Һамыда јахшы ҹәһәтләри ҝөрмәјә чалышын
“Еј Аллаһым, мәни јахшылыгла ан” (НЕҺЕМЈА 13:31).
1. Јеһова бүтүн инсанлара неҹә јахшылыг едир?
УЗУН мүддәт давам едән булудлу вә тутгун һавадан сонра, нәһајәт ки, ҝүнәш ҝөрүнүр. Инсанларын әһвал-руһијјәси јахшылашыр вә онлар өзләрини јахшы һисс едирләр. Узун мүддәт давам едән исти вә гураглыгдан сонра тәравәт ҝәтирән ҝүҹлү, һәтта лејсан јағыш јағанда да инсанлар бу ҹүр севинирләр. Һавадакы бу ҹүр дәјишикликләр, севән Јараданымыз Јеһова тәрәфиндән јарадылмыш јер үзүндәки ҝөзәл атмосфер сајәсиндә мүмкүндүр. Иса диггәти Аллаһын сәхавәтинә јөнәлдәрәк, өјрәдирди: “Дүшмәнләринизи севин, сизә лә’нәт охујанлара хејир-дуа верин, сизә нифрәт едәнләрә јахшылыг един, сизә әзијјәт вериб, тә’гиб едәнләр үчүн дуа един ки, сиз, ҝөјләрдә олан Атанызын оғуллары оласыныз; зира О, Өз ҝүнәшинә әмр едир ки, пис вә јахшы адамларын үзәринә доғсун; вә салеһ оланлар илә олмајанларын үзәринә јағышлар ҝөндәрир” (Матта 5:43-45). Бәли, Јеһова бүтүн инсанлара јахшылыг едир. Онун хидмәтчиләри инсанларда јахшы ҹәһәтләри ҝөрмәјә чалышараг, Ону тәглид етмәлидирләр.
2. а) Јеһова нәјә ҝөрә јахшылыг едир? б) Јеһованын јахшылығына олан мүнасибәтимизи О, неҹә мүәјјән едир?
2 Јеһова нәјә ҝөрә јахшылыг едир? Адәмин ҝүнаһа батдығы вахтдан е’тибарән Јеһова инсанларда даим јахшы ҹәһәтләри ҝөрмәјә чалышыр (Мәзмур 130:3, 4). Онун нијјәти ондан ибарәтдир ки, итаәткар инсанлар јенидән Ҹәннәтдә јашасынлар (Ефеслиләрә 1:9, 10). Онун лүтфү сајәсиндә вә’д олунмуш Зүрријјәтин васитәсилә ҝүнаһдан вә гејри-камилликдән азад олмаг үмидимиз вар (Тәквин 3:15; Ромалылара 5:12, 15). Фидијәни гәбул едәнләр нәһајәтдә камиллијә чата биләҹәкләр. Јеһова һал-һазырда һәр биримизә нәзарәт едир ки, һәр шејдән әлавә Онун сәхавәтинә неҹә һај вердијимизи мүәјјән етсин (1 Јәһја 3:16). Јеһова, Онун јахшылығына ҝөрә дујдуғумуз миннәтдарлыг һиссиндән етдијимиз һәр бир шеји нәзәрә алыр. Һәвари Павел јазырды: “Аллаһ һагсыз дејилдир ки, сизин ишинизи... Онун ады наминә ҝөстәрдијиниз мәһәббәти унутсун” (Ибраниләрә 6:10).
3. Һансы суал диггәтимизә лајигдир?
3 Инсанлардакы јахшы ҹәһәтләри ҝөрмәкдә Јеһованы неҹә тәглид едә биләрик? Ҝәлин бу суалларын ҹавабыны һәјатын дөрд саһәсиндә 1) мәсиһчи хидмәтиндә, 2) аиләдә, 3) јығынҹагда вә 4) инсанларла мүнасибәтимиздә нәзәрдән кечирәк.
Тәблиғдә вә шаҝирдләрин һазырланмасында
4. Нәјә ҝөрә демәк олар ки, мәсиһчи хидмәтиндә иштирак етмәклә инсанларда јахшы ҹәһәтләри ахтарырыг?
4 Иса шаҝирдләринин буғда вә дәлиҹә мәсәли һаггындакы суалына ҹаваб верәрәк, деди: “Тарла... дүнјадыр”. Мәсиһин мүасир хидмәтчиләри олан бизләр е’тираф едирик ки, бу һәгигәт бизим хидмәтимизә аиддир (Матта 13:36-38; 28:19, 20). Тәблиғ хидмәтини јеринә јетирәрәк, халг гаршысында иманымызы бәјан едирик. Јеһованын Шаһидләринин евдән-евә вә күчәләрдә апардыглары хидмәтләринә ҝөрә јахшы танынмалары сүбут едир ки, биз һәгигәтән дә Падшаһлыг һаггындакы хәбәрә лајиг олан инсанлары сә’јлә ахтарырыг. Иса өзү бу ҹүр тапшырыг вермишдир: “Һансы шәһәрә, ја кәндә ҝирсәниз орада ләјагәтли кимдирсә ахтарын” (Матта 10:11; Һәвариләрин ишләри 17:17; 20:20).
5, 6. Нәјә ҝөрә инсанларын јанына тәкрар-тәкрар ҝәлирик?
5 Ҝөзләмәдикләри һалда инсанларын јанына ҝәлмәклә, ҝәтирдијимиз хәбәрә онларын мүнасибәтини мүшаһидә едирик. Бә’зән елә олур ки, аиләнин бир үзвү бизи динләдији һалда, диҝәр үзвү отагдан гышгырыр ки, “бу бизи марагландырмыр”; бунунла да сөһбәт баша чатыр. Әфсуслар олсун ки, киминсә тәрәфиндән ҝөстәрилән мүгавимәт вә ја е’тинасызлыг башгасынын мүнасибәтинә тә’сир едир! Белә олан һалда инсанларда јахшы ҹәһәтләри ҝөрмәјә чалышырыгса нә етмәлијик?
6 Тәблиғ едәрәк јенидән һәмин евә вә ја мәнзилә ҝәлириксә, әввәлки дәфә сөһбәтимизи јарымчыг гојан адамын өзү илә сөһбәт етмәк имканы јарана биләр. Өтән дәфә баш верәнләри хатырлајараг, һазырлаша биләрик. Еһтимал ки, мүгавимәт ҝөстәрән инсан јахшы нијјәтләрлә давранмышдыр вә зәнн едир ки, башга инсанын Падшаһлыг һаггындакы хәбәрә гулаг асмасына јол вермәмәлидир. Ола биләр ки, онун бизим мәгсәдләримиз һаггындакы нөгтеји-нәзәри јанлыш мә’луматын тә’сири нәтиҹәсиндә формалашыб. Лакин бу вәзијјәт бизи, һәмин евдә вә ја мәнзилдә Падшаһлыг һаггындакы хош хәбәри инадла тәблиғ етмәји давам етдирәрәк, дүзҝүн олмајан тәсәввүрләрә нәзакәтлә дүзәлиш вермәк ҹәһдимизә мане олмамалыдыр. Биз бүтүн инсанлара Аллаһ һаггында дәгиг билик газанмагда көмәк етмәк марағындајыг. Еһтимал ки, бу заман Јеһова һәмин инсаны Өзүнә ҹәлб едәҹәкдир (Јәһја 6:44; 1 Тимотејә 2:4).
7. Хидмәтдә мүсбәт әһвал-руһијјә әлдә етмәкдә бизә нә көмәк едәр?
7 Иса шаҝирдләринә тә’лим верәркән, аилә тәрәфиндән ҝөстәриләҹәк мүгавимәт барәдә сусмурду. Мәҝәр о демәмишдими: “Мән оғулу атадан, гызы анадан вә ҝәлини гајнанадан ајырмаға ҝәлдим”? Иса әлавә етмишди: “Адамын дүшмәнләри өз евинин халгы олаҹагдыр” (Матта 10:35, 36). Лакин шәраитләр вә мүнасибәтләр дәјишир. Инсанын бизим тәблиғимизә олан мүнасибәти гәфил хәстәлик, јахын адамыны итирмәси, мүхтәлиф фәлакәтләр, емосионал бөһран вә бир чох башга амилләр уҹбатындан дәјишә биләр. Тәблиғ заманы инсанлара, онларын хош хәбәрә һеч заман һај вермәјәҹәјини дүшүнәрәк, мәнфи нәзәрләрлә бахырыгса, һәгигәтәнми онларда јахшы ҹәһәтләри ҝөрмәјә чалышырыг? Нәјә ҝөрә бир даһа онларын јанына хош әһвал-руһијјә илә ҝәлмәјәк? Еһтимал ки, онларда башга реаксија ҝөрәҹәјик. Јалныз нә дејәҹәјимиз јох, һәм дә неҹә дејәҹәјимиз ваҹибдир. Бә’зән инсанларын ҝәтирдијимиз хәбәрә мүнасибәтини мәһз бу дәјишир. Тәблиғдән әввәл етдијимиз һәрарәтли дуа, шүбһәсиз ки, бизә мүсбәт әһвал-руһијјә әлдә етмәјә вә Падшаһлыг һаггындакы хәбәри һамы үчүн ҹәлбедиҹи етмәјә көмәк едәр (Колослулара 4:6; 1 Салониклиләрә 5:17).
8. Мәсиһчиләр иманларына шәрик олмајан гоһумларында јахшы ҹәһәтләри ҝөрмәјә чалышмагла нәјә наил ола биләрләр?
8 Бә’зи јығынҹагларда Јеһоваја бир аиләнин чохлу үзвләри хидмәт едир. Чох вахт аиләнин јеткин үзвләринин сарсылмазлығы кичикләрин һејрәтинә вә һөрмәтинә сәбәб олмуш вә онларын аилә дахилиндә вә никаһдакы јахшы мүнасибәтләрини ҝөрәрәк, аиләнин кичик үзвләри нөгтеји-нәзәрләрини дәјишмишләр. Һәвари Петерин өјүдү исә, бир чох мәсиһчи гадынлара әрләрини “сөз сөјләнмәдән” фәтһ етмәјә көмәк етмишдир (1 Петер 3:1, 2).
Аиләдә
9, 10. Јагуб вә Јусиф өз аилә үзвләриндә јахшы ҹәһәтләри ҝөрмәјә неҹә чалышырдылар?
9 Аиләнин үзвләрини бағлајан сых телләр, инсанларда јахшы ҹәһәтләри ҝөрмәјә даһа бир имкан јарадыр. Јагубун вә оғулларынын нүмунәсини нәзәрдән кечирәк. “Тәквин” китабынын 37-ҹи фәслинин 2-ҹи вә 3-ҹү ајәләриндә дејилир ки, Јагуб Јусифи башгаларындан чох севирди. Гардашлары Јусифә о гәдәр һәсәд апардылар ки, ону өлдүрмәк гәрарына ҝәлдиләр. Лакин сонрадан Јагубла Јусифин өз аилә үзвләринә неҹә мүнасибәт бәсләмәләри мараглыдыр. Онларын һәр икиси аилә үзвләринин јахшы ҹәһәтләринә диггәт јетирдиләр.
10 Јусиф аҹлығын зәрбә вурдуғу Мисирдә әрзағын пајланмасына башчылыг едирди. Гардашлары ҝәләндә исә, Јусиф онлары гәбул етди. О, өзүнү гардашларына дәрһал танытмады, лакин елә етди ки, онлара јахшы гајғы ҝөстәрсинләр вә онлар јаша долмуш аталарына әрзаг апара билсинләр. Бәли, Јусиф вахты илә гардашларынын нифрәтинин гурбаны олса да, онларын хејринә давранырды (Тәквин 41:53–42:8; 45:23). Ејни тәрздә Јагуб да, өлүм јатағында оланда оғулларынын һамысы үчүн пејғәмбәрлик хејир-дуалары сөјләди. Пис әмәлләринә ҝөрә онлардан бә’зиләри мүәјјән үстүнлүкләрдән мәһрум олсалар да, һамысы торпаг мирасы алдылар (Тәквин 49:3-28). Јагуб өтүб-кечмәјән мәһәббәтин ҝөзәл нүмунәсидир!
11, 12. а) Аилә үзвләриндә јахшы ҹәһәтләри ҝөрмәјин ваҹиб олдуғуну һансы пејғәмбәрлик нүмунәси вурғулајыр? б) Исанын гејб олмуш оғул һаггындакы мәсәлиндә атанын нүмунәсиндән нә өјрәнирик?
11 Јеһованын сәдагәтсиз Исраил халгы илә давранышында ҝөстәрдији сәбри, Онун инсанларда јахшы ҹәһәтләри неҹә ахтардығыны даһа јахшы баша дүшмәкдә көмәк едир. Јеһова мәһәббәтинин нә гәдәр давамедиҹи олдуғуну, пејғәмбәр Һошеанын аилә шәраитинин нүмунәсиндә ҝөстәрди. Һошеанын арвады Гомер дәфәләрлә зина етмишди. Буна бахмајараг, Јеһова Һошеаја бујурур: “Исраил оғуллары башга илаһиләрә јөнәлдикләри вә үзүм көкәләрини севдикләри һалда Рәбб онлары неҹә севирсә, сән дә јенә ҝет, достунун севҝилиси вә зина едән гадыны сев” (Һошеа 3:1). Јеһова нәјә ҝөрә белә тапшырыг верди? Јеһова билирди ки, Онун јолларындан сапан халгын арасында, ҝөстәрдији сәбрә һај верән инсанлар олаҹаг. Һошеа бәјан етди: “Сонра Исраил оғуллары дөнүб өзләринин Аллаһы Рәбби вә падшаһлары Давуду арајаҹаглар вә сон ҝүнләрдә горхараг Рәббә вә онун јахшылығына дөнәҹәкләр” (Һошеа 3:5). Шүбһәсиз ки, бу, аиләдә чәтинликләр јаранан заман үзәриндә дүшүнмәјә лајиг олан нүмунәдир. Әҝәр бундан сонра да өз аилә үзвләриндә јахшы ҹәһәтләри ҝөрмәјә чалышсан, ән азы сәбр етмәјә даир ҝөзәл нүмунә вермиш олаҹагсан.
12 Исанын гејб олмуш оғул барәсиндәки мәсәли, аилә үзвләримиздә јахшы ҹәһәтләри неҹә ҝөрә биләҹәјимизи даһа дәриндән баша дүшмәјә көмәк едир. Кичик оғул әхлагсыз һәјат тәрзини тәрк едәрәк евә дөнүр. Атасы она мәрһәмәтлә јанашыр. Ата, аиләни һеч заман тәрк етмәјән бөјүк оғулун шикајәтинә неҹә реаксија ҝөстәрир? Она мүраҹиәт едәрәк дејир: “Оғлум! Сән һәмишә мәнимләсән вә мәним бүтүн әмлакым сәниндир”. Бу, тә’нә јох, садәҹә олараг ата мәһәббәтинә зәманәт иди. Ата давам едир: “Севинмәк вә шадланмаг лазымдыр ки, сәнин бу гардашын өлмүшдү — дирилди, гејб олмушду — тапылды”. Буна бәнзәр тәрздә биз дә башгаларында јахшы ҹәһәтләри ҝөрмәјә чалыша биләрик (Лука 15:11-32).
Мәсиһчи јығынҹағында
13, 14. Мәһәббәтин “падшаһлыг ганунуну” мәсиһчи јығынҹағында неҹә јеринә јетирә биләрик?
13 Биз мәсиһчиләр, “падшаһлыг ганунуна” (И–93) риајәт етмәјә чалышырыг (Јагуб 2:1-9). Әслиндә биз јығынҹағымызын, мадди имканлары бизимкиндән фәргләнән үзвләрини инкар етмирик. Бәс ирги, мәдәни фәргләр вә ја һәтта дини кечмишимиз әсасында ‘өз арамызда ајры-сечкилик’ едирикми? Әҝәр беләдирсә, биз Јагубун мәсләһәтини неҹә тәтбиг едә биләрик?
14 Мәсиһчи јығынҹағына ҝәләнләрин һамысыны саламламагла сәмимилијимизи ҝөстәрә биләрик. Падшаһлыг Залына јени ҝәлән кәсләрлә сөһбәт етмәк үчүн тәшәббүсү өз үзәримизә ҝөтүрәндә, онларын кечирдији нараһатчылыг вә утанҹаглыг һисси арадан галхыр. Һәгигәтән дә, мәсиһчи ҝөрүшүнә илк дәфә ҝәләнләрин бә’зиләри дејирләр: “Һамысы чох меһрибан иди. Санки һамы мәни артыг таныјырды. Өзүмү евдәки кими һисс едирдим”.
15. Јығынҹагда јашлы адамлара мараг ҝөстәрмәкдә ушаглара неҹә көмәк етмәк олар?
15 Елә ола биләр ки, бә’зи јығынҹагларда ҝөрүш гуртарандан сонра, ушаглар вә ја јенијетмәләр бөјүкләрдән ајрылараг ја Падшаһлыг Залынын өзүндә, ја да бајырда бир јерә топлашсынлар. Бу вәзијјәти хошлугла неҹә һәлл етмәк олар? Сөзсүз ки, биринҹи аддымы, евдә ушаглары ҝөрүшләрә һазырлајаркән, нәсиһәт вермәклә валидејнләр атмалыдырлар (Сүлејманын мәсәлләри 22:6). Ушаглара мүхтәлиф нәшрләри топламаг тапшырығы вермәк олар ки, һәр биринин ҝөрүш үчүн лазым олан ләвазиматлары олсун. Һәм дә, Падшаһлыг Залында јашлы вә ја хәстә кәсләрлә үнсијјәтдә олмаға ушагларыны јалныз валидејнләр тәшвиг едә биләр. Бу ҹүр адамларла әтрафлы сөһбәтләр етмәклә, ушаглар өзләри дә мәмнунлуг дуја биләрләр.
16, 17. Бөјүкләр јығынҹағын ҝәнҹ үзвләриндә јахшы ҹәһәтләри неҹә ҝөрә биләрләр?
16 Јашлы баҹы-гардашлар јығынҹагдакы ушаглара вә јенијетмәләрә мараг ҝөстәрмәлидирләр (Филипилиләрә 2:4). Онлар өзләри ушаглара јахынлашыб, онларла руһландырыҹы сөһбәт едә биләрләр. Адәтән ҝөрүш вахты ајдын ифадә олунмуш фикирләр сөјләнилир. Ушаглардан ҝөрүшүн хошларына ҝәлиб-ҝәлмәдији барәдә, хүсусилә јадларында сахладыглары вә тәтбиг едә биләҹәкләри фикирләр барәдә сорушмаг олар. Ушаглар вә јенијетмәләр јығынҹағын ајрылмаз һиссәсидирләр, буна ҝөрә дә ҝөрүш заманы онларын диггәтли олдугларыны вурғуламаг, вердикләри шәрһләрә вә үмумијјәтлә һәр һансы бир иштиракларына ҝөрә тә’рифләмәк лазымдыр. Јығынҹагда бөјүк адамларла давранышлары вә евдә јеринә јетирдикләри ади ишләр, онларын сонрадан һәјатда даһа ҹидди вәзифәләрин өһдәсиндән ҝәлә билиб-билмәјәҹәкләрини ҝөстәрәҹәк (Лука 16:10).
17 Үзәрләринә мәс’улијјәт ҝөтүрмәклә бә’зи јенијетмәләр руһән елә бөјүјүрләр ки, онлара артыг даһа ваҹиб тапшырыглар е’тибар етмәк олар. Мүәјјән ишлә мәшғул олмалары сајәсиндә еһтимал ки, мә’насыз ишләрә чох вахтлары галмајаҹаг (2 Тимотејә 2:22). Хидмәти көмәкчи олмаг истәјән гардашлары мүхтәлиф ишләрлә ‘имтаһан етмәк’ олар (1 Тимотејә 3:10). Онларын ҝөрүшләрдәки фәал иштиракы, хидмәтдәки сә’јләри, һәмчинин јығынҹағын бүтүн үзвләринә ҝөстәрдикләри гајғыкеш мүнасибәтләри, онларын нәјә гадир олдугларыны вә онлара әлавә тапшырыглар вермәјин мүмкүн олуб-олмадығыны ҝөрмәкдә ағсаггаллара имкан верир.
Һамыда јахшы ҹәһәтләри ҝөрмәк
18. Башгалары һаггында мүһакимә јүрүдәркән һансы тәһлүкәдән гачынмаг лазымдыр вә нәјә ҝөрә?
18 Сүлејманын мәсәлләри 24:23 (МКШ) ајәсиндә јазылыб: “Мәһкәмәдә тәрәфкешлик етмәк јахшы дејил”. Јухарыдан назил олан һикмәт тәләб едир ки, ағсаггаллар јығынҹағын ишләрини һәлл едәркән ајры-сечкиликдән гачынсынлар. Јагуб демишди: “Јухарыдан назил олан һикмәт әввәлән сафдыр, сонра да сүлһпәрвәр, мүлајим, итаәткар, мәрһәмәтли вә хејирли бәһрә илә долу, гәрәзсиз вә ријасыздыр” (Јагуб 3:17). Тамамилә ајдындыр ки, башгаларында јахшы ҹәһәтләр ҝөрмәјә чалышан ағсаггаллар јол вермәмәлидирләр ки, онларын рә’јинә шәхси мүнасибәтләр вә ја һиссләр тә’сир етсин. Мәзмурчу Асаф јазырды: “Аллаһын ҹәмијјәтиндә Аллаһ дурур; илаһиләр [вә ја инсанлардан олан һакимләри нәзәрдә тутан “илаһијә бәнзәјәнләр”] арасында һөкм едәр. Нә вахта гәдәр һагсыз һөкм верәҹәксиниз вә писләрә сајғы ҝөстәрәҹәксиниз?” (Мәзмур 82:1, 2). Мүвафиг олараг, мәсиһчи ағсаггаллары сөһбәт онларын достуна вә ја гоһумларына аид оланда белә, ајры-сечкилијә мејлдән гачынырлар. Беләликлә, онлар јығынҹагдакы бирлији горујур вә Јеһованын руһунун манеәсиз олараг тә’сир ҝөстәрмәсинә јол верирләр (1 Салониклиләрә 5:23).
19. Башгаларында јахшы ҹәһәтләри һансы үсулларла ҝөрә биләрик?
19 Баҹы вә гардашларымызда јахшы ҹәһәтләри ҝөрмәјә чалышмагла биз, Павелин Салоники шәһәриндәки јығынҹаға јазаркән әкс етдирдији әһвал-руһијјәни тәглид едә биләрик. О јазырды: “Биз дә Рәббә ҝүвәнәрәк, сиздән әминик ки, сизә вердијимиз ҝөстәришләрә әмәл едирсиниз вә едәҹәксиниз” (2 Салониклиләрә 3:4). Һәмиманлыларымызда јахшы ҹәһәтләри ҝөрмәјә чалышарыгса, онларын чатышмајан ҹәһәтләринә ҝөз јуммаг бизим үчүн асан олаҹагдыр. Гардашлары тә’рифләмәк үчүн имканлар ахтараҹаг вә әлбәт ки, тәнгиди руһдан гачынаҹағыг. Павел јазырды: “Тәсәррүфатчылардан исә тәләб олунур ки, һәр бири садиг олсун” (1 Коринфлиләрә 4:2). Јалныз јығынҹағын ишләрини идарә едәнләр дејил, бүтүн мәсиһчи баҹы-гардашларымыз да сәдагәт ҝөстәрирләр. Буна ҝөрә дә биз онлары чох севирик. Беләликлә, биз онларла јахынлашырыг, мәсиһчи достлуғунун телләри исә даһа мөһкәм олур. Павел һәмиманлыларыны неҹә гәбул едирдисә, биз дә баҹы-гардашларымызы о ҹүр гәбул едирик. Онлар ‘Аллаһын Падшаһлығы үчүн бизим әмәкдашларымыздыр’ вә бизә ‘тәсәлли верирләр’ (Колослулара 4:11, И–93). Бунда биз Јеһованын нөгтеји-нәзәрини әкс етдиририк.
20. Һамыда јахшы ҹәһәтләри ҝөрмәјә чалышан кәсләри һансы хејир-дуалар ҝөзләјир?
20 Шүбһәсиз ки, биз Неһемјанын дуасыны тәкрар едирик: “Еј Аллаһым, мәни јахшылыгла ан” (Неһемја 13:31). Јеһованын инсанларда јахшы ҹәһәтләри тапмаға чалышмасына биз неҹә дә шадыг! (1 Краллар 14:13). Ҝәлин, башгалары илә мүнасибәтләримиздә биз дә белә давранаг. Белә олан һалда, гуртулуша вә олдугҹа јахында олан јени дүнјада әбәди һәјата үмидимиз олаҹаг (Мәзмур 130:3-8).
Сиз неҹә ҹаваб верәрдиниз?
• Јеһова һансы әсасла һамыја јахшылыг едир?
• Ашағадакы һалларда инсанлардакы јахшы ҹәһәтләри неҹә ҝөрә биләрик:
• хидмәтимиздә?
• Аиләмиздә?
• Јығынҹағымызда?
• Һамы илә мүнасибәтимиздә?
[16-ҹы сәһифәдәки шәкил]
Јусифин гардашлары әввәлләр она һәсәд апарсалар да, о, гардашларында јахшы ҹәһәтләри ҝөрмәјә чалышырды.
[17-ҹи сәһифәдәки шәкил]
Мүгавимәтләрә бахмајараг, биз һамыја көмәк етмәјә чалышырыг.
[18-ҹи сәһифәдәки шәкил]
Кечмишләриндән асылы олмајараг, Јагубун бүтүн оғуллары хејир-дуа алдылар.
[19-ҹу сәһифәдәки шәкил]
Мәсиһчи ҝөрүшләриндә һамыны сәмимиликлә гаршылајын.