инсанларын кимлијинә бахмајан вә рүшвәт алмајан... Аллаһдыр”. Һакимијјәтә малик олан әксәр инсанлардан фәргли олараг, Јеһова киминсә һаггында олан рә’јинә мадди вәзијјәтин вә ја заһири ҝөрүнүшүн тә’сир етмәсинә јол вермир. О, гәрәзлик вә ајры-сечкилик етмир. Јеһованын ајры-сечкилик етмәдијини нөвбәти нүмунәдән ајдын ҝөрмәк олур: Онун һәгиги хидмәтчиләри олмаг дә’вәти вә әбәди јашамаг имканы јалныз һансыса сечилмиш група бәхш едилмир. Һәвариләрин ишләри 10:34, 35 ајәләриндә охујуруг: “Һәр халгдан олуб, Ондан горхан вә һагг иш ҝөрән Она мәгбулдур”. Бәли, белә ҝөзәл имкан сосиал вәзијјәтиндән, дәрисинин рәнҝиндән вә миллијәтиндән асылы олмајараг, бүтүн инсанларын гаршысында ачылыр. Мәҝәр бу, әсл әдаләтин ҝөзәл нүмунәси дејилми? Һәгигәтән дә Јеһованын әдаләти һаггында нә гәдәр чох өјрәнириксә, бир о гәдәр дә Она јахынлашмаг истәјимиз артыр!

Еј Аллаһын мүдриклијинин дәринлији!

15. Мүдриклик нәдир вә Јеһова ону неҹә тәзаһүр етдирир?

¹⁵ Ромалылара 11:33 ајәсинә әсасән һәвари Павел нөвбәти сөзләри демәјә тәшвиг олунмушду: “Еј Аллаһын... һикмәт [мүдриклик] вә елминин дәринлији!” Бәли, Јеһованын түкәнмәз мүдриклијинин мүхтәлиф ҹәһәтләри үзәриндә дүшүнмәјимиз биздә дәрин еһтирам һисси ојадыр. Бәс бу хүсусијјәти неҹә мүәјјән етмәк олар? Мүдриклик өзүнә, арзу олунан нәтиҹәни әлдә етмәк үчүн билијин тәтбигини, бәсирәти вә анлајышы дахил едир. Јеһова ҝениш билијинә вә дәрин анлајышына әсасланараг, һәмишә ән јахшы гәрарлар гәбул едир вә онлары ән мүвафиг јолларла һәјата кечирир.

16, 17. Јеһованын јаратдыглары Онун түкәнмәз мүдриклијинә неҹә шәһадәт едир? Нүмунә ҝәтирин.

¹⁶ Јеһованын түкәнмәз мүдриклији конкрет олараг нәдә ифадә олунур? Мәзмур 104:24 ајәсиндә дејилир: “Ја Рәбб, ишләрин нә чохдур! Онларын һамысыны һикмәтлә јаратдын; јер сәнин сәрвәтинлә долу”. Доғрудан да, Јеһованын јаратдыглары һаггында нә гәдәр чох өјрәнириксә, Онун мүдриклији гаршысында бир о гәдәр дә еһтирам һисси дујуруг. Јеһованын јаратдыгларыны тәдгиг етмәклә алимләр чох шеј өјрәнмишләр! Һәтта мүһәндислијин биомиметика адланан хүсуси саһәси мөвҹуддур ки, бурада биоложи структурларын бә’зи хүсусијјәтләринин тәкрары илә мәшғул олунур.

¹⁷ Ола билсин, сән ади һөрүмчәк торунун зәрифлијинә вә гәшәнҝлијинә дәфәләрлә мәфтун олмусан. Бу һәгигәтән дә валеһедиҹи конструксијадыр. Заһирән зәриф ҝөрүнән бә’зи һөрүмчәк торларынын ипләри, ејни нисбәтдә ҝөтүрсәк, поладдан вә ҝүлләкечирмәз жилетин һазырландығы лифләрдән мөһкәмдир. Буну неҹә тәсәввүр етмәк олар? Әҝәр һөрүмчәк торуну бөјүк балыг тору өлчүсүндә бөјүтсәк, онун көмәји илә, һәтта сәрнишин тәјјарәсини белә сахламаг олар! Бәли, Јеһова һәр шеји ‘һикмәтлә јарадыб’.

18. Кәламы олан Мүгәддәс Китабын јазылмасында инсанлары истифадә етмәси Јеһованын мүдриклијини неҹә ҝөстәрир?

¹⁸ Јеһованын мүдриклијинә ән бөјүк сүбут Онун Кәламы олан Мүгәддәс Китабда јерләшир. Бу китабда јазылмыш мүдрик нәсиһәтләр бизә дүзҝүн һәјат јолуну ҝөстәрир (Ишаја 48:17). Лакин Јеһованын мүгајисәедилмәз мүдриклији Мүгәддәс Китабын јазылма тәрзиндә дә өзүнү ҝөстәрир. Неҹә? Јеһова Өз мүдриклијинә әсасланараг Кәламынын јазылмасы үчүн инсанлары истифадә етмәји гәрара алмышдыр. Әҝәр Јеһова Мүгәддәс Китабын јазылмасы үчүн мәләкләри истифадә етсәјди, онун бу гәдәр садә олаҹағыны ҝөзләмәк олардымы? Әлбәттә ки, мәләкләр Јеһованы өз јүксәк нөгтеји-нәзәрләринә әсасән тәсвир едиб, Она олан сәдагәтләрини ифадә едә биләрдиләр. Бәс онда биз, билик вә баҹарыглары бизимкиндән олдугҹа јүксәк олан камил руһани варлыгларын дүшүнҹә тәрзини анлаја биләҹәкдикми? (Ибраниләрә 2:6, 7).

19. Һансы нүмунәдән ҝөрүнүр ки, Мүгәддәс Китабын јазылмасы үчүн инсанларын истифадә едилмәси сајәсиндә бу китаб сәмими һиссләрлә долудур вә анлајыш үчүн әлверишлидир?

¹⁹ Јеһованын Мүгәддәс Китабын јазылмасында инсанлары истифадә етмәси сајәсиндә, бу китаб сәмими һиссләрлә долудур вә анлајыш үчүн әлверишлидир. Ону јазан кәсләр дә бизимкинә бәнзәр һиссләрә малик идиләр. Гејри-камил олан бу инсанлар бизим гаршылашдығымыз сынаг вә чәтинликләрлә гаршылашырдылар. Бә’зән онлар өз һиссләрини вә нараһатчылыгларыны тәсвир едәркән, биринҹи шәхсин адындан јазырдылар (2 Коринфлиләрә 12:7-10). Онлар елә шејләри гәләмә алыблар ки, һеч бир мәләк буну ифадә едә билмәзди. Мисал үчүн, “Мәзмур” китабынын 51-ҹи фәслиндә јазылмыш Давудун сөзләрини ҝөтүрәк. Ҝириш сөзләринә әсасән, Давуд бу мәзмуру ҹидди ҝүнаһ ишләтдикдән сонра бәстәләмишди. Бурада Давуд баш верән һадисәјә ҝөрә чох тәәссүфләнәрәк үрәјини бошалдыр вә ҝүнаһындан кечмәси үчүн Аллаһа јалварыр. 2-ҹи вә 3-ҹү ајәләрдә дејилир: “Фәсадымдан мәни бүсбүтүн ју вә сучумдан мәни тәмизлә. Чүнки үсјанларымы билирәм вә сучум даима өнүмдәдир”. 5-ҹи ајәјә дә диггәт јетирәк: “Будур, мән фәсад ичиндә доғулдум вә анам ҝүнаһ ичиндә мәнә һамилә галды”. 17-ҹи ајәдә исә әлавә едилир: “Аллаһын гурбанлары гырылмыш руһдур; еј Аллаһ, гырылмыш вә әзилмиш үрәји хор ҝөрмәзсән”. Мәзмурчунун нә гәдәр әзаб чәкдијини һисс едирсәнми? Гејри-камил инсандан башга бу ҹүр һиссләри ким ифадә едә биләрди?

20, 21. а) Нәјә ҝөрә демәк олар ки, Мүгәддәс Китабы инсанлар јазмыш олса да, орада Јеһованын мүдриклији јерләшир? б) Нөвбәти мәгаләдә нә мүзакирә олунаҹагдыр?

²⁰ Јеһова Кәламынын јазылмасы үчүн гејри-камил инсанлары истифадә етмишдир. Буна ҝөрә дә биз мәһз бизә лазым олан, јә’ни “Аллаһдан илһам алмыш”, амма јенә дә инсанларын үрәјинә јахын јазыны алмышыг (2 Тимотејә 3:16). Бәли, бүтүн бу инсанлар мүгәддәс руһун рәһбәрлији алтында јазмышлар. Онлар өзләринин дејил, Јеһованын мүдриклијини јазмышлар. Бу мүдриклик там е’тибара лајигдир. Бу мүдриклик бизимкиндән о гәдәр јүксәкдир ки, Јеһова бизи мәһәббәтлә тәшвиг едир: “Бүтүн үрәјинлә Рәббә ҝүвән вә өз анлајышына архаланма; бүтүн јолларында ону таны, о да сәнин јолларыны доғрулдар” (Сүлејманын мәсәлләри 3:5, 6). Бу мәсләһәтә риајәт етмәклә, биз мүдрик Аллаһымыза јахынлашаҹағыг.

²¹ Јеһованын ән ҝөзәл вә ҹәлбедиҹи кејфијјәти мәһәббәтдир. Јеһованын әввәлләр вә инди мәһәббәти неҹә ҝөстәрдији нөвбәти мәгаләдә мүзакирә олунаҹагдыр.

Јадыныза сала биләрсинизми?

• Јеһова һансы аддымлары атмышдыр ки, биз Онунла јахын мүнасибәтләри инкишаф етдирә биләк?

• Һансы нүмунәләр Јеһованын јарадыҹы вә хиласедиҹи гүввәсини неҹә тәзаһүр етдирдијини ҝөстәрир?

• Јеһова әдаләтини неҹә тәзаһүр етдирир?

• Јеһованын мүдриклији јаратдыгларында вә Мүгәддәс Китабда өзүнү неҹә ҝөстәрир?

[23-ҹү сәһифәдәки шәкил]

Чобан гузуну синәсиндә дашыдығы кими, Јеһова да шәфгәтлә Өз хидмәтчиләринин гејдинә галыр.

[24-ҹү сәһифәдәки шәкил]

Јеһованын мүдриклији Мүгәддәс Китабын јазылыш тәрзиндән ҝөрүнүр.