Бә’зиләрини неҹә инсан кими хатырлајырлар?

ТӘХМИНӘН үч мин ил бундан әввәл Исраилин падшаһы Саулдан гачыб ҹаныны гуртармаг мәҹбуријјәтиндә галдығы заман, Давуд адамларыны гојун вә кечи саһиби олан Набал адлы варлы чобанын јанына ҝөндәрди ки, ондан јемәк вә су истәсин. Әслиндә Набал Давуда вә онун адамларына борҹлу иди, чүнки онлар онун сүрүләрини горујурдулар. Лакин Набал гонагпәрвәрлик ҝөстәрмәкдән имтина етди. О, һәтта Давудун адамларыны кобудлугла мәзәммәт дә етди. Набал одла ојнајырды, чүнки Давудла зарафат пис нәтиҹәләнә биләрди (1 Самуел 25:5, 8, 10, 11, 14).

Набал Јахын Шәргдә ҝениш јајылмыш адәтә — јолчулара вә әҹнәбиләрә гонагпәрвәрлик ҝөстәрмәк адәтинә зидд давранды. Набал өзүнә неҹә ад газанды? Мүгәддәс Китабда онун һаггында дејилир ки, о, “кобуд” вә “ишләриндә пис иди”. Онун адынын мә’насы “ахмаг” демәкдир вә ишләри дә, шүбһәсиз ки, адына мүвафиг иди (1 Самуел 25:3, 17, 25). Сиз дә өзүнүзә белә бир ад газанмаг истәрдинизми? Сиз башгалары илә, хүсусилә дә илк бахышдан әлверишсиз шәраитдә имиш кими ҝөрүнүрләрсә, онларла кобуд вә нәзакәтсиз рәфтар едирсинизми? Јохса сизә хејирхаһлыг, гонагпәрвәрлик вә нәзакәтли олмаг кими хүсусијјәтләр хасдыр?

Дәрракәли Абигаил

Набал кобудлуғуна ҝөрә өзүнү тәһлүкәјә атды. Давуд вә онунла олан 400 нәфәр гылынҹа гуршаныб Набалын дәрсини вермәјә ҝетдиләр. Баш верәнләр барәдә Набалын арвады Абигаил ешитди вә анлады ки, силаһлы тоггушмадан гачынмаг мүмкүн олмајаҹаг. О, бу вәзијјәтдән неҹә чыхыш јолу тапа биләрди? Абигаил кифајәт гәдәр јемәк тәдарүкү ҝөрүб, Давуд вә адамларыны дајандырмаға тәләсди. Онларла ҝөрүшдүкдә Давуда јалварды ки, наһаг ган төкмәсин. Давудун үрәји јумшалды, Абигаилин јалварышларыны динләди вә рәһми ҝәлди. Бундан бир мүддәт сонра Набал өлдү. Бу заман Абигаилин ләјагәтинә гијмәт верән Давуд онунла евләнди (1 Самуел 25:14-42).

Абигаил неҹә ад газанды? Мүгәддәс Китабда дејилир ки, бу “гадын чох анлајышлы” иди. Онун сағлам дүшүнҹәли вә баҹарыглы гадын олдуғуна шүбһә јохдур, о, неҹә вә нә заман һәрәкәт етмәк лазым ҝәлдијини билирди. Абигаил сәдагәт ҝөстәрди, әрини вә ев халгыны мәһв едилмәкдән гуртарды. О, өлүмүндән сонра өзү һаггында дәрракәли бир гадын кими ад гојмушдур (1 Самуел 25:3).

Петери неҹә инсан кими хатырлајырлар?

Инди исә ҝәлин хәјалән ерамызын биринҹи әсринә сәјаһәт едәк вә Исанын 12 һәварисинин неҹә инсан олдугларыны нәзәрдән кечирәк. Ән емосионал вә тез ҹошан, шүбһәсиз ки, Галилејадан олан Петер, јә’ни Кефа адлы балыгчы иди. Ҝөрүндүјү кими, о, енержили инсан иди вә өз һиссәләрини ифадә етмәкдән чәкинмирди. Бир дәфә Иса шаҝирдләринин ајағыны јумаға башлады. Нөвбә Петерә чатанда о нә етди?

Петер Исаја деди: “Ја Рәбб, ајагларымы Сәнми јујаҹагсан?”. Ҹавабында Иса деди: “Мәним етдијими сән инди билмәзсән, амма сонра баша дүшәҹәксән”. Петер ҹаваб верди: “Мәним ајагларымы әсла јумајаҹагсан”. Петерин ифадәли вә ејни заманда ҹошғун реаксијасына диггәт јетирин. Бәс Иса нә етди?

Иса ҹаваб вериб деди: “Әҝәр сәни јумасам, Мәним ишимдә пајын олмаз”. Бу заман Шимон Петер деди: “Ја Рәбб, јалныз ајагларымы јох, әлләрими вә башымы да ју!” Инди исә Петер башга бир ифрата гапылыр! Лакин тәәҹҹүбләнмәк лазым ҝәлмир, ахы бу Петерә хас ҹәһәтләр иди. Онда һеч бир јалан вә икиүзлүлүк јох иди (Јәһја 13:6-9).

Петери, һәмчинин ән ади зәифликләри олан бир инсан кими хатырлајырлар. Мисал үчүн, инсанлар Петери мәһкум олунан Назаретли Иса илә бирликдә олмагда ҝүнаһландыранда, о, Мәсиһи үч дәфә инкар етди. Петер өз сәһвини баша дүшәндә һөнкүр-һөнкүр ағлады. О, өз кәдәрини вә пешманчылыг һисси кечирдијини ҝөстәрмәјә утанмады. Диггәтәлајигдир ки, Петерлә баш верән бу һадисәни Инҹили јазан шәхсләр гејдә алмышлар. Јәгин ки, бу, Петерин өзү һаггында мә’лумат вермәси сајәсиндә мүмкүн олмушдур! Өз сәһвләрини бојнуна алмаг үчүн, о, кифајәт гәдәр тәвазөкар иди. Бу ҝөзәл кејфијјәт сиздә дә вармы? (Матта 26:69-75; Марк 14:66-72; Лука 22:54-62; Јәһја 18:15-18, 25-27).

Мәсиһи инкар етдикдән бир нечә һәфтә сонра, Петер мүгәддәс руһ васитәсилә һәрәкәтә ҝәләрәк Пентикост ҝүнүндә чохсајлы јәһудиләрә ҹәсарәтлә тәблиғ едирди. Бу, Исанын Петерә е’тибар етдијинә шүбһә јери гојмурду (Һәвариләрин ишләри 2:14-21).

Сонралар Петер башга бир тәләјә дүшдү. Һәвари Павел нәгл едир ки, јәһудиләрдән олан гардашлар Антакјаја ҝәлинҹәјә гәдәр Петер башга халглардан олан иманлыларла ачыг-ајдын үнсијјәт едирди. Инди исә о, Јерусәлимдән ҝәлән “сүннәт тәрәфдарларындан горхараг, чәкилиб гејри-јәһудиләрдән ајрылды”. Павел Петерин ријакарлығыны ифша етди (Галатијалылара 2:11-14).

Бунунла белә, Исанын давамчыларынын чоху ону тәрк етмәјә һазыр олдуглары һәмин ҝәрҝин анларда шаҝирдләрдән ким ҹәсарәтлә өз фикрини билдирди? Бу, Иса онун әтини јемәјин вә ганыны ичмәјин нә демәк олдуғу һагда јени ачыгламалар етдији заман баш верди. О деди: “Инсан Оғлунун әтини јејиб, ганыны ичмәдикҹә, дахилиниздә һәјат олмаз”. Мәсиһин јәһудиләрдән олан давамчыларынын әксәријјәти бүдрәдиләр: “Бу чәтин сөздүр. Ону ким динләјә биләр?” Сонра нә баш верди? “Бу замандан е’тибарән шаҝирдләрдән бир чоху Ондан ајрылыб, артыг Онунла ҝәзмирди” (Јәһја 6:50-66).

Иса бу ҝәрҝин анда 12 һәварисинә доғру дөнүб чох һәссаслыгла сорушду: “Јохса сиз дә ҝетмәк истәјирсиниз?” Бу заман Петер ҹаваб верди: “Ја Рәбб, биз кимин јанына ҝедә биләрик? Әбәди һәјатын сөзләри Сәндәдир. Биз дә иман етдик вә билирик ки, Јашајан Аллаһын Оғлу Мәсиһ Сәнсән” (Јәһја 6:67-69).

Петер өзүнә неҹә ад газанды? Онун һәјаты һаггында охујанда онун дүзҝүнлүјү вә сәмимилији, сәдагәти вә өз зәифликләрини е’тираф етмәјә һазыр олмасы адамы һејран едир. О, өзүнә неҹә дә јахшы ад газанмышдыр!

Мәсиһ инсанларын хатириндә неҹә галыб?

Исанын јер үзүндәки хидмәти ҹәми үч ил јарым давам етмишдир. Бунунла белә о, өз шаҝирдләринин јаддашына неҹә һәкк олунмушдур. Камил вә ҝүнаһсыз олдуғу үчүн о, сојуг вә адамајовушмаз идими? Аллаһын Оғлу олдуғуну билдији үчүн, өз вәзифәси илә ловғаланырдымы? Шаҝирдләрини горхутмаг вә мәҹбур еләмәк јолу илә өзүнә табе етдирмәјә чалышырдымы? Өзүнә гаршы о дәрәҹәдәми ҹидди иди ки, јумор һиссини белә итирмишди? Зәифләрә, хәстәләрә вә ушаглара вахты галмајаҹаг дәрәҹәдәми мәшғул иди? Башга халглардан олан инсанлара вә о дөврүн кишиләринә хас олдуғу кими, гадынлара е’тинасызлыг ҝөстәрирдими? Јазылы мәнбәләрдән Иса һагда нә өјрәнмәк олар?

Иса инсанлара мараг ҝөстәрирди. Онун хидмәтини өјрәнән заман ҝөрүрүк ки, о, дәфәләрлә шикәстләрә вә хәстәләрә шәфа верирди. О, еһтијаҹы оланлара көмәк етмәк үчүн әлиндән ҝәләни едирди. О, шаҝирдләринә: “Гојун ушаглар Мәним јаныма ҝәлсинләр! Онлара мане олмајын!” дејә ҝөстәришләр верәрәк ҝәнҹләрә мараг ҝөстәрирди. Бундан сонра Иса ушаглары “гуҹаглајыб, әлләрини үзәрләринә гојараг, хејир-дуа верди”. Сиз дә ушаглара вахт ајырырсынызмы, јохса онлара садәҹә олараг диггәт јетирмәк үчүн белә һәддиндән артыг мәшғулсунуз? (Марк 10:13-16; Матта 19:13-15).

Иса Мәсиһин ҝүнләриндә јәһудиләрин һәјаты Гануна әлавә олунмуш дини гајдаларла јүкләнмишди. Дини рәһбәрләр инсанларын үзәринә ағыр јүк гојурдулар, өзләри исә бу јүкләрә бармаглары илә дә тохунмурдулар (Матта 23:4; Лука 11:46). Иса онлардан неҹә дә фәргләнирди! О дејирди: “Еј бүтүн јорғунлар вә јүкләри ағыр оланлар, Мәним јаныма ҝәлин вә Мән сизә раһатлыг верәрәм” (Матта 11:28-30).

Инсанлар Иса илә үнсијјәтдән тәравәт алырдылар. О, шаҝирдләрини горхутмурду, буна ҝөрә дә онлар өз фикирләрини сөјләмәјә чәкинмирдиләр. Иса, һәтта онларын нә һагда дүшүндүкләрини билмәк үчүн, онлара суаллар да верирди (Марк 8:27-29). Јығынҹағын ағсаггаллары өзләриндән соруша биләрләр: “Мән дә һәмималыларыма белә тәәссүрат бағышлајыраммы? Диҝәр ағсаггаллар мәнимлә өз фикирләрини сәрбәст бөлүшүрләрми, јохса онлар буну етмәкдә чәтинлик чәкирләр?” Әҝәр ағсаггаллар садә, башгаларыны динләмәјә вә һәр кәсин шәраитинә ујғунлашмаға һазыр оларларса, онларла үнсијјәт доғрудан да тәравәтләндириҹи тә’сир бағышлајар! Дүшүнҹәсизлик сәмими вә сәрбәст үнсијјәтә јалныз мане олур.

Иса Аллаһын Оғлу олса да, өз ҝүҹүндән вә ја һакимијјәтиндән һеч вахт суи-истифадә етмирди. Әксинә, өз динләјиҹиләрини дүшүнмәјә тәшвиг етмәјә чалышырды. Фәрисејләр һијләҝәрликлә: “Гејсәрә верҝи вермәк ҹаиздирми, ҹаиз дејилми?” дејә суал верәрәк, ону сөз үстүндә тутмаг истәдикләри заман да, о, мәһз белә давранды. Иса сиккәни она ҝөстәрмәләрини хаһиш етди вә сорушду: “Сиккәнин үстүндәки бу сурәт вә јазы киминдир?” Онлар: “Гејсәрин” дејә ҹаваб вердиләр. О вахт Иса онлара деди: “Елә исә, гејсәринкини гејсәрә, Аллаһынкыны Аллаһа верин” (Матта 22:15-21). Ҝәтирилән садә дәлилләр кифајәт иди.

Исанын јумор һисси вардымы? Бә’зи охуҹулар Исанын: “Дәвәнин ијнә дешијиндән кечмәси, зәнҝин адамын Аллаһын Падшаһлығына ҝирмәсиндән даһа асандыр” дејә сөјләдији сөзләрдәки јумору, јәгин ки, һисс едирләр (Матта 19:23, 24, И-93). Балаҹа тикиш ијнәсинин дешијиндән кечмәјә чалышан дәвәни тәсәввүр етмәк белә чәтиндир. Инсанын гардашынын ҝөзүндәки түкү ҝөрүб, өз ҝөзүндәки тири исә ҝөрмәмәси һаггындакы мәсәл дә мүбалиғәјә әсасланыр (Лука 6:41, 42). Ҝөрүндүјү кими, Иса әслиндә ҹидди интизамын гаты тәрәфдары дејилди. О, сәмими вә хејирхаһ иди. Јумор һисси мүасир мәсиһчиләрә дә ҝәрәкдир, чүнки бу һисс чәтин анларда инсанын һәјатына бәзәк верир.

Исанын гадынларла хош рәфтары

Гадынлар өзләрини Исанын јанында неҹә һисс едирдиләр? Анасы Мәрјәми дә дахил етмәклә, онун садиг давамчылары арасында чохлу гадынлар да варды (Лука 8:1-3; 23:55, 56; 24:9, 10). Гадынлар өзләрини Исанын јанында елә сәрбәст һисс едирдиләр ки, һәтта бир дәфә ҝүнаһкар кими танынан бир гадын ҝөз јашлары илә онун ајагларыны јуду вә баһалы јағ илә јағлады (Лука 7:37, 38). Илләрлә ганахмадан әзијјәт чәкән башга бир гадын исә, издиһамы јарыб кечди ки, Исанын палтарына тохунсун вә шәфа тапсын. Иса иманына ҝөрә ону тә’рифләди (Матта 9:20-22). Ҝөрүнүр ки, Исаја мүраҹиәт етмәк гадынлар үчүн чәтин дејилди.

Бир дәфә Иса су гујусунун јанында самаријалы гадынла сөһбәтә башлады. Гадын елә тәәҹҹүбләнди ки, Исадан сорушду: “Сән јәһуди, мән исә самаријалы бир гадын, неҹә олур ки, мәндән су истәјирсән?” О вахт јәһудиләр самаријалыларла тәмасда олмурдулар. Бундан сонра Иса гадына “фышгыран, әбәди һәјата говушдуран” (И-93) су барәсиндә тәәҹҹүблү бир һәгигәти ачыглады. О, гадынларла сәрбәст үнсијјәт едир вә бунунла өз мөвгејинин алчалдығыны дүшүнмүрдү (Јәһја 4:7-15).

Исаны инсани кејфијјәтләринә ҝөрә, ејни заманда фәдакарлыг руһуна ҝөрә хатырлајырлар. О, Аллаһын мәһәббәтинин тәҹәссүмү иди. Иса, онун давамчысы олмаг истәјән һәр бир кәс үчүн нүмунәдир. Сиз онун нүмунәсини нә дәрәҹәдә дәгиг тәглид едирсиниз? (1 Коринфлиләрә 13:4-8; 1 Петер 2:21).

Мүасир мәсиһчиләр өзләриндән сонра неҹә из гојурлар?

Бу ҝүн минләрлә садиг мәсиһчиләр өлүрләр: чохлары аһыл јашларында, кимләр исә өмрүнүн чичәкләнән дөврүндә. Онлар өзләриндән сонра јахшы из гојурлар. Узун өмүр сүрән Кристал кими, бә’зи садиг мәсиһчиләри онларын сәмими гәлбли вә гајнајыб-гарышан олдугларына ҝөрә хатырлајырлар. Башгаларыны исә, мәсәлән, тәхминән 43 јашларында өлән Даркы — шән хасијјәтинә вә һәмишә көмәк етмәјә һазыр олдуғу үчүн хатырлајырлар.

Будур, Испанијадан олан Һосенин нүмунәси. 1960-ҹы илләрдә, Јеһованын Шаһидләринин тәблиғ иши гадаға гојулдуғу заман Һосе евли иди вә үч балаҹа гызыны тәрбијә едирди. Онун Барселонада сабит иши варды. О заман Испанијанын ҹәнубунда јеткин мәсиһчи ағсаггалларына тәләбат варды. Һосе ишини атыб, аиләси илә бирликдә Малагаја көчдү. Чох вахт иш олмадығындан онлар мадди ҹәһәтдән чәтин анлар јашамалы олурдулар.

Һосени, вәфалы һәјат јолдашы Кармела илә бирликдә нүмунәви гызлар бөјүдән садиг вә е’тибарлы хидмәтчи кими таныјырдылар. Һәмин әразидә мәсиһчи конгресләри тәшкил етмәк үчүн көмәк лазым ҝәлдикдә, Һосе һәмишә көмәјә һазыр иди. Тәәссүфләр олсун ки, 50-дән артыг јашы оланда ҹидди хәстәләнди вә өлдү. Лакин о, өзүндән сонра е’тибарлы, әмәксевәр ағсаггал, һәмчинин севән бир әр вә ата кими из гојмушдур.

Бәс сиздән сонра неҹә хатирә галаҹагдыр? Дүнән өлсәјдиниз, бу ҝүн сизин һаггынызда нә данышардылар? Јәгин ки, бу суал һамымызы неҹә јашамағымызын үзәриндә дүшүнмәјә вадар едәҹәкдир.

Јахшы ад газанмаг үчүн биз нә етмәлијик? Биз һәмишә руһун сәмәрәсинин, мәсәлән, мәһәббәт, сәбир, јахшылыг, һәлимлик вә өзүнә һаким олмаг кими хүсусијјәтләриндә тәкмилләшә биләрик (Галатијалылара 5:22, 23). Шүбһәсиз, “јахшы ад хош гохулу јағдан вә өлүм ҝүнү, бир адамын доғулдуғу ҝүндән јахшыдыр” (Ваиз 7:1; Матта 7:12).

[5-ҹи сәһифәдәки шәкил]

Абигаили дәрракәли олдуғу үчүн хатырлајырлар.