Еј ҝәнҹләр, Јеһоваја лајиг шәкилдә һәрәкәт един

БӘ’ЗИ ҝәнҹ мәсиһчиләр мүвәггәти олараг аиләләриндән вә доғма јығынҹагларындан узагда јашамалы олурлар. Бә’зиләри хидмәтләрини ҝенишләндирмәк үчүн һараса башга јерә көчүрләр. Диҝәрләри бу дүнјанын ишләринә гаршы битәрәф мөвге тутдуглары үчүн евләрини тәрк етмәли олурлар (Ишаја 2:4; Јәһја 17:16). Бә’зи өлкәләрдә “гејсәр” Аллаһа садиглији горујан ҝәнҹләри һәбсә мәһкум едир вә ја онлара иҹтимаи иш кәсирa (Марк 12:17; Титуса 3:1, 2).

Битәрәфлији горудуглары үчүн һәбсхана мүддәтини чәкән ҝәнҹләр узун мүддәт ҹинајәткарларын арасында ола биләрләр. Башга сәбәбләр үзүндән евдән узагда јашајан ҝәнҹ оғлан вә гызлар да хошаҝәлмәз мүһитдә ишләмәјә вадар ола биләр. Бу ҝәнҹ мәсиһчиләр вә ја өз ирадәсинә зидд олараг бу кими вәзијјәтә дүшән башгалары “Аллаһа лајиг шәкилдә һәрәкәт” етмәјә чалышараг, чәтинликләрин вә сынагларын өһдәсиндән неҹә ҝәлә биләрләр? (1 Салониклиләрә 2:12). Валидејнләр мүмкүн олан хошаҝәлмәз вәзијјәтләрә һазырлашмагда өвладларына неҹә көмәк едә биләрләр? (Сүлејманын мәсәлләри 22:3).

Хүсуси чәтинликләр

3 ил 1 ај әрзиндә евдән узагда јашамаға мәҹбур олан 21 јашлы Такис дејир: “Мән валидејнләримин гајғыкеш һимајәсиндән, һәмчинин мәни јахшы таныјан ағсаггалларын мәһәббәтли нәзарәтиндән узаг дүшмүшдүм; чәтинлик вә горху ичиндә идим”b. О әлавә едир: “Һәрдән өзүмү сон дәрәҹәдә көмәксиз һисс едирдим”. 20 јашлы Петрос ики илдән артыг евдән узагда јашамалы олмушдур. О е’тираф едир: “Һәјатымда илк дәфә иди ки, әјләнҹә вә үнсијјәт даирәсинә аид гәрары өзүм гәбул етмәли идим вә мәним сечимим һәр заман мүдрик олмурду”. Сонра о дејир: “Мән даһа сәрбәст олдум, лакин бунунла белә үзәримә чохлу мәс’улијјәт дүшдү — бә’зән өзүмү чох пис һисс едирдим”. Бу кими вәзијјәтләрә дүшән ҝәнҹ мәсиһчиләрә мүнтәзәм баш чәкән мәсиһчи ағсаггалы Тасос гејд етмишдир: “Һәддиндән артыг садәлөвһ вә зәиф ҝәнҹләрин онларын иманларына шәрик олмајан јашыдларындан налајиг нитгә, үсјанкар руһа вә зоракылыға тутулмаг тәһлүкәси вар”.

Мүгәддәс Китаб принсипләрини сајмајан инсанларын әһатәсиндә јашајан вә ишләјән заман, диггәтли олмаг лазымдыр ки, биздә јашыдларымызын әхлагсыз вә Мүгәддәс Китаба зидд олан һәрәкәтләрини тәглид етмәк истәји ојанмасын (Мәзмур 1:1; 26:4; 119:9). Еһтимал ки, шәхси өјрәнмә илә мәшғул олмаг, ҝөрүшләрә ҝәлмәк вә тәблиғ хидмәтиндә иштирак етмәк кими ишләрдә әввәлҹәдән планлашдырылмыш графикә риајәт етмәк чәтин олаҹагдыр (Филипилиләрә 3:16). Һәмчинин руһани мәгсәдләр гојмаг вә онлара наил олмағын үзәриндә ишләмәк дә чәтин ола биләр.

Сөзсүз ки, ҝәнҹ садиг мәсиһчиләр давраныш вә данышыг тәрзләри илә Јеһованы разы салмаг истәјирләр. Онлар сәмави Аталарынын сәмими хаһишини сәдагәтлә јеринә јетирмәјә чалышырлар: “Оғлум, һикмәтли ол вә үрәјими севиндир ки, мәни писләјәнә ҹаваб верим” (Сүлејманын мәсәлләри 27:11). Онлар баша дүшүрләр ки, онларын һәрәкәтләри башгаларынын Јеһоваја вә Онун халгына неҹә јанашаҹагларына тә’сир едир (1 Петер 2:12).

Тә’рифәлајигдир ки, белә ҝәнҹ оғлан вә гызларын әксәријјәти һәвари Павелин: ‘Рәббә лајиг шәкилдә һәрәкәт едиб, Ону һәр ҹәһәтдән разы салын; һәр ҹүр хејирли ишдә сәмәрә верин... Там тәһәммүл вә севинҹлә сәбир ҝөстәрмәниз үчүн Онун иззәтли гүввәтинә ҝөрә һәр ҹүр гүдрәтлә мөһкәмләнин’ дејә һагларында дуа етдији I әсрдә јашамыш гардашлар кими олмаға вар ҝүҹләри илә чалышырлар (Колослулара 1:9-11). Мүгәддәс Китабда јад, әдавәтлә вә бүтпәрәстликлә долу бир мүһитдә Јеһоваја лајиг тәрздә һәрәкәт етмәји баҹаран, Аллаһын ҝәнҹ хидмәтчиләринин бир нечә нүмунәси вар (Филипилиләрә 2:15).

“Рәбб Јусифлә иди”

Јагуб вә Раһелин севимли оғлу Јусиф ҝәнҹ чағларында Аллаһ горхусуна малик олан атасынын һимајә етдији доғма евләриндән узаг дүшдү. О, гул кими Мисирә сатылмышды. Јусиф әмәксевәр, е’тибарлы вә јүксәк әхлаглы нөгсансыз бир ҝәнҹ иди. Јусифин Потифара — Аллаһын хидмәтчиси олмајан бир инсана гуллуг етмәсинә бахмајараг, о, тәмиз виҹданлы вә чалышган иди, буна ҝөрә дә онун ағасы ахырда бүтүн ев ишләрини она е’тибар еләди (Тәквин 39:2-6). Јусиф Јеһоваја садиглијини горујурду вә бу сәбәбдән зиндана атыланда о: “Бәс мән нәјә ҝөрә чалышырдым?” демәди. О, һәтта һәбсдә белә өзүнү нөгсансыз апарырды вә тезликлә зинданда бир чох вәзифәләри јеринә јетирмәјә башлады (Тәквин 39:17-22). Аллаһ она хејир-дуа верди вә Тәквин 39:23 ајәсиндә дејилдији кими “Рәбб Јусифлә иди”.

Јусиф Аллаһ горхусуна малик олан аиләсиндән узаг дүшән заман мисирлиләрин әхлагсыз һәјат тәрзинә ујғунлашараг, ону әһатә едән бүтпәрәстләр кими давранмаг мејлинә неҹә дә асанлыгла гапыла биләрди! Амма о, бунун әвәзинә, Аллаһын принсипләринә әмәл едир вә чох ағыр сынагларла гаршылашмасына бахмајараг, Јеһованын өнүндә нөгсансызлығыны горујурду. Потифарын арвады Јусифи ҝүндән-ҝүнә онунла јатмаға тәһрик етдикҹә о, гәтијјәтлә ҹаваб верирди: “Неҹә бу бөјүк пислији едим вә Аллаһа гаршы суч ишләдим?” (Тәквин 39:7-9).

Бу ҝүн Јеһованын ҝәнҹ Шаһидләринә налајиг үнсијјәтә, әхлагсыз әјләнҹәләрә, порнографијаја вә позуҹу мусигијә даир Мүгәддәс Китаба әсасланан хәбәрдарлыглара диггәт јетирмәк лазымдыр. Онлар дәрк едирләр ки, “Рәббин ҝөзү һәр јерә бахар, писләрә, јахшылара нәзәр салар” (Сүлејманын мәсәлләри 15:3).

Муса “ҝүнаһ илә зөвг алмагдан” үз дөндәрди

Муса Фир’онун сарајында бүтпәрәстлик вә һәр ҹүр зөвгү сәфа ичиндә бөјүмүшдү. Мүгәддәс Китабда дејилир: “Муса... Фир’онун гызынын оғлу адланмағы иман васитәсилә рәдд етди, Аллаһын халгы илә әзаб чәкмәји тәрҹиһ етди” (Ибраниләрә 11:24, 25).

Дүнја илә достлуг мүәјјән саһәләрдә сәрфәли олса да, бу достлуғун өмрү аздыр. Белә достлуг узағы бу дүнјанын мәһдуд өмрү гәдәр сүрәҹәкдир (1 Јәһја 2:15-17). Мусанын нүмунәсини изләмәк даһа јахшы дејилми? Мүгәддәс Китабда дејилир ки, “о, Ҝөрүнмәјәни ҝөрүрмүш кими, мөһкәм дајанды” (Ибраниләрә 11:27). Онун фикри Аллаһдан горхан әҹдадларынын руһани мирасына ҹәмләнмишди. Онун һәјатынын мә’насы Аллаһын ирадәсини јеринә јетирмәкдән ибарәт иди (Чыхыш 2:11; Һәвариләрин ишләри 7:23, 25).

Аллаһдан горхан ҝәнҹ оғлан вә гызлар иманларына шәрик олмајан инсанларын арасында пис мүһитә дүшдүкдә, Јеһова илә мүнасибәтләрини шәхси өјрәнмә васитәси илә “Ҝөрүнмәјәни” даһа јахшы танымагла мөһкәмләндирә биләрләр. Өзүнә мүнтәзәм олараг ҝөрүшләрә ҝетмәји вә тәблиғ хидмәтиндә иштирак етмәји дахил едән мәсиһчи фәалијјәти илә зәнҝин график онлара фикирләрини руһани шејләрә ҹәмләшдирмәјә көмәк едәҹәк (Мәзмур 63:6; 77:12). Онлар Мусада олан иман вә үмиди инкишаф етдирмәјә сә’ј ҝөстәрмәлидирләр. Фикирләрини вә ишләрини Јеһоваја доғру јөнәлтмәк вә Онун досту олмаг имканына севинмәк онлар үчүн фајдалы оларды.

О, додаглары илә Аллаһы мәдһ едирди

Аллаһын пејғәмбәри Елишанын ҝүнләриндә суријалылара әсир дүшән исраилли гызҹығаз да евдән узагда оларкән өзүнү нүмунәви апарырды. О, ҹүзама тутулмуш Сурија сәркәрдәси Нааманын арвадына гуллугчу олду. Гызҹығаз ханымына деди: “Каш ки, әфәндим Самиријәдәки [Самаријадакы] пејғәмбәрин өнүндә олајды! О заман ону ҹүзамындан азад едәрди”. Онун шаһидлик етмәси сајәсиндә Нааман Исраилә, Елишанын јанына јола дүшдү вә ҹүзамдан тәмизләнди. Үстәлик, Јеһоваја ибадәт етмәјә башлады (2 Краллар 5:1-3, 13-19).

Бу гызҹығазын нүмунәси ҝөстәрир ки, ҝәнҹләр, һәтта валидејнләриндән узаг дүшсәләр белә, онларын өз данышыг тәрзләри илә Аллаһа һөрмәт етмәләри олдугҹа ваҹибдир. Әҝәр һәмин гызҹығазын дили “бошбоғазлыг, јахуд кобуд зарафат”лар етмәјә өјрәнмиш олсајды, имкан јарандыгда, о, Аллаһы тәмиз виҹданла мәдһ едә биләрдими? (Ефеслиләрә 5:4; Сүлејманын мәсәлләри 15:2). 20-дән бир аз артыг јашы олан Никос адлы ҝәнҹ оғлан битәрәф мөвгејинә ҝөрә ҹәза чәкән мүддәтдә баш верәнләри хатырлајыр: “Биз диҝәр ҝәнҹ гардашларла ислаһедиҹи дүшәрҝәдә кәнд тәсәррүфаты ишләрини ҝөрәркән, валидејнләримизин вә јығынҹағын тә’сириндән узагда икән, һисс етдим ки, нитгимиз хејли кобудлашыб. Сөзсүз ки, нитгимиз Јеһоваја иззәт ҝәтирмирди”. Хошбәхтликдән, Никоса вә башгаларына Павелин нитгдән истифадә етмәјә даир вердији тә’лимә диггәт јетирмәкдә көмәк етдиләр: “Ҹинси әхлагсызлығын вә һәр ҹүр натәмизлијин, јахуд тамаһын гој аранызда ады белә чәкилмәсин, чүнки бунлар мүгәддәсләрә јарашмаз” (Ефеслиләрә 5:3).

Јеһова онлар үчүн реал иди

Гәдим Бабилдә Даниелин үч јәһуди јолдашыјла баш верән һадисә, Исанын дедији нөвбәти принсипи тәсдигләјир: аз шејдә садиглик чох шејдә дә садиглијә ҝәтириб чыхарыр (Лука 16:10). Онлара Мусанын ганунуна ҝөрә гадаған олунмуш гиданы верәндә, өзләринә бәраәт газандырараг дүшүнә биләрдиләр ки, јад өлкәдә әсир олдугларына ҝөрә башга чыхыш јоллары јохдур. Анҹаг онлар ҹүз’и ҝөрүнә биләҹәк бир шејә белә ҹидди јанашдылар. Онлар буна ҝөрә неҹә дә бөјүк хејир-дуа алдылар! Онлар падшаһ сүфрәсинин ләзиз јемәкләриндән јејән бүтүн башга әсирләрдән сағлам вә ағыллы идиләр. Аз шејдә садиглик онлары, сөзсүз ки, мөһкәмләндирди, буна ҝөрә дә бүтә сәҹдә етмәк кими даһа ҹидди сынагла гаршылашдыгда онлар өз иманларыны горуја билдиләр (Даниел 1:3-21; 3:1-30).

Јеһова бу үч ҝәнҹ оғланлар үчүн олдугҹа реал иди. Евләриндән вә Аллаһа ибадәт мәркәзиндән узаг дүшдүкләринә бахмајараг, онлар дүнјадан ләкәсиз галмаға там гәтијјәтли идиләр (2 Петер 3:14). Јеһова илә мүнасибәт онлар үчүн о гәдәр гијмәтли иди ки, онлар бунун наминә һәјатларыны белә гурбан вермәјә һазыр идиләр.

Јеһова сәни тәрк етмәјәҹәк

Тамамилә тәбиидир ки, ҝәнҹ оғлан вә гызлар севдикләри вә е’тибар етдикләри инсанлардан узаг дүшдүкдә гәрарсызлыг, һәјәҹан вә горху һиссләри кечирирләр. Лакин онлар чәтинликләри там әминликлә гаршылаја биләрләр, чүнки Јеһова онлары тәрк етмәјәҹәк (Мәзмур 94:14). Әҝәр онлар “салеһлик уғрунда әзијјәт чәк”мәли олсалар, Јеһова онлара “әдаләт јолларын”да мүтләг дәстәк олаҹаг (1 Петер 3:14; Сүлејманын мәсәлләри 8:20).

Јеһова Јусифи, Мусаны, исраилли гызҹығазы вә үч садиг јәһуди оғланлары даим мөһкәмләндирир вә бол-бол мүкафатландырырды. Бу ҝүн О, “иман уғрунда ҝедән мүбаризәдә јахшы чарпыш”анлары Өзүнүн мүгәддәс руһу, Кәламы вә тәшкилаты васитәсилә мөһкәмләндирир вә онлара “әбәди һәјат” мүкафаты вә’д едир (1 Тимотејә 6:11, 12). Бәли, Јеһоваја лајигли тәрздә һәрәкәт етмәк мүмкүндүр, бундан әлавә мүдрикликдир (Сүлејманын мәсәлләри 23:15, 19).

[Һашијәләр]

[31-ҹи сәһифәдәки чәрчивә]

ВАЛИДЕЈНЛӘР, ӨВЛАДЛАРЫНЫЗЫ ҺАЗЫРЛАЈЫН!

“Иҝидин әлиндә охлар нәдирсә, ҝәнҹ ушаглар да еләдир” (Мәзмур 127:4). Ох өз-өзүнә һәдәфә дүшмәјәҹәк. Ону мәһарәтлә тушламаг лазымдыр. Ејнилә ушаглар да валидејнләринин лазыми тәрбијәси олмадан мүстәгил һәјатын чәтинликләрини гаршыламаға һазыр олмајаҹаглар (Сүлејманын мәсәлләри 22:6).

Ҝәнҹләр гејри-иради һәрәкәтләрә мејлли вә “ҝәнҹлик еһтирасларын”а табедирләр (2 Тимотејә 2:22). Мүгәддәс Китаб хәбәрдарлыг едир: “Дәјәнәк вә мәзәммәт һикмәт верир; фәгәт өзбашына бурахылан ушаг анасыны утандырыр” (Сүлејманын мәсәлләри 29:15). Јенијетмәнин һәрәкәтләринә сәдд гојулмаса, о, мүстәгил һәјатын чәтинликләринә вә сынагларына һазыр олмајаҹаг.

Мәсиһчи валидејнләр өвладларына һәјатын реал чәтинликләри вә проблемләри һаггында ачыг данышмалыдырлар вә онлар буна мәс’улијјәтлә јанашмалыдырлар. Әҝәр оғуллары вә ја гызлары евдән ҝедәрләрсә, валидејнләр онларын гаршылаша биләҹәкләри хошаҝәлмәз вәзијјәтләри шиширтмәдән вә горхутмадан тәсвир едә биләрләр. Аллаһдан ҝәлән мүдрикликлә тамамланан белә тәрбијә “ҹаһилләрә узагҝөрәнлик, ҝәнҹ оғлана билик вә дәрракә вер”әҹәк (Сүлејманын мәсәлләри 1:4).

Валидејнләр ушагларына руһани дәјәрләри вә әхлаг принсипләрини ашыламагла онлары һәјати чәтинликләрин өһдәсиндән ҝәлмәјә һазырлајыр. Өвладларынын һәјатынын мүвәффәгијјәтли олмасы, Мүгәддәс Китабын мүнтәзәм аиләви өјрәнмәсиндән, ачыг сөһбәтдән вә ушагларын рифаһына сәмими мараг ҝөстәрмәкдән асылыдыр. Валидејнләр ушаглары Мүгәддәс Китаб принсипләринә әсасән мүстәгил һәјата һазырламагла, тәрбијә ишинә таразлы, мүсбәт вә мүдрикликлә јанашмалыдырлар. Валидејнләр өвладларына өз нүмунәләри илә өјрәдә биләрләр ки, дүнјада олуб, ејни заманда, дүнјадан олмамаг мүмкүндүр (Јәһја 17:15, 16).

[29-ҹу сәһифәдәки шәкил]

Бә’зи ҝәнҹ мәсиһчиләр валидејнләринин евини тәрк етмәли олурлар.

[30-ҹу сәһифәдәки шәкилләр]

Ҝәнҹ оғлан вә гызлар сынаглара мәғлуб олмадан Јусифи тәглид едә биләр вә әхлаги тәмизликләрини горујуб сахлаја биләрләр.

[31-ҹи сәһифәдәки шәкилләр]

Додаглары илә Јеһованы мәдһ едән әсир дүшмүш исраилли гызҹығаздан нүмунә ҝөтүрүн.