“Мәһз буна еһтијаҹым варды”
БУ ҜӨЗӘЛ һәдијјәјә — “Јеһоваја јахынлаш” адлы китаба (түрк.) ҝөрә сизә үрәкдән миннәтдарлығымы билдирирәм. Бу китаб мәнә Јеһованын мәни севдијини вә гијмәтләндирдијини һисс етдирди, мәһз буна еһтијаҹым варды. Инди өзүмү Јеһоваја вә Онун әзиз Оғлуна даһа јахын һисс едирәм. Һамыја бу китаб һаггында сөјләмәк вә ону бүтүн јахынларыма вермәк истәјирәм”. Бу сөзләри Јеһованын бир Шаһиди 2002–2003-ҹү илләрин “Падшаһлығын чалышган тәблиғчиләри” адлы вилајәт конгресләриндә е’лан едилән 320 сәһифәлик јени китаб һаггында демишдир. Ҝәлин, бу јени китабын бә’зи сәҹијјәви ҹәһәтләрини нәзәрдән кечирәк вә онун нәјә ҝөрә нәшр едилдијини мүзакирә едәк.
Јени китабын сәҹијјәви ҹәһәтләри
Китаба нә дахилдир? Бу журналда тәгдим едилән өјрәниләҹәк ики мәгаләнин бүтүн материалы, һәтта бундан да чох шејләр дахилдир! Китабда, һәр бири “Ҝөзәтчи Гүлләси”нин өјрәниләҹәк мәгаләсинә бәрабәр олан 31 фәсил јерләшир. Өн сөз вә башланғыҹдакы үч мәгаләдән сонра, китаб — һәр бири Јеһованын әсас хүсусијјәтләриндән биринә һәср олунан дөрд һиссәјә бөлүнүр. Һәр һиссәнин әввәлиндә бу хүсусијјәтләрдән биринә даир үмуми тәсвир верилир. Нөвбәти бир нечә фәсилдә Јеһованын бу хүсусијјәти неҹә тәзаһүр етдирдијинә диггәт јетирилир. Сонра Иса һаггында фәсил башланыр. Нә үчүн? Чүнки Иса демишдир: “Мәни ҝөрән, Атаны ҝөрмүш олур” (Јәһја 14:9). Јеһованын мүкәммәл әкси олан Иса, Аллаһын хүсусијјәтләрини өзүндә чох ҝөзәл сурәтдә ҹанландырмышдыр. Һәр һиссәнин сонунда, мүзакирә олунан хүсусијјәти һәјатымызда неҹә әкс етдирә биләҹәјимизи ҝөстәрән фәсил јерләшир. Јеһованын хүсусијјәтләри мүзакирә олунан бу јени китабда Мүгәддәс Јазыларын бүтүн китабларына истинад едилир.
“Јеһоваја јахынлаш” китабынын мараглы ҹәһәтләри дә вар. Икинҹи фәсилдән башлајараг, һәр фәсилдә “Дүшүнмәк үчүн суаллар” чәрчивәси јерләшир. Мүгәддәс Китаб ајәләри вә суаллар тәкрар кими верилмир. Онларын мәгсәди, сәни мүзакирә олунан материалын үзәриндә Мүгәддәс Китабын көмәји илә дәриндән дүшүнмәјә тәшвиг етмәкдир. Мәсләһәт олунур ки, Мүгәддәс Јазылардан ҝәтирилән һәр бир ајәни ачыб диггәтлә охујасан. Ҹавабыны әтрафлы дүшүнүб, ону өзүнә тәтбиг етмәјә чалыш. Бу ҹүр дүшүнмә сәнин үрәјинә тә’сир бағышлајаҹаг вә Јеһоваја даһа да јахынлашмагда сәнә көмәк едәҹәкдир (Мәзмур 19:14).
“Јеһоваја јахынлаш” китабына дахил олан шәкилләрин һәр бири бөјүк дәгигликлә сечилиб, онларын мәгсәди өјрәтмәк вә тәшвиг етмәкдир. Он једди фәсилдә бүтүн сәһифәни тутан вә Мүгәддәс Китабдан мүхтәлиф сәһнәләри тәсвир едән ҝөзәл шәкилләр јерләшдирилиб.
Китабын мәгсәди
“Јеһоваја јахынлаш” китабы нә мәгсәдлә нәшр едилиб? Бу јени нәшрин башлыҹа мәгсәди — Јеһова илә даһа сых мүнасибәтләри инкишаф етдирә билмәјимиз үчүн Ону даһа јахшы танымагда бизә көмәк етмәкдир.
Бу китабы охумаг даһа кимләр үчүн фајдалы ола биләр? Ола билсин, сән Мүгәддәс Китабы өјрәтдијин адамлар, јахуд хидмәтдә гејри-фәал олан мәсиһчи баҹы-гардашларын һаггында дүшүндүн. Бәс сән өзүн бу китабы охумаға башламысанмы? Әҝәр башламамысанса, онда нәјә ҝөрә буну мүмкүн гәдәр тез етмәк үчүн вахтыны планлашдырмајасан? Охудугларын үзәриндә дүшүнмәк үчүн дә вахт ајыр. Гој бу јени нәшр Јеһова Аллаһа даһа да јахынлашмагда вә Онун Падшаһлығы һаггындакы хош хәбәри севинҹ вә сә’јлә бәјан етмәкдә сәнә көмәк олсун!