Билијинизә өзүнә һаким олмағы әлавә един
“Билијинизә нәфсә [“өзүнә”, ЈД] һаким олмағы... әлавә един” (2 ПЕТЕР 1:5-8).
1. Инсанларын проблемләринин чоху нәји баҹармамаларындан ирәли ҝәлир?
НАРКОТИК маддәләрин истифадәсинә гаршы апарылан бөјүк компанија заманы Бирләшмиш Штатлардакы ҝәнҹләр тәшвиг олунурдулар: “Садәҹә “јох” дејин”. Әҝәр һәр бир кәс һәгигәтән дә јалныз наркотикә дејил, һәм дә сәрхошлуға, дүшүнҹәсиз вә ја әхлагсыз һәјат тәрзинә, коммерсија саһәсиндәки виҹдансызлыға вә ‘ҹисмани тәбиәтин еһтирасларына’ “јох” десәјди, бу неҹә дә ҝөзәл оларды! (Ромалылара 13:14). Амма буну етмәјин һәмишә асан олдуғуну ким иддиа едә биләр ки?
2. а) Мүгәддәс Китабын һансы нүмунәләри инсанын өзү илә мүбаризә апармасынын јени бир шеј олмадығыны ҝөстәрир? б) Бу нүмунәләр бизи нәјә тәшвиг етмәлидир?
2 Гејри-камил инсанларын һамысы өзләринә һаким олмагда чәтинлик чәкдикләри үчүн, зәифликләримизлә мүбаризәдә галиб ҝәлмәјин үсулу һамымызы марагландырмалыдыр. Мүгәддәс Китабда гәдимдә јашајан вә сә’јлә Аллаһа хидмәт етмәјә чалышмаларына бахмајараг, бә’зән өзләрини идарә едә билмәјән инсанлар һаггында данышылыр. Давудун Бат-шеба илә зина ишләтмәсини хатырлајаг. Бу ҝүнаһ тәгсири олмајан ики адамын — зина сајәсиндә дүнјаја ҝәлән ушағын вә Бат-шебанын әринин өлүмүнә сәбәб олду (2 Самуел 11:1-27; 12:15-18). Вә ја, “истәдијим јахшы шеји етмирәм, лакин истәмәдијим пис иши ҝөрүрәм” дејә ачыг е’тираф едән һәвари Павели дүшүнәк (Ромалылара 7:19). Бә’зән сәндә дә буна бәнзәр үмидсизлик һисси јаранырмы? Павел давам едирди: “Аллаһын Ганунундан дахили варлығыма ҝөрә зөвг алырам. Лакин мән үзвләримдә башга бир ганун да ҝөрүрәм ки, о, ағлымын тәсвиб етдији ганун илә мүбаризә едир вә үзвләримдә олан ҝүнаһ ганунуна мәни әсир едир. Нә заваллы адамам! Өлүмә апаран бу бәдәндән мәни ким хилас едәҹәк?” (Ромалылара 7:22-24). Мүгәддәс Китабдакы нүмунәләр, өзүмүзлә мүбаризәдә һеч заман тәслим олмамаг гәтијјәтимизи мөһкәмләдәҹәк.
Өзүнә һаким олмағы өјрәнмәк лазымдыр
3. Өзүнә һаким олмаг кејфијјәтини инкишаф етдирмәјин нәјә ҝөрә асан олмајаҹағыны изаһ един.
3 Өзүнә һаким олмаг — өзүнү идарә етмәк габилијјәти — 2 Петер 1:5-7 ајәләриндә иманла, фәзиләтлә, биликлә, тәһәммүллә, Аллаһа ихласла, гардаш севҝиси вә мәһәббәтлә јанашы хатырланыр. Арзу олунан бу кејфијјәтләрин һеч бири инсана доғулдуғу вахтдан там дәрәҹәдә хас дејилдир. Онлары јетишдирмәк лазымдыр. Онларын нәзәрә чарпмасы үчүн гәтијјәт вә сә’ј ҝөстәрмәк тәләб олунур. Өзүнә һаким олмаг кејфијјәтини инкишаф етдирмәјин асан олаҹағыны ҝөзләмәлијикми?
4. Нәјә ҝөрә чохлары өзүнә һаким олмаг сарыдан проблемләринин олмадығыны дүшүнүрләр вә бу нәјә әламәтдир?
4 Доғрудур, милјонларла инсанлар өзләринә һаким олмаг сарыдан проблемләринин олмадығыны дүшүнә биләрләр. Онлар, биләрәкдән вә ја билмәјәрәкдән гејри-камил бәдәнләринин еһтирасларыны иҹра едәрәк арзу етдикләри кими јашајыр вә давранышларынын өзләринә, јахуд да башгаларына ҝөстәрдији тә’сир барәсиндә аз дүшүнүрләр (Јәһуда 10). Өзүнү идарә етмәк кејфијјәтинин чатышмазлығы вә ја буну арзуламамаг бу ҝүн әввәлләр олдуғундан даһа чох мүшаһидә олунур. Бу она әламәтдир ки, биз һәгигәтән дә Павелин һаггында јаздығы “ахыр ҝүнләрдә” јашајырыг. О габагҹадан дејирди: “Чәтин анлар ҝәләҹәкдир. Чүнки инсанлар худбин, пулпәрәст, ловға, тәкәббүрлү, күфр данышан... нәфсини сахламајан [“өзүнә һаким олмағы баҹармајан”, ЈД]” олаҹаглар (2 Тимотејә 3:1-3).
5. Јеһованын Шаһидләри өзүнә һаким олмаг мәсәләсинә нәјә ҝөрә диггәт ајырырлар вә һансы мәсләһәт бизим ҝүнләр үчүн дә мүнасибдир?
5 Јеһованын Шаһидләри өзүнә һаким олмағын мүәјјән чәтинликләрлә бағлы олдуғундан хәбәрдардырлар. Павел кими онлар да билирләр ки, дахилимиздә ики гүввә мүбаризә апарыр: бир тәрәфдән биз Аллаһа мәгбул олуб, Онун нормаларына әсасән јашамаг истәјирик, диҝәр тәрәфдән исә, гејри-камил бәдәнимиз бизи ҝүнаһлы јола итәләјир. Буну баша дүшәрәк Јеһованын Шаһидләри бу мүбаризәдә неҹә галиб ҝәләҹәкләринин үзәриндә артыг чохдан дүшүнүрләр. Һәлә 1916-ҹы илдә һазырда охудуғунуз журналда “өзүмүзү, дүшүнҹәләримизи, сөзләримизи вә давранышымызы неҹә идарә етмәк” барәсиндә данышылырды. Журналда һәм дә Филипилиләрә 4:8 ајәсини јадда сахламаг тәклиф олунурду. Бу ајәдә олан илһамланмыш мәсләһәт 2 000 ил әввәл верилсә дә, бизим ҝүнләрә дә мүвафиг ҝәлир вә бу мәсләһәтә бу ҝүн риајәт етмәк I әсрдә вә ја 1916-ҹы илдә олдуғундан даһа чәтиндир. Бунунла белә, мәсиһчиләр дүнјәви истәкләри рәдд етмәк үчүн бүтүн гүввәләри илә чалышыр, бунунла да Јараданларыны разы салдыгларыны анлајырлар.
6. Нәјә ҝөрә өзүнә һаким олмаг кејфијјәти үзәриндә ишләјәркән үмиди итирмәк лазым дејил?
6 Өзүнә һаким олмаг барәсиндә, Галатијалылара 5:22, 23 ајәләриндә мүгәддәс руһун сәмәрәсинин һиссәси кими данышылыр. Бу кејфијјәти “мәһәббәт, севинҹ, сүлһ, сәбир, лүтфкарлыг, јахшылыг, сәдагәт, һәлимлик”лә бир јердә тәзаһүр етдирсәк, јахшы сәмәрәләр әлдә едәҹәјик. Ахы белә оланда, Петерин изаһ етдији кими биз Аллаһа хидмәтимиздә “фәалијјәтсиз вә сәмәрәсиз” галмајаҹағыг (2 Петер 1:8). Лакин бу кејфијјәтләри өзүмүздә үрәјимиз истәдији кими тез вә јахшы сурәтдә јетишдирә билмириксә, үмидимизи үзмәли вә ја өзүмүзү иттиһам етмәли дејилик. Јәгин ки, мәктәбдә бир шаҝирдин мә’луматы диҝәриндән даһа тез гаврадығына диггәт јетирмисиниз. Ја да ки, иш јериндә ким исә јени тапшырығы башгаларындан тез мәнимсәјир. Ејни тәрздә дә бә’зиләри мәсиһчи кејфијјәтләрини диҝәрләриндән тез мәнимсәјирләр. Ән әсасы — Аллаһа мәгбул кејфијјәтләрин үзәриндә әлимиздән ҝәлдији гәдәр јахшы ишләмәк лазымдыр. Буну, Јеһованын Өз Кәламы вә јығынҹаг васитәсилә тәгдим етдији јардымдан бүтүнлүклә фајдаланараг едә биләрик. Мәгсәдә доғру сә’јлә һәрәкәт етмәјимиз, һансы сүр’әтлә ирәлиләмәјимиздән ваҹибдир.
7. Өзүнә һаким олмағын ваҹиб олдуғу нәдән ҝөрүнүр?
7 Руһун сәмәрәсинә дахил олан кејфијјәтләрин сијаһысында өзүнә һаким олмаг ахырынҹы јердә дурса да, о бириләриндән һеч дә аз әһәмијјәтли дејил. Тамамилә әксинә. Јаддан чыхармамалыјыг ки, әҝәр мүкәммәл сурәтдә өзүмүзә һаким олмағы баҹарсајдыг, “ҹисмани тәбиәтин әмәлләри”нин һамысындан гачына биләрдик. Лакин гејри-камил инсанлар “ҹисмани тәбиәтин әмәлләри [олан]... зина, ҹинси әхлагсызлыг, мурдарлыг, сәфаһәт, бүтпәрәстлик, сеһрбазлыг, дүшмәнчилик, мүнагишә, һәсәд, гәзәб, еһтираслылыг, нифаг, тәфригәләр” кими әмәлләрдән һәр һансына тәслим олмаға мејллидирләр (Галатијалылара 5:19, 20). Буна ҝөрә дә биз, үрәјимиздән вә әглимиздән ҝүнаһлы мејлләри гопарыб атмаға чалышараг, даима мүбаризә апармалыјыг.
Бә’зиләринә өзүнә һаким олмаг даһа чәтиндир
8. Нәјә ҝөрә өзүнә һаким олмаг бә’зиләри үчүн хүсусилә чәтиндир?
8 Мәсиһчиләрдән ким исә өзүнә һаким олмагда диҝәрләриндән даһа чох чәтинлик чәкир. Нәјә ҝөрә? Буна сәбәб валидејнләрин вердији тәрбијә вә ја әввәлки һәјат тәрзи ола биләр. Әҝәр өзүнә һаким олмаг габилијјәтини јетишдирмәк вә тәзаһүр етдирмәк бизим үчүн чәтин дејилсә, бу севинҹ үчүн сәбәбдир. Лакин биз әлбәттә ки, өзүнә һаким олмагда чәтинлик чәкән вә бу сәбәбдән бизә нараһатчылыг јарадан кәсләри дә унутмалы дејилик, онлара рәһмлә вә анлајышла јанашмалыјыг. Бизләрдән һамымыз гејри-камил олдуғу үчүн, кимин исә өзүндән разы олмаға һаггы вармы? (Ромалылара 3:23; Ефеслиләрә 4:2).
9. Бә’зи кәсләрин һансы зәифликләри вар вә онлардан нә заман бирдәфәлик јаха гуртармаг мүмкүн олаҹаг?
9 Нүмунәләрә бахаг. Ола биләр ки, биз, вахтилә түтүн вә ја наркотик маддәләрдән истифадә едән һәмиманлылардан киминсә бу шејләрә гаршы һәлә дә ҝүҹлү мејли олдуғуну билирик. Вә ја бә’зиләринә сөһбәт јемәкдән вә ја спиртли ичкиләрдән ҝедәндә өзләрини идарә етмәк чәтин ҝәлир. Башгаларына исә дилини јүјәнләмәк чәтиндир вә онлар тез-тез сөздә сәһвә јол верирләр. Бу чатышмамазлыгларын өһдәсиндән ҝәлмәк үчүн сә’јлә чалышыб өзүнә һаким олмаг кејфијјәтини инкишаф етдирмәк лазымдыр. Нәјә ҝөрә? Јагуб 3:2 ајәсиндә биз реал мүшаһидә илә гаршылашырыг: “Һамымыз чох сәһв едирик. Сөзүндә сәһв етмәјән, камил инсандыр. О бүтүн бәдәнини дә јүјәнләјә биләр”. Еләләри дә вар ки, гумар ојунларына ҝүҹлү һәвәс дујурлар. Кимә исә тез гәзәбләнмәјин өһдәсиндән ҝәлмәк чәтиндир. Еһтимал ки, бу кими вә буна бәнзәр башга зәифликләрин өһдәсиндән ҝәлмәк үчүн вахт тәләб олунаҹагдыр. Артыг индидән әһәмијјәтли ирәлиләјишләр етсәк дә, ҝүнаһлы мејлләрдән анҹаг камиллијә чатанда бирдәфәлик јаха гуртара биләҹәјик. Бу арада исә ҝүнаһлы јола гајытмамаг үчүн, биз өзүмүзә һаким олмағы баҹармалыјыг. Мүбаризә давам едир, буна ҝөрә дә тәслим олмамаг үчүн ҝәлин бири-биримизә көмәк едәк (Һәвариләрин ишләри 14:21, 22).
10. а) Әкс ҹинсләр арасындакы мүнасибәтләрдә өзләринә һаким олмаг бә’зиләри үчүн нәјә ҝөрә хүсусилә чәтиндир? б) Бир гардаш һансы ҹидди дәјишиклији етмишдир? (10-ҹу сәһифәдәки чәрчивәјә бахын.)
10 Бә’зиләринин өзүнә һаким олмагда чәтинлик чәкдикләри башга бир саһә исә,— әкс ҹинсләр арасындакы мүнасибәтләрдир. Инсанлара әкс ҹинсә гаршы ҹинси мејли Јеһова Аллаһ Өзү вермишдир. Лакин өз истәкләрини Аллаһын нормалары дахилиндә идарә етмәк бә’зиләри үчүн чох чәтиндир. Ҝүҹлү ҹинси мејлләри олдуғундан онларын вәзијјәти даһа да ҝәрҝинләшә биләр. Биз, инсанларда һәр васитә илә еһтирас аловуну ҝүҹләндирмәјә ҹан атан ҹинси әхлагсызлыға гәрг олмуш дүнјада јашајырыг. Бу, ән азы мүәјјән мүддәт үчүн субај галыб, Аллаһа аилә илә бағлы манеәләр олмадан хидмәт етмәк арзусунда олан мәсиһчиләр үчүн чәтинликләр јарада биләр (1 Коринфлиләрә 7:32, 33, 37, 38). Лакин Мүгәддәс Китабын вердији “евләнмәк ешг илә јанмагдан јахшыдыр” мәсләһәтинә мүвафиг олараг, онлар аилә гурмаг гәрарына ҝәлә биләрләр; бунда исә, әлбәт ки, гәбаһәт бир шеј јохдур. Ејни заманда онлар Мүгәддәс Јазыларын мәсләһәт етдији кими, “Рәббә бағлы” олан кәслә аилә гурмағы арзулајырлар (1 Коринфлиләрә 7:9, 39). Әмин ола биләрик ки, Јеһованын адил принсипләринә садиг галанлар, Ону севиндирир. Һәмиманлылары да шаддырлар ки, онларла јанашы Аллаһа бу ҹүр јүксәк әхлаглы вә тәмиз инсанлар хидмәт едир.
11. Аилә гурмаг истәјән, лакин мүвафиг һәјат јолдашы тапмајан кәсләрә неҹә дәстәк ола биләрик?
11 Әҝәр мүвафиг һәјат јолдашы тапмаг мүмкүн дејилсә, неҹә? Аилә гурмаг истәјән, лакин мүвафиг бирини тапа билмәјән инсанын неҹә чәтинлик чәкдијини тәсәввүр етмәк олар. О, јолдашларынын аилә гурдугларыны вә аилә һәјатындан һәзз алдыгларыны ҝөрүр, өзү исә һәлә дә мүвафиг һәјат јолдашы ахтарыр. Бу вәзијјәтдә бә’зиләри үчүн онанизмлә мәшғул олмаг кими натәмиз вәрдиш бөјүмәкдә олан проблемә чеврилә биләр. Һәр һалда мәсиһчиләрдән һеч ким диггәтсизлији уҹбатындан әхлаги тәмизлији горујуб сахламаг истәјән һәмиманлысыны кәдәрләндирмәк истәмәзди. Дүшүнмәдән “сән нә заман евләнәҹәксән (вә ја әрә ҝедәҹәксән)?” кими сөзләри демәклә биз истәмәдән гардашымызы вә ја баҹымызы руһдан сала биләрик. Биз буну пис фикирлә демәјә биләрик, лакин дилимизә нәзарәт едәрәк өзүмүзә һаким олмаг нә гәдәр дә јахшы оларды! (Мәзмур 39:1). Субај галараг әхлаги тәмизликләрини горујан баҹы вә гардашларымыз сәмими тә’рифәлајигдирләр. Онлары руһдан салаҹаг нә исә демәк әвәзинә, биз онлары руһландырмаға чалыша биләрдик. Мисал үчүн, јеткин мәсиһчиләрдән ибарәт кичик бир груп шам јемәјинә вә ја садәҹә олараг фајдалы мәсиһчи үнсијјәти үчүн бир јерә јығыланда субај кәсләри дә дә’вәт етмәк олар.
Никаһда өзүнә һаким олмаг
12. Нәјә ҝөрә һәтта никаһда оланлар да өзләринә һаким олмағы баҹармалыдырлар?
12 Аилә гурмаг, автоматик олараг ҹинси әлагә саһәсиндә өзүнә һаким олмаг кејфијјәтинин зәрурилијини арадан галдырмыр. Мисал үчүн, әрин вә арвадын ҹинси тәләбатлары олдугҹа фәргләнә биләр. Вә ја һәјат јолдашларындан биринин физики вәзијјәти уҹбатындан бә’зән нормал ҹинси әлагәләр чәтинләшәр вә ја гејри-мүмкүн ола биләр. Ҝүман ки, әввәлки һәјат тәрзинә ҝөрә әр вә ја арвада: “Әр өз арвадына лазымлы мәһәббәт бәсләсин; арвад да әри илә бу ҹүр даврансын” мәсләһәтинә риајәт етмәк чәтиндир. Белә һалда, диҝәр һәјат јолдашы даһа чох өзүнә һаким олмағы баҹармалыдыр. Лакин һәм әр, һәм дә арвад һәвари Павелин никаһда олан мәсиһчиләрә мәһәббәтлә вердији мәсләһәти јадда сахлаја биләрләр: “Бир-биринизи әр-арвадлыг һаггыныздан мәрһум етмәјин, јалныз бәлкә дә, разылыг илә, мүвәггәти олараг оруҹ тутмаг вә дуа етмәк үчүн. Бундан сонра јенә дә бирләшин ки, нәфсинизи сахлаја билмәдијинизә ҝөрә шејтан сизи имтаһан етмәсин” (1 Коринфлиләрә 7:3, 5).
13. Өзләринә һаким олмагда чәтинлик чәкән кәсләр үчүн нә едә биләрик?
13 Әҝәр әр вә арвад интим олан бу мәсәләдә өзләринә һаким олмағы өјрәнибләрсә, бу онлар үчүн неҹә дә бөјүк хејир-дуадыр! Ејни заманда, онлар бу мәсәләдә даһа чох дөзүмлү олмаға чалышан һәмиманлыларына да анлајышла јанашмалыдырлар. Руһани баҹы вә гардашларымыза мүдриклик, ҹәсарәт вә гәтијјәт вермәси үчүн Јеһоваја дуа етмәји һеч заман унутмајаг; бунун сајәсиндә онлар өзләринә һаким олмаг габилијјәтини инкишаф етдирмәк вә налајиг истәкләри боғмаг үчүн сә’јлә чалышмағы давам етдирә биләҹәкләр (Филипилиләрә 4:6, 7).
Бир-биринизә көмәк етмәјә давам един
14. Һәмиманлыларымыза нәјә ҝөрә мәрһәмәт вә анлајышла јанашмалыјыг?
14 Әҝәр мүәјјән саһәдә һеч бир зәифлијимиз олмајыбса, бу саһәдә өзүнә һаким олмаг үчүн вар ҝүҹү илә чалышан һәмиманлымызы баша дүшмәк бизим үчүн бә’зән чәтин ола биләр. Лакин инсанлар тәбиәтҹә фәргләнирләр. Ким исә аз, ким исә даһа чох емосионалдыр. Бә’зиләринә өзүнү әлә алмаг вә өзүнә һаким олмаг асан, диҝәрләринә исә чәтин баша ҝәлир. Лакин хатырламаг лазымдыр ки, өзү илә мүбаризә апаран адам пис адам дејил. Һәмиманлыларымыз бизим анлајыш вә мәрһәмәт ҝөстәрмәјимизә еһтијаҹ дујурлар. Сә’јлә мүбаризә апарараг өзүнү әлә алмаға чалышан кәсләрә мәрһәмәт ҝөстәрмәјә давам етмәјимиздән бизим шәхси хошбәхтлијимиз асылыдыр. Буну, Исанын Матта 5:7 ајәсиндә јазылан сөзләриндән ҝөрүрүк.
15. Өзүнә һаким олмаг кејфијјәти үзәриндә ишләјәнләри Мәзмур 130:3 ајәсиндәки сөзләр неҹә руһландыра биләр?
15 Бә’зән мәсиһчи кејфијјәти тәзаһүр етдирә билмәјән һәмиманлымыз һаггында һеч заман пис фикирдә олмамалыјыг. Биз мүвәффәгијјәтсизлијә уғрајанда, буну һәмиманлыларымыз ҝөрмәсәләр дә, Јеһованын јалныз бу мәғлубијјәтимизи дејил, һәм дә бир чох гәләбәләримизи ҝөрдүјүнү билмәк неҹә дә тәсәлливериҹидир. Мәзмур 130:3 ајәсиндәки сөзләр бөјүк тәсәлли ола биләр: “Әҝәр нөгсанлары һесаба алсан, еј Јеһова, ја Рәбб, ким дура биләр?”
16, 17. а) Галатијалылара 6:2, 5 ајәләрини өзүнә һаким олмаг кејфијјәтинә даир неҹә тәтбиг етмәк олар? б) Өзүнә һаким олмаг кејфијјәтинә даир даһа нәји нәзәрдән кечирәҹәјик?
16 Јеһованы разы салмаг үчүн бизләрдән һәр биримиз өзүнә һаким олмаг кејфијјәти үзәриндә ишләмәлидир, амма биз һәм дә мәсиһчи гардашларымызын көмәк едәҹәкләринә дә әмин ола биләрик. Бизләрдән һәр биримиз мәс’улијјәт јүкүнү өзү дашымалы олса да, зәифликләримизлә мүбаризә апармагда бири-биримизә көмәк етмәјә дә’вәт олунуруг (Галатијалылара 6:2, 5). Биз, ҝетмәјимиз лазым олмајан јерә ҝетмәји, бахмағымыз лазым олмајан шејә бахмағы вә етмәли олмадығымыз шеји бизә гадаған едән атаны, ананы, әри, арвады вә ја досту јүксәк гијмәтләндирмәлијик. Ахы онлар бизә өзүнә һаким олмаг — өзүнү идарә етмәк габилијјәтини тәзаһүр етдирмәкдә көмәк едирләр.
17 Еһтимал ки, бир чох мәсиһчиләр бизим индијә гәдәр өзүнә һаким олмаг кејфијјәти барәсиндә дедикләримизлә разылашаҹаглар, лакин, ола билсин, дүшүнүрләр ки, шәхсән онлар бу саһәдә нәјин исә үзәриндә ишләмәлидирләр. Онлар гејри-камил инсанлардан ҝөзләнилдијиндән даһа артыг өлчүдә өзүнә һаким олмаг кејфијјәтини тәзаһүр етдирмәк истәјәрдиләр. Сән дә бу ҹүр дүшүнүрсәнми? Аллаһын руһунун тәркиб һиссәси олан бу кејфијјәти инкишаф етдирмәк үчүн сән нә едә биләрсән? Бунун сајәсиндә зәрури мәсиһчи мәгсәдләринә сән неҹә наил ола биләрсән? Буну нөвбәти мәгаләдә нәзәрдән кечирәҹәјик.
Хатырлајырсынызмы?
• Мәсиһчиләр үчүн өзләринә һаким олмаг нәјә ҝөрә ваҹибдир?
• Бә’зиләринә өзләринә һаким олмаг нәјә ҝөрә чәтиндир?
• Никаһда өзүнә һаким олмаг кејфијјәти нәјә ҝөрә ваҹибдир?
• Бир-биримизә көмәк едәркән өзүнә һаким олмаг габилијјәтини инкишаф етдирмәк нәјә ҝөрә асан олур?
[10-ҹу сәһифәдәки чәрчивә/шәкил]
О, “јох” дејә билди
Алманијада јашајан Јеһованын Шаһиди телекоммуникасија ширкәтиндә ишләјирди. Онун ишинә тәхминән 30 телевизија вә радио програмларына нәзарәт етмәк дахил иди. Манеәләр јарананда, о лазым олан програмы нәзәрдән кечирмәли вә проблеми мүәјјән етмәли иди. О дејир: “Манеәләр, демәк олар ки, һәмишә мүнасиб олмајан вахтда — зоракылыг, ја да ки, секс ҝөстәрилән заман јаранырды. Бу әхлагсыз сәһнәләр ҝүнләрлә, бә’зән исә һәфтәләрлә башымдан чыхмырды: онлар санки бејнимә һәкк олурду”. О е’тираф едир ки, бу онун руһани вәзијјәтинә мәнфи тә’сир ҝөстәрирди: “Мән онсуз да асанлыгла өзүмдән чыхырам, зоракылыг сәһнәләри исә вәзијјәти даһа да ҝәрҝинләшдирди. Екранда секс сәһнәләри ҝөрмәјимин уҹбатындан исә, һәјат јолдашымла мүнасибәтләримиздә ҝәрҝинлик јаранды. Мән һәр ҝүн өзүмлә мүбаризә апармалы олурдум. Бу мүбаризәдә мәғлуб олмамаг үчүн, ашағы мәваҹибли олса да, јени иш јери тапмаг гәрарына ҝәлдим. Бу јахынларда буна наил олдум. Арзум јеринә јетди”.
[9-ҹу сәһифәдәки шәкилләр]
Мүгәддәс Китабы өјрәнмәк сајәсиндә әлдә едилән билик, өзүмүзә һаким олмаға көмәк едир.