Аллаһа иман етмәк үчүн һәгиги тәмәл

КОРЕЈА дилиндә нәшр едилән “Ҝәнҹләрин килсәни тәрк етмәләринин 31 сәбәби” адлы китабда иддиа олунур ки, бир чохлары килсәни өз суалларына ганеедиҹи ҹаваб тапа билмәдикләри үчүн тәрк едирләр. Мисал үчүн, онлары бу кими суаллар нараһат едир: “Аллаһа иман едәнләр нә үчүн изтираб чәкирләр?” вә ја “Бир чох тә’лимләрин бу гәдәр долашыг вә бир-биринә зидд олдуғу һалда, биз килсәдә дејиләнләрин һамысына нәјә ҝөрә инанмалыјыг?” (“31 Reasons Why Young People Leave the Church”)

Кешишдән лазыми ҹаваб ала билмәдикдә, чохлары елә гәнаәтә ҝәлир ки, Мүгәддәс Китабда ҹаваб тапмаг мүмкүн дејил. Кешиш јалныз өз нөгтеји-нәзәринә әсасланараг изаһат верәндә, бу, анлашылмазлыға, һәтта Аллаһын вә Мүгәддәс Китабын инкар едилмәсинә сәбәб олур.

Ҹәнуби Африка Республикасындан олан вә лүтеран аиләсиндә тәрбијә алмыш Абел буну өз тәҹрүбәсиндә һисс етмишдир. О хатырлајыр: “Килсәдә өјрәдирләр ки, өләнләри Аллаһ “алыр”. Лакин мән баша дүшә билмирдим ки, севән бир Аллаһ валидејнләри ушагларын әлиндән неҹә “ала” биләр. Мәним бөјүдүјүм кәнддә биз тојуғу ҹүҹәләри бөјүмәмиш кәсмәздик. Боғазлыг инәји кәсмәздик, доғмасыны вә баласыны једириб бөјүтмәсини ҝөзләјәрдик. Мән анлаја билмирдим ки, нәјә ҝөрә мәһәббәт Аллаһы да инсанларын гајғысына бу ҹүр галмыр”.

Канададан олан Арамы да бу кими фикирләр нараһат едирди. О дејир: “Мән 13 јашында оланда атам өлдү. Дәфн мәрасими заманы һамынын һөрмәт етдији кешиш деди ки, атамын өлмәсини вә ҝөјләрдә Она јахын олмасыны Аллаһ истәмишдир. О деди: “Аллаһ јахшы инсанлары алыр, чүнки Аллаһ салеһләри севир”. Мән баша дүшә билмирдим ки, бу гәдәр егоистлик Аллаһда һарадандыр”.

Әввәл-ахыр Абел дә, Арам да Јеһованын Шаһидләри илә растлашдылар вә онларла Мүгәддәс Китаб өјрәнмәси башланылды. Нәһајәт ки, онлар өз суалларына ҹаваб тапдылар. Онларда Аллаһа гаршы мәһәббәт вә мөһкәм иман јаранды. Нәтиҹәдә онлар һәјатларыны Јеһоваја һәср етдиләр вә Онун садиг хидмәтчиси олдулар.

Дәгиг билик Аллаһа иман етмәјин ачарыдыр

Јухарыда тәсвир олунан һадисәләр бизә нә өјрәдир? Аллаһа иман етмәк үчүн Мүгәддәс Китабдан дәгиг билик әлдә етмәк олдугҹа ваҹибдир. Һәвари Павел Филипи шәһәриндәки мәсиһчиләрә демишдир: “Дуа едирәм ки, мәһәббәтиниз [“дәгиг”, ЈД] билик вә һәр ҹүр идрак бахымындан ҝетдикҹә даһа чох артсын” (Филипилиләрә 1:9). Павел, Аллаһа вә һәмиманлыларымыза олан мәһәббәти Аллаһ һаггындакы дәгиг биликлә вә Онун ирадәсини баша дүшмәклә әлагәләндирир.

Бу, мәнтигидир, чүнки биз јалныз таныдығымыз адама е’тибар едә биләрик, инсаны нә гәдәр јахшы таныјырыгса, онунла нә гәдәр јахыныгса, она бир о гәдәр дә чох е’тибар едирик. Буна бәнзәр тәрздә, Аллаһа иман етмәк үчүн сиз дәгиг билик әлдә етмәлисиниз. Һәвари Павел демишдир: “Иман исә үмид едилән шејләрә е’тимад, ҝөрүнмәјән һәгигәтләрә инамдыр” (Ибраниләрә 11:1). Әҝәр Аллаһа иман дәгиг Мүгәддәс Китаб биликләринә әсасланмырса, онда о, бир балаҹа күләк әсән кими учан ојунҹаг евә бәнзәјир.

Сиз Мүгәддәс Китабы өјрәнмәјин сајәсиндә бир чох суалларыныза, мәсәлән, узун мүддәт Абелә вә Арама раһатлыг вермәјән: “Инсанлар нә үчүн өлүр?” суалына ҹаваб тапа биләрсиниз. Мүгәддәс Китабда изаһ олунур: “Неҹә ки, ҝүнаһ тәк бир адам васитәсилә вә өлүм ҝүнаһ васитәсилә дүнјаја ҝирди, еләҹә дә өлүм бүтүн инсанлара кечди; чүнки һамы ҝүнаһ ишләтмишдир” (Ромалылара 5:12). Инсанларын гоҹалыб өлмәсинин сәбәби Аллаһын онлары Өз јанына апармасы јох, Адәмин ҝүнаһ ишләтмәсидир (Тәквин 2:16, 17; 3:6, 17-19). Бундан әлавә, биз Мүгәддәс Китабдан Јеһова Аллаһын тәгдим етдији һәгиги үмид барәсиндә өјрәнирик. О, Оғлу Иса Мәсиһ васитәсилә ҝүнаһлы инсанлара дирилмәјә үмид верир (Јәһја 5:28, 29; Һәвариләрин ишләри 24:15).

Бизим дирилмә һаггында һәгигәти лазымынҹа гијмәтләндирмәјимизә көмәк етмәк үчүн, Мүгәддәс Китабда Исанын бир нечә нәфәри һәјата гајтармасы һагда мә’лумат гејдә алыныб (Лука 7:11-17; 8:40-56; Јәһја 11:17-45). Мүгәддәс Китабда тәсвир олунан бу һадисәләри охујаркән, дирилән инсанларын дост вә гоһумларынын кечирдикләри ҹошғун севинҹ һиссләринә диггәт јетирин. Һәмчинин диггәт јетирин ки, бу һадисәләрин шаһидләри Исаја иман ҝәтирмиш вә Аллаһа һәмд етмәјә тәшвиг дујмушлар.

Аллаһ вә Онун нијјәтләри һаггында дәгиг билик, бу ҝүн јашајан инсанлара да ејни ҹүр тә’сир ҝөстәрә биләр. Чохларынын нә вахтса һеч кимин ганеедиҹи ҹаваб верә билмәдији ҹидди суаллары олмушдур. Белә вәзијјәт һәмин инсанларын чашгынлығына сәбәб олмуш, раһатлыгларыны позмуш вә һәтта иманларыны белә алт-үст етмишдир. Лакин онлар Мүгәддәс Китабы өјрәнәрәк өз суалларына ҹаваб тапмыш вә бунун сајәсиндә онларын һәјаты тамамилә дәјишмишдир.

Аллаһы севмәдән Она хидмәт етмәк гејри-мүмкүндүр

Аллаһа иман етмәк үчүн дәгиг билик ваҹибдир, лакин инсанда Аллаһа табе олмаг вә Она хидмәт етмәк истәји јарансын дејә садәҹә олараг билик әлдә етмәк аздыр. Аллаһын әмрләринин ән биринҹиси һансыдыр дејә сорушдугда, Иса ҹаваб верди: “Аллаһын олан Рәбби бүтүн үрәјинлә, бүтүн ҹанынла, бүтүн дүшүнҹәнлә вә бүтүн гүввәтинлә сев” (Марк 12:30). Бу ҹүр мәһәббәт Аллаһа табе олмаға вә Она хидмәт етмәјә һәр шејдән чох тәшвиг едир. Сиздә дә бу ҹүр мәһәббәт вармы?

Рејчел артыг бир нечә онилликдир ки, Корејада миссионер хидмәт едир. О, Аллаһа нә үчүн инандығынын сәбәбини белә изаһ едир: “Мән Јеһованын Өз јаратдыгларына гаршы сәхавәтли, Өз халгыны бағышламаға һазыр олмасынын вә биздән нә истәдијини ачыглајараг, бизә фајдалы оланы өјрәтмәсинин үзәриндә дүшүнүрәм. Бунун сајәсиндә Аллаһа олан мәһәббәтим артыр. Мәһәббәт исә мәндә Она хидмәт етмәк арзусу ојадыр”.

Алманијадан олан Марта адлы дул гадын Јеһоваја хидмәтә 48 ил һәср етмишдир. О дејир: “Јеһоваја нәјә ҝөрә хидмәт едирәм? Она ҝөрә ки, мән Ону севирәм. Мән һәр ахшам дуада Јеһова илә сөһбәт едир вә вердији бүтүн совгатлара, хүсусилә дә фидијә гурбанлығына ҝөрә сәмими гәлбдән миннәтдарлығымы билдирирәм”.

Ҝөрүндүјү кими, Аллаһа мәһәббәт биздә Она сәмими гәлбдән хидмәт етмәк арзусу ојадыр. Бәс бу ҹүр мәһәббәти неҹә инкишаф етдирмәк олар? Илк нөвбәдә, Аллаһын бизә ҝөстәрдији мәһәббәтә ҝөрә миннәтдарлығымызы артырмагла. Гәлбләри риггәтә ҝәтирән Мүгәддәс Китабдакы хатырлатмаја диггәт јетирин: “Севмәјән, Аллаһы танымамышдыр, чүнки Аллаһ мәһәббәтдир. Аллаһын мәһәббәти биздә белә зүһур етмишдир: Аллаһ Өз јеҝанә Оғлуну дүнјаја ҝөндәрди ки, биз Онун васитәсилә һәјат алаг. Мәһәббәт бундан ибарәтдир ки, биз Аллаһы севмәдик, О бизи севди вә Өз Оғлуну бизим ҝүнаһларымызын әфвини тә’мин едән гурбан кими ҝөндәрди” (1 Јәһја 4:8-10).

Сиз Онун мәһәббәтинин бүтүн гүдрәтини дәрк едирсинизми? Тәсәввүр един ки, ҝүҹлү ахында боғулурсунуз вә ким исә өз һәјатыны тәһлүкәјә атараг сизи хилас едир. Мәҝәр сиз о адамы унударсынызмы? Чох еһтимал ки, сиз она дәрин миннәтдарлығынызы билдирәҹәк вә онун үчүн әлиниздән ҝәләни етмәк истәјәҹәксиниз. Бизим уғрумузда Өз Оғлу Иса Мәсиһин һәјатыны гурбан верән Аллаһын мәһәббәти мүгајисәолунмаз дәрәҹәдә ҝүҹлүдүр (Јәһја 3:16; Ромалылара 8:38, 39). Аллаһын мәһәббәти сизин үрәјинизи риггәтә ҝәтирдији заман, сиздә Аллаһа гаршы мәһәббәт вә Она сәмими гәлбдән хидмәт етмәк истәји јаранаҹагдыр.

Индики вә ҝәләҹәк хејир-дуалар

Биз Аллаһын ирадәсини илк өнҹә Она олан мәһәббәтдән ирәли ҝәләрәк јеринә јетирсәк дә, Аллаһын Она хидмәт едәнләри мүкафатландырдығыны билмәк бизи севиндирир. Һәвари Павел бу фикри белә гејд етмишдир: “Иман етмәдән Аллаһа мәгбул олмаг исә гејри-мүмкүндүр. Чүнки Аллаһа јахынлашан иман етмәлидир ки, О вар вә Ону ахтаранлара мүкафат верир” (Ибраниләрә 11:6).

Аллаһы севән вә Она табе олан кәсләр, һәгигәтән дә хејир-дуаланмышлар. Бир чохлары Мүгәддәс Китабын принсипләринә риајәт етмәклә өз сәһһәтләрини јахшылашдырмышлар (Сүлејманын мәсәлләри 23:20, 21; 2 Коринфлиләрә 7:1). Мүгәддәс Китабын тәләб етдији кими дүзҝүн давранан вә сә’јлә чалышан кәсләр, адәтән иш саһибләринин е’тибарыны газаныр вә буна ҝөрә дә мадди ҹәһәтдән даһа тәһлүкәсиз вәзијјәтдәдирләр (Колослулара 3:23). Аллаһын хидмәтчиләри Јеһоваја ҝүвәнмәклә, һәтта чәтин вәзијјәтләрдә белә горујуб-сахладыглары үрәк раһатлығы тапырлар (Сүлејманын мәсәлләри 28:25; Филипилиләрә 4:6, 7). Ән башлыҹасы исә, онлар јахын ҝәләҹәкдә јер үзүндә гурулаҹаг Ҹәннәтдә әбәди һәјаты әминликлә ҝөзләјирләр (Мәзмур 37:11, 29).

Өз үзәрләриндә Јеһованын хејир-дуаларыны һисс едәнләр, Она гаршы һансы һиссләри кечирирләр? Канададан олан Жаклин адында мәсиһчи гадын Аллаһа миннәтдарлығыны билдирир: “Онун бүтүн совгатлары чох ҝөзәлдир вә О, бизә әбәди һәјата мөһкәм үмид верир”. Артыг јухарыда хатырлатдығымыз Абел өз һиссләрини белә тәсвир едир: “Әввәлләр мән јер үзүндә Ҹәннәтдә әбәди јашамағын мүмкүн олдуғу барәдә һеч ешитмәмишдим, инди исә һәмин дөврү сәбирсизликлә ҝөзләјирәм. Лакин Ҹәннәтдә јашамаг үмиди олмасајды да, мән јенә дә Аллаһа хидмәт едәрәк, Она олан мәһәббәтими ҝөстәрәрдим”.

Сиз дә мөһкәм имана саһиб ола биләрсиниз

Мүгәддәс Китабда Аллаһ һаггында дејилир ки, О, “әдаләтлә һөкм едән, үрәји вә көнлү сынајан”дыр (Јеремја 11:20). Бәли, Јеһова бизим үрәкләримизин дәринликләриндә олан ҝизлин шејләри сынајыр. Бизим һәр биримиз Аллаһа һансы сәбәбләрә ҝөрә инандығымызы ајырд етмәлијик. Аллаһ һаггында јалан тә’лим вә тәсәввүрләр, ола билсин, кечмишдә бизим сәһв һәрәкәтләр етмәјимизә сәбәб олмушдур. Лакин Мүгәддәс Китабдан алдығымыз дәгиг биликләр бизим Јараданла, Јеһова Аллаһла олан мүнасибәтимизи дүзәлтмәјә гадирдир (1 Тимотејә 2:3, 4).

Јеһованын Шаһидләри инсанларла пулсуз Мүгәддәс Китаб өјрәнмәси кечирмәклә, онларын Аллаһ һаггында дәгиг билик әлдә етмәләринә көмәк едирләр (Матта 28:20). Бу ҹүр имканлардан истифадә едәнләр, Аллаһа мәһәббәт вә иман инкишаф етдирмишләр. Мүгәддәс Китабы өјрәнмәјин сајәсиндә әлдә етдикләри ‘сағлам шүур вә дәрракә’ онлара бу ҹүр чәтин зәманәдә тәһлүкәсиз јашамаға көмәк едир (Сүлејманын мәсәлләри 3:21-23, МКШ). Ән ваҹиби исә, инди онларын ҝәләҹәјә “мөһкәм вә мәтн” үмидләри вар (Ибраниләрә 6:19). Сиз дә мөһкәм имана саһиб ола биләр вә хејир-дуалардан севинҹ әлдә едә биләрсиниз.

[4-ҹү сәһифәдәки чәрчивә]

Ҹаваб тәләб едән чәтин суаллар

“Мән тәләбәлик илләриндә хәстәханада тибби практика кечән заман, јахшы инсанларын ағрыдан неҹә инилдәдикләрини ҝөрүрдүм. Онлар хәстәликдән вә ја бәдбәхт һадисәләр үзүндән әзијјәт чәкирдиләр. Әҝәр Аллаһ варса, онда бүтүн бу шејләр нә үчүн баш верир? Мәҝәр динин верә биләҹәји јалныз үрәк раһатлығыдырмы?” (Корејадан олан кечмиш пресвитериан).

“Мән ички дүшкүнү олан атамын һара: ҹәһәннәмә, јохса ҝөјә ҝетдији барәдә чох дүшүнмүшәм. Өлүләр вә ҹәһәннәм оду барәдә дүшүнәндә дәһшәтә ҝәлирдим. Мән севән Аллаһын кимисә ҹәһәннәмә, әбәди әзаблара неҹә ҝөндәрә билдијини баша дүшмүрдүм” (Әввәлләр католик мәзһәбинә мәнсуб олан бразилијалы гадын).

“Јери вә инсанлары неҹә ҝәләҹәк ҝөзләјир? Инсанларын әбәди јашаја билмәләри неҹә мүмкүн ола биләр? Јер үзүндә һәгиги сүлһ неҹә бәрпа олунаҹаг?” (Алманијадан олан кечмиш католик).

“Реинкарнасија (ҹанын бир формадан башга бир формаја кечмәси) тә’лими мәнә гејри-мәнтиги ҝөрүнүрдү. Һејванлар Аллаһа хидмәт етмирләр, буна ҝөрә дә, ҝүнаһларына ҝөрә инсанын ҹаны һејванын бәдәнинә көчәрсә, о, өз сәһвләрини дүзәлдиб, даһа јүксәк пилләјә неҹә кечә биләр?” (Ҹәнуби Африка Республикасындан олан кечмиш индус).

“Мән конфутсичиләр аиләсиндә бөјүмүшәм вә әҹдадларымызы раһатламаг мәрасимләриндә иштирак етмишәм. Совгатлары столун үстүнә дүзмәјә көмәк едән вә нәзакәтлә баш әјән заман, мән өлән гоһумларымызын ҝәтирдијимиз совгатлары доғрудан да јејиб-јемәјәҹәкләри вә бизим онлара баш әјдијимизи ҝөрүб-ҝөрмәдикләри барәдә дүшүнүрдүм” (Корејадан олан кечмиш конфутсичи).

Бу инсанларын һамысы Јеһованын Шаһидләри илә бирликдә Мүгәддәс Китабы өјрәнмәклә, өз суалларына ҹаваб тапмышлар.